Dibatish Ud Mupak wa Usey Nakash!

Yesu walonda anch in Kristu afanyidin kuyibatish. (Tang Mateu 28:19, 20.) Chad dibatish chom ik? Ni yom ik yifanyidinay muntu kusal chakwel amubatish?

1. Dibatish Chom ik?

Dizu “kubatish” didiokil mu dizu dia Grek dirumburikina anch “kuwuchik jimu” mu mem. Chisu chamubatishau Yesu, amuwuchika mu wit wa Yordan, kupwa ‘watuntuka mu mem.’ (Marko 1:9, 10) Chilik chimwing, in Kristu akin akat kuyibatish kusutin kuyiwuchik, charumburik anch kuyandjik jimu mu mem.

2. Dibatish dimekeshin ik?

Anch muntu amubatish, wamekesh kal anch wipanin kal amwinend kud Yehova Nzamb. Mutapu ik ukatay muntu kwipan? Kurutu kwa kutambul dibatish, muntu ukat kulembil kwa amwinend, ni kumulej Yehova anch ukatin kumusadin chikupu. Ukat kushilamu anch ukumwifukwil ching kusu Yehova ni ukutek rusot rend pa ndond ya kusambish mu mwom wend. Ukat kutond ‘kwitun amwinend ni . . . kudandamen kulondul’ mafundish ni chilakej cha Yesu. (Mateu 16:24) Kwipan ni kutambul dibatish kukat kumukwash muntu kwikal mu urund wa piswimp nakash ni Yehova ni pamwing kand ni ambay nend in Kristu.

3. Yom ik yifanyidinay muntu kusal chakwel amubatish?

Ukutwish kwirijek mulong wa dibatish kusutil kwilej piur pa Yehova ni kukudish ritiy rikash mudiay ndiy. (Tang Hebereu 11:6.) Anch ronganyin ni ritiy rey yakul nakash, ukumukat Yehova. Ni anch wamukat Yehova, ukukat kand kuyilej antu akwau piur pend ni ukukat kuziyin kwi mbil jend. (2 Timote 4:2; 1 Yohan 5:3) Anch muntu ‘wikal ni mwom uwamp mud musotilay Yehova,’ ukutwish kukat kupan mwom wend kud Nzamb ni kutambul dibatish.—Kolosay 1:9, 10.a

ILEJA CHIKURIKINA

4. Tukutwish kwilejin ku dibatish dia Yesu

Tang Mateu 3:13-17 mulong wa kwilej yom yivud piur pa dibatish dia Yesu. Kupwa isambinany yipul ey:

• Ov, Yesu wading uchid mwanikanch chisu chamubatishau?

• Mutapu ik wamubatishau? Ov, amuzizina mem ma kuziz?

Yesu wasambisha kusal mudimu wa pakampwil wamwinkishau kud Nzamb chisu chamubatishau. Tang Luka 3:21-23 ni Yohan 6:38, kupwa isambinany chipul ech:

• Kupwa kwa kumubatish Yesu, mudimu ik watekay pa ndond ya kusambish mu mwom wend?

5. Dibatish ud mupak ukutwisha kuwanyish

Kwinsambishin muntu ukutwish kuman mud kwipan ni kutambul dibatish ud mupak ukash nakash. Pakwez, ukutwish kusambish kuwanyish yitinau, kushik ni mu chilik cha kwiyov anch katat ukutwish kukwat mupak winou wa usey. Mulong wa kuman yilakej ya antu atwisha kusal mwamu, talany VIDEO.

VIDEO: Kasikesh Urund Wey ni Yehova (1:11)

Tang Yohan 17:3 ni Jakobu 1:5, kupwa isambinany chipul ech:

• Yom ik yikutwisha kumukwash muntu kwirijek mulong wa dibatish?

1. Tukat kwipan kud Yehova pitukata kumulej anch tukatin kumusadin chikupu

2. Pakatau kutubatish, tukat kumekesh kud antu atunyingumukina anch twipanin kal kud Nzamb

6. Anch atubatish tukat kwikal mu dijuku dia Yehova

Anch muntu amubatish, ukat kwikal mu dijuku didia mu uumwing dia pa mangand mawonsu. Ap anch tudiokil ku jinond kushalijan, ni tukwet yaku kushalijan, etu awonsu twitiyijin yom yimwing ni tuziyidin mbil ja mutapu umwing. Tang Kuseng 25:14 ni 1 Pita 2:17, kupwa isambinany chipul ech:

• Dibatish dikwet usu ik pa urund ukwetay muntu ni Yehova ni urund ukwetay ni antu akwau amwifukwidina Yehova?

YOM TWILEJA KAL

Yesu walonda anch in Kristu afanyidin kuyibatish. Pakwel anch muntu amubatish, ufanyidin kukudish ritiy rikash mudiay Yehova, kulimish mbil jend, ni kwipan kud ndiy.

Ov, uvurikin?

• Dibatish chom ik, ni mulong wak did dia usey nakash?

• Dibatish dimekeshin ik?

• Yom ik yifanyidinay muntu kusal chakwel amubatish?

JINGUNIN KAND

Jingunin chirumburikina dibatish ni yom yakad kurumburik dibatish.

“Dibatish Chom ik?” (Mutu wa mulong udia pa jw.org)

Shinshikinany yom yifanyidinay muntu kusal chakwel ashiken ku dibatish.

“Kumukat Yehova ni Kumujikitish Kukukubachik Kutambul Dibatish” (Chinong cha Kalam cha Ngond wa 3, 2020)

Tal yom yamubachika ikundj umwing kutambul dibatish.

“Asota Anch Nijingunina Amwinam Uyakin” (Chinong cha Kalam cha 1, Ngond wa 2, 2013)

Shinshikin mulong wak dibatish ud mupak wa usey nakash, ni mutapu ukutwisha kwirijek.

“Ov, Afanyidin Kwimbatish?” (Yakul ya Ukwash ku Yipul Yikatau Ansand Kwiyipul, Volim wa 2, shapitre wa 37)