Wintakel Mulong wa Kuwanyish Rutong ra Nzamb

“[Nzamb] ukat kusadish yom yawonsu mu chiyul cha rukat rend.”—EFES 1:11.

1. Ov, mulong wak yikumangen yawonsu ya Atuman a Yehova yikez kukumangan pa Ndol 12, 2006?

DIAKASATU urel, pa Ndol 12, 2006, piswimp antu mamiliyon 16, akez kukumangan pamwing mulong wa chivurikish cha Yakudia ya Urel ya Nsalejetu. Mwi ndond yimwing ni yimwing ya yikumangan, mukwez kwikal mes pakezau kutek dibot diakad chivish, dibot difanikeshina mujimbu wa Kristu, ni nviny yisuz, yifanikeshina mash mend. Piswimp ni kwisudiel kwa diskur dikurumburila chirumburikina Chivurikish cha rufu ra Yesu, yifanikesh yiney—cha kusambish dibot, kupwa kwalondul nviny—akez kuyisutish kurutu kwa antu awonsu akwikalaku. Mu yikumangen yikemp kusu ya Atuman a Yehova, muntu umwing ap avud mu in kukumangan akez kudia ni kuna yifanikesh. Pakwez, mu yikumangen yivud, mukezap kwikal wa kudia ap kuna. Ov, mulong wak chidia ching kusu in Kristu akemp, in achingejina kushakam mwiur, awiy adilinga ni kuna, oku avud, in antu achingejina kushakam chikupu pa divu, kakatap kudia ni kuna?

2, 3. (a) Mutapu ik watangay Yehova divu kwambatan nich rutong rend? (b) Rutong ik ratanginay Yehova divu ni antu?

² Yehova udi Nzamb ukweta rutong. Mu kuwanyish kwa rutong rend, ndiy “ukat kusadish yom yawonsu mu chiyul cha rukat rend.” (Efes 1:11) Cha kusambish wamutanga Mwanend kapokal. (Yohan 1:1, 14; Kujingunik 3:14) Kupwa, kusutil kud Mwan winou, Yehova watanga dijuku dia an a muspiritu ni mangand mamekena, pamwing ni divu patekay muntu.—Job 38:4, 7; Kuseng 103:19-21; Yohan 1:2, 3; Kolosay 1:15, 16.

³ Yehova katangap divu mud ndond ya kuyipakin antu chakwel kwijik anch akutwish kwikal awanyishinau chakwel kuyiwejin ku dijuku diend dia an a muspiritu didia mwiur, mud mukata kulejan maegliz mavud ma in Kristendom. Ndiy wadinga nich rutong rijikena mu muchim wend patangay divu, chadinga mulong ‘antu ashakamap.’ (Isay 45:18) Nzamb watanga divu mulong wa muntu ni muntu mulong wa divu. (Kuseng 115:16) Divu dia kabuj diela kwikal paradis, dizwila too nau antu atentamina, afanyidina kudidim ni kudilam. Kayinkishap ambay a uruw a kusambish ruchingej ra kwez kuya mwiur.—Disambishil 1:26-28; 2:7, 8, 15.

Rutong ra Yehova Aritadika

4. Mutapu ik watadikau kusadil ukaleng wa Yehova kwisambishil kwa rusangu ra muntu?

⁴ Mwan wa muspiritu wa Nzamb wabwambwila ni wakwata mupak wa kushesh rutong ra Yehova, wasadila nayimp katok ka Nzamb ka want ipend. Wavundangesha chisambu cha antu awonsu amekeshina rukat ra kuziyil ku ukaleng wa Yehova. Satan washikija dijuku diakusambish dia muntu ku kulondul njil ya want ipau pantaliken nend Nzamb. (Disambishil 3:1-6) Ndiy katadikap dikand dia Yehova, pakwez walika mutapu Wend wa kusadil ukaleng ni kupwa kand mbil Yend ya kuyikel. Wawiy mutapu, walanka mulong ukash wa ukaleng wa Yehova panap pa divu, kwisambishil kwin kamu kwa rusangu ra muntu.

5. Mulong ik ukwau walangwishau, ni wayikwata anany?

⁵ Mulong ukwau wambatena piswimp nich mulong wa ukaleng wa mangand udi mulong wa kaad wasarumunay Satan pa machuku menday Yob. Satan watadika chibachikin cha yitang ya Yehova mu Kumuziyil ni kumusadil Ndiy. Satan waleta chitongijok chakwel anch akat kumuziyilang nich mayingish ma ushish ni anch, ang ayipak, akez kumulik Nzamb. (Yob 1:7-11; 2:4, 5) Ap anch chalanka kwambatan nend kashalapol wa Yehova, mulong winou wayikwata kand an a muspiritu a Nzamb, pamwing ni Mwan kapokal wa Yehova.

6. Mutapu ik washinshamanay Yehova ku rutong rend ni dijin diend?

⁶ Chishinshamenay ku rutong rend ni ku kurumburik kwa dijin diend, Yehova wiyikadisha amwinend Muprofet ni Mupandish.a Wamwela Satan anch: “Am nikez kutek rukuny pakach pey ni mband, ni pakach pa mbut yey ni mbut ya mband. Ndiy ukez kukuchany ku mutu wey, niyey ukez kumusum ku kapolantundu kend.” (Disambishil 3:15) Kusutil kwi mbut ya ‘mukajend,’ ap chikunku cha mwiur cha dirijek diend, Yehova wakula ku kusarumun kwa Satan ni wayinkisha an a Adam ruchingej ra dipandish ni mwom.—Rom 5:21; Galatia 4:26, 31.

‘Ujindj Utumbila wa Rusot Rend’

7. Rutong ik rajinguninay Yehova kusutil kud kambuy Paul?

⁷ Mu mukand wend kud in Kristu a ku Efes, kambuy Paul warumburila nawamp mutapu utakedilay Yehova yom chakwel kuwanyish rutong rend. Paul wafunda anch: “Ndiy wijikisha kudi etu ujindj [utumbila] wa rusot rend ni chiyul chend mudi watonday mu Kristu, chakwel mu kwinzul kwa muten ndiy ukanunga yom yawonsu mu Kristu, yom ya mwiur ni yom ya pansh.” (Efes 1:9, 10) Rutong ra uyaj ra Yehova ridi ra kunung mu uumwing mangand makweta yitang yikata kuziyil nich rukat ku ukaleng wend. (Kujingunik 4:11) Chawiy chikeza kutumbishiwu dijin diend, Satan ukez kumekan mukamakasu, ni rusot ra Nzamb rikez kusadik “pansh mudi mwiur.”—Mateu 6:10.

8. Dizu diakarumunau anch ‘wintakel dirumburikin ik’?

⁸ “Rusot ruwamp” ra Yehova, ap anch rutong, rikez kuwanyin kusutil ku ‘umutakel.’ Paul wasadila dizu dirumburikina anch “ditenchik dia chikumbu.” Disambidinap guvernema, mud wa Want wa Umesia, pakwez mutapu wa kutenchik yom.b Mutapu wamushena ukezay Yehova kutakel yom chakwel kuwanyish rutong rend mudi ‘ujindj utumbila’ wijikishau pakemp-pakemp mu yitot ya mivu.—Efes 1:10; 3:9.

9. Mutapu ik walejanay Yehova pakemp-pakemp ujindj utumbila wa rusot rend?

⁹ Kusutil ku yishiken yilondulijadina, Yehova wajingunina pakemp-pakemp mutapu rutong rend piur pa Mbut yashilayimu mu Eden rikeza kuwanyin. Manswik mend mashilayimu nend Aburaham majingunina anch Mbut ya kushilamu yikez kez pa divu mu dijuku dia Aburaham ni yikez kwikal njil kukeza kuyukil “michid yawonsu ya pansh.” Manswik minam malejan anch antu akwau akez kwinung nich chikunku cha kusambish cha mbut. (Disambishil 22:17, 18) Manswik ma Chijil masukay ni Isarel ku mujimbu malejana rutong ra Yehova ra kwikal nich “want wa in kupesh.” (Kubudik 19:5, 6) Manswik masukay nend David malejana anch Mbut yikez kikal Mutu wa Want chikupu ni chikupu. (2 Samwel 7:12, 13; Kuseng 89:3, 4) Manswik ma Chijil mayitwala in Yuda kudiay Mesia, Yehova weza kulejan mitambu yikwau kushalijan ya kuwanyin kwa rutong rend. (Galatia 3:19, 24) Antu afanyidina kubomb pamwing nich chikunku cha kusambish cha mbut ading afanyidin kusal “want wa in kupesh” wasambelau kulondil ni afanyina kuyandjik mu “manswik masu” mud “Isarel” musu, wa muspiritu.—Jeremiy 31:31-34; Hebereu 8:7-9.c

10, 11. (a) Mutapu ik walejanay Yehova Mbut yakushilamu? (b) Ov, mulong wak wezay Mwan kapokal wa Nzamb pa divu?

¹⁰ Mu kwambatan nich wintakel wa rusot ra Nzamb, chisu pa chawanyina cha kumekan kwa Mbut yasambelau kulondil pa divu. Yehova wamutuma mwangel Gabriel kumulej Mariy anch ukuval mwan ikundj ukezau kupil anch Yesu. Mwangel wamuleja anch: “Mulong ndiy ukwikal mujim, akez kamutazuk anch Mwan wendendiy udia Piur; ni Mwant [Yehova] Nzamb ukez kapan nkwas ya tatukwend David kudiay ndiy. Ukez kaswan piur pa chikumbu cha Yakob chikupu; ni want wend kiukez kwikalip ni musul.” (Luka 1:32, 33) Chawiy kujingunik kwa Mbut yashilaumu kwikala patok.—Galatia 3:16; 4:4.

¹¹ Mwan kapokal wa Yehova wafanyidina kwez pa divu ni kupakiu djat ni pa musong. Chakul chiwanyidina cha kwakul ku disarumun dia Satan chadinga mu chikas cha Yesu. Ov, wela kushal ushinshamena kud Tatukwend? Chom chinech chakwata ku ujindj utumbila. Kwinyim kambuy Paul warumburila mwaz wa Yesu anch: “Ujindj [utumbila] wa wi-Nzamb chakin waswej kujimb: Ndiy wamekeshinau mu mujimbu wa muntu, Amuyingishila mu [s]piritu; Amumana kudi angel, Amwitiyija mu mangand, Amwaka mu uyaj mwiur.” (1 Timote 3:16) Mwaning, kusutil ku kushinshaman kwend kwakad kunyikek djat ni ku rufu rend, Yesu wapana chakul cha rawonsu ku disarumun dia Satan. Pakwez yom yikwau yitadila ujindj utumbila yashala yakad kujingunin.

‘Ujindj Utumbila wa Want wa Nzamb’

12, 13. (a) Chisu chom chimwing cha ‘ujindj utumbila wa want wa Nzamb’? (b) Chom ik chikwatina ku kutond kwatonday Yehova uvud ukemp wa antu akuya mwiur?

¹² Mu umwing wa weny wend wa kuya kulejan mu Galilaya, Yesu walejana anch ujindj utumbila wadinga wambaten nich winyikel wa Want wend wa Umesia. Ndiy wayileja in kwilejend anch: “Kudi en aninkisha kal kwijik ujindj [utumbila] wa want wa mwiur [“kwijik want wa Nzamb,” Marko 4:11].” (Mateu 13:11) Mutambu umwing wa ujindj winou ukwatin ku kutond kwa Yehova kwa “kachisak kakemp” ka antu 144000 akeza kwinung pamwing ni Mwanend mud chid cha mbut, chakwel kuyikel pamwing nend mwiur.—Luka 12:32; Kujingunik 14:1, 4.

¹³ Mulong antu ayitanga mulong wa kushakam pa divu, “chitang chisu” chadinga chisotikin kudiay Yehova mulong wa antu amwing kuya mwiur. (2 Korint 5:17, Manswik Masu) Chalonday mud umwing wa antu atondau kuswan ruchingej riner ra pakampwil ra mwiur, kambuy Pita wafunda anch: “Kuyuk kwikal kudi Nzamb ni Tatuku wa Nsalejetu Yesu Kristu! Ku riy rend ripandikena etu twavadika kand asu ku ruchingej ridia rom, mulong wa disanguk dia Yesu Kristu ku rufu, watuswanisha uswan wa chikupu, wakad kusheshikang, wakad kujiyang, watutekilay mwiur.”—1 Pita 1:3, 4.

14. (a) Ov, mutapu ik wandamau in michid mu ‘ujindj utumbila wa want wa Nzamb’? (b) Ov, mutapu ik tutwishina kutesh kurumburik kwa “yom yikurikina ya Nzamb”?

¹⁴ Chikunku chikwau cha ujindj utumbila pantaliken nich winyikel wa Want ku machuku ma kurutu radinga rusot ra Nzamb ra kuyandjik antu a michid mukach mwa uvud ukemp wa antu akezau kutazuk kuya kuyikel pamwing ni Kristu mwiur. Paul warumburila mulad winou wa “wintakel” wa Yehova, ap anch mutapu wa kutenchik chakwel kuwanyish rusot rend anch: “Kaujinguninap ujindj winou kudiau an a antu a majuku makwau mudi chamekeshau katat kudi apostol ni aprofet atumbila mu [s]piritu; chakwel in mangand adi answan netu, yid ya mujimbu umwing, ni in kushilimu netu mu Kristu ku rusangu ruwamp.” (Efes 3:5, 6) Chovu cha chikunku chinech cha ujindj utumbila achijingunina kudi “apostol . . . atumbila.” Chawiy chimwing kand ilel, anch chadingap nich ukwash wa spiritu utumbila, ing kituteshilap “yom [yiney] ya Nzamb yikurikina.”—1 Korint 2:10; 4:1; Kolosay 1:26, 27.

15, 16. Ov, mulong wak Yehova wayitonda in kuyikel pamwing ni Kristu mukach mwa antu?

¹⁵ “Tunan chitot ni makum manying ni tunying” amanau iminy pamwing nend “Mwan a Mukoku” wiminy pa Mukandu wa Sion wa mwiur ayilejen anch ‘ayilanda kudiokal pansh,’ ‘ayilanda mukach mwa antu kwikal mabuj ma kusambish kudi Nzamb ni kudi Mwan a Mukoku,’ Kristu Yesu. (Kujingunik 14:1-4, MM) Yehova watonda wakusambish wa anend a mwiur ikala chikunku cha kusambish cha mbut yashilayimu mu Eden, ov, chad mulong wak watonday akusala pamwing ni Kristu kudiokal mukach mwa antu? Kambuy Paul urumburil anch uvud winou ukemp wadinga wa ‘atazukay mudi mudia rutong rend [Yehova],’ “mudi mudia rusot rend ruwamp.”—Rom 8:17, 28-30, MM; Efes 1:5, 11, MM; 2 Timote 1:9.

¹⁶ Rutong ra Yehova ridi ra kutumbish dijin diend dijim ni ditumbila ni kukamunin ukaleng wend wa pa mangand mawonsu. Kusutil ku “wintakel” wend wa manangu wakad cha kufanikan nich, ap mutapu wa kutenchik yom, Yehova wamutuma Mwanend mwanat pa divu, chadinga chimufanyidin kupakiu djat ni ku rufu. Chikwau kand, Yehova wakwata mupak anch mu winyikel wa Want wa Umesia wa Mwanend mukez kwikal antu amekana niyawiy kwikal achidijinau ku ukaleng Wend djat ni ku rufu.—Efes 1:8-12; Kujingunik 2:10, 11.

17. Ov, mulong wak tufanyidina kusangar anch Kristu ni ambay nend anyikel adinga kwisambishil antu?

¹⁷ Yehova wamekesha rukat rend rijim mulong wa an a Adam kusutil ku kumutum Mwanend pa divu ni ku kutond mukach mwa antu in akez kwikal answan pamwing ni Mwanend mu winyikel wa Want. Ov, mutapu ik welau kwisakinau antu akwau akeza kwimekesh ashinshamena kudiay Yehova, kudiosh kudiay Abel djat ni kuya kurutu? Chavadikau aswik a chitil ni rufu, antu akad kuwanyin aswiridin kuyok muspiritu ni ku mujimbu ni kuyishikij ku kuwanyin, kwambatan nich rusot ra kusambish ra Yehova mulong wa antu. (Rom 5:12) Chidi cha rongoj mud ik kud antu in awonsu achingejina kurutu oku mwom wa chikupu pa divu kwijik anch Mwant wau ukez kuyimekeshin rukat ni chovu cha ranaken mud kamu mwayisadilay in kwilejend pa chisu cha mujikit wend wa pa mangand! (Mateu 11:28, 29; Hebereu 2:17, 18; 4:15; 7:25, 26) Ni chidi cha kukasikesh mud ik kud awiy kwijik anch ant-in-kupesh akusala pamwing ni Kristu mwiur adinga amakundj ni amband in ritiy, antu arisha ayinau nich kuziy kwa chiuntu ni amana mar ma mwom, mud mutumena niyetu!—Rom 7:21-25.

Rutong Rakad Kukangany ra Yehova

18, 19. Ov, mulong wak mazu ma Paul madia mu Efes 1:8-11 moviken nawamp kud etu, ni chom ik tukeza kushinshikin mu mutu wa mulong ulondwilaku ou?

¹⁸ Katat tudi atenchikinau nawamp kutesh kurumburik kwa usey wa mazu ma Paul kudiau in Kristu azizidilau many, madia mu Efes 1:8-11. Ndiy walonda anch Yehova wayijikisha “ujindj [utumbila] wa rusot rend,” anch awiy adinga ‘answan’ pamwing ni Kristu, ni anch “warijekin kal mulong wa kulond kwendendiy ukata kusadish yom yawonsu mu chiyul cha rukat [rusot] rend.” Tumen anch chinech chifanyidin ching kusu “wintakel” wamushena wa Yehova wa yom mulong wa kuwanyish rutong rend. Chom chinech kand chitukwashin kwov kurumburik mulong wak ching kusu in Kristu akemp akumangena adiling yifanikesh ku Yakudia ya Urel ya Nsalejetu.

¹⁹ Mu mutu wa mulong ulondwilap ou, tukez kuman chirumburikina Chivurikish cha rufu ra Kristu kud in Kristu inay akweta ruchingej ra kuya mwiur. Tukez kand kwilej mulong wak tutikit twa antu tukweta ruchingej ra kushakam chikupu pa divu tufanyidin kusanger nakash mu chom chifanikeshina Chivurikish.

[Mazu madia kwishin kwa paj]

Ya Dichirikin

• Ov, mulong wak Yehova watanga divu ni kumutekap muntu?

• Ov, mulong wak chadinga cha usey anch Mwan kapokal wa Yehova amupaka djat ni ku rufu?

• Mulong wak Yehova wayitonda ambay anyikel nend Kristu pakach pa antu?