Mukand wa Chisak Chitakedina
Akadivar ni Anambaz Akatish:
“Ranaken kudi en ni chisambu chidiokila kudi Nzamb Tatukwetu ni Mwant Yesu Kristu.” (1 Kor. 1:3) Tuchingedin nich musangar chisu chiyikeza yom yawonsu yikata kupim kupan uyaj umufanyidina Yehova! (Kus. 150:6) Pituchingedina dichuku dined dijim, tudandamedin kulejan rusangu ruwamp ra Want wa Nzamb ni kwikadish in kwilej.
Mudimu wa kulejan rusangu ruwamp udi wa kusambish pa midimu ya Yehova mu mangand. (Marko 13:10) Mulong twij kamu nawamp kusanger kwa Yehova mu mudimu winou, tukat kumulembil ndiy chakwel atukwasha kuwanyish mudimu winou, ni twij anch muntu mwin mwawonsu ukwet mutapu wa kutaninamu ku difut diapanau. (Kuj. 14:6, 7, 14, 15) Chidi chakin, tukat kurish nich yikokujol ya mwikadil, pakwez tukat kujikitish nakash ‘patudjikinau ukash udiokila mwiur’ mulong wa kuwanyish mudimu winou!—Luka 24:49.
Chidi cha musangar kutal mudimu wa muvu wa kwinyim ni kushinshikin yawanyishinay Yehova kusutil kud atushalapol end ashinshamena. Payinkishinau usu kusutil ku mwiku utumbila, antu a Nzamb amekeshin rukat ra Ukristu, awinin rukis ra mangand. Rukat riner rameken patok ku yikumangan yetu ya distrik. Kudiosh pa Kalol djat pa Kachirikin 2003, in kukumangan kudiokal ku jingand chitot ni kusut asadin maweny mulong wa kukumangan ku yikumangan ya michid 32 yasadikina mu makontina matan. Amishoner, in mudimu wa pa mangand mawonsu, ni yid ya Betel asadidila mwi ngand ja wingendj ayipula ku yikumangan ya distrik ni yikumangan ya michid.
Twatambwil ku yikumangan yiney, yichap “Voyez le bon Pays” ni Ilejina Kudiay Mulej Mujim. Chikwau kand, ijikishin anch buku musu wa Shikol ya Ayibol wachirikidinau kurijek akusambish kumwilej kwisudiel kwa muvu wa mudimu wa 2004. Pakemp-pakemp, ayibol asala kal mivu yivud ni asuta kal ku shikol ya ayibol akez kabwombakan mu kalas pamwing nau ayibol asu.
Ukwash wa Nzamb ni kupan kwa antu kwatwishishin rutung ra Yot ya Want, nakash kamu mu jingand ja uzwendj. Mulong wa maswir majim ma yakudia ya muspiritu mu mangand, kudi jintong ja kutek mitiy mu jingand jivud. Broshir Sangarin Kushakam Panap Pansh Chikupu! katat udiaku mu mazu 299, nich kuchapiu kwa uvud wa makopi mamaliyon 139; Ronganyin Ritwadila ku Mwom wa Chikupu wasutin makopi mamiliyon 93 mu mazu 161; ni broshir Nzamb Witin Etu Tusal Ik? makopi mamiliyon 200 ni kusut amuchapin mu mazu 267.
Tuyezishinaku kwa chirungul antu 258845 afanikeshina kwipan kwau kusutil dibatish dia mem mu muvu wa mudimu wasutila ou! Ap anch ukwash wen ku Want wa Nzamb wakwikadishinany pakampwil mu rukis ra Satan, wakwikadishinany kand in kutambul a pakampwil a yiyukish ya Yehova ni diking dia mu spiritu mud muubambedilany mu kubambel kudia kurutu kwen. (Heb. 12:1, 2; Kuj. 12:17) Chakin, ijikany anch ‘Ndiy ukulaminany kakuzelangap.’—Kus. 121:3.
Mufund wa muvu 2004, ‘Chawiy chishany . . . Ikalany irijekina kal,’ ufanyidin kamu. (Mat. 24:42, 44) In Kristu ayijimbwil mud angez mu ditenchik dined dia yom dia kujiy. (1 Pi. 2:11; 4:7) Pa chinech, tuswiridin kwimen pa yom ya mu spiritu, kupipesh mwom wetu, ni kusop nawamp michim yetu. “Nnak mujim” usotil kutudia, wend watubwalakeshin mu ditenchik diend dia yom.— Kuj. 12:9.
Kutang Bibil pichuku pichuku kudi kwa usey chakwel kulam kubabal kwetu. Kukutukwash chakwel ‘Inge wetu ikala ching Inge’ pantaliken nich kwipan kwetu ni ‘kulam ba ruchingej retu rutwading nich pa kusambish ni kushik kwisudiel.’ (Jak. 5:12; Heb. 3:14) Kutang Bibil pichuku pichuku kukutwish kutukwash kuvurik mutapu mapumbukina mangand kwi mbil ja Nzamb jakad kuswimpang. (Mal. 3:6; 2 Tim. 3:1, 13) Ronganyin ra Bibil rikutukwash kwipuk “jinsangu jamwamu jalondau in kudimwok” ni kushal ashishamena kudiay Yehova.— 2 Pi. 1:16; 3:11.
Anvaj, chiuyilidilany anen mwi nkand ni malejan ma Yehova, ov, ukat kuyikwashany kwitekin ntong ja muspiritu ni “kuchish”? (Ef. 6:4) Ov, ukat kuyifumbany kuman dikez (machuku mau ma kurutu) mud Yesu mwin manangu upandikena wikalaku chamanay dikez diend? Yesu wela kwikal nsongamabay upandikenamu, nkaliweny upandikenamu, ap mwingang mujim nakash wakad kal kwikalangakwap, pakwez ndiy wadandamena kusal mudimu wa chisu chawonsu. Likany chilakej cha Yesu chikubachikany kuyikwash anen kutek pa ndond ya kusambish yisakin ya Want mu mwom wau.
Chisak Chitakedina, chimekeshina Chisak cha kashalapol ushinshamena, chijikitishin nakash “chisak chipandiken kujimb” mulong chitukwashin kuwanyish chisend chetu cha ‘kulejan rusangu riner ruwamp ra want mu mangand mawonsu ni kwikal uman.’ (Kub.7:9; Mat. 24:14, 45) En akadivar akatish ijikany anch Yehova uvurikin “mudimu wen ni rukat riukata kumekeshany mu dijin diend, muukata kuyisadilany [atumbila, NW], ni katat uchidi kuyisadilany.” (Heb. 6:10) Piutangilany yamanau yisangareshina ni kuman yibudikin ya kubombikan kwa usu wen mu mapaj malondwila, ijikany anch wasadilany mudimu wa usey mu kulejan uman winou pa mangand mawonsu.
Komb kangal muntu ap chilembil akukangeshany kutambul difut, piuchingedilany dikez nich kujijaman ni kudandamen ‘kuchingel difut diukutambulany kurutu’. (Heb. 11:26; Kol. 2:18) Mwaning, muchingejinany Yehova, ni kwijik anch ndiy ukez kuyikwash awonsu amukatila atambul mwom wa chikupu.— Yoh. 6:48-54.
Ijikany anch tukwet musangar wa kusadil niyenen pamwing mulong wa ntumb ya uyaj wa Yehova.
Akadivar nen,
Chisak Chitakedina cha Atuman’a Yehova