Ov, ‘Wilejin Kal Ujindj’ wa Kusanger Yom Ukweta?

1. Kusanger yom yikwetay muntu kurumburikin ik, ni kurumburikinap ik?

OV, UKWETING chaku cha kusanger yom ukweta? Muntu ukata kusal mwamu ukat kutan musangar ni chisambu mulong ukat kushinshikin pa yiyukish yikwetay. Kakatap kwiyakamish ap kwov ushon mulong wa yom yiburedinay. Pakwez, kwikal muntu ukata kusanger yom yikwetay chirumburikinap anch ukutwishap kwiyakamish ap pakemp. Chilakej, chiyipinap kukimb mitapu ya kusal yom yivud mu mudimu wa Nzamb. (Rom 12:1; 1 Tm. 3:1) Chikalap nchik mwamu, muntu ukimbina kusal mwamu kakutwishap kushadish musangar wend ap anch kamwinkishinap yisend pa chisu chaday chichingejidinay.

2. Mulong wak kulik kusanger yom yikwetay muntu kud kwa ubaaj?

² Kulik kusanger yom tukweta kukutwish kulet yibudikin yiyimp. Antu akad mwikadil winou akutwish kusutish chisu chivud mu kusal mudimu ukash mulong wa kwikal ni yom yakadau kamu kwau kuswiriken. Cha ushon, in Kristu amwing ashikedin kal kwiy nfalang ap yom yikwau yading yiswirikedinau. Pamwing ap asambisha kutong anch, ‘niyiswirikedin kamu,’ ‘nayikimbin kal nakash,’ ap anch ‘nikupan nfalang mu kusut kwa chisu.’ Chakin kamu, wij wa mitapu yin yawonsu umusangareshiningap Yehova. (Jnsw. 30:9) Antu akwau anenganana kal kushik ni mu chilik cha kulikap kumusadin Yehova mulong katambulap yisend yading yichingejinau mu chikumangen. (Gal. 6:9) Mutapu ik ukutwishay muntu wipanina kal kud Yehova kushiken ap kusu kwau kutong kusal yom mud yiney? Mulong ukutwish kwikal anch pamwing ap wading walikinap kal kusanger yom yikwetay.

3. Uyakin ik twilejina mu Filip 4:11, 12?

³ Etu awonsu tukutwish kukudish mwikadil wa kusanger yom tukweta. Kambuy Paul wafunda anch: “Nilejin kal kusanger yinikweta chikalap nchik mashakamin mam.” (Tang Filip 4:11, 12.) Wafunda yom yiney padingay mu rukan. Chikalap nchik mwamu, kashadishap musangar wend. Wading “[wilejin] kal ujindj” wa kusanger yikwetay. Anch chatukasiken kwikal ni musangar, mazu ma Paul ni yom yamushikena yitwinkin kashinsh anch ­tukutwish kusangar chikalap nchik mashakamin metu. Pakwez tufanyidinap kutong anch chiswapel kwau kusanger mashakamin tukweta. Tufanyidin kwilej kusal mwamu. Mutapu ik? El tushinshikinany mwikadil ukutwisha kutukwash kwilej ujindj wa kusanger yom tukweta.

IKAL MWIN KUJIKITISH

4. Kwikal in kujikitish kukutwish kutukwash nchik kwikal ni musangar? (1 Tesalonik 5:18)

⁴ Muntu ukata kujikitish chimuswapedining kwikal ni musangar. (Tang 1 Tesalonik 5:18.) Chilakej, anch tud chakin kamu in kujikitish mulong wa yom tukweta yida ya usey mu mwom, tukutwishap kwiyakamish nakash mulong wa yom tukatina pakwez tuyiburedin. Anch twamekesh kujikitish mulong wa yisend yetu tukweta tukusal usu wa kuyiwanyish pa ndond pa kusurab yisend yikwau. Chawiy chitushimwokishinap kuman anch Bibil utukasikeshin kumujikitish Yehova mu malembil! Kwikal in kujikitish kukutwish kutukwash kwikal “ni chisambu cha Nzamb chisutinamu yom ­yawonsu tukutwisha kutesh.”​—Flp. 4:6, 7.

5. Yom ik yafanyina kuyibachik in Isarel kumekesh kujikitish? (Tal kand chipich.)

⁵ Tushinshikinany yom yayishikena in Isarel. Yisu yivud asambisha kumwinanin Yehova mulong kayinkishangap yakuda yadingau nich mu Idjibit. (Kuch. 11:4-6) Chid chakin anch mwom wadingap uswapela mwi mpay. Yom ik yafanyina kuyikwash kusanger yom yading yikwetau? Afanyina kushinshikin pa yom yawonsu yayisadinau kud Yehova ni kumekesh kujikitish mulong wa yom yiney. Afanyina kuvurik anch padingau asuk ni payisadinangau kwa chisum mu Idjibit, Yehova waletisha yipupu dikum mwi ngand yiney. Kupwa kwa kuyilikaku, “ayibuwa in Idjibit” utad wa argent, or, ni masun. (Kub. 12:35, 36) Payishindakeshau ku chikum cha Karung Musunz, Yehova waurila mem mu chilay. Ni padingau mwi mpay, Yehova wayidishang dichuku dawonsu kusutin mana. Chad wisu wading mulong? Anch in Isarel aburena musangar, chidap mulong ading aburedin yakuda, pakwez mulong kadingap in kujikitish mulong wa yom yadingau nich.

6. Yom ik yikutwisha kutukwash kwikal in kujikitish?

⁶ Mutapu ik ukutwisha kumekesh kujikitish? Cha kusambish, itekina chisu dichuku dawonsu cha kutongijokin pa yom yiwamp ukweta mu mwom. Ukutwish kufund yom yaad ap yisatu ufanyidina kujikitishin. (Mad. 3:22, 23) Cha kaad, mekesh kujikitish. Yijikitisha antu akwau mulong wa yom yikusadidinau. Cha usey ­nakash, mujikitishang Yehova chisu ­chawonsu. (Kus. 75:2) Cha kasatu, tond arund akweting chaku cha kujikitish. Anch arunetu ad in kujikitish, niyetu tukutwish kwikal in kujikitish, pakwez anch kadap in kujikitish, niyetu tukutwish kwikal mwamu. (Kuv. 1:26-28; 2 Tm. 3:1, 2, 5) Anch twikal in kujikitish chisu chawonsu, tukutwish kwipuk kwiyakamish piur pa yikokujol ni yom twakad kwikal nich.

7. Yom ik yamukwasha Aci kwikal ni muchim wa kujikitish, ni yibudikin ik yikalaku?

⁷ Shinshikin yom yamushikena Aci, ushicha mwi ngand ya Endonezi. Ulondin anch: “Pa chisu cha chipupu cha KOVID-19 nasambisha kwilakej mashakamin mam ni mashakamin ma ambay nam in Kristu. Mud chibudikin, nashadisha musangar.” (Gal. 6:4) Yom ik yamukwasha kuswimp yitongijok yend? Aci ulondin anch: “Nasambisha kuchind yiyukish natambulang dichuku dawonsu ni kutongin pa yom natanidinamu kal kusutin kwikal mu dirijek da Nzamb. Kupwa namujikitisha Yehova mulong wa yom yiney yawonsu. Kusal mwamu kwankwasha kwikal ni musangar nakash.” Anch niyey ukwetap musangar mulong wa mashakamin mey, ukutwish kusal yom mud yasalay Aci mulong wa kwikal ni muchim wa kujikitish?

IKAL WIKEPISHINA

8. Yom ik yamushikena Baruk?

⁸ Chisu chimwing, Baruk, sekreter wa Yeremiy, kasangerap mashakamin mend. Baruk wading ni chisend chikash cha kumukwash ­Yeremiy kulejan uruu ukash ku muchid wading wakad kujikitishang. Mu chisu kanang, Baruk kashinshikinap pa yom ya usey. Pa ndond pa kushinshikin pa yom yading yikatinay Yehova anch asal, chimeken anch wasambisha kwitongin nakash amwinend ni kutongin pa yom yading yikatinay ndiy kusal. Kusutin Yeremiy, Yehova wamwela Baruk anch: “Ov, ey ukat kuchingej yom yiwamp ching kusu kudi ey amwiney? Kangal kusal mwamu, bwat.” (Jer. 45:3-5) Mu kulond kukwau, wading mud ukat ­kumulej anch: “Sanger mashakamin ukweta katat.” Baruk wamutesha Yehova ni ­wadandamena kwikal mu urund wa piswimp ni Ndiy.

9. Kukwatijan ni 1 Korint 4:6, 7, mutapu ik tufanyidina kuman yisend? (Tal kand yipich.)

⁹ Yisu yimwing, Kaman wa Yehova ukutwish kutong anch ufanyidin kwikal ni chisend kanang. Ukutwish kutong mwamu mulong pamwing ap ukwet ukaliweny uvud, ukat kusal mudimu nakash, ap wamusadidin kal Yehova mu mivu yivud. Pakwez chisend chikimbinay, akutwish pamwing ap kuyinkishach antu akwau. Yom ik yikutwisha kumukwash kulam musangar? Ukutwish kushinshikin yom yafunday kambuy Paul mu 1 Korint 4:6, 7.(Tang.) Ukaliweny tukweta ni yisend yawonsu tukata kutambul yidokil kud Yehova. Kakatap kutwinkishay mulong tud a pakampwil nakash kuyisutamu antu akwau. Pakwez chid kwau mulong wa ranaken rend rijim.​—Rom 12:3, 6; Ef. 2:8, 9.

10. Mutapu ik tukutwisha kwikal antu ikepishina?

¹⁰ Tukutwish kwikal ikepishina anch twatongin nakash pa chilakej chatushilay Yesu. Shinshikin yom yasadika uchuku payowishay Yesu in kwilej end ku mend. Kambuy Yohan wafunda anch: “Mulong Yesu wading wij [1] anch Tatuku wamwinkishin kal yom yawonsu mu makas mend ni [2] anch wadokala kud Nzamb ni [3] wading uyil kud Nzamb, . . . [wasambisha] kuyowish in kwilej end ku mend.” (Yoh. 13:3-5) Yesu wafanyina kutong anch in kwilej end awiy ading afanyidina kumwowish ku mend. Pakwez mu mwom wend wawonsu pa divu, Yesu wading kand kal atongangap anch uwanyidin kwikal ni mwom wa piur ni uwamp nakash. (Luk. 9:58) Yesu wading muntu wikepishina; wasangerang yom yading yikwetay. Watushila chilakej chiwamp nakash cha kulondul.​—Yoh. 13:15.

11. Kwikepish kwamukwasha nchik Dennis kwikal ni musangar?

¹¹ Dennis, uda mu Pays-Bas ukat kusal usu wa kwikal wikepishina mud Yesu, pakwez chimuswapedinap. Ulondin anch: “Yisu yimwing anch amwinkish muntu chisend nikatina, nikat kwov nayimp, mulong nikat kutong anch yam niwanyidina kutambul chisend chinech. Anch yom yiney yanshiken, nikat kwilej mitu ya milong yisambidina piur pa kwikepish. Mu Application JW Library^®, natekin kal pamwing mikand kanang yisambidina piur pa kwikepish mulong wa kuyitan swa swa ni kuyitangiril. Napwitin kal kand pa telefon wam madiskur mamwing misambidina piur pa kwikepish, ni nikat kumatesh yisu yivud.a Nilejin kal anch nifanyidin kusal yom yawonsu mulong wa kumutumbish Yehova, kadap mulong wa kwipwitin nkeu. Etu awonsu tukwetamu kachisend kanang mu yom yiwanyishinay Yehova amwinend.” Anch usangaredinap mashakamin mey, sal yom kanang mulong wa kwikal muntu wikepishina. Kusal mwamu kukukwash kukasikesh urund wey ni Yehova ni kwikal ni musangar.​—Yak. 4:6, 8.

TONGIJOKIN PA RUCHINGEJ REY

12. Yom ik tuchingedina mu machuku ma kurutu yitukwashina kwikal ni musangar? (Isay 65:21-25)

¹² Tukat kwikal ni musangar nakash anch twatongin pa yom yiwamp yatukaninay kal Yehova mulong wa machuku ma kurutu. Mukand wa Isay utwinkin kashinsh anch Yehova wij anch mwom tukweta nlel uwapinap, ni utukanin anch ukuuwapish mu machuku ma kurutu. (Tang Isay 65:21-25.) Tukez kushakam mu diking ni mu yikumbu yiwamp. Tukez kikal ni midimu yisangareshina, ni yakuda yiwamp yitungina mujimbu. Tukezap kand kwiyakamish piur pa ubaj ukutwisha kutushiken etu ayinetu ap anetu. (Isay 32:17, 18; Ezek. 34:25) Tukutwish kwikal ni kashinsh anch yom yawonsu yitukaninau mulong wa machuku ma kurutu yikuwanyin kamu chakin.

13. Yisu ik pakampwil tufanyidina kushinshikin pa ruchingej retu?

¹³ Katat, chawiy kamu chisu tukweta kuswir kwa kushinshikin pa ruchingej retu kusutamu pakur. Mulong wak? Mulong tushich “mu machuku ma nsuden” ni etu awonsu turishin ni yikokujol “yikash kurish nich.” (2 Tm. 3:1) Dichuku dawonsu Yehova ukat kutukwash kujijaman kusutin kutwinkish umutakel, usu, ni ukwash tuswirikedina. (Kus. 145:14) Chikwau kand, ruchingej retu ra win Kristu rikutwish kutukwash kujijaman piturishina ni yikokujol yikash. Pamwing ap ukat kusal mudimu nakash mulong kwau wa kuland yakuda, yakudjal, ni kufutin ndond ya dijuku kushakam. Ov, mwamu chirumburikin anch ukudandamen kwikal kazwendj? Bwat kamu! Yehova washidinamu kal kukwinkish yom uswirikedina​—ni yivud nakash​—mu Paradis. (Kus. 9:19; 72:12-14) Pamwing ap ukat kurish ni kusansan kwakad kupwang, kuziy mu manang, ap kand mayej makwau makash. Ov, mwamu chirumburikin anch ukudandamen kuyel chikupu pakad kwez kwiyov nawamp? Bwat kamu. Mwi ngand yisu ya Nzamb mukwikalap mayej ap rufu. (Kuj. 21:3, 4) Ruchingej riner rikat kutukwash kwikal ni musangar, kulik kwiyakamish nakash mulong wa yom yitushikedina katat. Tukutwish kwikal ni musangar ap anch atusadin yom mu mutapu wakad kutentam, twafish mukatish netu, turishin ni mayej, ap yikokujol yikwau kand. Mulong wak? Mulong chikalap nchik kujimb kwa chikokujol turishina nich katat, twij anch “mar mad ma chisu chikemp” ni anch piswimp ap tukumanap kand mar mwi ngand yisu.​—2 Ko. 4:17, 18.

14. Mutapu ik tukutwisha kukasikesh ruchingej retu?

¹⁴ Mulong ruchingej retu piur pa machuku ma kurutu rikat kutukwash kwikal ni musangar, mutapu ik tukutwisha kurikasikesh? Mud mutapu ukutwishay muntu kudjal makalash mulong wa kuman nawamp yom yida palemp, tufanyidin kusal yom kanang mulong wa kukasikesh ruchingej retu chakwel tutwish kuman nawamp Paradis uda kurutu kwetu. Anch twiyakamish nakash piur pa kuburen nfalang, tufanyidin kuman mutapu ukwikala mashakamin metu chisu chikupwa milong ya nfalang, mabaz, ni uzwendj. Anch tuziyin mulong katwinkinap chisend kanang, tufanyidin kutongin mutapu ukulika yom yiney kwikal ya usey chisu tukwikala awanyidina ni pitukumusadina Yehova mu tunan twa mivu. (1 Tm. 6:19) Yom yivud yikata kutwakamish katat yikutwish kutukangesh kushinshikin pa kushilamu piur pa machuku ma kurutu. Pakwez anch twikal ni chaku cha kutongijokin pa kushilamu kuwamp nakash kwa Yehova, chikutuswapel kulik kwiyakamish nakash mulong wa milong yetu.

15. Rusang ra Christa ritufundishin ik?

¹⁵ Shinshikin mutapu ruchingej ramukwasha Christa watinau kud Dennis twajimbulang kwiur oku. Ulondin anch: “Nikwet mayej makata kwinziyish ni kwinkangesh kwend, chawiy nikat kusadin nking ya ayilim mulong wa kushemunik ni yisu yivud niding kwam mu ulal. Mujimbu ukat kwinsansan dichuku din dawonsu. Dokter wam wanlejin anch kwikil kand ruchingej ra kuyerik. Pakwez kapamp kamwing natonga anch, ‘tumenap nend yom mu mutapu umwing piur pa machuku ma kurutu.’ Am nishinshikidin pa ruchingej ram rikata kwinletin chisambu cha mu manang. Nlel, nikat kurish ni yikokujol yivud mu mangand minam, pakwez nikwikal ni mwom uwamp mwi ngand yisu!”

“KWIKIL CHOM CHIKUBURENAU AKATA KUMULIMISH NDIY”

16. Mulong wak Mwant David walonda anch “kwikil chom chikuburenau” antu akata kumulimish Yehova ?

¹⁶ Ap anch tud atushalapol a Yehova akweta musangar, pakwez yikokujol yikuburenap. Tongin piur pa Mwant David pafishay anend asatu. Amudimbena, arunend alika kumushinshamen, mwant wakimba kumujip ni wamurishikisha mu mivu yivud. Pakwez, pading parishinay ni chikokujol chinech, walonda piur pa Yehova anch: “Kwikil chom chikuburenau akata kumulimish ndiy.” (Kus. 34:10, 11) Mulong wak walonda mwamu? Mulong wading wij anch ap anch Yehova kakangeshap yikokujol yiney kumushiken, pakwez ukudandamen kumwinkish yom yading yiswirikedinay. (Kus. 145:16) Mud David, niyetu tukutwish kwikal nich kashinsh anch Yehova ukutwish kutukwash kujijamen yikokujol yetu yawonsu. Tukutwish kwikal ni chisambu ni musangar chikalap nchik mashakamin metu.

17. Mulong wak ukwatina mupak wa kwilej ujindj wa kusanger yom ukweta?

¹⁷ Yehova ukatin anch wikal ni musangar. (Kus. 131:1, 2) Chawiy sal usu wa kwilej kusanger yom ukweta. Anch wikal mwin kujikitish, mwin kwikepish, ni wakasikesh ruchingej rey, ukutwish kulond anch: Mwaning “nilejin kal kusanger yinikweta.”​—Flp. 4:11.