Mareferans ma Mudimu ni Mashakamin ma in Kristu Mukand wa Chikumangan
NGOND WA 4 RUBING RA 1-7
YOM YA USEY YIDIA MU DIZU DIA NZAMB | 1 KORINT 7-9
“Ujich Chidi Chipan”
wp11 1/1 paj 20 par. 3
Sadil Nawamp Ujich wey
3 Mujich ukweting yisu yivud [ni] want ipau ukash kupandakanamu ngatan. (1 Kor. 7:32-35) Yiney yawiy yibudikin yimwing yiwamp ya pakampwil yikutwisha kumukwash ipana nakash mu mudimu wend wa kulejan, amekesha rukat rend kudi antu akwau, ni aseja piswimp nakash ni Yehova. Pakwez, in Kristu avud asangera yiyukish ya ujich ni akwata mupak wa “kwitiy malejan minam,” chisu chimwing. Antu akwau kadingap nich chitongijok cha kwikal ajich, pakwez pa chisu chakarumuka mikadil yau, awiy atongijokina mu malembil piur pa mwikadil wau ni amana anch nich ukwash wa Yehova niyawiy akutwish kwitiyij mwikadil winou mu muchim wau. Chawiy lel, itiyija kukarumuk kwa mikadil ni itiyija kushal ajich.—1 Kor. 7:37, 38.
w08 15/7 paj 27 par. 1
Manans Majim ma Mikand ya In Korint
7:33, 34—Chirumburikin ik “yom ya mangand” yikata kwiyakamishay nich ngatan ap ngachik? Paul wisambidin yom ya mangand ya mu mwom yifanyidinau kubangin angatan ni angachik in Kristu. Mu yom yiney mudi yakudia, ya kudjal, ni chikumbu, kudioshamu yom yiyimp ya mangand minam, yichininau in Kristu.—1 Yoh. 2:15-17.
w96-F 15/10 p. 12-13 par. 14
Ujich—Ukwashin Kusal Mudimu Pakad Kampuw
14 Mwin Kristu mujich usadidina chisu chend cha ujich mulong wa kuwanyish mipak yend ya choy kasadinap ‘nawamp nakash’ kuyipandakan in Kristu atijadina. Udi mujich, kadiap “mulong wa kwipan ku Want,” pakwez mulong wa mayingishin mend amwinend. (Mateu 19:12) Ikundj ap mband mujich ufanyidin ‘kwiyakamish mulong wa yom ya Mwant,’ ni kwiyakamish mulong wa ‘kwitapil dilau dia Mwant,’ ni ‘kwipan kamu ku mudimu wa Want pakad kampuw.’ Chinech chirumburikin kwipan kamu rawonsu mulong wa kumusadin Yehova ni Yesu Kristu. Ching kusutil kusal mwamu kwawiy kumekeshina anch mwin Kristu mujich ikundj ap mband usadin ‘nawamp nakash’ kuyisutamu in Kristu atijadina.
Kukimbijol Mapit ma mu Spiritu
Mazu ma Kwinsudiel
Yisu yimwing, in Kristu amwing akwata mupak wa kwaurik ni ambay nau a uruw ap anch kwadingap chisal cha masandj. (1 Korint 7:11) Mu yom yilondwilaku ey, mwin Kristu ukutwish kwitiy kwaurik ni mbay nend.
• Kulik kukwash kwa kwikatin: Ikundj ulikin kuwanyish maswir ma ku mujimbu ma dijuku diend, kushik mu chilik cha kwel anch dijuku dikwetap kand nfalang ap yakudia.—1 Timote 5:8.
• Kumumesh muntu mar ku mujimbu chipandakena: Kudi kumumesh mbay wa uruw mar mu chilik cha kushiken kwiyov anch ukash wend wa mujimbu ap mwom wend udi mu ubaj.—Galatia 5:19-21.
• Kuyipish urund wa muntu ni Yehova: Ikundj ap mband ukat kumukangesh mbay nend kumusadin Yehova.—Midimu 5:29.
w00-F 15/7 p. 31 par. 2
Ukutwish Kushal Wishitwila mu Mangand Mijondila
Chawiy ansand kafanyidinap kwipupwil kwatan pa chisu chasambisha kal kulank maku ma kulalijan. Uruu witin kwipan nakash, ni mulong wa kuwanyish chisend chinech chitin kwikal muntu uswila. (Disambishil 2:24) Chiwapin kuchingel kushik ni pakusutina ‘chisu cha maku ma usand’—chirung chikata kupandakan yovil ya kulalijan ni kuyipish mutapu wa kutong. (1 Korint 7:36) Ni chikwikal cha usup ni chitil kudi muntu wapamina kal ukimbina kwatan chad wiyandjik mu mwikadil wa masandj mulong kamenap kwend muntu wa kwatijan nend!
NGOND WA 4 RUBING RA 8-14
YOM YA USEY YIDIA MU DIZU DIA NZAMB | 1 KORINT 10-13
“Yehova Ushinshamen”
w17.02 paj 31-32
Yipul ya in Kutang
Mupostol Paul wafunda anch Yehova “kakwitiyap yoziu kukupandakany en.” (1 Kor. 10:13) Ov, chinech chirumburikin anch Yehova wakwata kal mupak kurutu kwa chisu piur pa yom tukutwisha kujijaman ni kutond yoziu tukurisha nich?
▪ Anch mwamu chidia, tong mutapu chikutwisha kwikal nich usu mu mwom wetu. Chilakej, mwan nsand wa mukadivar wijipa amwinend. Tatukwend wova ushon nakash. Wiyipula ijika anch Yehova wading wij kurutu ni kukwat mupak anch ndiy ni mukajend akutwish ajijaman ku rufu riner riyimp. Mu mangand minam, etwawonsu turishin nich mar makash. Ov, tufanyidin kwitiyij anch Yehova ndiy ushinshikidining chom chawonsu chikutushikena mu mwom wetu?
Patushinshikidina 1 Korint 10:13, tukuman anch Bibil kakasikeshinap chitongijok chakwel anch Yehova wijing kurutu kwa chisu mutapu tukutwisha kujijaman ni kupwa wakwat mupak wa yoziu yikutushikena. Mulong wak tulondina mwamu? El tushinshikinany mayingishin manying.
Chakusambish, Yehova wayinkisha antu want ipau, usu uyikwashining kutond yikusalau. Ukimbining anch twikwatin mipak ayinetu. (Kuvurik Yijil 30:19, 20; Joshua 24:15) Anch twakwat mipak yimusangarishina Yehova, tukumuchingejin anch atutakel. (Jinswir 16:9) Pakwez anch twakwat mipak yiyimp, tukez kushakam kukwatijan ni yibudikin ya mipak yetu yiyimp. (Galatia 6:7) Chawiy anch Yehova ndiy utondining yoziu yikutwisha kutushiken, ov, tukutwish kamu kwikal nich want ipetu?
Cha kaad, Yehova kakatap kutuchidij ku ‘mar makad kutongin.’ (Mulej 9:11) Akisidan muyimp ukutwish wamushiken muntu mulong wa kwikal ndond yiyimp mu chisu chiyimp. Yesu walonda piur pa akisidan muyimp wajipa antu 18 chisu chayiwila rubumbu. Warumburila nawamp anch Nzamb kindiyap waletisha rufu riner. (Luka 13:1-5) Komb chidiap cha manangu kutong anch kurutu akisidan asadika, Nzamb wijing nany ukufa ap nany ukupanda.
Cha kasatu, umwing ni umwing pakach petu ufanyidin kulam kushinshaman kwend kudi Yehova. Satan walonda anch atushalapol a Yehova akat kumusadin Ndiy mulong wa yom yiyinkishinay. Satan walonda kand anch tukutwishap kushal ashinshamena kudi Yehova anch yoziu yatushiken. (Job 1:9-11; 2:4; Kujingunik 12:10) Anch Yehova watuking ku yoziu yimwing, chikumekan mudi anch Satan uyingin nich.
Cha kanying, Yehova katondiningap chakwel ijika chom chawonsu chikutushikena kurutu kwa chisu. Chakin kamu, Yehova ukutwish kwijik yom yikusadika machuku ma kurutu anch wachikatish. (Isay 46:10) Pakwez Bibil ulondin anch kakutondangap chakwel ijika chom chawonsu kurutu kwa chisu. (Disambishil 18:20, 21; 22:12) Yehova udi mwin rukat ni utentamin, kakatap kuyipish want ipetu tutondining nich.—Kuvurik Yijil 32:4; 2 Korint 3:17.
Chawiy, yom ik yakimbay kulond Paul palonday anch Yehova “kakwitiyap yoziu kukupandakanany en”? Pinap, Paul wading urumburil yikusalay Yehova chisu cha yoziu, chidiap kurutu kwa yoziu kushiken bwat. Anch twamuchingejin Yehova, ukutukwash kuwin choziu cha mutapu win wawonsu chikushikena mu mwom wetu. (Kuseng 55:22) Tukushinshikin mayingishin maad mamekeshina mulong wak Paul walonda mwamu.
Diyingishin diakusambish dimekeshin anch yoziu yikata kutushiken yikat kuyishiken kand “antu awonsu.” Mudi mutushicha mu mangand ma Satan, etwawonsu tukutwish kwikal nich mashakamin makash, pamwing ap tukwikal nich ushon nakash. Pakwez anch twamuchingejin kamu Yehova, tukutwish kujijamen yoziu yiney ni tukushal kamu ashinshamena. (1 Pita 5:8, 9) Chakusambish mu 1 Korint shapitre wa 10, Paul wafunda piur pa kupak kumwing kwayipakau an a Isarel mwi mpay. (1 Korint 10:6-11) Antu amuchingejina Yehova ajijamana mu yoziu yiney. Pakwez in Isarel amwing amubwambwila Yehova. Kashalap ashinshamena mulong kamuchingejinap ndiy.
Diyingishin dia kaad didi anch ‘Nzamb ushinshamen.’ Chinech chirumburikin ik? Anch twatong kamu nawamp mutapu walamay Yehova atushalapol end mu mivu ya pakur, tumen kamu anch wayikwasha nich kushinshaman “awiy amukata ndiy ni kulam yijil yend.” (Kuvurik Yijil 7:9) Twilejin anch Yehova uwanyishining chisu chawonsu kushilamu kwend. (Joshua 23:14) Tukutwish kwikal nich kashinsh anch (1) Yehova kakutwishap kwitiy anch choziu cha mutapu win wawonsu chitukasiken etu kujijaman, ni (2) ukutulej etu “mutapu wa kukwasinik.”
Mutapu ik uyilejiningay Yehova antu amuchingejidina “mutapu wa kukwasinik”? Chakin kamu, ukutwish wadiosh choziu. Pakwez vurik anch, Paul walonda anch Yehova “ukunilejany [mutapu] wa kukwasinik chakwel ukwikalany ni usu wa kupandakan.” Chawiy komb, Yehova ukat kutulej mutapu wa kukwasinik pakatay kutukasikesh anch tukutwish kushal ashinshamena. Komb el tushinshikin mitapu yimwing yikatay kusadin:
▪ Yehova ukat “kutwongoj mu mar metu mawonsu.” (2 Korint 1:3, 4) Ukutwish kuninetish manangu metu, michim yetu, ni yovil yetu kusutin Bibil, spiritu wend utumbila ni kashalapol ushinshamena.—Mateu 24:45; Yohan 14:16; Rom 15:4.
▪ Yehova ukusadin spiritu wend utumbila mulong wa kutukwash. (Yohan 14:26) Mulong spiritu utumbila ukutwish kutukwash kuvurik jinsangu ja mu Bibil ni mbil jidiamu chakwel tutwisha kukwat mipak ya manangu.
▪ Yehova ukusadin angel end mulong wa kutukwash.—Hebereu 1:14.
▪ Yehova ukuyisadin akadivar nau anambaz netu mulong wa kutukwash. Akutukasikesh kusutin yom yikulondau ni yikusalau.—Kolosay 4:11.
Chawiy lel, yom ik twilejina kal ku mazu ma Paul madia mu 1 Korint 10:13? Yehova kakutondangap yoziu yikutushikena. Pakwez, tufanyidin kwikal nich kashinsh anch ang twamuchingejin kamu Yehova, tukutwish kujijaman ku choziu cha mutapu win wawonsu. Twij kamu anch Yehova ukudandamen kutulej chisu chawonsu mutapu wa kukwasinik chakwel tushala ashinshamena kudiay ndiy!
Kukimbijol Mapit ma mu Spiritu
w04-F 1/4 p. 29
Yipul ya in Kutang
Mulong wak verse wa 1 Korint 10:8 ulondin anch in Isarel 23 000 afa dichuku dimwing mulong wa masandj, pakwez Kuchind Michid 25:9 ulondin anch 24 000 awiy afa?
Kudi mitapu yivud yimekeshina kushalijan kudia mu maverse minam maad. Mutapu umwing uswapela kutesh ukutwish kwikal anch uvud wakin udi pakach pa 23 000 ni 24 000, ni uvud ukutwish kuvul ku mutambu umwing ap ukwau.
Tushinshikinany mutapu ukwau. Kambuy Paul wajimbula rusangu ra in Isarel ku Sitim mudi chilakej cha kubabesh kudi in Kristu a ku Korint wa pasak, musumb wadinga wijikena nakash mulong wa mwikadil wau uyimp. Wafunda anch: “Niyetu kangal twasal yitil ya [masandj] mudi mwasalau antu amwing a pakach pau. Pasalau mwamu, antu tunan makum maad ni tusatu ayijipa pa dichuku dimwing.” Palejenay piur pa antu ajipau kudi Yehova mulong asala masandj, Paul uletin uvud wa antu 23 000.—1 Korint 10:8.
Pakwez Kuchid Michid shapitre wa 25, utulejin anch ‘in Isarel ibomba mu kumwifukwil Bal wa ku Peyor, chad ujim wa Yehova wasweja nakash mulong wa in Isarel.’ Kupwa, Yehova wamuleja Moses kuyijip ‘antakel awonsu a antu.’ Chad Moses wayileja anzwij kusadin mbil yiney. Kwinsudiel, “chipupu chadiokala pakach pa in Isarel” chisu chasalay Fines kapamp kamwing mulong wa kumujip ikundj mwin Isarel wandjika mband mwin Madian mu chibeng. Rusangu ripwil nich mazu am: “Kwafa antu tunan makum maad ni tunying ku chipupu chenech.”—Kuchid Michid 25:1-9.
Mu uvud ulejenau mu Kuchid Michid mudi ‘antakel awonsu a antu’ ajipau kudi anzwij ni kudi Yehova amwinend. Chimeken anch kukutwish kwikal antekel a antu kanan ajipau kudi anzwij, awiy awanyishina uvud wa antu 24 000. Ap anch antakel inay asala masandj ap bwat, kusal misambu yiney ap kwitiy antu ading ayisadina, kwayifisha nich mudi antu ‘ibomba mu kumwifukwil Bal wa ku Peyor.’
Kukwatijan ni buku umwing wa milong ya Bibil, dizu dikarumwinau anch “kwibomb,” dikutwish kurumburik “kulamat kudi muntu.” In Isarel ading antu ipanina kal kudi Yehova, pakwez chisu ‘chibombau mu kumwifukwil Bal wa ku Peyor,’ ajipa urund wau wa piswimp ni Nzamb. Kupwa kwa mivu 700, Yehova wayileja in Isarel kusutil muprofet Ozey anch: “Pashikau kwi ndond yipidilau anch, Bal Peyor, asambisha kumwifukwil mukish Bal. Chad mu chisu chikemp atakanana mudi akish akatau.” (Ozey 9:10) Awonsu asala mwamu afanyina kuyirumburish kudiay Nzamb. Chawiy, Moses wayivurisha an a Isarel anch: “Mes men mamana yasalay [Yehova] mulong wa Bal Peyor, ni [Yehova] Nzamb wen washesha mukach mwen antu amulondula Bal Peyor.”—Kuvurik Yijil 4:3.
w15-F 15/2 p. 30
Yipul ya in Kutang
Ov, nambaz mwin kulejan wa Want ufanyidin kubwit ku mutu wend anch utakedin dilejan dia Bibil pamwing ni mukadivar mwin kulejan?
▪ Mu mutu wa mulong wa “Yipul ya in Kutang” udia mu Chinong cha Kalam cha 15 Ngond wa 7, 2002, alejenamu anch nambaz ufanyidin kubwit ku mutu anch utakedil dilejan dia Bibil pamwing ni mukadivar, ikala wabatishinau kal ap bwat. Kupwa kwa kushinshikin kand chipul chinech, twamen anch chidi cha usey kulet kuswimp kanang ku chitongijok chinech.
Anch nambaz utakedil dilejan dia Bibil pamwing ni mukadivar wabatishinau kal, ufanyidin kamu kubwit ku mutu wend. Mu kusal mwamu, umekeshin kalimish mulong wa ditenchik dia Yehova piur pa wintakel udia mu dijuku ni mu chikumangen cha win Kristu, mulong uwanyishin chisend chifanyidinau kuwanyish kudi nfumwend ap mukadivar wabatishinau kal. (1 Kor. 11:5, 6, 10) Anch kabwikinap ku mutu, ufanyidin kumwit mukadivar kutakel dilejan anch uwanyidin ni ukutwish kusal mwamu.
Ku mutambu ukwau, anch nambaz utakedil dilejan dia Bibil pamwing ni mukadivar wakad kal kutambul dibatish ni wakad kwikal nfumwend, kwikil diyingishin dia Bibil dimwitina kubwit ku mutu. Pakwez, kom ka anambaz amwing kakutwish kuyibachik kubwit ku mutu ap anch udi ni mukadivar wakad kal kubatishau.
NGOND WA 4 RUBING RA 22-28
YOM YA USEY YIDIA MU DIZU DIA NZAMB | 1 KORINT 14-16
“Nzamb Ukwikal ‘Yom Yawonsu Kudi Muntu Mwawonsu’”
w98-F 1/7 p. 21 par. 10
“Rufu Rikwikalapaku”
10 “Nsudiel” yimekeshin nsudiel ya Mivu Kanan ya Winyikel wa Kristu, chisu chikuchirishay Yesu nich kwikepish ni kushinshaman Want kudi Nzamb wend ni Tatukwend. (Kujingunik 20:4) Chitongijok cha Nzamb cha “[kukumangej] kand yom yawonsu mudiay Kristu,” chikwikal chawanyidin kal. (Efes 1:9, 10) Pakwez kurutu, Yesu ukushesh “kuyikel kwa mitapu yawonsu, ni ulabu wa mitapu yawonsu, ni ukash wa mitapu yawonsu” yibwambwidina ku ukaleng wa Nzamb. Mudi kand yom yivud kusutamu disheshik dikusadika ku Harmagedon. (Kujingunik 16:16; 19:11-21) Paul ulondin anch: “Mulong chifanyidin Kristu kuyikel djat ni pakuyipandakenau akankuny awonsu kudi Nzamb ni kuyitek mwishin mwa yidjatil ya Kristu. Mukankuny wa kwisudiel ukez kusheshay udi rufu.” (1 Korint 15:25, 26) Mwaning, yibudikin yawonsu ya chitil cha Adam ni rufu yikwikal yapwil kal. Chinech chimekeshin anch Nzamb ukwazuril “nzay” kusutil kuyichirish afu ku mwom.—Yohan 5:28.
kr paj 237 par. 21
Want Uwanyishin Rusot ra Nzamb pa Divu
21 Ov, chikwikal nchik piur pa chom chikata kushiken kupwa kwa mayej ni chitil: rufu? Rufu udi “mukankuny wa kwisudiel,” mukankuny ukutwisha kuyishesh lel antu awonsu akad kuwanyin chikalap lel ap machuku ma kurutu. (1 Kor. 15:26) Ov, Yehova kakutwishap kumudiosh mukankuny winou? Tal yatakelay Isay kulond: “Ndiy ukez kadiosh rufu chikupu. Nsalejetu [Yehova] ukez kakuswol mansoj ku mes ma antu awonsu.” (Isay 25:8) Ov, ukutwish kutong mutapu ukwikala yom chisu chinicha? Kukwikalap kand madil, nzay, mansoj ma runeng! Chinyim ni chinech—kukwikal mansoj ma musangar pakezay Yehova kuwanyish kushilamu kwend kushimokishena kwa kuyivumbul afu! (Tang Isay 26:19.) Kupwa, uyimp wawonsu waletau kudi rufu akez kuudiosh.
wp12 1/9 paj 17 par. 17
Chisambu Mu Mivu Kanan—Ni Kurutu!
17 Kwikil mazu mawamp nakash malejena kusadik kwa yom yiney mudi yalonday anch “chad mwamu Nzamb ukez kutakel yawonsu.” Chinech chirumburikin ik? Tongin bil pasak mu Eden, padingau antu awanyidina Adam nenday Ev, mu dijuku dia Yehova dia mangand mawonsu mu kwovijan ni mu chisambu. Yehova Mukaleng wa Mangand Mawonsu, wayikela pa yitang yend yawonsu, angel ni antu. Ading akat kwambamb nend muntu ni muntu, akat kumwifukwil, ni ndiy wading ukat kuyiyukish. Ndiy wading ukat “kutakel yawonsu.”
Kukimbijol Mapit ma mu Spiritu
wp12 1/10 paj 9, mushet
Ov, Kambuy Paul Wayijidika Amband Kulond?
Kambuy Paul wafunda anch “chifanyidin amband anenet zong mu kukumangan.” (1 Korint 14:34) Ov, chinech chirumburikin ik? Ov, ndiy wading upipeshin manangu mau? Bwat. Pakwez, wisambina yisu yivud piur pa malejan mawamp ma amband. (2 Timote 1:5; Titus 2:3-5) Mu mukand wend wayifundinay in Korint, Paul kayiyulap kusu amband pakwez wayiyula kand antu ading ni chipan cha jindim ni cha uprofet anch “anenet zong” pakatau kulond akaritiy akwau. (1 Korint 14:26-30, 33) Chawiy lel, in Kristu amwing adinga ni mushiku wa kulejan ritiy rau risu ading akat kuyinenetish in kulond chakwel kwipul yipul mudi muchadinga chaku ku mutambu winou wa mangand. Mulong wa kwipuk kanvundangesh kinak, Paul wayikasikesha anch “chifanyidin ayipul anfumwau ku yikumbu.”—1 Korint 14:35.
it-1-F p. 1181
Kulik Kuvund
Mu umwing ni Yesu mudi mwamuvumbulau ndiy, aswan nend niyau akat kuyivumbul kadiap kusu mulong wa kutambul mwom wa chikupu mudi yitang ya mu spiritu pakwez mulong wa kutambul kulik kuvund ni kulik kufa. Mulong ashakama ni asala nich kushinshaman kupwa afa nich mijimbu ya kuvund, pakwez katat akat kutambul mijimbu ya mu spiritu yakad kuvund mudi mulejenay Paul patok mu 1 Korint 15:42-54. Chimeken anch kulik kufa kumekeshin mutapu wa mwom usangaredinau, wakad nsudiel ni wakad kusheshik, pakwez kulik kuvund kumekeshin mujimbu wayinkishau kudi Nzamb, wakad kutwish kuvund, kusheshik ap kujiy. Chimeken anch Nzamb wayinkisha usu wa kudandamen kwikal aom ayinau, pakad kuchingejin misul ya usu ukwau mudi mudia yitang yikwau ya mujimbu ap ya spiritu. Chinech chimeken anch Nzamb uyichingejidin kamu nakash. Pakwez kwikal ni mwom winou wakad kufa ni wakad kwengamin pa musul kanang kumekeshinap anch kadiap mwinshin mwa umutakel wa Nzamb; ni mudi Ntakel wau Kristu Yesu, adandamedin kuziyil ku rusot ni umutakel wa Tatukwau.—1Ko 15:23-28; tal Âme; Immortalité.
NGOND WA 4 RUBING RA 29–5 NGOND WA 5
YOM YA USEY YIDIA MU DIZU DIA NZAMB | 2 KORINT 1-3
“Yehova—‘Nzamb wa Rongoj Rawonsu’”
w17.07 paj 10 par. 4
‘Dilany Nau Antu Adidina’
4 Tatukwetu wa mwiur ni ndiy wafisha anend akatish, mudi kashalapol wend Aburaham, Isak, Jakobu, Moses, ni Mwant David. (Kuchind Michid 12:6-8; Mateu 22:31, 32; Midimu 13:22) Bibil utulejin anch Yehova uchingedin kurutu oku dichuku dikuyivumbulay amakundj inay ashinshamena. (Job 14:14, 15) Pa chisu chinicha, akusangar ni akusanger ukash wa mujimbu uwanyidina. Yehova wafisha kand Mwanend wa kusambish. Bibil ulondin anch Yesu wading muntu umwing ‘wamusangarishanga’ Nzamb. (Jinswir 8:22, 30) Tukutwishap kutongin mutapu wovay Yehova pamanay mwanend ukat kufa rufu risansena.—Yohan 5:20; 10:17.
w17.07 paj 12 par. 14
‘Dilany Nau Antu Adidina’
14 Chikutwish kwikal chikasikena kwijik yom ya kumulej muntu ukweta runeng. Pakwez Bibil ulondin anch: “Jindim ja in manangu jikat kwokan.” (Jinswir 12:18) Antu avud akat kutan mazu ma kuyongoj nich antu akwau madia mu broshir Quand la mort frappe un être aimé. Yisu yivud, chom cha ukwash nakash ukutwisha kusal kudi ‘kudil nau antu adidina.’ (Rom 12:15) Gaby, ukweta nfumwend wafa, ulondin anch yisu yimwing mutapu umwing wa kumekesh yovil yend udi wa kudil. Uwejidinaku anch: “Wawiy mutapu nitanining rongoj anch arund adil pamwing ni yamam. Mu chisu chinicha nikwiyovangap kand anch nikwet ushon amwinam.”
Kukimbijol Mapit ma mu Spiritu
w16.04-F p. 32
Yipul ya in Kutang
“Chijingidij” ni “chizu” chitambwilay mwin Kristu mwawonsu uzizidilau many kudi Nzamb yom ik?—2 Kor. 1:21, 22.
▪ Chizu: Kukwatijan ni buku umwing, dizu dia Grek dikarumwinau anch “chizu” mu 2 Korint 1:22 diading “dizu diasadinangau mu kwisak ni yom ya yijil” dirumburikina “difut dia kusambish, kupan nfalang, machip, makatau kufut kurutu mulong wa chom chilandinau ap mulong wa kuking mbil ya chom chalandangau ap chipanina usey ku machip kanang.” Mulong wa antu azizidilau many, mu difut diau dilejenau mu 2 Korint 5:1-5 mudi kand kwikal ni mujimbu wakad kuvund mwiur. Yehova ukat kuyinkish kand chipan cha kwikal ni mwom wakad kufa.—1 Kor. 15:48-54.
Mu Grek wa katat, dizu difanakena ni dined akat kusadin mulong wa rupet ra antu atondijadina mulong wa kwatijan. Chinech chidi chifanakesh chiwamp mulong wa antu akwikala mband wa chifanakesh wa Kristu.—2 Kor. 11:2; Kuj. 21:2, 9.
▪ Chijingidij: Pakur, chijingidij achisadinang mudi sinyatir umekeshina mwin chom, uyakin ap kwitiy machip kanang. Mulong wa azizidilau many, ayiteka “chijingidij,” mu chifanakesh kudi spiritu utumbila mudi chom cha Nzamb. (Efes 1:13, 14) Ap mwamu, chijingidin chinech chidiap cha rawonsu, pakwez chikat kwikal cha rawonsu chisu chikemp kurutu kwa mwin Kristu kufa ushinshamena ap kurutu kwa kusambish mar makash.—Efes 4:30; Kuj. 7:2-4.
w10-F 1/8 p. 23
Ov, Wij?
Yom ik yading yitonginay pamwing ap kambuy Paul palonday piur pa ‘chisak cha in kupandakan’?
▪ Paul wafunda anch: “Tumushimanany Nzamb mulong Kristu wapandakana ukash wawonsu wa yitil mulong wa ukash wa Nzamb. Chawiy niyetu in kumulondul, tukat kupandakan mulong wendendiy. Nzamb ukat kutusadish etu mulong wa kupalangesh Rusangu Ruwamp ra Kristu ku jindond jawonsu, mudi mukat kupalangana madjimb ma malash mawamp. Mulong etu tudi mudi madjimb ma malash mawamp malambulay Kristu kudi Nzamb. Madjimb minam makat kupalangan pakach pa antu adia mwi njil ya kupand ni kudi akwau adia mwi njil ya kujiy. Kudi antu adia mwi njil ya kujiy, madjimb minam madi ma rufu makata kujipan. Pakwez kudi antu adia mwi njil ya kupand, madjimb minam mawiy makata kulet mwom.”—2 Korint 2:14-16.
Kambuy Paul wading ufanakeshin ni chaku cha in Rom ading kusal musambu wa kumutumbish kalal wawinang akankuny abwambwilang ku winyikel wa Rom. Ku misambu yiney, aletang ya kubuw ni antu a rukan ni alambulang angomb, chad kalal wawinang nau amasalay end ayibudinang nkash kudi antu. Kwinsudiel kwa misambu yiney, apeshang angomb ni kujip antu avud a rukan.
Kulond kwa chifanikesh anch “madjimb ma malash mawamp ma Kristu” mamekeshina mwom kudi amwing ni rufu kudi akwau “kudiokil kamu ku chaku cha in Rom cha kwosh malash pa chisu cha musambu,” mudi mulondinay buku umwing (The International Standard Bible Encyclopedia). “Madjimb ma malash mading mamekeshina kuwin mayivurisha antu ading mu winkwal anch rufu rading riyichingedin.”