Akadivar Ansand, Ov, Usotinany Kwikal Nich Yisend?
1. Ov, chisu ik chifanyidinay mukadivar nsand kusambish kusadil umutakel ufundinau mu 1 Timote 3:1?
1 ‘Anch muntu usotil kwikal nich chisend . . . , ndiy usotil mudimu uwamp.’ (1 Tim. 3:1) Mazu minam mapepidilau mayikasikeshin akadivar asotila kuwanyish yisend ya mudimu mu chikumangen. Ov, ufanyidin kwikal wapanin kal chakwel usal mwamu? Chakin kamu, chiwapin kusambish kusot kwikal nich chisend piuchidia nsand. Mu mutapu winou ukutwish kutambul diyiy ni kumekesh ukashinsh wey wa kwikal utondinau mudi nkwash wa mudimu chisu ukwikala muntu mukurump. (1 Tim. 3:10) Anch udi mukadivar nsand wababatishau kal, ov, mutapu ik ukutwisha kusot kwikal nich chisend?
2. Ov, mutapu ik ukutwishau kukudish ni kumekesh mwikadil wa kwipan?
2 Kwipan kwa Amwiney: Vurik anch usotil kwikal nich chisend chakusal mudimu uwamp, chidiap chijiken cha pakampwil bwat. Chawiy lel, ufanyidin kukudish maswir ma kuyikwash akadivar ni anambaz ney. Njil yimwing ya kusal mwamu yidi ya kusutil ku kutongijokin pa chilakej chiwamp cha Yesu. (Mat. 20:28; Yoh. 4:6, 7; 13:4, 5) Mwita Yehova chakwel akukwasha wikala mwin kukimb kuwap kwa antu akwau. (1 Kor. 10:24) Ov, ukutwish kupan ukwash kudi antu adia mu chikumangen mudi amapal ap ayilim? Ov, ukutwish kwipan amwiney mu mudimu wa kukatul masuku ap kwipan kand mu milad yikwau ya kulam nawamp Chot cha Want? Ov, ukutwish kand kwipan kwa kwisotin mu kusal diskur anch kwikil muntu wa kudisal pa chisu cha Shikol ya Mudimu wa Uteokras? Ukez kuman anch kusutil ku kwipan amwiney mulong wa akadivar ney kukez kukuletin musangar.—Mid. 20:35.
3. Ov, mutapu ik mwikadil wa muspiritu udinga wa usey ni mutapu ik akutwisha kuukudish?
3 Mwikadil wa Muspiritu: Chidi cha usey nakash kudi kashalapol udia mu chikumangen kwikal nich mwikadil wa muspiritu pa ndond pa kwikal nich ukaliweny wa pakampwil. Muntu wa muspiritu upakishining kuman yom mudi mutapu umeningay Yehova ni Yesu. (1 Kor. 2:15, 16) Ndiy umekeshining ‘dibuj dia muspiritu.’ (Gal. 5:22, 23) Ndiy uding kand mwin kulejan wa mushiku utekininga yisakin ya Want pa ndond ya kusambish. (Mat. 6:33) Ukutwish kukudish mikadil ya muspiritu kusutil ku kwikal nich chaku chiwamp cha dilejan dia muntu panrend. Chinech chikutwish kuwejinaku kutang kwa Bibil pichuku-pichuku, kutang nimero mwawonsu wa Chinong cha Kalam ni Réveillez-vous !, ni kwirijik ni kukumangan ku yikumangan ya chikumangen. (Kus. 1:1, 2; Heb. 10:24, 25) Chisu chamukasikeshau nsand Timote chakwel aya kurutu muspiritu, Paul wafunda anch: “Babal ey amwiney . . . ku malejan mey.” (1 Tim. 4:15, 16) Chawiy, sal usu wa kuwanyish yisend yey ya kusal madiskur ku Shikol ya Mudimu wa Uteokras. Irijeka mulong wa mudimu wa kulejan ni ipana pakad kujing. Itekina ni sal usu wa kujiwanyish jintong ja muspiritu mudi kusal mudimu wa uchibol, mudimu wa Betel, ap kukumangan ku Shikol ya Bibil ya Akadivar Ajich. Mwikadil wa muspiritu ukez kukukwash chakwel uchina “maku mayimp ma mujimbu mading ma ku usand wey.”—2 Tim. 2:22.
4. Ov, usey ik ukweta ukinakin ni kushinshaman?
4 Ukinakin ni UKashinsh: Mulong akadivar atonda chakwel angana yakudia kudi in Kristu adinga mu maswir mu mivu chitot ya kusambish ading antu “akin,” ading chakin kamu ijikena kwikal in kulond uyakin ni ashinshamena, atwimbuy kwovap wom piur pa mudimu wayinkishau kusal. Chinech chayikwasha kushinshikin pa milong yikwau ya usey. (Mid. 6:1-4) Chawiy lel, chisu chikwinkishinau chisend mu chikumangen ufanyidin kuchiwanyish nawamp nich ukaliweny wey. Mwimburija Nowa, walondula nawamp kamu yany yamwinkishau ya kusal waat. (Dis. 6:22) Ukashinsh udi nich usey ku mes ma Yehova ni umekeshining kukul kwa muspiritu.—1 Kor. 4:2; tal mushet ukweta mutu wa mulong ulondina anch: “Yiyukish ya Kufumb.”
5. Ov, mulong wak ansand akadivar afanyidin kusot kwikal nich yisend?
5 Mudi mwabwakau, Yehova uswapejin kuyikumangej antu. (Isay 60:22) Uvud piswimp ni chikunku chimwing pa kanying cha mamiliyon ma antu ababatishinau muvu ni muvu. Nich uvud winou wa antu asu ezina mu uyakin, kudi kuswir kwa amakundj adia ayifuvu muspiritu afanyidina kwikal nich yisend mu yikumangen. Nlel unou, kudi midimu yivud kupandakanamu ya kumusadil Yehova. (1 Kor. 15:58) Ov, en ansand akadivar usotilany kwikal nich yisend? Anch chidi mwamu, usotinany mudimu uwamp!
[Mutu wa mulong udia pa paj wa 2]
Nich uvud winou wa antu asu ezina mu uyakin, kudi kuswir kwa amakundj adia ayifuvu muspiritu afanyidina kwikal nich yisend mu yikumangen
[Mutu wa mulong udia pa paj wa 3]
Yiyukish ya Kufumb
Akadivar ansand ayifuvu atanining yiyukish chisu chiyinkishiningau yisend ni chiyifumbiningau kudi amakurump. Kupwa kwa kukumangan, kalam wa munyingumuku wading ushich pa chimet mulong wa kumukasikesh mwin kulejan umwing. Ndiy waman nsand umwing ushich piswimp nend, chad wamwipula nsand winou anch ukumuchingel chakwel isamba nend. Mukadivar winou wamwakula anch ndiy wading nich chisend cha kudioshang rubau ra kutangin kupwa kwa chikumangan ni chikumangan. Anvaj end ading tayad kuya, pakwez ndiy kasotap kuya kurutu kwa chisu pakad kuwanyish chisend chend. Kalam wa munyingumuku wamujikitisha. Ndiy walonda anch: “Amakurump a mu chikumangen chinech ading ij anch chifanyidin kuyifumb akadivar ansand ayifuvu kusutil ku kuyinkish yisend mu chikumangen. Mudi chibudikin, kichadingap chom cha kushimok kudiay awiy chakwel amutonda mukadivar nsand winou mudi nkwash wa mudimu chisu nadinga ni kusal mu chikumangen.”