Tukudishany Ukaliweny Wetu mu Mudimu wa Kulejan—Kusambish Mambamb Makutwisha Kushikij ku Kupan Uman

Yesu watwisha kupan uman wa kukashimwish kudi mband mwin Samaria mulong wasambisha kwambamb nend. Mutapu ik tukutwisha kukudish ukaliweny kusutil kusambish mambamb nau antu twakad kwijik?

• Ikal ni musangar ni ambamb nau antu. Ap anch wading waziyankal, Yesu wasambisha mambamb kusutin kwit mem. Chawiy ukutwish kusambish ni kuyink antu moy nich musangar ni kupwa, pamwing ap ambambinany piur pa mutapu udia kwiur, ap piur pa yom yisadikina. Vurik anch chitongijok chetu chakusambish chidi cha kusambish mambamb, chawiy ukutwish kwambambin mutu wa mulong win wawonsu ukutwisha kumusangaresh muntu. Ap anch kasangaredinap, kwikil chom ushadishina. Anch kasangaredinap, pakish kusadin kand chom chikwau. Mwita Yehova akwink kutakaman.​—Neh 2:4; Mid 4:29.

• Ikal ni nkeu mulong wa kusambish kulejan rusangu ruwamp, pakwez kangal wasal mau mau. Sal anch mambamb mikal masangareshina. Anch wamushindil, muntu ukutwish kwiyov nayimp ni kulik kwambamb. Kangal wiyakamish anch mambamb mapwil pakach kurutu upan uman. Anch chitongijok cha kusambish mambamb kurutu kwa kulejan rusangu ruwamp chikwovishin wom, iyijidisha kusambish mambamb pakad chitongijok cha kupan uman. [Mekesh ni isambina video wa 1.]

• Sal usu wa kukimb mutapu wa kupan uman kusutin kulond piur pa ritiy rey, ni kusal anch mwin kukutesh akwipul chakwel umurumburila. Yesu walonda mazu masangareshina mamubachika mband kwipul yipul. Pasambishay kumulej rusangu ruwamp, wading ukat kwakul ku yipul yend. [Mekesh ni isambina video wa 2, ni kupwa mekesh ni isambina video wa 3.]