Mukand Wa Chisak Chitakedila
MU KULONDUL chilakej cha Yesu, tukat kumulembil Nzamb nich kashinsh anch: “Dijin diey aditumbish.” Rusot retu rijim nakash ra kushakam kukwatijan nich malembil minam rimeken mu mutapu tukata kushakam etu Atuman a Yehova. Chakin kamu, chitufanyidin kwijik yom yivud kupandakanamu kwijik ching kusu dijin dia Nzamb. Tufanyidin kusadil chisu chawonsu tukweta chakwel kutumbish dijin dined. Chakin, katumb kapandakena kujimb kakutwishay kwikal nich muntu mwin mwawonsu pakach petu kadi ka kwikal utazukinau anch Kaman wa Yehova.—Mat. 6:9; Is. 43:10.
Kukwatijan nich Kuseng 110:3, antu a Yehova akat kwipan nich muchim umwing mu mudimu walonday Yehova anch ufanyidin kusadik. Ov, mulong wak antu a mivu ni mikadil yawonsu ipanin ayinau mu mudimu wa kulejan? Cha kusambish, chidi mulong wa rukat rau kudi Nzamb ni kwipan kwau kudi ndiy. Kuvurik Yijil 6:5, 6 utulejin anch tufanyidin kumukat Yehova nich ‘muchim wetu wawonsu, nich mupim wetu wawonsu, nich usu wetu wawonsu.’ Rukat riner ra kashinsh ritubachikin kusadil chisu chetu, usu wetu, ni mapit chakwel kuyish kurutu yisakin ya Want wa Nzamb, ni umwing wa mutapu tukutwisha kusal mwamu udi mudimu wa kulejan pakad kujing kukwatijan nich mikadil yetu.
Rukat ra Yehova mulong wa antu rawiy rikata kumubachik kutakel mudimu wa kulejan rusangu ruwamp chakwel arulejana mu mangand mawonsu. Ndiy kasotinap anch antu awonsu asheshika pakwez usotin anch antu awonsu akarumuka mu yaku yau yiyimp ni kumuchirikin Sakatang wau chakwel lel akutwish kupand. (2 Pi. 3:9) Yehova ulondin anch: “Kinikat kusangerap kuman mukayitil kufa. Nisotil ndiy alika yitil yend chakwel apanda.” (Ezek. 33:11) Pitukata kwipan mu mudimu wa kulejan, tumekeshin patok rukat ra Yehova kudi ambay netu. Chawiy, chimekeshina mulong wak tukwet musangar ujim pitukata kusal mudimu winou wa usey.
Rukat retu ripandikena mulong wa Nzamb rimekedin kand pa mutapu wetu wa kuman Dizu dia Nzamb, Bibil. Twelap kumwijik Nzamb pakad Bibil ni kumushejin, mudi mutulejinay Yakob 4:8 kusal. Twelap kwijik ap mulong wak tudiaku ni yikeza kutushiken mu machuku ma kurutu. Twelap kwijik anch ngaketu etu awonsu Adam ndiy musul wa milong tukweta. (Rome 5:12) Chakin kamu twelap kujingunin rukat ripandikena kujimb ra Nzamb mu kupan Mwanend kapokal mudi difut mulong wetwetu. Mu mitapu yikwau yivud, Yehova utwinkishin mu chilik kanang ronganyin rend, manangu, ni chovu. Ov, mutapu ik tukusangera chipan chatwinkishay, Dizu diend difundilau nich spiritu! Kujikitish kwetu mulong wa chipan chinech chamushena kutubachikin ‘kulam chisu cha muten’ mulong wa kutang, kwilej, ni kutongin pa mazu mend. (Ef. 5:15, 16; Kus. 1:1-3) Tufanyidinap dichuku ap dimwing kulik kusadil chisu tukweta cha kutang Dizu dia Nzamb dichuku ni dichuku. Pakwez, rukat retu mulong wa Nzamb rifanyidin kutushejish ku Dizu diend, ni kututwishish kukudish chovu chetu piur pend ni kupandikesh rukat retu mulong wendendiy.
Twileja mu Bibil anch pasalay Adam chitil, ndiy wayandjika anend ela kuvadik mu machuku ma kurutu, ni muntu ni muntu pakach petu, mu mwikadil umwing uyimp, wakad ruchingej. Pakwez, Nzamb watwisha kuyilej antu yakusal chakwel ashikena kwijik anch rutong rend mulong wa divu rikez kuwanyin.—Dis. 3:15.
Chakin kamu, muntu ni muntu pakach petu usotin nakash kutumbish dijin diamushena dia Nzamb wetu. Pitukata kukudish ronganyin piur pa mutapu udiay Yehova Nzamb upandikena kuwap, yitubachikin kusadil pamwing nich ditenchik diend kusutil ku kulejan dijin diend dijim ni rutong rend. Tukwet ruchingej rikash anch tukwikal nich dilau diend ni chiyukish katat ni machuku ma kurutu makad nsudiel mwi ngand yisu.
Etu yid ya Chisak Chitakedila tumekeshin rukat retu kudi en akadivar ni anambaz akatish. Tusotin kand kumekesh kusanger kwetu kukash mulong wa usu wen ukash wa kusadil chisu chashalaku kal kurutu kwa “mar makash” chakwel kuyitwadil antu avud rusangu ruwamp anch chitwishikin. (Kubur. 7:14) Mu kusal mwamu, uyinkishinany dilau watambulanya, dia kwikal nich ronganyin ra Nzamb ni ra Kristu ritwadila ku mwom wa chikupu.—Yohan 17:3.
Akadivar nen,
Chisak Chitakedila cha
Atuman a Yehova
[Picture on page 2]
RAPOR WA MWINKIND 2006
CONGO-BRAZZAVILLE
Mway. Mway. Mway. Mway.
Uvud wa: As. Mag. Kuch.K. Mal.Bi.
Ayb. kamp. 5 134,6 64,8 113,4 11,4
Ayb. ar. 237 66,4 31,7 47,0 8,5
Ayb. ank. 203 54,4 21,4 37,4 7,8
In kul. 4273 15,7 8,3 10,9 3,1
UVUD: 4718 Abatishinau: 178
CONGO-KINSHASA
Ayb. kamp. 248 119,1 38,1 75,6 14,5
Ayb. ar. 8818 61,6 13,3 36,8 6,4
Ayb. ank. 3440 53,2 11,3 28,1 5,4
In kul. 108193 11,9 3,3 7,1 1,7
UVUD: 120699 Abatishinau: 4762
•◀▶•