Mutapu Ukutaninamu mu Chisak Chey cha Mudimu wa Chingand

1. Ov, ditenchik dia Dilejan dia Buku dia Chikumangen diading ni yiyukish ik yiwanidina kusutil mu chisak chetu cha mudimu wa chingand?

¹ Ov, wavuramedin kal milad yimwing ya Dilejan dia Buku dia Chikumangen? Yisak yading yikemp ni kushakam kwading kwa minsamb yiwamp kamu. Chinech chasalanga anch dilejan dined dikudisha urund wa piswimp wadinga musul wa ukwash wa muspiritu. (Jinsw. 18:24) Kalam wa dilejan dia buku wading wij mashakamin metu ma pakampwil ni watwishanga kutwinkish ukwash wa muntu ipend. (Jinsw. 27:23; 1 Pita 5:2, 3) Yiyukish yiney yading kamu yiwanyidina kusutil mu chisak chetu cha mudimu wa chingand.

2. Ov, mutapu ik tukutwisha kwikal wa kusambish ku kukudish urund wa piswimp mu chisak chetu cha mudimu wa chingand udia musul wa ukwash wa muspiritu?

² Ikal wa Kusambish: Yisu yivud yisak ya mudimu wa chingand yidi ni uvud wa antu wa chilik chimwing mudi mwadinga yisak ya dilejan dia buku. Kusutil mu kusal mudimu wa kulejan ‘pamwing’ ni antu akwau kukutwish kwakasikesh urund wa piswimp. (Fil. 1:27) Ov, wasadin kal ni antu inch adia mu chisak chey? Ov, ukutwish ‘kwanzuril kand muchim wey’ pa mulong winou? (2 Kor. 6:13) Chikwau kand, yisu yimwing tukutwish kumutazuk muntu kanang udia mu chisak chetu chakwel inunga netu mu urel wetu wa Kwifukwil mu Dijuku ap ku yakudia. Mu yikumangen yimwing, yisak ya mudimu ya chingand yipanining ukwash wa kumwak mwi kulond ngendj. Pa rubing rikwendilay mwin kulond ngendj mu chisak chau, chisak chikutek yakudia pamwing ni kukasikesijan ap anch mwin kulond kakutwishap kuchingel.

3. Ov, yisu ik yimwing yifanyidina kutambul ukwash wa ukafung mu chisak chetu cha mudimu wa chingand?

³ Ap anch nlel unou chikumangen chikumangening pamwing tupamp twaad pa rubing, chinech chirumburikinap anch in kulejan kafandinap kuyital kwa ukafung. Atulam a yisak ayitonda mu chisak ni chisak chakwel apana dikasikesh ni kumwijidish muntu ipend mu mudimu wa kulejan. Anch kalam wen wa chisak kandikal atenchika chakwel aya ney mu mudimu wa kulejan, ov, mulong wak ukumulejap chakwel uya nend? Chikwau kand, kalam wa chisak ukwipan mu mudimu wa kulejan pamwing ni chisak kushalijan pa kupwa kwa rubing ngond ni ngond. Mu yikumangen yikemp mudia ching kusu yisak yikemp ya mudimu wa chingand, ndiy ukutwish kutenchik chakwel endila chisak ni chisak tupamp twaad pa muvu. Ov, watenchikin kal program wey chakwel uya mu mudimu wa kulejan chisu chikwendilay mu chisak chen?

4. (a) Ov, mutapu ik utenchikiningau yikumangan ya mudimu wa chingand? (b) Ov, mulong wak tufanyidina kupan yikumbu yetu mulong wa yikumangan ya mudimu wa chingand?

⁴ Yisu yivud chiwapining chisak ni chisak kukumangan panrau mulong wa mudimu wa chingand kupwa kwa rubing. Kwikal ni ndond yivud ya kukumangen mulong wa mudimu wa kulejan pa chisu chimwing chiwanyidina kukutwish kwayiswapel in kulejan kuya kukumangan mulong wa mudimu wa kulejan ni pamwing ap kuya mu teritwar. In kulejan akutwish kwirijek swa ni kuya mu teritwar pakad kulab. Chikumuswapel kand kalam wa chisak chakwel ata muchim kudi antu adia mu chisak chend. Pakwez, mikadil yikutwish kusal anch yisak yaad ap yivud yibomba. Anch chikumangen chakabuj chakumangan pamwing mulong wa mudimu wa kulejan pa Diampos dia kusambish pa ngond ap kupwa kwa Dilejan dia Chinong cha Kalam, yisu yivud chidi cha ukwash pasadikininga chikumangan chinech kwinkish chisak ni chisak minit yikemp chakwel kalam wa chisak atenchika chisak chend kurutu kwa kupwish chikumangan cha mudimu wa chingand nich malembil.​—Tal mushet “Ov, Ukutwish Kupan Chikumbu Chey?”

5. Ap anch ditenchik dia Dilejan dia Buku dia Chikumangen diapwil kal, ov, tukutwish kwikal nich ruchingej ik?

⁵ Ap anch ditenchik dia Dilejan dia Buku dia Chikumangen diapwil kal, Yehova udandamedin kutwinkish yom yawonsu tuswiridina chakwel tusala rusot rend. (Heb. 13:20, 21) Pitudia mwishin mwa diking dia Yehova, tukuburenap chom ap chimwing. (Kus. 23:1) Kudi yiyukish yivud yiwanyidina kutambul kusutil ku chisak chetu cha mudimu wa chingand. Anch twikal akusambish ni ‘in kukun yivud,’ tukez “kwangul kand yivud.”​—2 Kor. 9:6.

[Sanduku katika ukurasa wa 6]

Ov, Ukutwish Kupan Chikumbu Chey?

Yikumangen yimwing yibombining yisak yau ya mudimu wa chingand pa kupwa kwa rubing mulong kuding yikumbu yikemp ya kukumangen. Yikumangan ya mudimu wa chingand yiding ditenchik dimwing didiokila mu chikumangen, chawiy kwikal nich yikumangan yiney ku chikumbu chey chidi chisend chiwamp win kamu. Ov, ukutwish kupan chikumbu chey? Kangal widjidjek mulong mutapu umena chikumbu chey chidia. Amakurump akez kushinshikin mutapu udia chikumbu chey ni yom yikwau ya chilik chimwing yitadina ndond mudi mwadingau ni kutond jindond jasadikinanga dilejan dia buku. Anch usotin kupan chikumbu chey, mwijikisha amboku kalam wen wa chisak.