Mitapu Yitan ya Kutan Dilejan dia Bibil
1. Anch chidi chikokujol cha kutan dilejan dia Bibil mu teritwar wetu, ov, chom ik tufanyidina kusal, ni mulong wak?
1 Ov, wataninap kal chikokujol cha kutan muntu kanang ukutwisha kwilej nend Bibil? Dandamen kusal mwamu. Yehova uyiyukishining antu akad kuziy mu kusal rusot rend. (Gal. 6:9) Yitongijok yitan yidia kwishin oku yikukukwash.
2. Ov, mutapu ik tukutwisha kuyishejin antu kapamp kamwing chakwel tusambisha dilejan?
2 Kumushejin Muntu Kapamp Kamwing: Antu avud ij anch tupanining Chinong cha Kalam ni Réveillez-vous !, pakwez kakutwishap kwijik anch tukwikal nich malejan ma Bibil. Ov, mulong wak ukupakishap kumushejin muntu kapamp kamwing chisu uyilinga ku chikumbu ni chikumbu? Ukutwish kand kuyipul antu watanijana nau asangaredina anch akutwish kusot dilejan dia Bibil. Anch alikin, ukutwish kudandamen kupan mikand ni kukudish musangar. Mukadivar umwing wading ni kuyendil ambay amwing a uruw ading mudi antu a mwi njil yend ya kupanin magazet pasutin kal mivu. Padingay piswimp ni kuya, kupwa kwa kuyinkish magazet masu, ndiy wavurika ni wayipula anch: “Ov, ukutwishany kusot dilejan dia Bibil?” Chamushimokisha pakulau anch tusotin. Nlel unou ambay a uruw inay adi ababatishau kal.
3. Ov, tufanyidin kutong anch antu akumangeninga ading in kwilej Bibil ni muntu kanang? Rumburil.
3 Kuyipul Antu Asangaredina Kukumangan: Kangal watong anch antu umeninga amekeshina musangar ku yikumangan ya chikumangen anch ading kal in kwilej Bibil. Mukadivar umwing ulondin anch: “Chikunku chimwing ni kusut cha malejan nikweta nasambisha kwilej nau kusutil ku kwambamb ni antu akumangananga ku yikumangen.” Nambaz umwing wakwata mupak wa kumushejin mband umwing mwin usany wading ni ayangadim ababatishau kal ading mu chikumangen. Mband winou wakumangananga ku yikumangan pasutin kal mivu 15 ni yisu yawonsu wading ni kwez ku Chot cha Want kwisambishin kamu kwa chikumangan ni wabudikanga kamu kupwa kwa chikumangan. Mband winou witiya kwilej ni kupwa weza mu uyakin. Nambaz ufundina anch: “Nova kamu runeng pinasutisha mivu 15 pakad kumwipul anch ukusot kwilej!”
4. Ov, mutapu ik tukutwisha kutan dilejan kusutil kudi antu a chijiken?
4 Antu a Chijiken: Nambaz umwing wasala usu wa kuyitwal antu akwau ku malejan mau ma Bibil. Nich mbil ya ntakel wa dilejan, kwi mpwishil kwa dilejan ndiy wamwipula mwin kwilej anch wij antu kanang akusangera ayinau kwikal in kwilej. Chisu upanininga buku Chifundishay Bibil kudi muntu kanang kapamp kamwing ka kutanijan nend, ukutwish kumwipul anch: “Ov, wijap muntu mukwau ukusangera buku winou?” Yisu yivud, mashakamin mayikangeshining in kulejan ni ayibol kutakel malejan pamwing ni antu ataniningau mu teritwar. Chawiy, el antu akwau ijik anch ukutwish kutakel dilejan dia Bibil.
5. Ov, mulong wak tukutwisha kuyipul antu akad kwikal akaritiy akweta ambay nau a uruw adia yid ya chikumangen anch akusot kwilej?
5 Ambay a Uruw Akad Kwikal Akaritiy: Ov, mu chikumangen chen muding in kulejan atijadina ni antu akad kwikal akaritiy? Antu amwing akad kwikal akaritiy alikining kwisamb piur pa Bibil pamwing ni ambay nau in Kristu pakwez akutwish kwitiyij diladikij chakwel ileja pamwing ni muntu kanang wakad kwikal mu dijiku. Yisu yimwing chiwapining kumwipul ikundj ap mband udia mukaritiy kurutu kwa kwisamb ni mbay nend wa uruw udia wakad kwikal mukaritiy.
6. Ov, mutapu ik malembil makweta usey chisu cha kupakish kukimb malejan ma Bibil?
6 Malembil: Kangal wadiulany usu wa malembil. (Jak. 5:16) Yehova ukanin anch ukutesh kwit kwetu anch kwambaten nich rusot rend. (1 Yoh. 5:14) Mukadivar umwing wadinga ukwatiken nakash nich program wend wasambisha kulembil mulong wa kwikal nich dilejan dia Bibil. Mukajend wiyipula anch nfumwend ukutwish kwikal ni chisu cha kumubangin mwin kwilej, pakampwil chisu chadingay mwin kwilej nich milong yivud. Chawiy, mukajend wasambisha kumwijikish Yehova milong yiney palembidinay mulong wa nfumwend chakwel atana dilejan. Malembil mau amakula pasuta ambing aad chisu chatanay chibol umwing muntu mu chikumangen wasota kwilej ni kupwa kwa machuku makemp ndiy wamupana muntu winou kudi mukadivar winou. Mband ufundin anch: “Kudi antu in awonsu akutwish kutong anch kutakel dilejan dia Bibil kukutwish kwayikasiken, nilondin anch: Ikalany in kashinsh mu malembil men ni kangal wimikany kulembil pa mulong winou. Tukwet musangar uvud kupandakanamu wakad am kutongijokin.” Dandamenany, niyenen ukutwishany kand kutan malejan ma Bibil ni ukutanany musangar wa kumukwash muntu kanang chakwel andama ‘mwinjil yitwadila ku mwom.’—Mat. 7:13, 14.