Mukand Wa Chisak Chitakedina

CHITUDIA piswimp ni kushik kwa ditenchik disu dia yom, chidi cha kuswapej anch tudandamena kumuchingel Yehova. (Sof. 3:⁠8) Muprofet Daniel walonda anch ‘Nzamb . . . udi mwin Kujingunin ujindj, ni ndiy walejana. . . yom yikweza mu machuku ma kwisudiel.’ (Dan. 2:28) Didi dilau twitapidila chakin mud ik dia kushakam piswimp ni nsudiel ya chirung chatakelau kwisambin ni kutesh ujindj wa Nzamb utwijikishinay Yehova nlel!

Kusutil kud “kashalapol ushishamena ni kubabal,” Yehova ukat kulejan pakemp-pakemp rutong rend ra kukumangej “chisak chipandakena kujimb” pa mangand mawonsu cha in kumwifukwil mu “machuku ma kwisudiel” minam ma kanvundangesh. (Mat. 24:45; Kuj. 7:9; 2 Tim. 3:⁠1) Isay 2:​2, 3 urumburil kukumangej kwinoku kwa pa mangand mawonsu mud kusadikina ‘mu machuku ma kwisudiel.’ Muvu ni muvu, kukumangej kwinoku kukat kudandamen kwikalap nchik kanvundangesh ni chisum yivulijadina mu mangand minam.

Mu muvu wa 2004, atwijikishin kuswir kwa kuziyil ku mazu ma Yesu malondila anch: ‘Chishany ku mes . . . Ikalany irijekina kal.’ (Mat. 24:​42, 44) Chakin, yisadikina mu mangand yikwet dirumburik dijim mulong wa in Kristu, ajingunina “yijingidij ya miten” ni kwakul kulondulijan nich. (Mat. 16:​1-3) Mu kuwanyish kwa Dizu diend, Yehova ukudandamen kwikal ni antwend atenchikay kal mulong wa kusal mudimu wend rikalap nchik rupompat kanang rikutwisha kuyishiken.

Wikalap nchik usu usadilau antu amwing mulong wa kukangesh ap kwimik kulejan kwa Want, akadivar netu adandamedin kulond uyakin ni kukumangan pamwing. (Midimu 5:​19, 20; Heb. 10:​24, 25) Mu Russie mu Kalol 2004, turubinal wa dirumburish dijim mu Moscou witiyija mupak wa turubinal mukemp wa kukangesh mijikit ya Atuman a Yehova ku Moscou ni kujimangesh kubombakan kwau kwitiyijau kal mu chijil cha ngand yiniya. Pakwez akadivar kaziyinap; ij yisotinay Nzamb kud awiy, ni kumuziyil ndiy mud Mwant chipandakena antu. (Midimu 5:29) Tuchingejin anch Yehova ukuyitakel atushalapol end kwikalap nchik rupompat mu dirumburish diyishikedina.

Mivu yasutina ey mu République de Géorgie, akadivar ashadishin yom yau, ayimeshin mar nayimp, ni kuyitemishin mikand yau. Pakwez kwikil ut wachilau mulong wa awiy watwishina. (Is. 54:17) Mu muvu wa mudimu wa 2004, Atuman a Yehova ayitijin kand kulondul chijil mu Géorgie. Yikumangan ya distrik yasadikin pakad kanrumbangesh, ni mikand yandama mwi ngand pakad mbwandj. Kwiwejidin uvud usu wa in kulejan ni in kukumangan ku Chivurikish.

Mu Arménie, mu Érytrée, mu République de Corée, mu Rwanda, ni mu Turkémistan, akadivar ayiteka mu rukan mulong wa ritiy rau. Ayimesha mar, pakwez ij diyingish dia Mifund dia kupakiu kwau, diyikwashina kulam kujijaman kwau ni kuchingejin kudiay Yehova mulong wa kuyikamunin.​—⁠1 Pi. 1:6; 2 Pi. 2:⁠9.

Chisu ushinshikidinany Rapor wa Muvu wa Mudimu mu La Tour de Garde wa Kasan 1, 2005, ukusangarany pa kuman kuwap kwa Yehova. (Kus. 31:19; 65:11) Ruchingej retu ridi anch rapor winou akukasikeshany kudandamen kwend mu mutapu wa kumusangarish Nzamb.​—⁠1 Tes. 4:⁠1.

Usu ujim udandamedin kusadik mulong wa kukimb antu a mitapu yawonsu nich uyakin. Chilakej, mavideo, DVD, ni yom yikwau mu rudim ra yijingidij ni mikand mu Braille ayirijekin mulong wa kuyikwash atujik a matu ni amputames muspiritu. In kulejan a Want avud ilejin jindim jilondilau angez ashicha mu teritwar wau wa chikumangen.

Chikwau kand, yitot ya yirund ya kulemp ayisadil mu materitwar makasikena kushik. Mutiy umwing ukwet yirund ya kulemp 300 ni kusut yikweta in kulejan 7000 ni kusut. Chakin kamu riner ridi ruchingej rujim mulong wa yikumangen yisu! Chikwau kand, pa antu 16760607 akumangena ku Chivurikish muvu unou wa mudimu, tutikit 10 ni kusut kadiap Atuman a Yehova. Chinech chimekeshin anch kuchidi yakwangul yifanyidina kand kwangul.

Tupanin kujikitish kud Yehova mulong wa chiyukish chend chipitishina ni mutapu utulaminay nich rukat dichuku ni dichuku. (Jinsw. 10:22; Mal. 3:10; 1 Pi. 5:⁠7) Pituyila kurutu mu umwing mu “chikunku cha machuku ma nsudiel” chinech, tutekin ruchingej retu mudiay Yehova. Yikalap nchik yikokujol yitushikedina, tuvurikany amboku mufund wa muvu wa 2005: “Ukwash wam ukat kudiokal kud Yehova.” (Kus. 121:​2, NW) Ijikany amboku anch tukukatilany ni tukat kulembil mulong wenen.

Akadivar nen,

Chisak Chitakedina cha Atuman a Yehova

[Caption on page 5]

Mutapu ik Umeningau Atuman a Yehova Kuvot?

Mu Bibil mudi yijil yidia kamu patok yiyikwashina atushalapol a Nzamb kwikal ni chitong chifanyidina pa mulong winou. Pakwez, chimeken anch kwikil chijil piur pa chaku chin cha kuvot. Chilakej, kwikil diyingishin ap dimwing dimekeshina anch in kutakel a chapu kanang kakutwishap kuvot mulong wa kushiken ku mipak yitadina chapu chau. Yikumangen ya Atuman a Yehova yikwatining mipak chisu chivud piur pa muten wa kukumangan ni kusadil kwa chipau (nfalang) cha chikumangen nich kusal vot wa kutek makas mwiur.

Pa chinech, yom ik tukulonda piur pa kuvot kwa milong ya politik? Chakin, mu jingand jimwing ja demokrasi, piswimp antu 50 pa chitot kakuvotangap kwau pa dichuku dia vot. Atuman a Yehova ku mutambu wau, kakatap kukangesh mbil yikwetau antu akwau ya kuvot; ap kand kusal ap pakemp kampany wa mavot ma chipolitik. Alimishining ni kusadil pamwing nau in kutakel avotinau ku mavot. (Rom 13:​1-7) Pakwez piur pa kwijik anch akuya ayinau ni kuvot muntu kanang, umwing ni umwing wa Atuman a Yehova ukat kwikwatin mupak wengamidina pa kom kend kafundishinau nich Bibil ni kutesh kwend kwa chisend chikwetay kurutu kwa Nzamb ni kwa Ngand. (Mateu 22:21; 1 Pita 3:16) Mu kukwat mupak winou wa muntu ipend, Atuman akat kushinshikinang milong kanang.

Cha kusambish, Yesu Kristu walonda ya in kwilejend anch: “Awiy kadip kand a mangand, mudi am kinidip wa mangand.” (Yohan 17:14) Atuman a Yehova akwatining nich usey chijidik chinech. Mulong “awiy kadip kand a mangand,” kakatap kwiyandjik mu milong ya politik wa mangand.​—⁠Yohan 18:⁠36.

Cha kaad, kambuy Paul wisambina amwinend mud “ntimesh” wa Kristu kud antu a pa chirung chend. (Efes 6:​20, MM; 2 Korint 5:20) Atuman a Yehova itiyijin anch Kristu Yesu wadidin kal Want wa Mwiur wa Nzamb, ni yawiy, chidiau antimesh (a want winou), afanyidin kuulejan ku michid. (Mateu 24:14; Kujingunik 11:15) Antimesh kakwiyandjikangap mu milong ya jingand muyituminau. Chidiau aruu a Want wa mwiur wa Nzamb, Atuman a Yehova akwet chitong cha chilik chimwing cha kulik kwiyandjik mu milong ya politik ya jingand mushichau.

Mulong wa kasatu wa kushinshikin udi anch antu akata kuya ni kuvot muntu kanang ku biro wa vot akutwish kwikal ni chisend mu yikatay kusal. (Isikej nich 1 Timote 5:22) In Kristu afanyidin kushinshikin kamu nawamp anch asotil ap bwat kumukwash muntu mu chisend chinicha.

Cha kanying, Atuman a Yehova amening nich usey ujim uumwing wau wa Ukristu. (Kolosay 3:14) Marelijon pimiyandjikina mu milong ya politik, chisu chivud kukat kubudikin kutembijan pakach pa yid yau. Mu kumwimburij Yesu Kristu, Atuman a Yehova alikining nakash kwiyandjik mu politik ni alamining lel uumwing wau wa Ukristu.​—⁠Mateu 12:25; Yohan 6:15; 18:​36, 37.

Cha katan ni cha nsudiel, kulik kwau kwiyandjik mu politik kuyinkishin Atuman a Yehova want ipau wa kwisamb nau antu akweta yitongijok ya mitapu yin yawonsu ya politik piur pa uruu wa Want ukweta usey ujim.​—⁠Hebereu 10:⁠35.

Kulondwish nich yijidik ya Bibil yitwashinshikina kal kwiur oku, mu jingand jivud, Atuman a Yehova akwatining mupak muntu ni muntu ipend wa kulik kuya ni kuvot mu milong ya politik, ni want ipau wau wa kukwat mupak winou aulimishining mu chijil cha ngand. Ing, chikwikal nchik, anch chijil chiyitin an-a-ngand kuvot? Mu mwikadil wa mutapu winou, Kaman umwing ni umwing ukwet chisend cha kwikwatin nich kom kend, mupak wengamidina pa Bibil piur pa mutapu wa kusal. Anch muntu wakwat mupak wa kuya ku biro wa kuvotin, udi mupak umutadina amwinend. Yikusalay mu biro wa kuvotin yimutadin ndiy ni Sakatang wend.

La Tour de Garde wa Kalang 15, 1950, paj wa 445 ni paj wa 446, (Inglish) walonda anch: “Ndond yilondilay Sezar anch an-a-ngand afanyidin ching kuvot . . . [Atuman] akutwish kuya ku biro wa vot ni kwandam mu mabiro ma kuvotin. Mwinomu mwawiy mukatau kuyit kushidikin pa kadipaper ka kuvot nich ap kufund yisotinau. In kuvot akat kusal yikusotau nich kadipaper kau pa kuvotin. Chawiy lel pinap kurutu kwa Nzamb pawiy pafanyidinay Kaman wend kusal kwambatan nich yijil yend ni kulondulijan nich ritiy rau. Chidiap chisend chetu kuyilej yifanyidinau kusal nich kadipaper ka kuvot nich.”

Ing anch ikundj wakad kwitiyij ukweta mband mwin Kristu wamushindin anch ufanyidin kuya amwinend ni kuvot? Ndiy udi mwishin mwa nfumwend, mud kamu chidiau in Kristu mwishin mwa in kutakel. (Efes 5:22; 1 Pita 2:​13-17) Anch wamuziyil nfumwend waya ku biro wa vot wandam, udi mupak wend amwinend. Kwikil muntu ap umwing ufanyidina kumulond yom yiyimp.​—⁠Isikej nich Rom 14:⁠4.

Ing mwi ngand mwakad kwikal chijil cha kuvot pakwez mudia atubwebu in kafukej ayifukejidina antu akad kuyang kwau ku biro wa vot​—⁠pamwing ap mu chilik cha kutek mwom wau mu chak? Ap kand, ing anch antu, pikwakad ap kwikal chijil chitina kuvot, ayakamish nakash mu chilik kanang anch kayilap ku biro wa vot? Mu mikadil yiney ni yikwau yifanikena nich, mwin Kristu ufanyidin kwikwatin mupak wend amwinend. “Mulong muntu wawonsu ukez kasend chisend chend amwinend.”​—⁠Galatia 6:⁠5.

Kukutwish kwikal antu apwakeshinau pa kuman anch pa chirung cha mavot mwi ngand yau, Atuman a Yehova amwing ayil ni kuvot akwau bwat. Akutwish alond anch: ‘Atuman a Yehova kakwetap chovu.’ Antu afanyidin kwijik anch, mu milong mud yiney yitina kom ka muntu ipend, mwin Kristu umwing ni umwing ufanyidin kwikwatin amwinend mupak kurutu kwa Yehova Nzamb.​—⁠Rom 14:12.

Yikalap nchik mipak ya muntu ipend yikwatinau Atuman a Yehova mu mikadil kushalijan, akat kushinshik nawamp anch alamin kuburen kwau kwiyandjik mu milong ya mangand kwa Ukristu ni want ipau wa kulond. Mu yom yawonsu, akat kwengamin padiay Yehova Nzamb chakwel ayikasikesha, ayinkisha manangu, ni kuyikwash kwipuk kutun ritiy rau mwi njil ap yisu. Chawiy lel chimekeshinau ruchingej mu mazu ma nfund a kuseng: “Mulong Ey udi kal diyal diam ni dipat diam, chawiy ukwintakel ni kwintwal mulong wa dijin diey.”​—⁠Kuseng 31:⁠3.