Chisu Cha Chivurikish—Chisu Chiwamp Cha Kutanduril Mudimu!
1. Ov, yiyingish ik tukwet chakwel tushinshikin mudimu wetu pa Rish, Ndol, ni Ndol-Mem?
1 Ov, ukutwish wipan chakwel utanduril mudimu wa kulejan pa chisu cha Chivurikish chikwezap ech? Chikez kwikal chisu chiwamp ku jindond jivud cha kusutish asaa a muten mu mudimu winou muten ni urel. In kulejan amwing akeza kutambul konje ku mudimu ap ku shikol akutwish asutish chisu chinech mu mudimu wa kulejan. Kusambishil pa Ndol 2, tukez kusanger kampany wa pakampwil chakwel tuyitazuk antu akusangara kwez kukumangan netu ku Chivurikish pa Ndol 17. Kupwa, tukez kusanger kukasikesh musangar wa antu chakwel eza akumangana ku diskur dia pakampwil dikeza kusadik pa rubing ra Ndol 25. Chakin kamu, kudi yiyingish yivud tufanyidina kushinshikin chakwel tutanduril mudimu wetu pa Rish, Ndol, ni Ndol-Mem.
2. Ov, mutapu ik upandakena kuwap tukutwisha kusal chakwel tutanduril mudimu wetu wa kulejan?
2 Mudimu wa Uchibol Nkwash: Mutapu umwing upandakena usey udi wa kusal nakash mudimu wa uchibol nkwash. Pakwez etu awonsu tukwatiken nakash ni midimu, ni chinech chitin kamu kwirijek kurutu ni kusal yitenchik mu program wetu. (Jinsw. 21:5) Pamwingap ukutwish kukepish midimu yimwing yakad usey mu mashakamin mey. (Fil. 1:9-11) Ov, mulong wak umekeshinap maswir ma kusal mudimu wa uchibol kudi antu akwau mu chikumangen chakwel utal anch akutwish kwinung kuudia ey mudi ayibol nkwash?
3. Ov, mutapu ik ukutwisha majuku kutenchik chakwel matanduril kusal chom chipandakena usey mu mujikit wau?
3 Pa chisu chikwau cha urel wa Kwifukwil mu Dijuku, chikutwish kwikal chiwamp kwisambin jintong jen ja mu dijuku. (Jinsw. 15:22) Anch usadinany mu kwovijan, pamwingap yid yimwing ya mu dijuku yikutwish kusal mudimu wa uchibol nkwash pa ngond umwing ap avud. Ov, mulong wak ukwetap kashinsh anch chinech chikutwish kamu chasadik? Pamwingap dijuku dikutwish kand kutenchik chakwel ditanduril mudimu wadi kusutil ku kwipan mu mudimu wa kulejan pa maurel mamwing ap kuya kulemp pa machuku ma kwinsudiel kwa jimbing.
4. Ov, yiyukish ik yikeza kudiokil ku kutanduril mujikit wetu wa kulejan pa chisu cha Chivurikish chinech?
4 Yehova umening yom yawonsu yitusadininga chakwel tumusadil ni ukat kusanger mausu metu. (Heb. 6:10) Musangar udiokiling ku kumwinkish Yehova ni antu akwau. (1 Jnsg. 29:9; Mid. 20:35) Ov, ukutwish kutanduril mujikit wey pa chisu chinech cha chivurikish ni kuvudish musangar ku yiyukish yikubudikinaku?