Twikalany ni Rusot Rujim ra Kulejan Rusangu Ruwamp
1 “Mulong nikat kunanikan kukumanany . . . Chawiy chipandikena kudi am kwirijek kulejan [rusangu ruwamp] kud en.” Winou wawiy mutapu usambishinay mupostol Paul mukand wend kud akadivar in Rome. Ov mulong wak Paul wasota nakash kuya ni kuyital? Walonda anch: “Chawiy nez nitambul mabuj mukach mwen . . . Mulong am kinikwovip usany wa [rusangu ruwamp] mulong ridi usu wa Nzamb ku dipandish dia muntu wawonsu.”—Rome 1:11-16.
2 Paul wamekesha rusot rujim ra chilik chimwing pisambay ni amakundj amakurump a mu Efes. Wayivurisha anch: “Kudiok pa dichuku dinasambisha kudjat mend mu Asia . . . , ni mudi munalika kwov wom . . . nading ni kukulejany patok ni ku yikumbu nend nashimun kud Ayuda ni kudi Agrek.” (Midimu 20:18-21) Mu teritwar wend mwawonsu wamwinkishau, Paul wading ni rutong ra kupalangesh rusangu ruwamp ra dipandish ni kuman mabuj ma Want. Chinech chidi chilikej chiwamp mud ik cha kulondul!
3 Twiyipulap bil anch: ‘Ov nikweting rusot rujim ra chilik chimwing, rusot ra kushimun rusangu ruwamp ndond nishicha? Pa ndond pa kuman mudimu wa kulejan mud kusu chisend, ov nisotining nakash kwisambin rusangu ruwamp ni antu avud mud chitwishikina? Ov nashinshikidin kal ngikadil yam mu malembil? Ov napakishin kal milad yawonsu yidia mu teritwar wetu, mud kulejan ku chis ni chis, mu mukombil, mu makarche mudia mijikit yivud, ku telefon, ni kulejan kwa kukashimun?’
4 Twikalany ni Rusot Rujim ra Kulejan mu Ndol: Ndol udi ngond umwing muwamp mulong wa kuwejin kwinungin kwetu mu mudimu wa kulejan. Kukepish kwa asaa ayitinau ayibol kufanyidin kuyitwishish antwarubil avud kusal mudimu wa chibol nkwash. Yawonsu yishindamedin mwikadil wey, pakwez chitwishikin anch usadil mud chibol nkwash mu Ndol ni Ndol-Mem. Ap ukutwish kusambish uchibol wa rawonsu mulong ni yawiy ayikepishidil kuvul kwa asaa ayitinau. Anch tudi antwarubil, ov tukutwishap kusutish chisu chivud nakash kupandikanamu chitusadilinga mu Ndol ni Ndol-Mem, mulong wa kuyikwatikesh ayibol? Chinech chikusangarish chakin muchim wa Yehova!
5 Mud Paul, antwarubil awonsu a Want afanyidin kudandamen kumekesh rusot rujim ra kusal yivud mu mudimu wa kulejan. Anch twasal yawonsu tukutwisha mu mudimu winou, tukwikal ni musangar wa kashinsh. Paul wading ni musangar mud winou mu mudimu wend utumbila. Tuwapidil komb kulondul chilikej chend chipandikena kuwap.—Rome 11:13; 1 Kor. 4:16.