Dizu Dia Yehova Didi Diom

Manans Majim ma Mukand wa Kuburik—Chikunku cha 2

YOM IK yiyichingedina kurutu oku antu amwifukwidila Yehova Nzamb ni antu akad kumwifukwil? Yom ik yiyichingedina kurutu oku Satan ni ayilembil end? Yiyukish ik yikezau kutambul antu aziyidina mu chirung cha Winyikel wa Mivu Kanan wa Kristu? Yakul ya yipul yiney ni yikwau ya usey nakash yidi mu Kuburik 13:1–22:21.a Mu mashapitre minam mudi yishimushimu 9 pa yishimushimu 16 yamanay kambuy Yohan piswimp ni kwisudiel kwa mivu chitot ya kusambish C.C.

Yohan wafunda anch: “Wayuk muntu ukat kutang, ni awiy akata kumatesh mazu ma kubwak, ni kulam yom yifundilau.” (Kubur. 1:3; 22:7) Kutang ni kusadil yom yitwilejina mu mukand wa Kuburik kukutwish kwapukun ku michim yetu, kwakasikesh ritiy retu mudiay Nzamb ni mu Mwanend, Yesu Kristu, ni kutuletin ruchingej ramushena mulong wa machuku ma kurutu.b—Heb. 4:12.

KWICHIL MABUNG SAMBWAD MA UJIM WA NZAMB

(Kubur. 13:1–16:21)

Kuburik 11:18 ulondin anch: “Michid ya mangand yajimana, ni ujim weyey weza, ni muten wa kurumburish afu, ni wa kuyinkish uruu wau kudi atushalapol ey aprofet, ni kudi antwey, ni kudi awiy akat kudiov dijin diey wom, akemp ni ajim, mulong wa kushesh awiy akat kushesh ngand.” Mulong wa kurijek manangu pa yom yezinaku, chishimushimu cha chinan chilejen mudimu wa “nnam . . . ukwet mitu sambwad ni misengu dikum.”—Kubur. 13:1.

Mu chishimushimu cha chidivu, Yohan umumen “Mwan a Mukoku wiminy pa mukandu wa Sion,” wadinga ni “antu tunan chitot ni makum manying ni tunying.” Ayikwola antu inay “mukach mwa antu.” (Kubur. 14:1, 4, MM) Kwalondula yijikish yalondau angel. Mu chishimushimu chilondwilap, Yohan umen “angel sambwad akwet yipupu sambwad.” Chimeken kamu anch, Yehova amwinend uyinkishina angel inay mbil ya kwichil “mabung sambwad ma ujim wa Nzamb” pa yom kushalijan yidia mu mangand ma Satan. Mu mabung minam mudi mazu ni yibabesh ya dirumburish dikezay kulet Nzamb. (Kubur. 15:1; 16:1) Yishimushimu yiney yaad yilejen kand tuyom tukwau tuvud piur pa dirumburish dia Want dikwatijadina nich riyind ra kasatu ni kubul kwa mpuny ya sambwad.—Kubur. 11:14, 15.

Yipul Yipwilingau Piur pa Bibil:

Kubur. 13:8—“Mukand wa aom wa Mwan a mukoku” chom ik? Winou udi mukand wa chinfan ukweta ching majin ma antu akuyikela nend Yesu Kristu mu Want wend wa mwiur. Mudi kand ni majin ma in Kristu azizidilau many achidia pa divu, akweta ruchingej ra kutambul mwom mwiur.

Kubur. 13:11-13—Mutapu ik usadilay nnam ukweta misengu yaad mudi nnak mujim ni kushirish kasu mwiur? Mudi nnam wa misengu yaad—Dikand dia Mangand dia in Angleterre ni in Amerik—dilondil mudi nnak mujim chilejen anch dikat kusadil mar, kushindil ku usu, ni chisum chakwel antu itiyija wintakel wend. Dikat kushirish kasu kudiokal mwiur charumburik anch dikat kwimekesh mudi profet ku kulond anch diapandakana usu wa muyimp mwi njit jaad ja mangand mu chitot cha mivu cha 20 ni diapandakana Ukomunist.

Kubur. 16:17—Pa “rinzwizu” ik pichilau dibung dia sambwad? “Rinzwizu” rifanikeshin yitongijok ya Satan, “usu wa chipepil [mwikadil wa manangu], . . . ukata kusadil mudimu katat mu an a in kubwambul.” Rinkind winou wa ulemb ndiy upwitinau [upiminau] mu ditenchik diawonsu dia Satan dia yom yiyimp.—Efes 2:2.

Malejan Kudi Etu:

Kubur. 13:1-4, 18. “Nnam” ufanikeshina mant ma antu “udiokil mu mem,” charumburik anch, udiokil mu chisak cha antu chirumbangena. (Isay 17:12, 13; Dan. 7:2-8, 17) Nnam winou, watekau ni winkishinau usu kudi Satan, uvud wend udi wa 666, umekeshina kuburen kuwanyin kwend mu chilik chimwing chijim nakash. Kutesh kurumburik kwa chidiay nnam winou kutukwashin kamu nawamp chakwel tulika kumulondul nich kumubaz ni tulika kumwifukwil mudi mu mwifukwidilau antu avud.—Yoh. 12:31; 15:19.

Kubur. 13:16, 17. Kwikalap nchik milong yikash yikutwisha yatushiken mulong wa kuwanyish midimu yetu ya dichuku din diawonsu, mudi ‘kuland ap kulandish,’ kangal twilikidil mu chilik cha kumushil ndond nnam winou atutakel mu mwom wetu. Kwitiyij ‘chijingidij cha nnam pa makas metu ap pa jimpal jetu’ kukez kumutwishish nnam chakwel atakela yisal ap ikala nich usu pa yitongijok yetu.

Kubur. 14:6, 7. Kulejan kwa angel kutulejin anch tufanyidin kamu kulejan rusangu ruwamp ra Want wa Nzamb wimikinau kal swa-swa. Tufanyidin kuyikwash in kwilej etu a Bibil chakwel amwova Nzamb wom ni amutumbisha Yehova.

Kubur. 14:14-20. Chisu cha “muten wa kwangul,” charumburik anch, kuyangul antu akeza kapand, wawanyin, chikez kwikal chisu chikezay mwangel kwichil “mwitwil yijim ya ujim wa Nzamb,” “nviny ya pansh” yakumangejau. Nviny winou—ditenchik diyimp dia Satan dimekena ni mes dia mant mayiyikedila antu pamwing nich “mabuj ma nviny” yibudikin ya yisal yau yijondila—akez kuyinongish chikupu. Tufanyidin kamu kushal ajikishina chakwel kangal tulewa nviny ya pansh.

Kubur. 16:13-16. “Ayilembil ayimp” afanikeshin kampany wa Satan ukweta rutong ra kushinshikin anch ant a pansh kakwachikinap pichilau mabung sambwad ma ujim wa Nzamb pakwez ayisadishin chakwel amubwambwila Yehova.—Mat. 24:42, 44.

Kubur. 16:21. Mudi mushejidina piswimp nsudiel ya mangand minam, mu kulejan kwa dirumburish dia Yehova piur pa ditenchik diyimp dia Satan mudi kand kulond kwa mazu makash ma dirumburish dia Nzamb, mafanikeshau nich mem makwatijadina. Chikalap nchik mwamu, kuchidi kand antu avud adandamedina kumuswingish Nzamb.

MWANT UWININA UYIKEDIL

(Kubur. 17:1–22:21)

“Babilon mujim,” want wa pa mangand mawonsu wa relijon wa makasu, udi chikunku chijondila cha mangand ma Satan. Chishimushimu cha 11 chimulejen mudi “mband wa kusotan”—mband mwin kusal masandj—“ushich panyim pa nnam usunz.” Udi piswimp ni kumushesh kudi “misengu dikum” ya nnam win umusendina. (Kubur. 17:1, 3, 5, 16) Chimufanikeshinau mband wa kusotan mudi “musumb ukash,” chishimushimu chilondwilaku chilejen kuwa kwend ni chilejen kand diladikij dia swa-swa dia Nzamb diyiladikijinay antu anch: “Diokalany kudiay ndiy.” Antu avud adidin mulong wa kuwa kwa musumb ukash. Kudi kuzangam kwa musangar mwiur, mulong wa “uruu wa Mwan a mukoku.” (Kubur. 18:4, 9, 10, 15-19; 19:7) Mu chishimushimu cha 13, muntu ushicha “pa kabar utok” uyil kurish njit ni in michid. Ndiy usheshin shitit mangand mayimp ma Satan.—Kubur. 19:11-16.

Ov, chidi nchik ku mutambu wa “nnak mukuru, ndiy Djabul ni Satan”? Chisu ik chikezau kumudjibwil “mu karung wa kasu ni fur”? Chawiy chimwing cha yom yisambidinau mu chishimushimu cha 14. (Kubur. 20:2, 10) Yishimushimu yaad ya nsudiel yiletin chitokish pa mutapu ukeza kwikadil mwom mu chirung cha Mivu Kanan. Mudi “kuburik” kwashik kal kwinsudiel, Yohan umen ‘wit wa mem ma kupand uyil djat ni mu mukombil wau,’ ni diladikij dia musangar dimuladikijinau muntu win mwawonsu “ukweta impu.”—Kubur. 1:1; 22:1, 2, 17.

Yipul Yipwilingau Piur pa Bibil:

Kubur. 17:16; 18:9, 10—Ov, mulong wak “ant a pansh” adidil piur pa chikunku chasheshau ayinau? Diyingishin dia kudil kwau didi kwitongamin kwau. Kupwa kwa kumushesh Babilon mujim, pawiy pa chisu chikezau ant a pansh kujingunin usey wend kudi awiy. Ndiy wadinga ni kuyiyingish mulong wa yisal yau yiyimp. Babilon mujim uyikwashin kand kuyikumangej ansand chakwel aya kuyirishin njit. Chikwau, usadiling mudimu ukash wa kuyiziyish antu.

Kubur. 19:12—Ov, mulong kwikil muntu mukwau wija ching kusu Yesu wija dijin dimufundilau? Dijin dined didi mulong wa mwaz ni yisend yikwetay, mwaz ni yisend yiney mudi yilejenau mu Isay 9:6, yikwetay Yesu pa chirung cha dichuku dia Mwant. Kwikil muntu ap umwing udija dijin dined ching kusu ndiy amwinend mulong yisend yend yiney yidi ya pakampwil ni ching ndiy kusu umwing ukutwisha kutesh chirumburikina kwikal nich mwaz winou. Pakwez, Yesu uyinkishinaku yid ya chisak cha ngachik yimwing ya yisend yiney, ni ‘ufundin pa jimpal jau dijin diend disu.’—Kubur. 3:12.

Kubur. 19:14—Anany akeza kukandam pa atubar pamwing nenday Yesu ku Armagedon? Mu “in njit adia mwiur” ayila pamwing ni Yesu mwi njit ja Nzamb mukez kwikal angel pamwing ni azizidilau many awina kal ni atambula kal difut diau dia mwiur.—Mat. 25:31, 32; Kubur. 2:26, 27.

Kubur. 20:11-15—Ov, majin ma anany mafundinau mu “mukand wa aom”? Winou udi mukand ukweta majin ma antu in awonsu awanyishina yitinau chakwel atambula mwom wa chikupu—in Kristu azizidilau many, yid ya chisak chipandakena kujimb, ni atushalapol ashinshamena a Nzamb akezau kusangul ku ‘disanguk ditentamina.’ (Mid. 24:15; Kubur. 2:10; 7:9) Antu eza kuchirikin kand ku mwom kusutil ku ‘disanguk dia antu akad kutentam’ akez kufund majin mau mu “mukand wa aom” ching anch ashakam kukwatijan nich “yom yading yifundilaumu mu mukand” ya malejan makezau kulejan mu chirung cha Mivu Kanan. Pakwez, majin minam kamafundilap mutapu wa kukangany kumajimangesh. Majin ma azizidilau many mashadin kamu rawonsu ching anch amekesh kushinshaman kwau kushik ni ku rufu. (Kubur. 3:5) Majin ma antu akutambula mwom pansh makez kushal chikupu pakezau kusut ku kupakiu kwa nsudiel kwinsudiel kwa mivu kanan.—Kubur. 20:7, 8.

Malejan Kudi Etu:

Kubur. 17:3, 5, 7, 16. “Chiyul chidiokila mwiur” chitukwashin tutesha “ujindj wa mband ni wa nnam umusendila.” (Yak. 3:17) Nnam winou wa chifanikesh wasambisha mudi Chisak cha Michid (Société des Nations) ni kurutu eza kumutenchikiril wikal Uumwing wa Michid (Nations unies). Ov, kuujingunin ujindj winou kutubachikinap chakwel twikala nich mushiku wa kulejan rusangu ruwamp ra Want wa Nzamb ni kulejan dichuku dia dirumburish dia Yehova?

Kubur. 21:1-6. Tufanyidin twikala nich ruchingej rikash anch yiyukish yabwakau yikeza kulet winyikel wa Want yikez kuwanyin chakin kamu. Mulong wak? Mulong achilonda kal piur pay anch: “Achisal kal!”

Kubur. 22:1, 17. “Wit wa mem ma kupand” ufanikeshin yitenchik ya Yehova mulong wa kuyiland antu aziyidina ku chitil ni rufu. Ilel kudi kal chilik kanang cha mem minam. El twitiyijany nich kujikitish diladikij dituladikijinau anch ez utambulany “mem ma kupand makad usey” ni tudandamena niyetu nich mushiku kuyiladikij akwetu antu!

[Mazu madia kwishin kwa paj]

[Chipich chidia pa paj wa 25]

Yiyukish ik yamushena yikezau kusanger antu aziyidila mu chirung cha winyikel wa Want cha mivu kanan!