Yany Kudi Akadivar Atakedininga Yikunku ya Chikumangan cha Mudimu
Mudi musambishina nich Mudimu Wetu wa Want winou, mazu ma kusambish nich program wa Chikumangan cha Mudimu mafanyidin kwikal makemp. Yany ni yivurish yilondwilaku ey yambaten ni yilejen patok mutapu wasambisha mutu wa mulong ulondila anch “Mutapu wa Kurijek Chikumangan cha Mudimu,” wabudishau mu Mudimu Wetu wa Want wa pa Ndol-mem 2009:
◼ Diskur: Chikunku chinech chisambidin diskur diengamidina pa yom kanang yatondinau pakwez chisambidinap chikunku cha minsamb nau in kutesh. Mwin kulond ufanyidin kukasikeshin pa yom yivud yikutwisha kukwash nakash chikumangen.
◼ Yipul ni Yakul: Mudi mudinga kamu dilejan dia Chinong cha Kalam, chikunku chinech chikwet mazu ma mu wiswimp ma kutakel nich pamwing ni mzu ma kupwish nich, ni yipul yipwilau mu maparagraf mawonsu. Mwin kutakel kafanyidinap kupan yirumburil nakash nakash. Akutwish kutang Mifund anch kudi chisu. Chifanyidinap kutang maparagraf, ching anch yany yilejen kusal mwamu.
◼ Minsamb: Dined didi diskur dikweta minsamb nau in kutesh. Kididiap diskur diamwamu kusu, ni kididiap kand ni yipul yawonsu ni yakul.
◼ Yakumenaku ni ma interview: Yany ya kusal nich Chakumenaku yirumburil anch mukadivar ukusala chikunku chinech ukwet chisend cha kuwejaku chakumenaku; pakwez kakwetap mbil ya kusadish chakumenaku chendendiy. Akadivar ni anambaz akutonday kusal chakumenaku afanyidin kwikal ayifuvu ni yilakej, ni ufanyidin kwirijek nawamp win pamwing nau kurutu kwa chisu anch chitwishikin. Kichidiap chiwamp kutond mwin kulejan musu ni wakad uman chakwel amekesh mutapu ukusalau chikunku kusu ni kuyinkish chisu cha kusut kurutu, ap anch amwing akutwish kusal mudi in chikumbu. Pasadilingau in kulejan chakumenaku afanyidin kutalijan nau in kutesh. Akadivar asadilinga inteview arumburiling ku yipul yidiokilinga ku chimet kupandakanamu ashicha mu chikumangan. Chifanyidin kurijek yakumenaku ni ma interview kurutu kwa chisu anch akwinkishanyay. Anch chikumangan chisutishin chisu, mukadivar ukutwish kwiswimpish chikunku, ukwipuk kusadish yakumenaku ni ma interview. Ankwash a mudimu akutwish kutenchik pamwing ni ntakel wa chisak cha amakurump ap ni mukurump mukwau kurutu kwa kutond akusala yikunku yiney.
Anch chikunku chimwing chikwet yany ya pakampwil, chifanyidin kuyilondul nawamp win kamu. Chakwel kutakel yikunku ya program wa Chikumangan cha Mudimu nawamp, akadivar akuchisal mu mutapu wa kusutish “yom yawonsu ayisala mu kuwanyin ni mu kufanyin.”—1 Kor. 14:40.