Yakul Ku Yipul Yen

◼ Ov, chom ik chifanyidinau an kwilej chakwel akula muspirtu?

Anvaj in Kristu asadining usu wau wawonsu wakuyikand anau kusutil ku “dipup ni malejan ma [Yehova].” (Ef. 6:4) Chilakej, anvaj atana ukwash wa kushinshikin mufund wa pichuku-pichuku pamwing ni anau dichuku ni dichuku pamansh. Pa chisu cha difukwil dia mu dijuku ap pa yisu yikwau, majuku makutwish kutal ni kwisambin pamwing video, kwisambin piur pa malejan ma pakampwil madia mu mitu ya milong yidia mu buku Les jeunes s’interrogent, wisambidina pa rusangu ra mu Bibil ap yikunku yimwing ya kusadil. Pakwez, chakwel an ‘aya kurutu,’ afanyidin kand kuyilej nakash uyakin wa Bibil.​—Heb. 6:1.

Tushinshikinany pa yom tuyilejininga antu tusakanijadininga nau mu teritwar wetu. Kapamp ka kusambish ka kumanijan ni muntu ap kakumuchirikin pakad kulab, yisu yivud tusadining usu wa kusambish dilejan dia Bibil kusutil ku kusadil buku Chom ik Chakin Kamu Chifundishinay Bibil? Kupwa kwa kupwish kwilej buku winou, tusadidining buku “Ilamany Ayinen mu Rukat ra Nzamb.” Ov, mulong wak? Mulong buku Chifundishinay Bibil umwinkishining mwin kwilej ronganyin rengamedina pa Mifund. Pakwez, buku “Rukat ra Nzamb,” uyifundishining mutapu wa kusadil yany ya Bibil mu mashakamin mau ma pichuku-pichuku. Kushinshikin mabuku minam maad kuyikwashining in kwilej asu chakwel “andjika mij” mudiay Kristu ni ‘ikasikesha mu ritiy.’ (Kol. 2:6, 7) Ov, malejan minam makutwishap kand kwikal ma ukwash kudi anetu? Awiy akuswir kand kuyifundish piur pa chakupesh, pa Want ni pa mwikadil wa antu. An aswiridin kand kwijik mulong wak Nzamb ulikidinay mar ni mutapu wa kujingunin machiku ma nsudiel ma ditenchik dined dia yom. Awiy afanyidin kwikal nich kashinsh anch Atuman a Yehova akwet uyakin. Ansand aswiridin kand kwijik nawamp yany ya Bibil ni mutapu wa kusadil ‘usu wau wa kujingunin yom.’ (Heb. 5:14) Chakin kamu, anvaj afanyidin kushinshikin pa chimbu cha mivu ni kwijik nawamp chilik cha kutesh kwa anau kwa yom. Pakwez, an avud akweting ukaliweny wa kusambish kwilej nakwash uyakin wa Bibil pachidiau kamu an akemp.​—Luka 2:42, 46, 47.