DILEJAN DIA 10
Yikumangan ya Atuman a Yehova Yikutwish Kukukwash Mutapu ik?
Ov, wakumangenap kal nau Atuman a Yehova? Anch kand kal, pamwing ap wiyakamishin pa kukumangan kapamp kakusambish. Pamwing ap wiyipwil anch: ‘Yom ik yisadikining ku yikumangan yiney? Yikwet usey ik? Nikasalaku ik?’ Mu dilejan dined, ukuman mutapu kukumangan nau akwen kukutwisha kukukwash mu mwom wey ni kukusejish piswimp nakash ni Nzamb.
1. Diyingishin dia usey nakash tukata kukumangenang
Mwin kufund wa Bibil umwing walejana diyingishin dia usey nakash tukata kukumangenang nau akwetu palonday anch: “Nikez kamutumbish [Yehova] mu kukumangan.” (Kuseng 26:12, TMK) Chilik chimwing, Atuman a Yehova akatining nakash kukumangan pamwing. Pa mangand mawonsu, akumangening rubing rawonsu mulong wa kumutumbish Nzamb, kumuwangin, ni kumulembil. Muvu ni muvu akumangening kand ku yikumangan yijim mulong wa kwilej piur pa Yehova.
2. Yom ik ukwileja anch wez ku yikumangan?
Ku yikumangan yetu, tukat kwilej Dizu dia Nzamb, “[kurumburil] ni kwovakesh nawamp mazu [matanginau].” (Tang Nehemiy 8:8.) Anch wez, ukwilej piur pa Yehova ni piur pa mikadil yend yipandikena kuwap. Piukusambisha kujingunin mutapu ukukatinay Yehova, ukusambish kumusejin piswimp. Ukujingunin kand mutapu ukutwishay kukukwash kwikal ni musangar.—Isay 48:17, 18.
3. Mutapu ukutwishau kukukwash antu ukukumangana nau
Yehova utulejin anch “tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing.” (Hebereu 10:24, 25) Ku yikumangan yetu ukutanijan ni antu akatijadina, ni akatina kwilej yom yivud piur pa Nzamb mud muukatina kand ey. Ukutesh mutapu ukatau kukasikeshijan kusutil Bibil. (Tang Rom 1:11, 12.) Ukwambamb kand ni antu akweta musangar chikalap nchik milong yirishinau nich. Minam mad kusu kwau mayingishin makemp twajimbula kal makata kutubachik kukumangan pakad kujing!
ILEJA CHIKURIKINA
Ileja yom yikata kusadikang ku yikumangan ya Atuman a Yehova ni mulong wak chid cha usey kukumangan.
4. Mutapu usadikining yikumangan ya Atuman a Yehova
Mu mivu chitot yakusambish, in Kristu akumanganang pakad kujing mulong wa kumwifukwil Yehova. (Rom 16:3-5) Tang Kolosay 3:16, kupwa isambinany chipul ech:
In Kristu a mu mivu chitot yakusambish amwifukwilang Yehova mutapu ik?
Nlel unou, Atuman a Yehova akat kukumanganang niyau pakad kujing ku Yot yau ya Want. Mulong wa kuman mutapu ukata kusadik yikumangan, talany VIDEO. Kupwa talany chipich chimekeshina mutapu usadikina yikumangan yetu ni isambinany yipul ey:
Kutanijan ik kudia pakach pa yom wamana kal yisadikining ku Chot cha Want ni yom yilejenau mu Kolosay 3:16?
Ov, kudiap chom wamana kal mu video ap pa chipich chisadikining ku yikumangan chikusangareshina nakash?
Tang 2 Korint 9:7, kupwa isambinany chipul ech:
Mulong wak kakuyitangap antu nfalang ku yikumangan ya Atuman a Yehova?
Shinshikin pamwing ni mulej wey yom yikwilejau ku yikumangan rubing riner.
Chikunku ik cha yikumangan chikusangareshina nakash ap umena anch chikukukwash?
Ov, wij?
Pa kapend ketu ka jw.org, ukutwish kutan ndond ni chisu chikata kusadik yikumangan yetu pa mangand mawonsu.
Ku yikumangan yetu asadiningaku madiskur, kumekesh mavideo, ni akat kutufumb mutapu wa kulejan ni kufundish rusangu ruwamp. Kwinsambishin ni kwinsudien kwa yikumangan tukat kuwangang muminy ni kulembil
Pa chisu cha yikunku yimwing akat kuyitang antu akumangena kwakul
Antu awonsu ayitazukin ku yikumangan yetu—amakundj, amband, amapal ni ansand, ap anikanch
Atuman a Yehova kakatap kwit ap kusangish nfalang ku yikumangan yau. Kwandam kuding kwau kwa chamwamu
5. Chitin kwikasikesh mulong wa kuyang ku yikumangan
Shinshikin chilakej cha dijuku diavadikinay Yesu. Mulong wa kuya kukumangan ku yikumangan yijim yasadikang muvu ni muvu, chayitang kusal weny wa Akilometre piswimp 100 mwi ndond mudia mikandu, mulong wa kudiokal ku Nazaret kuya ku Yerusalem. Tang Luka 2:39-42, kupwa isambinany yipul ey:
Ov, utongin anch chading chitin kusal usu kanang mulong wa kuya ku Yerusalem?
Mulong wak chikutwish kukwit kusal usu mulong wa kuyangang ku yikumangan?
Ov, utongin anch chid cha usey kusal usu wa kukumanganang? Mulong wak?
Bibil ulondin anch kukumangan pamwing mulong wa kumwifukwil Yehova kud kwa usey nakash. Tang Hebereu 10:24, 25, kupwa isambinany chipul ech:
Mulong wak tufanyidin kukumangan pakad kujing?
ANCH MUNTU WAKWEL ANCH: “Komb pa kwilej Bibil win ching waya ku chikumangan? Oku ukutwish kwey kumwilejin ku chikumbu.”
Verse ik ap chilakej ik chidia mu Bibil chimekeshina mutapu utonginay Yehova?
YOM TWILEJA KAL
Kuya ku yikumangan kukutwish kukukwash kwilej yom yivud piur pa Yehova, kukasikesh urund wey ni ndiy, ni kumwifukwil pamwing ni antu akwau.
Ov, uvurikin?
Mulong wak Yehova utukasikeshin kwikal ni chaku cha kukumangan?
Yom ik ukutwisha kwilej ku yikumangan ya Atuman a Yehova?
Ey utongin anch yikumangan yikutwish kand kukukwash mu mitapu ik yikwau?
JINGUNIN KAND
Chid nchik anch wiyakamishin mulong wa kwez ku yikumangan? Tal mutapu washikenay ikundj umwing wading kwiyovang niyend mwamu kukat yikumangan.
Tal mutapu washikenay nsand umwing kukat yikumangan ni yom yasalay mulong wa kudandamen kukumangan.
Tal mutapu wiyovilau antu akwau piur pa yikumangan.
“Ov, Chid Kamu cha Usey Kukumangan Ku Chot cha Want?” (Mutu wa mulong udia pa jw.org)
Tal mutapu waswimpa mwom wa ikundj umwing wading mwin chisum pakumanganay ku yikumangan ya Atuman a Yehova.
“Kwikil Kwindond Nayangang Pakad Ut” (Chinong cha Kalam cha 1 Ngond wa 7, 2014)