Difundish dia 17

Kulam murund, kudi kwikal murund

Urund ushindamedin pa rukat. Anch ukakwilej yivud piur pa Yehova, rukat rey mulong wendendiy rikujimb. Anch rukat rey mulong wa Nzamb rajimb, rusot rey ra kumusadil ni rawiy rikujimb. Chinech chikukubachik kwikal mwin kwilej wa Yesu Kristu. (Mateu 28:19) Anch winungin ku dijuku dia musangar dia Atuman’a Yehova, ukutwish kuman urund wa Nzamb chikupu. Ov yom ik ufanyidina kusal?

Ufanyidin kumekesh rukat rey mulong wa Nzamb nich kuziyil yijil yend. “Anch chakin tumukatil Nzamb, tuziyidil kand ku yijil yend. Chawiy yijil yend kiyikasikenap nakash kudi etu.”—1 Yohan 5:3.

Sadil yiwilejina. Yesu walejana chishimu chimwing chifanikeshina chinech. Muntu ukweta manangu watunga chikumbu chend pa diyal. Muntu chisup watunga chikumbu chend pa usukuril. Rinkind mujim chatutay, chikumbu chatungau pa diyal chawap bwat, pakwez chikumbu chatungau pa usukuril chawa nich kusheshik kujim. Yesu walonda anch antu akata kutesh mafundish mend ni kumasadil adi mud muntu ukweta manangu watungina pa diyal. Pakwez antu akata kutesh mafundish mend ni kulik kumasadil adi kamu mud muntu chisup watungina pa usukuril. Ov ey usotil kufanikan ni muntu ik?—Mateu 7:24-27.

Kwipan. Chinech chirumburikin anch umushejina Yehova mu malembil ni kumulej anch usotil kusal rusot rend chikupu. Kusal rusot ra Nzamb kumekeshin anch udi mwin kwilej wa Yesu Kristu.—Mateu 11:29.

Dibatish. “Akubatish, wova yitil yey ni kutazuk pa dijin diend.” —Midimu 22:16.

Ikal Ukwatikena sens mu kumusadil Nzamb. “Ku midimu yawonsu yiukusalany, salany nich mushiku mudi muukata kumusadilany [Yehova, NW], wakad kutong anch ukat kuyisadilany antu.”—Kolosay 3:23.