WENJIL
Mutapu wa Kupandakan Kwichuk
Chaku cha kwichuk chiyipishining urund uwamp wa muspiritu wa muntu ni Nzamb-chikutwish kumushikij muntu ku kwikat amwinend ni ku kuvundangesh yitongijok yend.a Muntu ukata kwichuk ukutwish kushik ku kuman antu akwau mudiem yom yimukwashininga kupwish maswir mend. Chikwau, kakumanap kulal ni nfumwend ap ni mukajend mudi mutapu wa kumekesh rukat bwat, pakwez, chidi kwau mudi maswir mezina mulong wa kusangaresh kusu mujimbu mu kachikunku kakemp ni kupwish maswir mend minam. Pakwez, kupwish maswir minam mu mutapu winou kudi kwau kwa ka chikunku kiswimp. Chakin kamu, muntu usadininga mwamu kajipiningap yid yend ya mangand mudi “masandj, kwijond, ris, maku makad kuyikel ma masandj,” pakwez uyilangwishining yid yiney.—Kolosay 3:5, NWT.
Kambuy Paul wafunda anch: “Anamakwam in Kristu . . . chifanyidin etu kwishitwish ku yom yawonsu yikata kuyipish mijimbu ni mipim yetu. Chad twikalany kamu antu atumbila akata kumulimish Nzamb.” (2 Korint 7:1) Anch chikukasikedin kulondul mazu malondinay verse winou, pikil kuziy. Yisu yivud, Yehova “witenchikin mu kulikishilan” ni kukwashan. (Kuseng 86:5; Luka 11:9-13) Chawiy, anch muchim wey ukufishining nich chisu usadininga chisal chinech, ni usadining usu wa kuchilik ap anch chidandamedining kusadik pa yisu yimwing, chimeken anch ukatiningap chaku chinech. Chawiy lel, ufanyidin kwijik anch “Nzamb udi mujim kupandakanamu michim yetu, ndiy wij kand yom yawonsu.” (1 Yohan 3:20) Chikwau, Nzamb kameningap ching kusu yitil yetu, pakwez umening ni untu wetu. Ronganyin riner rimukwashing kututesh nich riy chisu tumwitininga dilikishin. Chawiy, pikil kulik kumulej Nzamb milong yey mu malembil nich muchim umwing, mudi muyilinga mwan kudiay tatukwend chisu chidingay mu mar. Yehova ukez kukuyukish nich kom kadia zwang. (Kuseng 51:1-12, 17; Isay 1:18) Chikwau, ufanyidin kusal jinzau jiwamp mulong wa kusal yom yambatena nich malembil mey. Chilakej, ufanyidin kwipuk kutal mafilim ap kutang mabuku malejena pornografi ni kulik kushakam nau arund ayimp.b
Anch ukwetap mutapu wa kulik chaku chinech cha kwichuk, ukutwish kuyilejamu anvaj ey in Kristu ap murund ney wikadilakal mwin Kristu uswila akutwish kukukwash pa mulong winou.c—Jinswir 1:8, 9; 1 Tesalonik 5:14; Titus 2:3-5.
a Kwichuk chidi chaku cha ikundj ap mband cha kusengesh mujimbu wend wa chivaj djat ni pakubudikina mem ma ruvaj, ni kudiay mband djat ni pakwisangareshay.
b Majuku mavud makwatin mupak piur pa mitapu yivud yisadidiningau ordinater ku yikumbu yau, amutekining patok, pa ndond ya antu awonsu mu chikumbu. Kuding kand majuku makwau malandining program mukwau wa kusadil ordinater pakad kwandjikamu yom yijondila. Program winou upandakening pamwing ni maprogram mend makwau makwetingay.
c Chakwel wijika chakusal mulong wa kulik chaku chinech cha kwichuk, tal mutu wa mulong ulondina anch “Les jeunes s’interrogent . . . Comment vaincre cette habitude ?” udia mu Réveillez-vous ! wa Kalang 2006, ni mu buku “Les jeunes s’interrogent — Réponses pratiques”, Volim 1, pa paj wa 178-182.