DILEJAN DIA 39
Chitongijok cha Nzamb Piur pa Mash
Mash mad ma usey nakash. Pakad mash, tukutwishap kwikal aom. Chidiay Sakatang, Nzamb ndiy ukweta mbil ya kutulej mutapu wa kumasadin. Yom ik yilondinay piur pa mash? Ov, ukutwish kumadia ap kumatek mu mujimbu? Ni mutapu ik ukutwisha kukwat mipak yiwamp piur pa mulong winou?
1. Mutapu ik umeningay Yehova mash?
Yehova wayileja atushalapol end a pakur anch: “Mwom wa mijimbu yawonsu udi mu mash mau.” (In Levi 17:14) Ku mes ma Yehova, mash mamekeshin mwom. Mulong mwom utumbil, ni chid chipan chidiokila kud Nzamb, komb mash nimawiy matumbil.
2. Mutapu ik wa kusadin mash ulikishinay Nzamb?
Yehova wayijidika atushalapol end a pakur kudia mash. (Tang Disambishil 9:4 ni In Levi 17:10.) Walejana kand chijil chinech chisu chapanay umutakel ku chisak chitakedila mulong wa kuyilej in Kristu anch ‘ipukany mash.’—Tang Midimu 15:28, 29.
Chirumburikin ik kwipuk mash? Anch dokter wakulej anch ufanyidin kwipuk maar, chirumburikin anch ufanyidinap kumana. Pakwez ov, ukudia yakudia mudia maar, ap ukwitiy kukutekam mu mijir? Bwat kamu. Chilik chimwing, chijil cha Nzamb cha kwipuk mash chirumburikin anch tufanyidinap kuna mash ap kudia annam amwifil. Ni tufanyidinap kand kudia yakudia yin yawonsu mutekinau mash.
Chid nchik piur pa kusadin mash mu yom ya kwiyokish? Milad yimwing ya kwiyokish yikat kujip kamu patok chijil cha Nzamb. Pakach pa milad yiney pad kumutek muntu mash ap yikunku yijim ya mash yitazukinau anch globules rouges, globules blancs, plaquettes, ni plasma. Pakwez piur pa milad yikwau ya kwiyokish, yimekenap kamu patok anch yijipin chijil cha Nzamb ap bwat. Chilakej, milad yimwing ya kwiyokish yikat kusadin yikunku yikemp yikemp yidia mu yikunku yijim ya mash. Milad yikwau ya kwiyokish yitin kusadin mash ma muntu amwinend. Chisu tutongijokina piur pa milad yiney, muntu ni muntu ufanyidin kwikwatin amwinend mupak.a—Galatia 6:5.
ILEJA CHIKURIKINA
Shinshikin mutapu wa kukwat mipak piur pa mutapu wa kwiyokish witina kusadin mash.
3. Kwat mipak yimusangareshina Yehova piur pa kwiyokish
Mutapu ik ukutwisha kukwat mipak yikwatijadina ni chitongijok cha Nzamb piur pa kwiyokish? Talany VIDEO, kupwa isambinany usey wa kusadin yom yilondwilaku ey.
Lembil mulong wa kwit manangu.—Jakobu 1:5.
Kimbijol mbil ja Bibil ni mutapu jitadina mulong wey.—Jinswir 13:16.
Kimbijol mitapu ya kwiyokish yidia kwi ndond ushicha.
Jingunin mitapu ya kwiyokish yiwakad ey kwitiy.
Ikal nich kashinsh anch mupak wey ukukukwash kwikal ni kom kishitwila.—Midimu 24:16.b
Ijik anch kwikil muntu ap umwing—ikala mbay ney wa uruw, mukurump wa chikumangen, ap mulej wey wa Bibil—ukukuleja mupak wa kukwat piur pa yom yitadina kom.—Rom 14:12.
Fund mupak wey chakwel antu akwau awijika.
4. Atuman a Yehova akimbining mitapu yiwamp ya kwiyokish
Chitwishikin kulimish mbil ja Nzamb piur pa mash ni kwiyokish nawamp pakad kusadin mash. Talany VIDEO.
Tang Titus 3:2, kupwa isambinany chipul ech:
Mulong wak tufanyidin kwovijan nawamp ni kumekesh kalimish chisu twambambina nau amingang?
Yifanyidina kulik kwitiy |
Yimutadina mwin Kristu amwinend |
|---|---|
A. Plasma |
Yikunku yidiokila ku plasma |
B. Globules blancs |
Yikunku yidiokila ku ma globules blancs |
C. Plaquettes |
Yikunku yidiokila ku ma plaquettes |
D. Globules rouges |
Yikunku yidiokila ku ma globules rouges |
5. Anch chitin kusadin yikunku yikemp yikemp ya mash
Mash makweting yikunku yijim yinying—globules rouges, globules blancs, plaquettes, ni plasma. Yikunku yiney yijim yinying akutwish kuyauril mu yikunku yikemp yikemp ya mash.c Yikunku yikemp yikemp yimwing akat kuyisadin mu chimwingang mulong wa kwok nich mayej ap mulong wa kukatul kudja kwa mash.
Mwin Kristu mwawonsu ufanyidin kukwat amwinend mupak ukwatijadina ni kom kend kafumbinau kud Bibil piur pa yikunku yikemp yikemp ya mash. Antu amwing akutwish kulik kwitiy milad ya kwiyokish yisadidina yikunku yikemp yikemp ya mash. Pakwez akwau akutwish kuman anch kom kau kayikangeshinap kwau kuyisadin.
Chisu ukimbina kukwat mupak, shinshikin chipul ech:
Ov, mutapu ik nikumurumburila dokter mulong wak nilikina ap nitiyina kusadin yikunku yikemp yikemp yimwing ya mash?
ANCH MUNTU WAKWIPUL ANCH: “Ov, uyimp ik udiaku anch amutek muntu mash?”
Ey utongin nchik?
YOM TWILEJA KAL
Yehova ukatin anch twipuka kusadin mash nayimp.
Ov, uvurikin?
Mulong wak Yehova umen anch mash matumbil?
Mutapu ik twija anch chijil cha Nzamb cha kwipuk mash chitadin kand kumatek mu mujimbu wa muntu?
Mutapu ik ukutwisha kukwat mipak yiwamp piur pa kwiyokish kwitina kusadin mash?
JINGUNIN KAND
Yom ik ufanyidina kutongin kurutu kwa kukwat mupak anch ukwitiy kukok mu kusadin mash mey amwiney?
“Yipul ya in Kutang” (Chinong cha Kalam cha 15 Ngond wa 10, 2000)
Yom ik ufanyidina kutongin chisu ushinshikidina anch ukwitiy kukok mu kusadin yikunku yikemp yikemp ya mash?
“Yipul ya in Kutang” (Chinong cha Kalam cha 15 Ngond wa 6, 2004)
Yom ik yamubachika dokter umwing kwitiy anch chitongijok cha Yehova piur pa mash choviken?
“Nitiya Chitongijok cha Nzamb Piur pa Mash” (Lankany!, wa 8 Ngond wa 12, 2003)
Jingunin mutapu ukatau amakurump asadina mu Komite wa Ukwash wa Milong ya Rupital kuyikwash akadivar ni anambaz nau.
a Tal Dilejan dia 35, “Mutapu wa Kukwat Mipak Yiwamp.”
b Tal dinans dia 5, dilondina anch “Anch Chitin Kusadin Yikunku Yikemp Yikemp ya Mash”; Mazu ma Kwinsudiel 3, “Milad ya Kwiyokish Yitina Kusadin Mash”; ni Mudimu Wetu wa Want wa Ngond wa 11, 2006 paj wa 3-6.
c Adokter amwing amen anch yikunku yinying yijim ya mash yid kwau pamwing ni yikunku yikemp yikemp. Pakwez ufanyidin kurumburil mulong wak ulikin kukutek mash ap yikunku yinying yijim yitazukinau anch globules rouges, globules blancs, plaquettes, ni plasma.