Yesu—udi ‘Mukat Wa Mwom’

Chilay chasalay Yesu cha kudish tunan twa antu wachisadina kwingangel kwa Karung wa Galalia, kwawiy kand kwachinay Yesu pakimbau antu kumudish want. Uchuku winiwa ndiy wendina pa mambek makash mading matutina pa karung ni wamupandisha Pita chisu chasambishay kujiy mulong wa kuburen kwend kwa ritiy pendinay pa mem. Yesu waninetisha kand rinkind mukash pamwing ap chading mulong wa kuyipandish in kwilejend akimba kujiy.

Kupwa, Yesu wachirika kwingangel kwa karung mulong wa kuya ku Kapernaum. Antu adishau mu chilay amutana kwinikwa ni amwipula anch: “Ov, chisu ik chiwashikanga ey kunoku?” Yesu wayipupa palonday anch eza kumukimb mulong ading akwet kuswir kwa kudia kand kapamp kakwau. Chawiy wayileja anch: “[Kangal wasadilany] yakudia yikata kuvund, pakwez surubany yakudia yikata kulet mwom wa chikupu.” Kupwa antu amwipula anch: “Ov, etu tukusal yom ik chakwel tusala midimu yisotilay Nzamb?”—Yohan 6:25-28.

Antu inay atongina pa midimu yimwing yafundau mu Chijil, pakwez Yesu wisambina pa mudimu umwing wa usey nakash chawiy wayileja anch: “Chom chisotilay Nzamb en kusal chidi kwingitiyij am watumay.” Pakwez, antu kamekeshap ritiy ra mutapu winou mudiay Yesu, chikalap nchik yom yawonsu yasalay. Chawiy amuleja anch ayisadina kand chilay chikwau chakwel amwitiyija. Amwipula anch: “Ov, chom ik ukusala? Mwi mpay anshankuretu adia yakudia yapilau anch, mana, mudi mufundilau anch: ‘Ndiy wayidisha nich [mikat] yadiokala mwiur.’”—Yohan 6:29-31; Kuseng 78:24.

Ap anch antu inay ita chakwel ayisadina chilay, Yesu wayileja kapamp kamwing Musul wakin kudiokila yilay yiney payilejay anch: “Nakulejany chakin, kadingap Moses wakwinkishanya [mukat] wadiokala mwiur. Tatukwam ndiy ukwinkishinanya [mukat] wakin udiokila mwiur. [Mukat] ukata kupanay Nzamb, yam kamu nidiokila mwiur, nikat kupan mwom kudi antu a pa mangand.” Pakad kutongin pa mulong winou, awiy amwita anch: “Mwant, twinkisha [mukat] winou machuku mawonsu.” (Yohan 6:32-34) ‘Mukat’ ik wisambinay Yesu?

Yesu warumburila anch: “Am yam [mukat] ukata kupan mwom. Muntu mwawonsu ukweza kudi am, kakez kwovap kand nzal. Muntu mwawonsu ukwingitiyija am, kakez kwovap kand impu. Chawiy nakulejanya kal en wanmananya kal, pakwez walikany kwingitiyij. . . . Mulong am kinadiokalap mwiur kusal rusot ram amwinam, pakwez neza ni kusal rusot rendendiy wantuma am. Riner rawiy rusot rendendiy wantuma am anch, kinifanyidinap kumushadish muntu ap kusu umwing wa antu awonsu anginkishay, pakwez nifanyidin kuyivumbul awonsu pa dichuku dia kwisudiel chakwel apanda. Talany chom chisotilay Tatuku. Antu awonsu akwinmana am ni kwingitiyij akwikal nich mwom wa chikupu.”—Yohan 6:35-40.

Mazu minan mayijimesha antu ni in Yuda asambisha kunyinyit piur pend. Mutapu ik ukutwishay kulond anch: ‘Ndiy udia mukat udiokila mwiur’? (Yohan 6:41) Mulong antu inay ading amumen anch wading mwan wavalau kudi anvaj a mwi ngand ya Galalia mu musumb wa Nazaret. Antu ipulijana anch: “Ov, muntu winou kindiyap Yesu, mwan wa Josef? Etu tumwij tatukwend ni makwend”—Yohan 6:42.

Yesu wayakula anch: “Likany kununganijan. Kwikil muntu ukutwisha kwiyezil kudi am, ching anch Tatuku wantuma am wamulet kudi am. Chad nikez kumuvumbul muntu winou chakwel apanda pa dichuku dia kwisudiel. Afundil mu mikand ya [Aprofet] a Nzamb anch: ‘[Yehova] ukez kuyilej antu awonsu.’ Muntu mwawonsu ukeza kumutesh Tatuku ni kwijik malejan mend, ukez kwez kudi am. Kinilondilap anch kudi muntu wamumanap kal Tatuku. Am nidiokila kudi Nzamb, yam kusu namumana Tatuku. Nakulejany chakin, muntu mwawonsu ukwingitiyija am ukwet mwom wa chikupu.”—Yohan 6:43-47; Isay 54:13.

Pambambay kwisambishin ni Nikodem, Yesu wajimbula mwom wa chikupu ni wisikeja mwom winou nich kutek ritiy mudiay Mwan a muntu palonday anch: “Chakwel muntu mwawonsu ukumwitiyija [Mwan kapwokal wa Nzamb]. . . kakujiyap, pakwez ukez kwikal nich mwom wa chikupu.” (Yohan 3:15, 16) Pakwez, wayileja patok antu inay chisend chikwetay cha kuyinkish mwom wa chikupu, wakad kudiokal ku yakudia ya mana ap ku mikat yadiau mu Galalia. Mutapu ik wafanyinau kutambul mwom wa chikupu winou? Yesu wachirikina kand mazu mend malonday anch: “Am yam [mukat] ukata kupan mwom”—Yohan 6:48.

Mambamb minam piur pa mukat udiokila mwiur madandamena ni Yesu wamapwisha chisu chadinga chifundishinay mu sinagog wa mu Kapernaum.