Chirumburikin ik Kwikal Utumbila?

Chakul cha Bibil

Kwikal utumbila kurumburikin kwikal waurikina ni yom yijondila. Dizu dia Hebereu dikarumwinau anch “utumbila” didiokil ku dizu dilondina anch “kwaurik.” Chawiy, chom chitumbila chaurikin ni yom yikwau ap chidi chitumbila, pakampwil mulong wa kwinang kwach ni kwishitul.

Nzamb udi utumbila mu chilik cha piur nakash. Bibil ulondin anch: “Kwikil utumbila mudi [Yehova].”a (1 Samwel 2:2) Nzamb ukwet usu wa kutek mbil ja kulondul piur pa kutumb.

Dizu “utumbila” akutwish kudisadin ku chom chin chawonsu chimutadina Nzamb kapamp kamwing, nakash yom yaurilau mulong wa difukwil dia Nzamb. Chilakej, Bibil ulondin piur pa:

• Jindond jitumbila: Nzamb wamuleja Moses piswimp ni chifukis cha kasu anch: “Ndond yiwiminya yidi ya divu ditumbila.”​—Kubudik 3:2-5.

• Yinship yitumbila: In Isarel a pakur amwifukwilang Yehova pa yisu ya misambu ya relijon yatazukau anch “kukumangan kutumbila.”​—In Levi 23:37.

• Yom yitumbila: Yom yasadinangau mu difukwil dia Nzamb pakur mu tempel wa Yerusalem ayitazuka anch ‘yom yitumbila.’ (1 Ant 8:4) Yom yiney yitumbila afanyina kuyisadin nich kalimish nakash, pakwez kafanyinap kuyifukwil.b

Ov, muntu wakad kuwanyin ukutwish kwikal utumbila?

Mwaning. Nzamb uyilejin in Kristu anch: “Ikalany antu atumbila, mulong am nidi utumbila.” (1 Pita 1:16) Chakin kamu, antu akad kuwanyin kakutwishap kushik mu chilik cha kwikal utumbila mudi Nzamb. Pakwez, antu aziyidin yijil yitentamina ya Nzamb akutwish kuyiman mudi ‘atumbila ni itiyinau kudi Nzamb.’ (Rom 12:1) Muntu usadina usu wa kwikal utumbila ukat kubabel mazu ni yisalijok yend. Chilakej, ukat kulondul mbil ja Bibil ja ‘kwikal antu atumbila ni kwiyep yom ya masandj’ ni ‘kwikal utumbila mu yaku yend yawonsu.’​—1 Tesalonik 4:3; 1 Pita 1:15.

Ov, Nzamb ukutwish kulik kutuman mudi antu atumbila?

Mwaning. Anch muntu kalimishinap mbil ja Nzamb piur pa mwikadil, Nzamb kakumanap muntu winou mudi utumbila. Chilakej, mukand wa Bibil wa Hebereu aufunda mulong wa ‘akadivar atumbila,’ pakwez uyibabeshin anch kangal akudisha “muchim uyimp wakad ritiy wa kupumbuk kudiokal kudi Nzamb mwom.”​—Hebereu 3:1, 12.

Yitongijok ya makasu piur pa kwikal utumbila

Chitongijok cha makasu: Ujich ukat kumukwash muntu kwikal utumbila nakash.

Misconception: Ap anch mwin Kristu ukutwish kutond kulik kwatan, ujich winou umusadinap anch ikal utumbila nakash ku mes ma Nzamb. Chidi chakin anch ajich akutwish kwipan nakash mu kusadin Nzamb. (1 Korint 7:32-34) Pakwez, Bibil umekeshin anch antu atena akutwish kwikal niyau atumbila. Mu win yakin, umwing wa atwimbuy a Yesu wading ngatan, dijin diend Pita.—Mateu 8:14; 1 Korint 9:5.