Kubudik Pamwing mu Kupan Uman Kuletining Musangar
Chisu chayitumay in kwilej end 70 kulejan, Yesu wayinkisha yany piur pa yom yikulondau, wayangana aad-aad, ni kuyilej teritwar mwadingau afanyidin kulejen. Chinech chayiletina musangar. (Luka 10:1-17) Chilik chimwing nlel, kupan uman pamwing kukwashin chakwel kuyiwanyish, kuyitenchik, ni kuyikasikesh antu a Nzamb mulong wa mudimu wa kulejan.
2 Amakurump Akata Kutakel: Amakurump akwet mudimu wa usey wa kuyikwash antu awonsu kubudikin mu mudimu wa kulejan pakad kujing. Kalam’a mudimu ukat kutakel mu kusal yitenchik mulong wa mudimu wa mukach mwa rubing. Ntakel ni ntakel wa dilejan dia buku ukwet chisend cha kurijek mujikit mulong wa chisak chend nakash kamu kwisudiel kwa rubing. Pa yisu yikata kukumangan chikumangen chawonsu mulong wa mudimu wa chingand, mud yikatau kukumangan kupwa kwa dilejan dia Tour de Garde, kalam ni kalam wa dilejan dia buku ufanyidin kudimukin maswir ma chisak chend cha dilejan dia buku.
3 “Kuyirijek Nawamp Wakad Kurumbangan”: Muntu ukutondau kutakel chikumangan cha mudimu wa chingand ufanyidin kusambish pa chisu ni kupwish chikumangan mu aminit 10 ap 15. Chipandaken kuwap anch arijeka mulong wa kubudik pamwing mu kupan uman ni kwangan teritwar (pakwez kalam wa dilejan dia buku ukez kudimukin chinech, mud kamu muchilejenau kwinsambishil) kupwa ukupwish nich malembil. Chinech chikat kukepish maswir ma in kulejan ma kukumangen mu teritwar mulong wa kulejan, mukutwishau kuman nich usey ukemp kalimish ka mudimu wetu. Chambaten kand nich chiyul cha Paul chilondila anch: “Chifanyidin usalany yom yawonsu ni kuyirijek nawamp wakad kurumbangan.” (1Kor. 14:40) Antu awonsu akumangena ku yikumangan yiney afanyidin kupan ukwash chakwel ditenchik dined ditwishika mu kushik pa chisu, kusadil nakash pamwing nend muntu utakedila, ni kuya swa mu teritwar ukwanganau.
4 Tudandamenany Pamwing mu Umwing: Ditenchik dia kupan uman pamwing dipanin yisu yiwamp mulong wetwetu kuyijik akwetu mu chikumangen. Anch kwikil chikangesh cha kwirijek kurutu kwa chisu chakwel kubudikin mu mudimu ni muntu kampand, chikwikal kand cha ukwash kukumangan ku yikumangan ya mudimu wa chingand pakad kwovijan kurutu ni muntu mukwau. Akutwish kutwinkish kusal mudimu ni muntu umwing twakad kwijik nawamp, chinech chikutukwash ‘kujimb’ mu rukat retu.—2Kor. 6:11-13.
5 Kupan uman pamwing kutukasikeshin ni kudandamedin kutubomb pamwing mud “ambay a mudimu mu uyakin.” (3Yoh. 8, NW) Tukutwish kusadil nakash mu kupan uman pamwing!