DILEJAN 6
Ov, Ruchingej ik Ridiaku Mulong wa Afu?
1. Ov, risu rusangu ruwamp piur pa afu?
Pashikay Yesu ku Betaniy piswimp ni Yerusalem, murund nend Lazar wading wafil kal pasutin machuku manying. Yesu waya kwin nzay pamwing ni Mart ni Mariy, ampanyend a ikundj wafa. Kupwa, chisak cha antu chakumangana. Ov, ukutwish kutongin musangar wovau Mart ni Mariy pamuvumbulau Lazar kudi Yesu?—Tang Yohan 11:21-24, 38-44.
Mart wading nich kashinsh piur pa rusangu ruwamp ra afu. Ndiy wadinga wij anch Yehova ukez kuvumbul afu chakwel ashakama kand pa divu.—Tang Job 14:14, 15.
2. Afu adi mu mwikadil ik?
Nzamb wamuleja Adam anch: “ukez kuchirikin kamu ku divu, mulong kwawiy kwakudioshau.”—DISAMBISHIL 3:19.
Antu ayitanga nich rufunfut. (Disambishil 2:7; 3:19) Tudiap aspiritu ashicha mu mujimbu wa mbij. Tudi yitang yimekena ni mes, chawiy kwikil chikunku cha mujimbu wetu chikwetinga mwom ku rufu. Pitukata kufa, wong wetu ufiling kand, ni yitongijok yetu yikat kusheshik. Chawiy lel, Lazar kalondap chom ap chimwing chamanay ku rufu rend mulong afu kijap chom ap chimwing.—Tang Kuseng 146:4; Mulej 9:5, 6, 10.
Ov, Nzamb ukat kuyimesh antu mar mu kasu kupwa kwa rufu? Mulong Bibil ulejen anch afu kijap chom ap chimwing, chawiy lel, karung ka misiny didi dilejan dia makasu dimusaadila Nzamb. Chitongijok chijim cha kuyimesh antu mar mu kasu chimusangareshiningap.—Tang Jeremiy 7:31.
Tal video ulondina anch Afu Adi mu Mwikadil ik?
3. Ov, afu akutwish kwambamb netu?
Afu kakutwishap kulond ap kutesh. (Kuseng 115:17) Pakwez angel amwing ayimp, akutwish kulond kudi antu ni kwimekesh mudi antu afila kal. (2 Pita 2:4) Yehova ulikishining kupak kwambamb ni afu.—Tang Kuvurik Yijil 18:10, 11.
4. Ov, annany akeza kuvumbuk?
Mamiliyon mavud ma antu afila kal madia mwi nzay makez kuchirik ku mwom pa divu. Ap antu amwing kamwijikap Nzamb ni asala yom yiyimp akez kuvumbuk.—Tang Luka 23:43; Midimu 24:15.
Antu akezau kuvumbul akez kwilej uyakin piur pa Nzamb ni kumekesh ritiy rau mudiay Yesu kusutil ku kumuziyil ndiy. (Kujingunik 20:11-13) Antu inay akuchirika ku mwom ni kusal yom yiwamp akez kusanger mwom wa chikupu pa divu.—Tang Yohan 5:28, 29.
5. Ov, divumbuk ditulejin ik piur pa Yehova?
Nzamb wasala anch ruchingej rikala ritwishikina kusutil ku kumutum Mwanend chakwel apana mwom wend mulong wetwetu. Chawiy lel, divumbuk ditulejin piur pa rukat ni chijingidij cha ranaken ra Yehova. Ov, chisu ik chikuchirikau afu ku mwom, ni nnany usotina pakampwil kuman?—Tang Yohan 3:16; Rom 6:23.