Mareferans ma Mudimu ni Mashakamin ma In Kristu Mukand wa Chikumangan
NGOND WA 6 RUBING RA 3-9
YOM YA USEY YIDIA MU DIZU DIA NZAMB | GALATIA 4-6
“Kurumburik kwa ‘Chishimu cha Chifanikesh’ Kudi Etu”
it-1-F p. 56 par. 1
Agar
Kukwatijan ni kambuy Paul, Agar wading ni chisend mu chishimu cha chifanikesh mulong wading umekeshin muchid wa Isarel wa ku mujimbu, wabombakana ni Yehova kusutil manswik ma Chijil maswikau ku Mukandu wa Sinay, kupwa manswik minam mavala “an mu uswik.” Mulong wa mwikadil wa ukayitil wa antu, muchid wakanganya kulimish mbil ja manswik minam. Mu manswik minam, in Isarel kikalap kand antu ipau pakwez ayifisha nich mudi akayitil awanyidina rufu; chawiy ikala aswik. (Yh 8:34; Ro 8:1-3) Yerusalem wadingaku pa chisu cha Paul umekeshin Agar, mulong Yerusalem wadinga musumb ujim umekeshina dirijek dia in Isarel a ku mujimbu wading muswik pamwing nau anend. Pakwez in Kristu avadilau kudi spiritu adi an a “Yerusalem wa mwiur,” umekeshina mband wa chifanakesh wa Nzamb. Mudi Sara, udia mband ipend, Yerusalem winou kand kal ikalangap muswik. Pakwez mudi mutapu wamuzongolau Isak kudi Isamayel, chilik chimwing an a “Yerusalem wa mwiur,” akolau kudi Mwan, ayizengola kudi an a Yerusalem muswik. Kupwa Agar ni anend ayopata, chinech chading chimekeshin anch Yehova wamulika Isarel wa ku mujimbu mudi muchid.—Gal 4:21-31; tal kand Yh 8:31-40.
wp14 1/10 paj 13 par. 11
Ikal ni Ritiy Rikash mu Want
11 Ap anch manswik ma Aburaham mawanyina chisu chaswanau an a Aburaham Ngand ya Kushilamu, mifund yimekeshin anch manswik minam mading makwet kand kuwanyin kwa mu spiritu. (Gal. 4:22-25) Mu kuwanyin kwinoku kujim, mudi murumburilay kambuy Paul pamupepilau, chikunku chakusambish cha mbut ya Aburaham udi Kristu ni chikunku chakaad chimekeshin in Kristu 144 000 azizidilau many. (Gal. 3:16, 29; Kuj. 5:9, 10; 14:1, 4) Mband wavala mbut ndiy utazukinau anch “Yerusalem wa mwiur”—chikunku cha mwiur cha dirijek dia Nzamb, chisadinau kudi yitang ya mu spiritu yishinshamena. (Gal. 4:26, 31) Mudi mwakanau mu manswik ma Aburaham, mbut ya mband yikulet yiyukish padi antu.
Kukimbijol Mapit ma mu Spiritu
w09-F 1/4 p. 13
Ov, Wij?
Mulong wak Yesu mu malembil mend wamutazuka Yehova anch “Abba, Tatuku”?
Mazu minam makutwish kurumburik anch “tatuku” ap “A Tatuku.” Mazu minam madi tupamp tusatu mu Mifund ni amasadidin mu malembil ni mamutadin ching Tatuku wa mwiur, Yehova. Mazu minam marumburikin kamu ik?
Buku umwing (International Standard Bible Encyclopedia) ulondin anch: “Mu kulond kwa antu a pa chisu cha Yesu, mazu ʼabbāʼ amasadinang chakusambish mudi mazu mamekeshina urund wa piswimp ni kalimish kakwetay mwan mulong wa tatukwend.” Mading mazu masadinangau mulong wa kumekesh kubangin ni kalimish, ni mading pakach pa mazu ma kusambish milejangay mwan mukemp. Yesu wamasadina mu malembil makurukina kudi Tatukwend. Mu chir cha Getiseman, asaa anying kurutu afa, Yesu wamulembila Yehova ni kulond anch ‘Abba, A Tatukwam.’—Marko 14:36.
Kukwatijan ni buku twajimbula kal kwiur oku, udandamedin kulond anch: “Mazu minam madingap mamutadina Nzamb mu mikand ya in Yuda, kusambish kamu chirung cha in Yuda kushik chirung cha in Rom, mulong chading chimeken anch kudi kumuburen Nzamb kalimish pa kumujimbul nich mazu minam mijikena.” Pakwez, “Yesu . . . wasadina mazu minam mu malembil mend mulong wa kumekesh uumwing wa pakampwil udia pakach pendendiy ni Nzamb.” Mu jindond jikwau jaad jifundinau mazu “Abba” jidi mu mifund ya kambuy Paul, chinech chimekeshin anch in Kristu a mu mivu chitot ya kusambish niyau amasadina mu malembil mau.—Rom 8:15; Galatia 4:6.
w10-F 1/11 p. 15
Ov, Wij?
Kambuy Paul wading ukimbin kumekesh ik palonday anch usendin pa mujimbu wend ‘yijingidij ya muswik wa Yesu’?—Galatia 6:17.
Mazu ma Paul mafanyina kulet yitongijok yivud mu manangu ma in kumutesh end a mu mivu chitot ya kusambish. Chilakej, pakur asadinang chikung chisuz cha utad ujal mulong wa kuyijingunin nich antu akwatangau kwi njit, in kubuu matempel ni aswik in kuchin. Pasadinangau utad winou pa mijimbu ya antu, chijingidij chinech chading chimekeshin kapipesh.
Pakwez, yijingidij yawonsu ya kasu yadingap ni kurumburik kwinoku. Antu avud a pakur ayisadinang mulong wa kumekesh anch adi antu a muchid ap a ndong kanang. Chilakej, kukwatijan ni Dictionnaire théologique du Nouveau Testament, “in Siria ipana ayinau kudi nzamb Hadad ni Atargatis kusutil kwitek yijingidij mu tudjal-ansambu ap kwi nshing . . . Chijingidij chifanakena nich diyij dia lierre achitekang pa muntu mwin kumwifukwil Dionysos.”
In kushimunin nsangu avud a katat alondining anch Paul wading ulondin piur pa yidur yatambulay chisu chamusalau nayimp ku mujimbu mu mudimu wend wa umishoner. (2 Korint 11:23-27) Pakwez, pamwing ap wading wisambidin piur pa mutapu wend wa mashakamin mading mamekeshina anch udi mwin Kristu, kadiap yijingidij ya ku mujimbu.
NGOND WA 6 RUBING RA 10-16
YOM YA USEY YIDIA MU DIZU DIA NZAMB | EFES 1-3
“Ditenchik dia Yehova ni Mudimu wad”
it-2-F p. 858 par. 2
Ujindj Utumbila
Want wa Umesia. Mu mifund yend, Paul upanin chitongijok chijim piur pa kujingunik kwa ujindj utumbila wa Kristu. Mu Efes 1:9-11 ulondin anch Nzamb warumburila ‘ujindj utumbila’ wa rusot rend ni kulond anch: “Nzamb watujingunina patok yom ya ujindj yatenchikay ku rusot rend, yawiy yom yawanyishay mu Kristu. Nzamb ukez kupwish kusal yom yatenchikay pa chisu chiwanyidina, mulong ku rusot rend ukez kukumangej yitang yawonsu ya mwiur ni ya pansh, chad ukez kumutek Kristu kwikal Mwant. Pakur Nzamb watutonda kal etu kwikal answan end, mudi mwading kutenchik kwend, ni kutond kwa rusot rend. Mwamu mukat kusalay yom yawonsu.” ‘Ujindj utumbila’ winou utadin guvernema ap Want wa Umesia wa Nzamb. “Yitang ya mwiur” yisambidinay Paul, adi answan akuyikela pamwing ni Yesu mu Want winou wa mwiur. “Yitang ya pansh” akwikal antu adia pa divu akuyikelau. Yesu wakimba kuyilej in kwilejend anch ujindj utumbila ukwatijadin ni Want chisu chayilejay anch: “Am nakurumburilanya kal en ujindj [utumbila] wa Want wa Nzamb.”—Mar 4:11.
wp12 1/7 paj 27-28 par. 3-4
“[Yehova] Nzamb Umwing” Uyikumangejin Majuku Mend
3 Moses wayileja in Isarel anch: “[Yehova] wetu udi Nzamb umwing.” (Kuv. 6:4) Yisal ni rutong ra Yehova yikat kusal pamwing. Chawiy lel, “pa chisu chiwanyidina,” Nzamb wasambisha kusal “yom yatenchikay”—yom yatenchikay mulong wa kuyitek mu uumwing yitangil yend yawonsu yikweta manangu. (Tang Efes 1:8-10.) Ditenchik dined dikez kuwanyish rutong riner mu mitapu yaad. Chakusambish kutenchik chikumangen cha azizidilau many mulong wa kwikal nich mwom mwiur mwishin mwa Yesu Kristu mudi Ntakel wau wa muspiritu. Rizau riner rasambisha pa Pentekot muvu wa 33 C.C. Pasambishay Yehova kukumangej antu akeza kuyikel pamwing ni Kristu mwiur. (Mid. 2:1-4) Mulong azizidilau many amekana kwikal ashinshamena mulong wa kutambul mwom piur pa yakupesh ya difut dia Kristu, awiy itiyija kapamp kamwing anch ikala “an a Nzamb.”—Rom 3:23, 24; 5:1; 8:15-17.
4 Mudimu wa kaad ukat kuyirijek antu akeza kushakam mu Paradis pa divu mwinshin mwa Want wa Kristu Mesia. “Chisak chipandakena kujimb” chawiy chisadila chikunku cha kusambish cha chisak chinech. (Kuj. 7:9, 13-17; 21:1-5, TMK) Mu Mivu Kanan ya Kuyikel, awiy akez kwinung pamwing ni mabiliyon ma antu akeza kuvumbuk. (Kuj. 20:12, 13) Tongin bil mutapu kuvumbuk kukeza kumekesh kand uumwing wetu! Kwinsudiel kwa mivu kanan, “yom yidia pa divu” akez kuyipak kapamp ka nsudiel. Antu akeza kushinshaman akez kwikal “an a Nzamb” a pa divu.—Rom 8:21; Kuj. 20:7, 8.
Kukimbijol Mapit ma mu Spiritu
wp13 1/2 paj 25 par. 15
Kangal Walikidil Chom ap Chimwing Chikukangesha Kutan Katumb
15 Kudandamen kwetu mu kusal rusot ra Yehova kukez kuyikwash antu akwau chakwel atana katumb. Ku chikumangen cha in Efes, Paul wafunda anch: “Nakwilembilany, amboku, kangal waziyany mulong am nimen mar ma kukwambatany en. Yom yiney yawonsu yidi mulong wa katumb kenen.” (Efes 3:13) Ov, mu mutapu ik mar ma Paul mading marumburikin “katumb” kudi in Efes? Kwikal tayad kwa Paul mulong wa kudandamen kuyilej chikalap nchik yoziu kwamekesha kudi in Efes anch yisend yadingau nich mudi in Kristu yading yilimina ni ya usey nakash. Kulik kwa Paul mu mar, kwelap kwambatan nich uruu ulejena anch urund wau ni Yehova, mudimu wau, ni ruchingej rau relap kwikal ra usey? Kujijaman kwa Paul kwatumbisha win Kristu ni kwamekesha anch kwikal mwin kwilej kwitin kwipan.
“Kwijik Rukat Rawonsu ra Kristu”
21 Dizu dia Grek diakarumunau anch “kwijik” dirumburikin kwijik “mu yisal, ap kusutil ku yom yikata kushiken.” Anch twamekesh rukat mudi mwasalay Yesu—mu kwipan pakad choy mulong wa antu akwau, mu kuwanyish nich riy maswir mau, mu kuyilikishin nich muchim wetu wawonsu—chawiy lel tukutwish kwjik nawamp yovil ya Yesu. Mu mutapu winou, kusutil ku yikata kutushiken mu mwom tukez kushiken ku “kwijik rukat rawonsu ra Kristu.” Kangal twavuramenany anch twashiken ku kwikal mudi Kristu, tukez kwikal piswimp ni muntu wilikejay Yesu nakash, Nzamb wetu wa rukat, Yehova.
NGOND WA 6 RUBING RA 17-23
YOM YA USEY YIDIA MU DIZU DIA NZAMB | EFES 4-6
“Djalany Yom Yawonsu Yikat Kupanay Nzamb ya Kurish Nich Njit”
En Ansand Imanany Dang Mulong wa Kurish ni Djabul
KAMBUY PAUL wayifanikesha in Kristu ni amasalay. Tudi mwi njit ni akankuny adi kwaku! Pakwez njit jetu jidiap nau antu, jidi pantaliken ni Satan nau ayilembil. Arishin kal njit nakash mu tunan twa mivu ni akwet ukaliweny nakash mu kurish. Chawiy chikutwish kumekan anch tukutwishap kupandakan ap kuwin njit jinej, nakash anch tudi ansand. Ov, ansand akutwish kuwin njit pantaliken nau akankuny inay a usu? Inge, akutwish, ni akat kuwin! Mulong wak? Mulong akat kutambul usu udiokila kudi Yehova. Chikwau kand, mudi amasalay afumbinau nawamp, akat “[kudjal] yom yawonsu yikat kupanay Nzamb ya kurish nich njit” chakwel ikala arijekinau mulong wa kurish njit.—Tang Efes 6:10-12.
w18.05 paj 22-23 par. 4, 7, 10
En Ansand Imanany Dang Mulong wa Kurish ni Djabul
4 Mudi nshipu, uyakin twilejina mu Dizu dia Nzamb ukat kutuchidij ku mafundish ma makasu. (Yohan 8:31, 32; 1 Yohan 4:1) Anch twilej kukat nakash uyakin udia mu Dizu dia Nzamb, chikutuswapel kushakam kukwatijan ni mbil ja Nzamb, ap kudjal ‘rikibu.’ (Kuseng 111:7, 8; 1 Yohan 5:3) Chikwau kand, anch twatesh nawamp uyakin winou, tukutwish kurish pantaliken ni akankuny netu.—1 Pita 3:15.
7 Mbil ja Yehova jitentamina jikata kuchidij “muchim,” ap wuntu wetu wa mukach, akutwish kujifanikesh ni rikibu. (Jinswir 4:23) Isalay kafanyinap kuswimp ap pakemp rikibu risadinau ni yikung ya utad ujal nich rikibu ra yikung yiziyina. Chilik chimwing, tukutwishap ap pakemp kuswimp mbil ja Yehova piur pa yom yiwamp nich yitongijok yetu ayinetu piur pa yom tumena anch yiwapin. Tukwetap manangu nakash mulong wa kuchidij muchim wetu. (Jinswir 3:5, 6) Chawiy tufanyidina kushinshikin chisu chawonsu anch ‘rikibu’ retu ridandamedin kuchidij muchim wetu.
10 Mulong yisapat yadjalangau amasalay a mu Rom yayikwashang kurish nawamp njit, yisapat ya chifanikesh tudjadila yitukwashin “kulejan rusangu ruwamp ra chisambu.” (Isay 52:7; Rom 10:15) Pakwez, yisu yimwing chitin kutakaman nakash mulong wa kulejan. Bo, ukweta mivu 20 ulondin anch: “Novang wom wa kulejan kudi ambay nam a shikol. Nimen anch nading kwovang usany. Anch navurik yom ya kwinyim, nijap kamu mulong wak nading mwamu. Pakwez katat nikwet musangar wa kulejan kudi arund nam.”
w18.05 paj 25-26 par. 13, 16, 20
En Ansand Imanany Dang Mulong wa Kurish ni Djabul
13 “Jinseu ja kasu” ik jikutwishay Satan kukwas? Pamwing ap ukurishikishin ni makasu piur pa Yehova. Satan ukatin utonga anch Yehova kakukatinap ni anch kwikil muntu ukubangidina. Ida, ukweta mivu 19 ulondin anch: “Niyovang yisu yivud anch Yehova kadiap piswimp ni yamam ni kakatinap anch ikala Murund nam.” Yom ik yikatay kusal anch wiyov mwamu? “Yikumangan yikat kukasikesh ritiy ram nakash. Nayang kwinakwa ni kushakam pakad kwakul, mulong natongang anch kwikil muntu ukatina kutesh yom nikulonda. Pakwez katat, nikat kwirijek mulong wa yikumangan ni kusal usu wa kwakul tupamp twaad ap tusatu. Chikasiken, pakwez nikat kwiyov nawamp anch nasal mwamu. Ni akadivar nau anambaz akat niyau kwinkasikesh nakash. Yisu yawonsu kupwa kwa yikumangan nikat kwijik anch Yehova winkatin.”
16 Mudi mukata chiful kuchidij wong wa isalay, “ruchingej ra dipandish” rikat kuchidij yitongijok yetu. (1 Tesalonik 5:8; Jinswir 3:21) Ruchingej ritukwashin kushinshikin pa kushilamu kwa Nzamb ni kulik kuziy mulong wa milong yetu. (Kuseng 27:1, 14; Midimu 24:15) Pakwez anch tukatin anch ruchingej retu rituchidija, rifanyidin kwikal rakin kudi etu. Tufanyidin kudjal ‘chiful’ ku mutu wetu, kangal kuchilam ku chikas!
20 Kambuy Paul walonda anch Dizu dia Nzamb didi mudi mpak ya musamu. Yehova watwinkisha Dizu diend. Pakwez tufanyidin kwilej mutapu wa kudisadin nich ukaliweny mulong wa kulond piur pa ritiy retu ap kuwapish mutapu wetu wa kutong. (2 Korint 10:4, 5; 2 Timote 2:15) Mutapu ik ukutwisha kuwapish ukaliweny wey? Sebastian, ukweta mivu 21 ulondin anch: “Nafundang verse umwing mu shapitre mwawonsu mu Bibil nasadinang mulong wa kutang. Katat nikwet list wa maverse nikatina.” Chinech chamukwasha kutesh nawamp mutapu utonginay Yehova. Daniel ulondin niyend anch: “Pinikata kutang Bibil, nikat kufund verse nimena anch nikutwish kuyikwash nich antu nitanina mu mudimu wa kulejan. Namen anch antu akat kusanger anch aman anch ukatin nakash Bibil ni anch usadin usu wa kuyikwash.”
Kukimbijol Mapit ma mu Spiritu
it-2-F p. 859-860 par. 7
Kutumb
Spiritu utumbila. Spiritu ap usu wa Yehova wimedin pa umutakel wend ni ukat kuwanyish ching rusot rend. Usu winou udi wishitwila, utumbila ni awauril mulong wa kuusadin kudi Nzamb. Chawiy chiutazikinau anch ‘spiritu utumbila’ ni ‘spiritu wa kutumb.’ (Kus 51:11; Lk 11:13; Ro 1:4; Ef 1:13) Spiritu utumbila usadina mudiay muntu udi usu mulong wa kutumb ap mulong wa kwishitul. Mwikadil wawonsu uyimp ap wijondila ukat kusal anch spiritu winou ‘anenganana.’ (Ef 4:30) Ap anch udi wakad kumekan, spiritu utumbila umekeshin wuntu utumbila wa Nzamb ni mulong wa chinech ukutwish ‘kunenganan’. Chisal chawonsu chiyimp chikat ‘kujimish kasu ka spiritu.’ (1Tes 5:19) Anch chisal chinech chadandamen, spiritu utumbila wa Nzamb ukat ‘kwov ushon,’ ni chinech chikutwish kusal anch mwin kubwambwil winou ikala mukankuny wa Nzamb. (Is 63:10) Muntu ukata kumunenganesh spiritu wa Nzamb ukutwish kuya kulemp nakash kushik mu chilik cha kumusaal spiritu winou, chitil chalonday Yesu Kristu anch kakutwishap kuchilikishin mu mangand minam ap mu mangand makweza kurutu oku.—Mt 12:31, 32; Mar 3:28-30; tal ESPRIT.
it-1-F p. 237 par. 10
Ris
Rikat Kumeken mu Yisal. Ris ra muntu rikat kumeken mu yisal yikutwishay kusal patok yimekeshina maswir mend mayimp ni makad kuwanyin. Jakobu mwin kufund umwing wa Bibil utulejin anch maku mayimp anch mimish, makat kuval chitil. (Jk 1:14, 15) Muntu ukweta ris ukutwish komb kumekan kusutil yisalijok yend. Kambuy Paul ulondin anch muntu ukweta ris udi mwin kwifukwil akish. (Ef 5:5) Muntu ukweta ris ukat kusal anch yom yovidinay ris yikala nzamb wend, ukat kuyitek pa ndond ya kusambish kusutamu mudimu wa Nzamb ni kumwifukwil Sakatang.—Ro 1:24, 25.
NGOND WA 6 RUBING RA 24-30
YOM YA USEY YIDIA MU DIZU DIA NZAMB | FILIP 1-4
“Kangal Wiyakamishany Mulong wa Chom Chawonsu”
w17.08 paj 12 par. 10
“Chisambu cha Nzamb Chisutila Ronganyin Rawonsu”
10 Yom ik yikutwisha kutukwash chakwel kangal ‘twiyakamisha piur pa chom chawonsu’ pakwez twikala ni “chisambu cha Nzamb”? Mazu ma Paul kudi in Filip mamekeshin anch ang twiyakamishin piur pa mulong, kulembil kudi kwa usey nakash. Chawiy anch twikal ni yakamish, tufanyidin kutek yakamish yetu mu malembil. (Tang 1 Pita 5:6, 7.) Anch wamulembil Yehova, ikal kamu nich kashinsh anch ukat kukubangin. Mujikitisha chisu chawonsu mulong wa yiyukish utambwila. Ni kangal wavuramen anch Yehova ukutwish “kusal yom yivud yipandakena yipul yetu ap yom yitutongila.”—Efes 3:20.
w17.08 paj 11 par. 7
“Chisambu cha Nzamb Chisutila Ronganyin Rawonsu”
7 Chisu chatangau akadivar a ku Filip mukand wa Paul, chom ik chatongau piur pa mukand winou? Avud pakach pau avurika yom yamushikena Paul ni Silas ni mutapu wayikwashau kudi Yehova mu mutapu wakad kuchingejin. Dilejan ik diayifundishay Paul mu mukand wend? Dilejan diading anch: Kangal wiyakamishany. Lembilany ni ukutambulany “chisambu cha Nzamb chisutila ronganyin rawonsu.” Mazu minam marumburikin ik? Ma Bibil mamwing makarumwin anch “chisutil yilat yetu yawonsu” ap anch “chisutil yitongijok ya antu awonsu.” Chawiy Paul wading ulondin anch “chisambu cha Nzamb” chishimokishen nakash mu mutapu wakad kutwish kuchitongin. Yisu yimwing twijingap mutapu ukupwa milong yetu, pakwez Yehova wij. Ni ukutwish kusal yom yakad kuchingejin.—Tang 2 Pita 2:9.
w17.08 paj 14 par. 16
“Chisambu cha Nzamb Chisutila Ronganyin Rawonsu”
16 Yom ik yikushikena anch twatambul “chisambu cha Nzamb chisutila ronganyin rawonsu”? Bibil ulondin anch “chikulam” michim ni manangu metu. (Filip 4:7) Mu dizu dia Grek kulond anch “kulam,” kwading kulond kwa usalay kwamekesha chisak cha amasalay atekau mulong wa kuking musumb. Antu ading achisha mu musumb wa Filip ading ayilamin kudi chisak cha amasalay mudi chinech. Afanyina kulal nawamp uchuku mulong ading ij anch musumb wau auchidijin. Mutapu wawiy umwing, anch tukwet “chisambu cha Nzamb,” tukwiyakamishap ni manangu ni michim yetu yikwikal zong. Twij anch Yehova ukat kutubangin ni ukatin anch tuya kurutu. (1 Pita 5:10) Ni chinech chikat kutuking ku yovil ya kwiyakamish nakash ap kuziy.
Kukimbijol Mapit ma mu Spiritu
it-2-F p. 850 par. 1
Yakupesh
Yakupesh ya maar. Mu Chijil cha Moses, yisu yivud yakupesh ya maar ayipanang pamwing ni yakupesh yikwau, nakash kupwa kwa in Isarel kushakam mwi Ngand ya Kushilamu. (Kuch 15:2, 5, 8-10) Yakupesh yiney yading ni maar ap “maar maswejila,” ni amadjishinang pa chintamb. (Kuch 28:7, 14; ilikej ni Kub 30:9; Kuch 15:10.) Kambuy Paul wayifundina in Kristu a ku Filip anch: “[Ap anch nikat kudjish mash mam mudi yakupesh ya maar.] Ap anch chidiap nchik mwamu, am nikusangar, nikez kusangar kand pamwing ni yenen awonsu.” Pinap kambuy Paul wasadila chilakej cha yakupesh ya maar mulong wa kumekesh rusot rend ra kwipan amwinend mulong wa anamakwend in Kristu. (Fl 2:17) Chisu chikemp kurutu afa, wamufundina Timote anch: “Pakwez am, chisu cham cha kwimpan mudi yakupesh [ya maar] chawanyin kal, chisu cha kuya chashiken kal.”—2Tm 4:6.
“Disanguk Dia Kusambish”—disadikin Katat!
5 Cha kaad, yid yizizidilau many ya “Isarel [wa] Nzamb” yifanyidin kumulondul Nsalejetu Yesu Kristu mu uyaj wa mwiur, kukezau “kwikal nend Mwant.” (Galatia 616; 1 Tesalonik 4:17) Chinship chinech achitazukining anch “disanguk dia pa budid” ap anch “disanguk dia kusambish.” (Filip 3:10, 11, Les Saintes Écritures — Traduction du monde nouveau; Kuburik 20:6) Anch disanguk dined diapwa, chisu chikez kuwanyin cha kuyisangwil pa divu mamiliyon ma antu akweta ruchingej ra kutambul mwom wa chikupu mu Paradis. Chawiy lel, ap anch ruchingej retu rikala ra kuya mwiur ap ra kushal panap pansh, tukat kusanger nakash “disanguk dia kusambish.” Dined didi disanguk dia mutapu ik? Disadikin chisu ik?