Ukwash Watambwilau Antu pa Mangand Mawonsu pa Chirung cha Chipupu Chapalangena pa Mangand Mawonsu

Mwi Ngond wa 3, 2020, palonday Organisation mondiale de la santé anch KOVID-19 chid chipupu, antu avud katongijokinap anch viris winou ukudandamen kuyimesh antu mar pa mangand mu muvu ni kusut. Mamiliyon ma antu, kuwejaku ni Atuman a Yehova amen mar ku mujimbu, mu manangu, ni kuburen nfalang mulong wa chipupu chinech. Mutapu ik watenchikinau Atuman a Yehova ni kupan ukwash pa chisu chinech cha mar?

Ukwash Kud Antu Adia mu Maswir

Mwinshin mwa umutakel wa Komite wa Kutenchik wa Chisak Chitakedila cha Atuman a Yehova, atekin Makomite ma Kupan Ukwash 950 ni kusut pa mangand mawonsu mulong wa kurishikish chipupu cha KOVID-19. Yisu yimwing, makomite minam marijeka mulong wa kuyikwash antu kwi ndond kushichau, ni yisu yikwau, Atuman a Yehova atambwil ukwash udiokila kud mburamatad. Makomite minam masadin kand usu nakash mulong wa kupan ukwash mu chilik chijim nakash.

Chilakej, shinshikin piur pa mutapu wadia mashakamin mu Paragwey. Jurnal umwing walejana anch mulong chipupu chayishikijin antu kuburen nfalang, “antu avud adia mu Paragwey akat kufa nzal.” Pakwez Makomite ma kupan ukwash mwi ngand yiney mading masambishin kal kupan mafund makweta yom yikutwisha kukwash dijuku dikweta antu anying mu ambing aad. Mu mafund minam mwading yakudia yiwanyidina, sabang, ni yom yikwau mulong wa kwinang. Difund ni difund diading dikwet usey wa adolar 30.

Mutapu ik usadinau in kupan ukwash inay usu wa kwiking ayinau ni kuyiking antu akwau pa chirung chinech cha chipupu cha KOVID-19? Akat kudjal mask ni kulimish chintamp. Akat kushinshikin kand mulong wa kwikal nich kashinsh anch masosiete mabudishina yakudia yiney yipaninau makat kusadin mu jindond jinangina, ni akat kukwat mipak yikash mulong wa kwiking. Chinech chirumburikin anch antu awonsu apanina mafund minam akat kudjal yom ya kwiking nich, kwinangish motak ni kuupan mon ya kujip nich atupwapu, ni kutek mafund minam pa ndond papanangau kal mon wa kujip nich atupwapu. Kupwa, antu inay akat kulimish chintamp chilejenau mulong wa kwichidij pa chisu chipaninau yom kud akadivar.

Kusadin Yipan kwa Manangu

Mwi Ngond wa 1, 2021, Komite wa Kutakel wapanin mbil ya kusadin adolar amiliyon 25 ni kusut mulong wa kukwashan nich pa chirung chinech cha chipupu. Mabiro ma mitiy ni Makomite ma Kupan Ukwash makat kusadin kwa manangu nfalang jinej ni kusal usu wa kuland yom ya kuyikwash nich antu ku usey uwamp. Chilakej, mwi ngand ya Shili, akadivar ading atakedina mudimu wa kupan ukwash akimba kuland akilo a makund 750. Pakwez pa chisu chinicha, usey wa makund wading wakaninikang kal tupamp twad mwi ngond kwau umwing! Asaa aad kupwa kwa kwitiy kuland makund ku usey wa piur nakash, mwin kulandish wayileja anch kwading mwin kuland mukwau wajindjikisha makund, pakwez walik kal kwend kuland. Chawiy mwin kulandish witiya kuyilandisham akadivar ku usey wading kusadinau machuku ma kwinyim kwasut kal ngond umwing!

Pakwez, payau akadivar mulong wa kusend makund, mwin kulandish winou wapakisha kulik ni kuyel anch akat kwangan yakudia nich katond, mud mwading musadina yitenchik yikwau. Kupwa kwa kusal malembil miswimp mu muchim, mukadivar netu umwing wamuleja mwin kulandish anch chikumangen ni chikumangen chashinshikidin kal kurutu kwa chisu mulong wa kuman muntu udia kamu mu maswir nakash. Akadivar arumburila kand anch, mulong yishankur ni ndond yiyila yom yiney yishalijadin, mu difund ni difund tukutekamu yom yikutwisha kwikal ya ukwash nakash ku dijuku dikuditambula. Kupwa, amwijikisha mwin kulandish anch yipan yawonsu ya nfalang ni mudimu ukash usadinau atuman a Yehova ud kwau wa kwisotin. Mwin kulandish washimoka nakash. Chawiy, kimenap kusu pa kuyishirishin usey, pakwez wawejinap kand chipan cha akilo 400 a makund.

“Kumekesh Rukat Rakin”

Lusu udia ipal ni mwadiamufu mu Liberia, ushich nau antu atan mu dijuku diend. Dichuku dimwing padingau akat kudia ni kushinshikin mufund wa dichuku pamanch, mwijukurend wa Lusu ukweta mivu sambwad wajingunina anch kwadingap yakudia yivud mu chikumbu chau. Chawiy wipula anch: “Yom ik tukudianya?” Lusu wamwinkisha kashinsh anch wading walembilang kal mulong wa kwit ukwash, ni anch wading nich kashinsh anch Yehova wafanyina kuyiwanyishin maswir mau. Dichuku diawiy dinidia kupwa ka midi, amutazuka Lusu kud amakurump a chikumangen ni amuleja kuya kusend yakudia. Ulondin anch: “Mwijukuram walonda anch katat nijik kal anch komb Yehova ukat kutesh ni kwakul ku malembil, mulong Yehova wakul kal ku malembil mam.”

Mwi ngand ya République démocratique du Congo, mband umwing wading ushich piswimp ni dijuku dia Atuman a Yehova. Kupwa kwa kuman dijuku dined akat kudiletin yakudia kud ambay nau in Kristu, mband winou walond anch: “Kupwa kwa chipupu chinech, tukwikal atuman a Yehova, mulong ayibangidin akadivar ni anambaz nau pa chirung chinech chikash.” Nfumwend wamwipula anch: “Ov, ukimbin kwikal Kaman wa Yehova mulong kwau wa nsak umwing wa muchel?” Mukajend wamwakula anch: “Kichidiap mwamu bwat, pakwez nsak winou wa muchel ud uman umekeshina rukat rakin.”

Anch Atuman a Yehova atwishin kusal mau mau mulong wa kuyikwash akadivar ni anambaz nau adia mu maswir pa chirung chinech cha chipupu, chid mulong wa yipan yey ya kwikatin. Wajikit mulong wa yipan yey wapanina kusutin kusadin milad yilejenau pa donate.jw.org.