Kujikitish Mulong wa Ranaken ra Nzamb
Kurutu kwendendiy kwikal mwin Kristu, kambuy Paul wakangesha nich chisum kupalangesh kwa Ukristu. Pakwez, mulong wasala chisal chinech pakad kwijik, ndiy amumekeshina ranaken. Yehova wamekesha rukat ridimukina, ni wamwinkisha Paul mudimu wa kulejan. Paul wasenda mudimu winou nich usey nakash. (Mid. 26:9-18; 1Tim. 1:12-14) Kujikitish mulong wa ranaken ra Yehova kwamubachika Paul chakwel kwipan amwinend mu kuwanyish mudimu wend wa kulejan.—2Kor. 12:15.
2 Mud kumekesh kwa ranaken ra Nzamb, etu niyetu atwinkishin kal mudimu. (2Kor. 4:1) Mud Paul, tukutwish kumekesh kujikitish kwetu mulong wa ranaken ritumekeshidinau kusutil ku kwipan kwetu ayinetu mu kuyikwash antu akwau kuya kurutu muspiritu. Njil yimwing tukutwisha kusal mwamu yidi kusutil kusambish ni kutakel malejan ma Baibel.
3 Kusambish Malejan ma Baibel: Mutapu wa kusambish malejan ma Baibel udi kusutil ku kusal njil ya kwangen magazet. Pitukata kuyendil antu adia mwi njil ya kwangen magazet pakad kujing, tukat kwijik nawamp maswir mau. Chisu chimwing mutu wa mulong wa gazet umwing ukutwish kuusadil mud chakusambish nich minsamb mulong wa kusambish dilejan dia Baibel mu broshir Nzamb Witin. Pa kumwendil kukulondula, chikwikal chitwishikina kudandamen kwisambin mu broshir Nzamb Witin chisu uchirikina kupan magazet kud mwin chikumbu.
4 Chiswiridin Malembil ni Kusal Usu: Kwinung mu malembil nich mushiku kukez kukwash mujikit wetu wa kulejan. Nambaz umwing chibol wadinga ni mwin kwilej wa Baibel walembila anch Yehova ukutwish kumuyukish chakwel kwikal nich malejan ma Baibel mavud. Wasala kand kwambatan nich malembil mend. Washinshikina nakash piur pa mudimu wend ni wajingunina nawamp anch kadingap ni kuyilej antu ya kwilej nau Baibel chisu chadingay ni kusal kuchirikinamu kusu. Wasambisha kusal mwamu ni pakad kulab wikala nich malejan maad ma Baibel chisu chadingay ni kusal kuchirikinamu kusu.
5 Chidi chiyukish mud ik cha kusadil pamwing mu kwijikish “rusangu ruwamp ra ranaken ra Nzamb”! (Mid. 20:24) Likany kujikitish mulong wa ranaken ra Nzamb kutubachik chakwel kwikal nich mushiku mu kuyikwash antu akwau kwitapil dilau dia ranaken ra Yehova.