Ov, Bibil Ukutwish Kukukwash Kujijamen Mar Madiokila ku Yirung Yikash?

Ov, niyey ud pakach pa mamiliyon ma antu arishina ni yirung yikash? Yibudikin yiyimp yidiokila ku yirung yikash yikutwish kutushiken mu mitapu kushalijan. Rinkind mukash (ouragans, typhons, cyclones, tornades) ukat kupumbul mem ni kuletish mabeb makata kushesh yom yivud nakash. Ruval mukash ukutwish kuwupol divu, ni kubarumok ni milayilay yikash ya ruval yikutwish kuletish kasu mu dit kakutwisha kushesh yom yivud. Chang chikash, mambek ma chirungul, ni rinkind mukash pa chirung cha kapepil yikutwish niyau kushesh yom nakash.

Ku jindond jivud, yirung yikash yiyil kuvulijan nakash ni kushesh yom nakash. Ditenchik ditazukinau anch Fédération internationale des Sociétés de la Croix-Rouge et du Croissant-Rouge dilondin anch: “Uvud wa antu amena mar ma yinship yiney udandamedin kuya kurutu. Mutapu uyila mabeb, chang chikash, ni rikind mukash kuvulijan nakash, chinech chikat kujip antu avud, kushesh yom yifanyidina kuyikwash antu kudandamen ni mwom, ni kuyishikij antu avud ku kubuuk.”

Kupwa kwa yinship mud yiney, antu avud akat kuman mar, kadiap kusu ku mujimbu, pakwez kand mu manangu. Akutwish kuman mar mulong ashadishin yom yau, yikumbu yau, ap kand kufish akatish nau.

Anch warishin ni mar madiokila ku yinship yikash, Bibil ukutwish kukukwash. Upanin rongoj, ruchingej, ni yiyul yiwamp, ni yom yiney yakwashin kal antu avud amana mar madiokila ku yirung yikash. (Rom 15:4) wakwil kand ku yipul ya usey nakash mud: Mulong wak ulikidilay Nzamb yom mud yiney kushiken? Ov, chid mulong wa kutupup?

Yirung yikash tumena nlel yidiap dipup dia Nzamb

Bibil ufundishin anch kadiap Nzamb uletishina mar mamenau antu. Utwinkishin kashinsh anch “Nzamb kakumwozangap nich kuyip, niyend Nzamb kakumwozangap muntu.” (Jak. 1:13) Chinech chirumburikin anch Yehova kandiyap ukata kuletish mar madiokila ku yirung yikash marishinau nich antu nlel unou.

Bibil ujimbwil yisu yimwing yasadinay Nzamb usu wa yitangil mulong wa kuyipup nich antu ayimp. Pakwez yinship yiney yishalijadin ni yirung yikash yisheshina yom nlel, mulong yikat kushiken pakad kuyibabesh antu ni kuyimesh antu awamp ni antu ayimp mar. Chinyim ni chinech, uruu udia mu Bibil umekeshin anch yisu yawonsu Nzamb wayikingang antu akad mulong, wasambelang kubabeshan, ni walejanang mayingishin mamubachikina kusal mwamu. Chilakej, Nzamb walejana mayingishin maletishinay Mabeb pa divu diakabuj pa chirung cha Nowa, wasambela kubabeshan, ni wamukinga Nowa ni dijuku diend.—Disambishil 6:13; 2 Pita 2:5.

Mulong wa kwilej yom yivud yitubachikina kulond anch mar ma yirung yikash tumena nlel didiap dipup dia Nzamb, tal mutu wa mulong: “Yom ik Yilondinay Bibil Piur pa Mar ma Chitangil?”

Nzamb ukat kuyibangin antu amena mar madiokila ku yirung yikash

Bibil umekeshin anch Yehovaa Nzamb ukat kutubangin ni kutwanaken. Shinshikin maverse makasikeshina malondwilaku am.

• Isay 63:9: “[Mu] mar mau mawonsu, [Nzamb] wamana nau mar.”

  Chirumburikina mazu minam: Chimusadining Yehova nayimp nakash anch wayiman antu akat kuman mar.

• 1 Pita 5:7: “Ukat kukulamany.”

  Chirumburikina mazu minam: Yehova ukatin anch wikal ni mwom uwamp.

Mulong Yehova ud mwin kubangin ni mwin ranaken, kakatap kuvung makas. Ukat kutwongoj kusutin yiyul yiwamp yidia mu Bibil ni ruchingej rakin ridiamu piur pa mwom wa machuku ma kurutu wakad mar madiokila ku yirung yikash.—2 Korint 1:3, 4.

Chisu chikudioshau chikupu mar madiokila ku yirung yikash

Bibil ujingunin kushilamu kwa Yehova “kwa [kutuletin] ruchingej ra kurutu.” (Jeremiy 29:11) Uyinkishin antu ruchingej ra kusanger mwom pa divu dikwikala paradis, pakad kwov wom wa mar madiokila ku yirung yikash.—Disambishil 1:28; 2:15; Isay 32:18.

Nzamb ukuwanyish kushilamu kwinoku kusutin Want wend, charumburik anch guvernema wa mwiur ukutakelau kud Yesu. (Mateu 6:10) Yesu ukwet manangu ni usu wa kukangesh mar madiokila ku yirung yikash kushiken. Padingay Yesu pa divu, wamekesha usu wend kusutin kuninetish rinkind mukash. (Marko 4:37-41) Ukuyikel nich manangu ni ronganyin, ni kuyifundish antu mutapu wa kulam yom yiyinyungumukina ni mutapu wa kushakam nawamp pakad kushesh yitangil yikwau. (Isay 11:2) Mwinshin mwa winyikel wend, antu kakez kamanap kand mar madiokila ku yirung yikash.

Pamwing ap wiyipwil anch: ‘Chisu ik chikusadinay Yesu usu wend mulong wa kupwish mar madiokila ku yirung yikash?’ Mulong wa kwakul ku chipul chinech, tal mutu wa mulong: “Want wa Nzamb Ukuyikel pa Divu Chisu ik?”

Mutapu wa kurish ni yirung yikash

Yiyul ya Bibil yikutwish kukukwash kurutu yirung yikash yishiken, piyikushikena, ni kupwa kwa kushiken.

• 

  Kurutu yishiken: Irijeka mulong wa kulik kushishawal.

  Yom yilondinay Bibil: “Muntu wa manangu anch waman yom yikash, ukat kujingam, pakwez antu amwamu akat kuya kurutu ni kwimesh mar.”—Jinswir 22:3.

  Chirumburikina mazu minam: Sambel kwijik yirung yikash yikutwisha kushiken kwi ndond ushicha chakwel utwisha kusal yom mau mau pakad kushishawal mulong wa kuking dijuku diey.

  Uman: “Chisu twachina mulong wa dit diatema kasu, twading twirijekin kal kurutu kwa chisu. Twading ni masakosh mudia yom ya ukwash. Twading ni mon ya kuna anch kwashiken mayej. Twading ni masun. Antu ading atunyingumukina ading akat kuzazat, ni kadingap kamena cha kusal. Pakwez etu twading tukwet yawonsu tuswirikedina, ni nijikitishin nakash mulong wa chom chinech!”—Tamara, wa mu Kaliforni, mu États-Unis.

• 

  Piyikushikena: Shinshikin pa yom yidia ya usey nakash.

  Yom yilondinay Bibil: “Mwom wakin wa muntu kiudiap mu yom yikwetay, ap anch ukwetap nchik mapit mavud.”—Luka 12:15.

  Chirumburikina mazu minam: Mwom ud wa usey nakash kusutamu yom ukweta.

  Uman: “Chisu rinkind mukash utazukinau anch typhon Lawinb chaupulay chikumbu chetu, namanap kand cha kusal. Pakwez chom chimwing kusu nasala chading kumulembil Yehova Nzamb ni muchim wam wawonsu. Najingunina anch yoma kwau ya ku mujimbu twashadisha, kadiap mwom yetu.”—Leslie, wa mu Filipin.

• 

  Kupwa kwa kushiken: Tongin pa yom ya nlel, kangal wiyakamish mulong wa damashik.

  Yom yilondinay Bibil: “Kangal wiyakamishany mulong wa diamashik, mulong diamashik niyau dikwet yakamish yau.”—Mateu 6:34.

  Chirumburikina mazu minam: Kangal wiyakamish nakash piur pa milong ya machuku ma kurutu.

  Uman: “Kupwa kwa rinkind mukash utazukinau anch ouragan Irma kupumbwil men ku chikumbu cham, nakwata mipak yivud nakash kusutamu pakur, ni mutu wanswana nakash. Napakisha kulondul chiyul cha Bibil cha kutongin pa yom ya nlel, pakad kwiyakamish mulong wa damashik. Namana anch kusutin ukwash wa Yehova, nikutwish kujijamen yikokujol yikash mu mutapu unakad kutwish kutongijokin.”—Sally, wa mu Florid mu États-Unis.

Mulong wa kutan yiyul yivud, tal mutu wa mulong: “Yom Yikutwisha Kupandish Mwom Anch Kwashiken Mar Madiokila ku Yom Yatangau,” mu Français.