Kasikanany mu Ritiy ni Kumwov Nzamb Wom

“Ikal mukash ni kwiman dang . . . [Yehova] Nzamb wey [udi] ni yeyey.”—YOSHUA 1:9.

1, 2. (a) Mu kuman kwa ukauntu, chisu chadinga chibudikin cha Isarel piur pa kuyiwin in Kanan? (b) Mutapu ik wamukasikeshau Yoshua?

MU MUVU wa 1473 kurutu kwa chirung chetu, muchid wa Isarel wadinga piswimp ni kwandam mwi Ngand ya Kushilamu. Moses wayivurisha antu mulong wa yikokujol yadinga kurutu anch: “En ukumwaukany wit wa Yordan ilel unou, ukuyany kwopat michid yijim ya usu ni dikand kukupandakananyamu en, ni kukwat misumb yijim yikweta jimpwembu jikash jishikina mwiur. Antu ajim ni alemp yimbu, awiy in Anak iwijany kal. En wateshanya dizu anch: ‘Nany ukutwisha kwiman kurutu kwa an a Anak?’” (Kuvurik Yijil 9:1, 2) Chakin, ayitabu inay ijikana nakash mulong wa kwas kwau njit! Chikwau, in Kanan amwing adinga nich yom ya njit yivud ni yikash, adinga ni atubar ni matemb ma njit makweta makupukup ku makar.—Ankalansambu 4:13.

² Oku kand, Isarel wadinga muchid wa atubindj ni wading wasal kal mivu 40 mwi mpay. Chawiy lel, mu kuman kwa ukauntu, chadinga chiyikasikedin kuwin njit. Chikalap nchik mwamu, Moses wadinga ni ritiy; ‘wamumana’ Yehova uyitakedil. (Hebreu 11:27) Moses wayileja antu anch: “[ Yehova] Nzamb wen ndiy kamu ukuya kurutu kwen. Ndiy ukez kuyishesh ni kuyiwishil kurutu kwen.” (Kuvurik Yijil 9:3; Kuseng 33:16, 17) Pafay kal Moses, Yehova wamuleja Yoshua nich kashinsh anch Ukumukwash, pamulejay anch: “Tumbuk, uya ushad wa wit wa Yordan, ey ni antu inay awonsu uyany mwi ngand yinipanyina kudi en in Isarel. Kwikil muntu ukutwisha kwez kukupandakan ey mu machuku mawonsu ma mwom wey. Mudi munadinga nend Moses, mwamu kand nikeza kwikal ni yeyey.”—Yoshua 1:2, 5.

3. Chom ik chamukwasha Yoshua ikal ni ritiy rikash ni akasikana?

³ Chamufanyina Yoshua kutang ni kutongijokin pa Chijil cha Nzamb, kushakam kwambatan nich, chakwel Yehova amukwash ni kumutakel. Yehova wamwela anch: “Chad ukez kuyukil mu yisalijok yey yiwamp, ni kukolik. Ov, am kinakulejap ey mwamu? Ikal mukash ni kwiman dang. Kangal wov wom ap kukatuk mong, mulong am [Yehova] Nzamb wey nidi ni yeyey kwawonsu kuukuya.” (Yoshua 1:8, 9) Yoshua wikasikesha, wimana dang, ni wayuka mu yom yasalay, mulong wamutesha Nzamb. Pakwez, antu avud a reng rend, alika kwau kutesh. Mudi chibudikin, kayukap mu yom yasalau, ni afila mwi mpay.

Antu Akad Ritiy ni Akad Kwikal Akash

4, 5. (a) Kushalijan ik kwadinga pakach pa ngikadil ya in kutentish dikum ni ya Yoshua ni Kaleb? (b) Mutapu ik wakulay Yehova mulong wa kuburen ritiy kwa antu?

⁴ Mivu makum manying pashejina Isarel kapamp ka kusambish ku Kanan, Moses wayituma amakundj 12 mulong wa kwendish ngand. Dikum achirika ni wom ukash. Alonda anch: “Antu twamenamu adi ayifuvu. Chad twayimen ayifuvu an amakundj a Anak, adiokila ku muchid wa ayifuvu. Pitwitala ayinetu twadi mud atubwol.” Ov, ‘antu awonsu’—adinga an a Anak—ayifuvu? Bwat. Ov, an a Anak adiokala kudi ayifuvu avadika kurutu kwa Mabeb? Bwat kwau! Ap mwamu, mulong wa kulond kwinoku kwakad kufanyin, mwong ukash wayikwata avud mu chibeng. Antu asota kuchirik mu Idjibit, mwadingau mu uswik!—Kuchind Michid 13:31–14:4.

⁵ Pakwez, in kutentish aad, Yoshua ni Kaleb, adinga ni impu ya kwandam mwi Ngand ya Kushilamu. Awiy alonda anch: In Kanan “adi mud yakudia yetu. Usu wau wayipwil kal, pakwez [ Yehova] udi ni yetwetu. Kangal twayovany wom.” (Kuchind Michid 14:9) Ov, Yoshua ni Kaleb adinga ni ruchingej riner chamwamu? Chakin kamu bwat. Awiy ni muchid wawonsu, amana mutapu Yehova wakwatishay Idjibit mwin dikand ni anzamb end usany kusutil ku Yipupu Dikum. Kupwa, amana kand mutapu Yehova wamujiyishay Farao ni amasalay end mu Karung Usunz. (Kuseng 136:15) Chakin kamu, chakasikana kulikishin wom wovau in kutentish dikum ni antu inunga nau. Yehova walonda, mulong wa kumekesh kukis kwend anch: “Chisu ik chikez kwingitiyijau am mulong wa yijingidij yawonsu yinasala mukach mwau.”—Kuchind Michid 14:11.

6. Kwikasikesh ni ritiy yiyiling pamwing mutapu ik, ni mutapu ik chimekena mu yisu yetu ya katat?

⁶ Yehova wakwata ku muj win kamu wa mulong—ngikadil ya mwong wa antu yamekesha anch kakwetap ritiy. Inge, ritiy ni kwikasikesh yiyiling pamwing, yendining pamwing mu chilik cha kwel anch kambuy Yohan watwisha kufundin chikumangen cha Ukristu ni piur pa ukash wach wa mu spiritu anch: “Winou wawiy usu wapandikenau kal nich mangand, rawiy ritiy retu kamu.” (1 Yohan 5:4) Ilel unou, ritiy mudi ra Yoshua ni Kaleb rimeken mu rusangu ruwamp ra Want rilejenau mu mangand mawonsu kudi mamiliyon musamban ni kusut ma Atuman a Yehova, ansand ni amapal, akash ni aziyila. Kwikil mukankuny utwishina kuyinenetish amasalay inay a usu, ni akasikena.—Rome 8:31.

Kangal “Kuchirik Panyim”

7. “Kuchirik panyim” kurumburikin ik?

⁷ Nich kwikasikesh, ilel unou atushalapol a Yehova, alejen rusangu ruwamp mulong akwet manangu mamwing mudi kambuy Paul, wafunda anch: “Pakwez, etu kitudiap a pakach pawawiy ni kuchirik panyim ni kushik ku mar ma chikupu; tudi pakach pawawiy akweta ritiy ni kushik kukata kwipandishil mupim.” (Hebreu 10:39) “Kuchirik panyim,” mudi mwalonday Paul, kurumburikinap kwov wom mu kachisu kakemp, mulong atushapol avud ashinshamena a Nzamb ova wom pa yisu yimwing. (1 Samwel 21:12; 1 Ant 19:1-4) Pakwez, ndinguril umwing wa Bibil ulondil anch, kurumburikin “kuchin, kudiokal,” kudi “kudiburil kulam fe uyakin.” Uwejidin kand anch “kuchirik panyim” kukutwish kwikal mutapu umwing wa kulond wimedina pa “kujiy kwa wat ni kusambish kuziy” pantaliken ni mudimu wa Nzamb. Chakin, antu akweta ritiy rikash kakatap kwakam “kuziy” pa chisu chikata kwez yikokujol—yikutwish kwikal kuzengol, mayej, ap yoziu yikwau. Pakwez, ayil kurutu mu kumusadil Yehova, ij anch uyibangidin nakash ni wij mipak yau. (Kuseng 55:22; 103:14) Ov, ukwet ritiy ra mutapu winou?

8, 9. (a) Mutapu ik wakasikeshay Yehova ritiy ra in Kristu a kusambish? (b) Chom ik tufanyidina kusal mulong wa kutung ritiy retu?

⁸ Pa chisu chimwing atwimbuy iyova anch ritiy rau radinga rikemp, chawiy chamwelau Yesu anch: “Tuwejinaku ritiy.” (Luka 17:5, MM ) Kwit kwau kwakin akwakula, pakampwil pa Pentekot mu muvu wa 33 pa chirung chetu, chisu cheza mwiku utumbila washilaumu padiau in kwilej ni wayinkisha njingunin yikurikina ya Dizu dia Nzamb ni rutong. (Yohan 14:26; Midimu 2:1-4) Parakasikana ritiy rau, in kwilej asambisha kampany wa kulejan chikalap nchik rupompat ni ashikija rusangu ruwamp kudi “awonsu atangilau mwishin mwa diur.”—Kolosai 1:23; Midimu 1:8; 28:22.

⁹ Chakwel anch tutunga ritiy retu ni kuya kurutu mu mujikit wetu, niyetu tufanyidin kwilej ni kutongijokin pa Bibil ni kulembil chakwel atwinkisha mwiku utumbila. Chidi ching kusutil ku kwandjik uyakin wa Nzamb mu manangu ni mu michim yetu—mudi mwasalay Yoshua, Kaleb, ni in Kristu akwau a kusambish—chawiy lel tukez kwak ritiy ritukasikeshina mulong wa kujijaman mwi njit ya mu spiritu ni kupandakan.—Rome 10:17.

Kwitiyij Kusu Anch Nzamb Udiaku Kuwanyidinap

10. Yom ik yidia mu ritiy rakin?

¹⁰ Mudi mwachimekeshau anshakur in kushinshaman, chakwel kukasikan ni kujijaman kudi yivud ya kusal kupandakanamu kwau kumwitiyij Nzamb. (Yakob 2:19) Kwitin anch tumwijika Yehova mudi muntu ni kumuchingejin nakash. (Kuseng 78:5-8; Jinswir 3:5, 6) Chirumburikin kwitiyij ni muchim wetu wawonsu anch kutesh yijil ni yany ya Nzamb kudi mulong wa kuwap kwetu. (Isay 48:17, 18) Mu ritiy mudi kand kwikal nich kashinsh kakash anch Yehova ukez kuwanyish kushilamu kwend kwawonsu ni ukez “kufutan kuwap kudi antu awonsu akata kumusurab.”—Hebreu 11:1, 6; Isay 55:11.

11. Mutapu wayiyukishau Yoshua ni Kaleb mulong wa ritiy rau?

¹¹ Ritiy riner riyil kurutu. Rikat kupam mudi mutushicha kwambatan nich uyakin, “pakany” ya kutaninamu, “utalany” yakul ku malembil metu ni, mu jinjil jikwau, uteshany umutakel wa Yehova mu mwom wetu. (Kuseng 34:8; 1 Yohan 5:14, 15) Tukutwish kwikal ni kashinsh anch ritiy ra Yoshua ni Kaleb rading rikash papakau kuwap kwa Nzamb. (Yoshua 23:14) Tushinshikinany manans manam: Apanda mu weny wa mivu 40 mwi mpay, mudi mwashilayimu Nzamb. (Kuchind Michid 14:27-30; 32:11, 12) Ayinkisha mwaz ujim mu mivu musamban ya kukwat Kanan. Kwisudiel, asangera mwom ni ukash wa mujimbu uwamp ni atambula uswan wau wa pakampwil. Chakin kamu, Yehova ukat kuyifut antu akata kumusadil nich kushinshaman ni kwikasikesh!—Yoshua 14:6, 9-14; 19:49, 50; 24:29.

12. Mutapu ik ukatay Yehova ‘kutumbish dizu diend’?

¹² Rukat rudimukina ra Nzamb pantaliken nend Yoshua ni Kaleb rituvurishin mazu manam ma nfund a kuseng: “Ey wawanyisha kushilamu kwey ni kupandikesh, nikutumbish dijin diey ni dizu diey.” (Kuseng 138:2) Pakatay Yehova kusadil dijin diend mulong wa kukasikesh kushilamu kwend, kuwanyin kwa kushilamu kwinoku kukat ‘kutumb’ mulong kukat kupandikanamu kuchingejin kwawonsu. (Efesus 3:20) Mwawiy, Yehova kand kal ayidimbangap antu akata ‘kusanger’ mwi ndiy.—Kuseng 37:3, 4.

Muntu “Wamusangarisha Nzamb”

13, 14. Ov, mulong wak Enok waswirikena ritiy ni kwikasikesh?

¹³ Tukutwish kwilej yom yivud piur pa ritiy ni kukasikan anch twashinshikin chilakej cha kaman umwing wa kurutu kwa Ukristu—Enok. Ap kurutu kwa kusambish kubwak, chakin kamu Enok wadinga wij anch ritiy ni kukasikan kwend yikez kupakiu. Mutapu ik? Mulong Yehova walonda mu Eden anch kukez kikal ukankuny, ap anch rukis, pakach pa antu amusadidila Nzamb ni antu amusadidila Satan Djabul. (Disambishil 3:15) Enok wadinga wij kand anch rukis riner rasambisha kamu kwinsambishil kwa rusangu ra muntu pa chisu chamujipay Kain mwanchend Abel. Chakin, tatukwau, Adam, washakama piswimp mivu 310 kudiosh kwavadikinay Enok.—Disambishil 5:3-18.

¹⁴ Pakwez, kwikalap nchik yishiken yiney, nich kwikasikesh Enok, “wenda pamwing ni Nzamb [wakin]” ni wafisha nich “yisalijok yau yiyimp” yadingau antu ni kulond piur pa Yehova. (Disambishil 5:22; Yuda 14, 15, MM ) Kwiman dang kwinoku wakad wom ku mutambu wa difukwil diakin kwamuletina Enok akankuny avud, chawiy mwom wend wikala mu ubaj. Pa chinech, Yehova wamwipukishaku muprofet wend ku kusansan kwa rufu. Kupwa kwa kumulej Enok anch “wamusangarisha Nzamb,” Yehova ‘wamushemunina’ pamwing ap wamuladika tul twa uprofet, pawiy pamudioshay mwom wafa kamu.—Hebreu 11:5, 13, MM; Disambishil 5:24.

15. Enok wayishila Atushalapol a Yehova ilel unou chilakej ik chiwamp?

¹⁵ Kupwa kamu kwa kwisambin kumushemunin Enok, Paul wisambina kand usey ujim wa ritiy, palonday anch: “Wakad ritiy muntu kakutwishap kumusangarish Nzamb.” (Hebreu 11:6) Inge, ritiy rawiy ramukasikesha Enok kwend pamwing ni Yehova ni kuyilej antu ayimp uruu wa dirumburish dia Nzamb mulong wa mangand makad kumwitiyij Nzamb. Pa chinech, Enok watushila chilakej chiwamp. Niyetu tukwet mudimu wa mutapu umwing wa kusal mu mangand mapompatina difukwil diakin ni mizwila too nich milad kushalijan ya uyimp.— Kuseng 92:7; Mateu 24:14; Kuburik 12:17.

Kwikasikesh Kudiokila ku Kumwov Nzamb Wom

16, 17. Abidias wadinga nany, ni wadinga mu mwikadil ik?

¹⁶ Kuwejin pa ritiy, kudi ngikadil yikwau yiwejidina ku kwikasikesh, pamwing ni wom wa kumwifukwil Nzamb. Tushinshikinany chilakej chijim cha muntu wamwova Nzamb wom wadingaku mu machuku ma muprofet Eliya ni Mwant Akab, muntu wayikela mu want wa kwindum wa Isarel. Pa winyikel wa Akab, difukwil dia Baal diapalangana nakash mu want wa kwindum. Chakin, aprofet 450 a Baal ni aprofet 400 a miyombu yitumbila, ni chijingidij cha chid cha usany cha mujimbu, adinga “kudia ku mes ya Yezebel,” mukajend a Akab.—1 Ant 16:30-33; 18:19,NW.

¹⁷ Yezebel, mukankuny mwin chisum wa Yehova, wasota kujiyish difukwil diakin mwi ngand. Wayijipa aprofet amwing a Yehova ni wasota kumujip Eliya, muntu watakelau kudi Nzamb chakwel achina ni kwauk Yordan. (1 Ant 17:1-3; 18:13) Ov, ukutwish kutongin mutapu chadinga chikash kukwatikesh difukwil diakin mu want wa kwindum pa chirung chinicha? Chipandikenamu nakash, ov, chela kwikal nchik anch wadinga ni kusal mudimu ku chikumbu cha mwant? Mwawiy mu mwikadil mwadingay Abidiasa mwin kumwov Nzamb wom, kashalapol wa chikumbu cha Akab, warisha nich mwikadil winou.—1 Ant 18:3.

18. Chom ik chamwikadisha Abidias mwin kumwifukwil Yehova wa pakampwil?

¹⁸ Pakad kwidjidjek, Abidias wadinga mbabej ni mwin manangu mu kwifukwil kwend kwamwifukwilangay Yehova. Chikalap nchik mwamu, ndiy katunap ritiy rend. Chakin kamu, 1 Ant 18:3,NW utulejin anch: “Abidias wamwova Yehova wom nakash.” Chakin, wom wa Abidias wamwovay Nzamb wadinga wa pakampwil! Wom winou, wamukasikesha nakash, ndiy wachimekesha kapamp kamwing payijipau aprofet a Yehova kudi Yezebel.

19. Chom ik chasalay Abidias chimekeshina kwikasikesh kwend?

¹⁹ Mu 1 Ant 18:4, tutangin anch: “Chikala anch, payijipay Yezebel aprofet a Yehova, Abidias wasenda aprofet chitot ni wayijindjika makum matan, makum matan mu mandam, ni wayinkisha mabot ni mem.” Mudi muukutwisha kutong, kuyidish amakundj chitot ku ujindj wadinga mudimu umwing wa ubaj. Abidias kafanyinap kusu kuchin anch kangal Akab ni Yezebel amukwata pakwez wafanyina kand kwipuk anch kangal aprofet 850 adinga ni kwezang ku chikumbu cha mwant amujingunina. Kuwejin pa chinech, in kwifukwil avud a makasu adinga mwi ngand, kudiosh ku atuzwendj djat ku anat, ela kwikal nich uman wa kumusaul nich Abidias mulong wa kusot kwitiyik kudi mwant ni kudi mwant-mwad. Ap anch in kwifukwil inay awonsu a makasu adinga ni kuman, nich kwikasikesh Abidias wawanyisha maswir ma aprofet a Yehova. Kumwov Nzamb wom kukutwish kwikal musul wa kwikasikesh chakin kamu!

20. Ov, mutapu ik wom wa Abidias wamwovay Nzamb wamukwasha, ni chilakej chend chitukwashin nchik?

²⁰ Mulong Abidias wikasikesha kusutil ku kumwov Nzamb wom, Yehova wamujindjika kudi akankuny nend. Jinswir 29:25 jilondil anch: “Wom wa muntu udi mupit wend amwinend, pakwez muntu ukungamedina [mudiay Yehova] ukez kashakam zong wakad kwakam.” Abidias kadingap muntu wa pakampwil; wova wom wa kumukwat ni kumujip, mudi mutukutwisha niyetu kwov wom. (1 Ant 18:7-9, 12) Ap mwamu, kumwov Nzamb wom kwamukasikesha kupandikan wom wa muntu ukutwishay kwov. Abidias udi chilakej chiwamp kudi etu, pakampwil kudi antu amwifukwidila Yehova mu chilik cha kutek want ipau ap mwom wau mu ubaj. (Mateu 24:9) Mwawiy, tusalany etu awonsu usu wa kumusadil Yehova “nich kalimish ni wom.”—Hebreu 12:28, MM.

21. Chom ik tukwisambina mu mutu wa mulong wambakedinap ou?

²¹ Ritiy ni kumwov Nzamb wom kiyawiyap kusu ngikadil yikata kukasikeshan; rukat rikutwish kwikal ngikadil ya usu nakash. Paul wafunda anch: “Nzamb katwinkap muchim wa wom, pakwez wa usu, ni wa rukat, ni wa kwirijek.” (2 Timoteu 1:7) Mu mutu wa mulong wambakedinap ou, tukez kuman mutapu rukat rikutwisha kutukwash kumusadil Yehova nich kwikasikesh mu chirung chinech cha machuku ma kwisudiel.—2 Timoteu 3:1.

[Mazu madia kwishin kwa paj]

Ov, Ukutwish Kwakul?

• Chom ik chamukwasha Yoshua ni Kaleb kukasikan?

• Yom ik yidia mu ritiy rakin?

• Ov, mulong wak Enok kovap wom wa kulejan uruu wa dirumburish dia Nzamb?

• Ov, kumwov Nzamb wom kukat kuwejin nchik ku kwikasikesh?

[Chipich chidia pa paj wa 15]

Yehova wamwela Yoshua anch: “Ikal mukash ni kwiman dang”

[Chipich chidia pa paj wa 17]

Enok walejana dizu dia Nzamb nich mushiku