Salany Chirung Chinech cha Chivurikish Chikala Chirung cha Musangar!
1. Ov, mutapu ik umwing wa kujimbish musangar wetu pa chirung chinech cha Chivurikish?
1 Ov, ukusot kujimbish musangar wey pa Rish, Ndol ni Ndol-Mem? Mutapu umwing wa kusal mwamu udi wa kutanduril mudimu wey wa kulejan ni kusal mudimu wa uchibol nkwash anch chitwishikin. Ov, mutapu ik chom chinech chikeza kujimbish musangar wey?
2. Ov, mutapu ik kutanduril mudimu wetu wa kulejan kuletininga musangar uvud?
2 Jimbish Musangar Wey: Yehova watutanga nich ukaliweny chakwel twikala nich musangar ni mazang yidiokila ku kumwifukwil pituwanyishininga maswir metu ma muspiritu ma chivadik. (Mat. 5:3) Ndiy watutanga kand mu mutapu winou chakwel tutana musangar kusutil ku kwipan mulong wa antu akwau. (Mid. 20:35) Mudimu wa kulejan utukwashining kuwanyish maswir minam maad—kumwifukwil Nzamb ni kuyikwash antu akwau. Chimeken patok anch kwipan nakash mu mudimu wa kulejan kuletining musangar ujim. Chikwau kand, pitulejena nakash, tukwikal nich ukaliweny uvud. Pitukutaninamu ukaliweny, tukukudish ruchingej retu ni tukukepish wom wetu. Tukez kwikal nich yisu yivud ya kupan uman ni ya kusambish malejan ma Bibil. Yitenchik yiney yawonsu yisadining chakwel mudimu wa kulejan wikal usangareshina nakash.
3. Ov, mulong wak Rish ni Ndol akez kwikal angond awamp a kusal mudimu wa uchibol nkwash?
3 Rish ni Ndol akez kwikal angond awamp a kusal mudimu wa uchibol nkwash mulong tukutwish kutond kuwanyish asaa 30 ap 50 itinau. Chikwau kand, kusambishin Diampos pa Rish 22 djat ni Diakaj Kamwing pa Ndol 14 dichuku dikusadika Chivurikish, tukez kwipan mu kampany usangareshina chakwel tuyitazuka antu akwau kwez kukumangan netu ku Chivurikish. Yikumangen yikez kusanger nakash pakezau kusal in kulejan avud pamwing ‘chikij ku chikij’ chakwel awanyish teritwar mujim anch chitwishikin pa chisu chiwanyidina.—Sof. 3:9.
4. Anch tusotin kusal mudimu wa uchibol nkwash, ov, yom ik tufanyidina kusal?
4 Irejika Katat: Anch kandikal usala mwamu, itekina chisu cha kuchirikin program wey chakwel umana yom ukutwisha kutenchik mulong wa kutanduril mudimu wey wa kulejan pa ngond umwing ap angond avud. Jimbul yom yiney mu malembil. (Jak. 1:5) Isambina mulong winou pamwing ni dijuku diey ni in kulejan akwau adia mu chikumangen. (Jinsw. 15:22) Chikalap nchik ukash wa mujimbu ap kwikal nich program ukwatikena nakash, ukutwish kuman ni kutan musangar udiokilinga ku kusal mudimu wa uchibol nkwash.
5. Ov, chibudikin ik tukeza kutan anch twatanduril mudimu wetu wa kulejan pa chirung chinech cha Chivurikish?
5 Yehova usotin atushalapol end ikal nich musangar uvud. (Kus. 32:11) Kusutil ku kwipan ayinetu ku kutanduril mudimu wetu wa kulejan pa chisu chinech cha Chivurikish, tukezap ching kusu kujimbish musangar wetu pakwez tukez kand kumusangaresh Tatukwetu wa mwiur.—Jinsw. 23:24; 27:11.