Ov, Nifanyidin Kulembil Kud Ansant?

Chakul cha Bibil

Bwat. Bibil ulejen anch tufanyidin kumulembil ching Nzamb, mu dijin dia Yesu. Yesu wayileja in kwilejend anch: “Chawiy chifanyidin kulembilany mwamu: Tatukwetu udia mwiur, dijin diey aditumbish.” (Mateu 6:9) Yesu kayilejap in kwilejend anch afanyidin kuyilembil ansant, angel ap muntu mukwau, ching kusu Nzamb.

Yesu wayileja in kwilej anch: “Am yam njil, yam uyakin, yam kand nikata kupan mwom. Kwikil muntu ukutwisha kwiyil kudi Tatuku ching wasutil kudi am.” (Yohan 14:6) Yesu ndiy kusu winkishau chisend cha kutulondin kwa Nzamb.—Hebereu 7:25.

Chid nchik anch namulembil Nzamb kupwa nayilembil kand ansant?

Chijil chimwing pakach pa Yijil Dikum chilondin anch: “Am [Yehova] Nzamb wey, nidi Nzamb wa mukau.” (Kubudik 20:5) Mu mutapu ik mudiay Nzamb “mukau”? Mazu ma kwinshin madia mu Bibil New American Bible malondin anch “witin antu alamata ching kud ndiy.” Nzamb witin anch difukwil dietu—kuwejaku ni malembil—yimuyila ching ndiy kusu amwinend.—Isay 48:11.

Tukat kumwovish Nzamb nayimp nakash anch twayilembil antu akwau, ap asant ni angel atumbila. Chisu chapakishay kambuy Yohan kumwifukwil mwangel umwing, mwangel wamukangesha ni kumulej anch: “Kangal wasal mwamu! Am nidi kashalapol pamwing ni yeyey nau anamakwey akata kumekesh uman wau anch, adi ayen a Yesu. Chifanyidin kumwifukwil Nzamb.”—Kujingunik 19:10.