Mukand Wa Chisak Chitakedila
TUKWET musangar mud ik wa kukufundilany! Tukujikitishinany mulong wa rukat ni spiritu wa kwipan udandamedinany kumekesh. Ukumanany mu mapaj ma Annuaire winou anch wasadilany yom yivud yiwamp mu muvu wa mudimu wasutina ou. Kapamp kakwau kand, twasutishin miliyar umwing ni kusut wa asaa mu mudimu wa kulejan ni kufundish, ni kuyikasikesh kapamp kamwing antu kushejin piswimp ni Yehova. Ov chidiap cha katumb kwikal mbay a mudimu pamwing ni Nzamb wetu utumbila ni Tatukwetu wa mwiur?—1 Kor. 3:9.
Chitutadila ku mudimu udia kurutu oku, tukwet ruchingej anch ukez kudandamenany kwimburij mushiku ni ritiy ra atushalapol a Nzamb, mud muchilejenau mu rusangu rifundinau mu Baibel. Chilikej, mupostol Paul, wadinga nich mushiku wa kwikal mwin kusong mabuj mud chitwishikina mu milong yadinga yambatena nich yisakin ya Want. Chimeken patok anch, chadinga pa chirung cha muvu wend wa nsudiel wa kushakam mu Efes pafunday mukand wend wa kusambish kud in Kristu a ku chikumangen cha Korint. Mulong wa yadingay ni kutong kusal pa chisu chinicha, ndiy wafunda anch: “Nichingejin kushakam kunoku ku musumb wa Efes djat ni pa dichuku dia musambu wa Pentekot. Mulong chisu chawanyin kal kudi am cha kusal mudimu ujim kunoku, ap anch kwikalap nchik akankuny avud.”—1 Kor. 16:8, 9.
Paul witenchika mulong wa kuya ku Masedon ni ku Korint. Pakwez, ndiy wajingunina ndond ya kusadil mudimu wa ukwash kusutil kushakam mu chisu kanang mu Efes. Paul wadinga uswapela kutesh; ndiy wamana mwikadil umwing uwamp mukutwishay kupan ukwash ku yisakin ya Want kwi ndond kwadingay ushich, chawiy lel watenchika kand program wend kwambatan nich. Chis chijim chitwadila ku kusal mudimu chanzurika kud ndiy, ni Paul wadinga nich mushiku wa kusadil nawamp chisu chinech mulong wa mudimu.
Kusal mwamu kwita midimu yivud—kulejan rusangu ruwamp ni kukasikesh chikumangen mu Efes. Kud amakurump a chikumangen cha mu musumb winou, Paul weza kuyilej anch: “Pinading ni kukurumburilany mazu ma Nzamb ni kukulejany pakach pa antu ap mu yikumbu yen, nakulejanya yom yawonsu yikutwisha kukukwashany, kinashakup chom, bwat. Nayibabesha in Yuda nau antu a michid yikwau wakad kasolikany, chakwel akarumuk kudiokal ku yitil yau, eza kudi Nzamb ni kumwitiyij Nsalejetu Yesu.”—Midimu 20:20, 21.
Chawiy chimwing kand, avud pakach pen akadivar ni anambaz akatish asadidil yisu yimekena kud en. Mu chirung cha muvu wa mudimu wasutina ou, kwading uvud wa antu piswimp 798938 atwishina kutenchik milong yau chakwel kusal mu mulad umwing ap ukwau wa mudimu wa uchibol. Amwing pakach pen ayil ku jindond jidia kulemp kusadil mud amishoner. Ukat kupalangeshany nich mushiku rusangu ruwamp ni kukasikesh yikumangen. Akwau pakach pen ilejin rudim rindjing chakwel kutwish kuyikwash antu akata kulond rudim ra wingendj ashicha nen pamwing. Akwau kand atenchika milong yau mulong wa kusadil mu teritwar wakad kupan ku chikumangen ap kusadil kwi ndond kudia kuswir kujim nakash. Amwing ashikedin kuman anch chis chijim chitwadila ku mujikit chanzurikin ku shikol, kwi ndond ya mudimu, ap mu mikadil yikwau mukutwishau kupan uman usongina mabuj, chilikej ku telefon. Midimu yisadikina mu mangand mawonsu yipanin uman anch antu a Nzamb, ansangarum ni amapal, akat kukimb nich mushiku ni kutan yisu ya kupan ronganyin ra uyakin kud antu ndond jin jawonsu jidiau.
Ikalany nich kashinsh anch Yehova umen ni usangaredin nakash usu wen. Baibel ulondil anch: “Nzamb utentamin, ndiy kakutwishap kuvuramen yisalijok yen ap rukat ruumekeshinanya mu dijin diend.” (Heb. 6:10) Dandamenany kudimukin yisu yikutwisha kukukwashany kuyish kurutu difukwil dishitwila. Amwing pakach pen akutwish kwikal tayad kujimbish nakash mudimu wau. Etu awonsu tukutwish kwikasikesh chakwel kwikadish mudimu wetu usongina mabuj.
Tukutwishap kuwanyish mudimu wetu wa kulejan pakad kutan rupompat. Vurikany anch kupwa kwa Paul kwisambin piur pa kwanzurik kwa chis chijim chitwadila ku mujikit, ndiy wafunda anch: ‘Kudi akankuny avud.’ Kud Paul, akankuny inay adinga in Yuda pamwing ni Akamichid, amwing adinga ni kumupompat kamu patok ni akwau akwatina mpung mu ujindj ya kumujip.—Midimu 19:24-28; 20:18, 19.
Turishin nich mwikadil wa chilik chimwing nlel unou. Mulong twashejin kal piswimp nakash nich disheshik dia ditenchik dined diyimp, tuchingejin kwiwejinaku kwa rupompat. Satan “ujimen nakash,” ni ujim winou ukat kuutadishin kamu nakash padiau antu akata kumusadil Nzamb. (Kuj. 12:12) Kangal wavuramenany anch Satan ndiy udia “mwin kutakel wa mangand minam.” Yesu wayela in kwilejend anch: “Anch en wadiany mu umwing nau in mangand, ing, awiy akukukatany en mudi anamakwau. Pakwez nakutondanya en kukudioshany mukach mwa in mangand, chawiy kiudianyap kand nau mu umwing. Wawiy mulong ukukisidilanyau.”—Yohan 14:30; 15:19.
Tukwatin mupak wakad kumushil muntu ap umwing ndond ya kuziyish ritiy retu ap kutuziyish mu mudimu wetu wa kulejan. Twij anch kukudandamen kwikal antu akata kutupompat ni kutupungan. Pakwez, tudandamedin kulejan rusangu ruwamp ra Want kwikalap nchik rupompat, nich ruchingej anch Yesu ukez kumupuchol Satan ni chisak cha antwend mu chisu chifanyidina chitenchikinay Yehova. Akankuny akanganya kumunenetish mupostol Paul; ni kakutwishap kuyinenetish atushalapol a Yehova nlel. Wikalap nchik ujim wa Satan ni rikis ra mangand, spiritu wa Yehova usadil nich usu ukash mukach mwa Antwend. Chidi cha musangar mud ik kwijik anch uvud wa in kulejan rusangu ruwamp washikedin chilik chisu cha piur nakash cha 6304645!
Tukat kulembil anch udandamenany kusadil yisu yimekena chakwel kutwal kurutu yisakin ya Want wa uyaj wa Yehova. Ikalany nich kashinsh ka rukat retu ra kubangin padiay muntu ni muntu chitusadila “chikij ku chijik” mu mudimu wa Nzamb Udia piur Nakash, Yehova.—Sof. 3:9, NW.
Akadivar nen,
Chisak Chitakedila Midimu ya Atuman’a Yehova