Antu Atentamina Akez Kumushiman Nzamb Chikupu

“Utentamina . . . akamuvurik ku mivu yawonsu . . . Kutentam kwend kushich chikupu.”—KUS. 112:6, 9.

1. (a) Dikez ik dia musangar diyichingedina antu awonsu achindinay Nzamb anch atentamin? (b) Yipul ik tukutwisha kwiyipul?

DIKEZ diamushena mudi ik diyichingedina antu awonsu achindinay Nzamb anch atentamin! Akez kukwatikan chikupu nich kwilej yom yivud piur pa ngikadil yiwamp ya Yehova. Michim yau yizwil bwafu nich ntumb pilejinau yom yivud piur pa yom yatangay Nzamb. Chimwing cha yom yitinay chakwel kwez kwikal ku machuku minam ma uyaj madia kurutu chidi “kutentam,” kukasikeshidinau mu Kuseng wa 112. Ov, mutapu ik ukutwishay Yehova, Nzamb utumbila ni utentamina, kuyiman antu akayitil mudi atentamina? Chikalap nchik usu utusadila chakwel tusala yom yitentamina, tukat kurumbok, pa yisu yimwing tukat kurumbuk nakash.—Rome 3:23; Yak. 3:2.

2. Yilay ik yaad ya rukat yasalay Yehova?

² Yehova watenchika nich rukat mutapu wa kuyiman antu akayitil mudi atentamin. Ov, mutapu ik lel? Cha kusambish, wasala chilay cha kushemunin mwom wa Mwanend mukatish wa mwiur wandama mwivumu mwa mujik chakwel anch atwisha kuvadik wakad kuburen kuwanyin kwa chiuntu. (Luka 1:30-35) Kupwa, pamujipau Yesu kudi akankuny nend, Yehova wasala chilay chikwau chijim nakash. Nzamb wamuchirisha Yesu ku mwom mudi chitang cha muspiritu.—1 Pita 3:18.

3. Ov, mulong wak Nzamb wasangara kumuparij Mwanend nich mwom wa mwiur?

³ Yehova wamuparija Mwanend Yesu chom chimwing chadingay wakad kwikal nich kurutu avadika mud muntu—mwom wakad kutwish kusheshik mwiur. (Heb. 7:15-17, 28) Yehova wasangara pa kusal chom chinech mulong Yesu washala ujijamena mu yoziu yikash. Chawiy Yesu wamwinkisha Tatukwend chom chipandakena kuwap, inge uwanyidina, chakul ku makasu ma Satan anch antu akat kumusadil Nzamb nich yitongijok ya choy, kichidiap mulong wa rukat rikash.—Jinsw. 27:11.

4. (a) Pachirikay mwiur, chom ik chasalay Yesu mulong wetwetu, ni Yehova wasala nchik? (b) Ov, wiyovil nchik piur pa yakusadilay Yehova ni Yesu?

⁴ Yesu wasala yom yivud, payay mwiur. Ndiy “wimana kurutu kwa mes ma Nzamb mulong wetwetu” nich usey wa “mash mend.” Tatukwetu muka rukat witiyija nich muchim umwing chakupesh cha usey cha Yesu mudi “yakupesh ya yitil yetu.” Chawiy lel, nich ‘kom kakad kufa nich,’ tukutwish “kumusadil Nzamb mwom.” Diyingish mud ik ditukweta dia kwakul ku mazu ma kusambish nich Kuseng wa 112 malondila anch: “Mushimanany [Yehova]”!—Heb. 9:12-14, 24; 1 Yoh. 2:2.

5. (a) Chom ik tufanyidina kusal chakwel twikal atentamina ku mes kwa Nzamb? (b) Mu mutapu ik wafundau Kuseng wa 111 ni Kuseng wa 112?

⁵ Chakwel anch Nzamb atwitiyija, tufanyidin ching kamu kwitiyin mu mash michilay Yesu. Tukutwishap twasutish dichuku ap dimwing pakad kumujikitish Yehova mulong wa rukat rend mulong wetwetu. (Yoh. 3:16) Tuswiridin kand kudandamen nich kwilej Dizu dia Nzamb ni tusala usu wetu wawonsu tushakam kukwatijan nich uruu udiamu. Mu Kuseng wa 112 mudi chiyul chimwing chipandakena kuwap mulong wa antu awonsu asotila kwikal ni kom kakad kufa nich ku mes kwa Nzamb. Kuseng winou uwejidin yitongijok pa Kuseng wa 111. Ma Kuseng minam mawonsu maad masambishin nich mazu “Mushimanany [Yehova!]” ap anch “Aleluya!” ni milong 22 yilondwilaku, mulong ni mulong usambishin nich dimuny dimwing dia alufabe wa Uhebereu.a

Mufulandal wa Kuyuk

6. Mutapu ik uyukina “muntu” umwovila Nzamb wom wisambidinau mu Kuseng wa 112?

⁶ “Wayuk muntu umwovila [Yehova] wom, ndiy ukat kusangar nakash mu yijidik yend. Mbut yend yikez kikal ni usu pinap pansh, dijuku dia mwin kutentam dikez kayuk.” (Kus. 112:1, 2) Talany anch, mwin kufund kuseng wisambidin bil cha kusambish “muntu” umwing ni kupwa wakarumuk wisambin ‘antu avud atentamina’ kwisudiel kwa verse wa 2. Chom chinech chilondil anch Kuseng wa 112 winou ukutwish wisambin chisak cha antu avud. Cha musangar, kambuy Paul amupepila chakwel ajimbula Kuseng 112:9 piur pa in Kristu a mu mivu chitot ya kusambish. (Tang 2 Korint 9:8, 9.) Kuseng winou ulejen nawamp win kamu mutapu uyukinau in kwilej a Kristu adia pa divu ilel!

7. Ov, mulong wak uswiridinau atushalapol a Nzamb kwikal nich wom wa winzamb, ni mutapu ik ufanyidina kwiyov piur pa yijidik ya Nzamb?

⁷ Mudi muchilejenau mu Kuseng 112:1, in Kristu inay akin ayukin nakash mulong endidin mu ‘wom wa Yehova.’ Wom winou wa kulik kumunenganesh uyitwishishin kujijamen chiyul cha mangand ma Satan. Awiy akat “kusangar nakash” mu kwilej Dizu dia Nzamb ni mu kuziyil ku yijidik yend. Kumwing ni chijidik cha kulejan rusangu ruwamp ra Want mu mangand mawonsu. Akat kusal usu wa kuyikadish antu a ku michid yawonsu in kwilej oku kand ayibabeshin antu ayimp anch dichuku dia dirumburish dia Nzamb diezin.—Ezek. 3:17, 18; Mat. 28:19, 20.

8. (a) Mutapu ik muyukinau antu ipana kal a Nzamb mulong wa mushiku wau? (b) Yiyukish ik ya kurutu yiyichingedina antu achingejina kushakam pa divu?

⁸ Mulong wa kuyiziyil ku yijidik yiney, atushalapol a Nzamb adia pa divu ilel ashikedin kal uvud wa mamiliyon sambwad. Ov, mutapu ik ukutwisha kutadik anch antu end kandikal ikala “ni usu pinap pansh”? (Yoh. 10:16; Kubur. 7:9, 14) Ni akez “kayuk” mud ik pachiwanyishinay Nzamb rutong rend! Mud chisak, antu achingejina kushakam pa divu akez kuyipandish ku “mar makash” ni akez kusal “ngand yisu . . . kukusokau in kutentam.” Pa kusut kwa chisu, antu akeza kupand ku Armagedon akez “kayuk” nakash. Akez kwikal tayad kuyak mamiliyon ma antu akeza kusanguk. Ruchingej risangareshina mud ik? Chakin kamu, antu akata “kusangar nakash” mulong wa yijidik ya Nzamb akez kushiken ku kuwanyin kwa chiuntu ni akez kusanger chikupu “kwikol kwa uyaj wa an a Nzamb.”—2 Pita 3:13; Rome 8:21.

Kusadil Mapit cha Manangu

9, 10. Mutapu ik ukatau kusadil in Kristu azizidilau many dipit diau dia muspiritu, ni kutentam kwau kukez kushakam nchik chikupu?

⁹ “Dipit dikavulijan mu chikumbu chend, kutentam kwend kukashakam mu mivu yawonsu. Kutok kukamekan mu mididim kudi utentamina, kudi ndiy ukata kwov riy ni ranaken, ni kulam kutentam.” (Kus. 112:3, 4) Pa chisu chafundau Bibil, atushalapol amwing a Nzamb, ijikana mulong wa dipit diau. Mu kulond kukwau, antu itiyijinay kamu Nzamb, ikadiling ampich, ap anch kadiap kwau ampich ku mujimbu. Uyakin udi anch, kudi antu avud akata kutond ayinau kumuziyil Nzamb akutwish ikal atuzwendj nakash, mud muchadinga pa chirung cha Yesu. (Luka 4:18; 7:22; Yoh. 7:49) Pakwez, anch muntu ukwet dipit divud ap dikemp, chitwishikin kwikal mpich muspiritu.—Mat. 6:20; 1 Tim. 6:18, 19; tang Yakob 2:5.

¹⁰ In Kristu azizidilau many, pamwing ni ambay nau, kakatap kwilamin dipit diau dia muspiritu anch ching ayinau kusu. Pakwez, akat “kutok” mu mangand ma mididim ma Satan, mud “kutok . . . kudi utentamina.” Asadiling mwamu kusutil ku kuyikwash antu akwau chakwel isakina dipit dia muspiritu dia manangu ni ronganyin ra Nzamb. Akankuny apakisha kujidik mudimu wa kulejan Want pakwez akangeny. Chinyim nich, dibuj dia mudimu winou utentamina dikez ‘kushakam chikupu.’ Kusutil ku kujijaman mu kutentam chikalap choziu, atushalapol a Nzamb akutwish ikal nich kashinsh ka kushakam chikupu, “mivu yawonsu.”

11, 12. Mu jinjil ik jimwing jikatau antu a Nzamb kusadil dipit diau dia ku mujimbu dikwetau?

¹¹ Antu a Nzamb, chisak cha azizidilau many ni in asadila “chisak chipandaken kujimb” ading nich muchim wa kupan dipit diau dia ku mujimbu. Kuseng 112:9 ulondil anch: “Wading ni kupan ni rukat kudi atuzwendj.” Chisu chivud, in Kristu inay akin ilel akat kusang dipit dia ku mujimbu mulong wa ambay nau in Kristu ni ap mulong wa amutej nau adia mu maswir. Akat kusadilang kand dipit dia ku mujimbu mulong wa kukwashan nich pa yisu kudia yak ya chitangil. Mudi mwalonday Yesu anch mwamu mufanyidinau kwikal, kuding ni kwawiy musul wa kuyuk.—Tang Midimu 20:35; 2 Korint 9:7.

¹² Chikwau, tongin bil piur pa nfalang jikatau kusadil mulong wa kubudish gazet winou mu jindim 172, jilondilingau antu avud atuzwendj. Shinshikin kand, chom chinech, jurnal winou udiaku kand mu jindim jikwau ja yijingidij jikatau kusadil atujikamatu, ni mu Braye mulong wa amputames.

Mwin Kwanaken ni Utentamina

13. Ov, anany asha yilakej yipandakena kuwap ya kupan, ni mutapu ik tukutwisha kwimburij chilakej chau?

¹³ “Muntu ukata kuyanakan ayiman mar ni kuyisondjik.” (Kus. 112:5) Pakad kwidjidjek wamenap kal anch antu apanininga ukwash kadingap chisu chawonsu in ranaken. Amwing apanining mulong wa kwimekesh ap kwa manshindangen. Chisangareshiningap kutambul ukwash wa muntu usotina kukwitiyikish anch udi mwishin mwend ap muntu usotina kukwovikesh anch udi kadia-kutun. Chinyim ni chinech, chisangareshin muchim mud ik kutambul ukwash wa muntu ukwanakedina. Yehova udi chilakej chipandakenamu cha mwin ranaken, Nzamb mwin musangar. (1 Tim. 1:11; Yak. 1:5, 17) Yesu Kristu wimburija muchifanyidina kamu chilakej cha ranaken cha Tatukwend. (Marko 1:40-42) Chawiy lel, pakwel anch Nzamb atumana anch tutentamin, tupanany nich muchim usangera ni ranaken, pakampwil mu mudimu wa kulejan pituyikwashina amutej netu muspiritu.

14. Mu jinjil ik jimwing mu tukutwisha ‘kurijek yom yetu mu kutentam’?

¹⁴ “Ndiy ukata kurijek yom yend mu kutentam.” (Kus. 112:5) Mudi mwasambelau kuchilond, chisak cha mwin kulam yom ushinshamena chilamin yom ya Nsalejend kukwatijan nich kutentam kwa Yehova. (Tang Luka 12:42-44.) Chom chinech chimeken patok pa umutakel wa Mifund uyinkishiningau amakurump, akata pa yisu yimwing kupwish milong yijim ya yitil mu chikumangen. Njil yitentamina ya kupwish milong yidi kand mu umutakel udia mu mikand yengamidina pa Bibil yiletinay chisak cha kashalapol piur pa mutapu ufanyidina kusal yikumangen yawonsu, yikumbu yawonsu ya amishoner, ni yikumbu yawonsu ya Bethel. Kayitinap ching kusu amakurump kutentam pakwez ayitin kand ni in Kristu awonsu mu mashakamin mau umwing ni mukwau ni antu akad kwitiyij, ni mu milong ya kwisak.—Tang Mike 6:8, 11.

Yiyukish Mulong wa Kutentam

15, 16. (a) Jinsangu jiyimp ja mangand jikwet usu ik padi antu atentamina? (b) Atushalapol a Nzamb akwatin mupak wa kudandamen kusal ik?

¹⁵ “Mulong utentamina kakez kamushemuninip, bwat, akamuvurik ku mivu yawonsu. Ndiy kakwovip wom wa jinsangu jiyimp, mulong muchim wend ukat kukungamen mudi [Yehova, NW], Muchim wend udi ukash ni wakad wom. Dichuku dimwing ukuman chikatilay padi akankuny nend.” (Kus. 112:6-8) Kandikal kwikalangap jinsangu jiyimp mu rusangu ra muntu mudi muchidia ilel, pamwing ni yom mudi jinjit, chisum, misong yisu ya mayej ni mayej makwau mayikwatina amapal, kujipijan, uzweny, ni kuyip kwa rinkind. Antu atentamina ku mes kwa Nzamb, kakutwishap iyep ku yibudikin ya jinsangu jinej jiyimp, pakwez kiyikatap kuyakamish nich wom. Chinyim ni chinech, michim yau yidi ‘yikash’ ni ‘yakad wom’ mulong achingejin machuku ma kurutu nich kashinsh, ni ij anch mangand masu matentamina ma Nzamb madi piswimp. Anch kwikal chak, atwishining kurish ni mwikadil winou mulong awiy amwengamidin Yehova chakwel ayikwasha. Yehova kakatap kuyilik antu end atentamina ‘ashemunika’ ukat kuyikwash ni kuyinkish usu chakwel ajijamana.—Filip. 4:13.

¹⁶ Antu atentamina a Nzamb akat kura kand nich rukis ni makasu makatau kuyitwambin kudi in kuyipompat, pakwez antu inay akangeny kuyininetish in Kristu akin ni kakezap kutwish. Pakwez, atushalapol a Nzamb adandamedin kwikal akash ni kakatap kunyikek mu mudimu wayinkishau kudi Yehova—wa kulejan rusangu ruwamp ra Want ni wa kuyikadish in kwilej awonsu akatina. Pakad kwidjidjek, in kutentam akez kura nich rupompat rikash mudi mushejidina disudiel piswimp. Kuyikis kwinoku kukez kushiken pa musong pa chisu chikezau kuyirishish kudiay Satan Djabul mu mangand mawonsu mudi Gog wa Magog. Chad lel, tukez ‘kuman chikatilay padi akankuny netu’ chikezau kukwachik usany mulong wa kukangany kwau. Kukez kwikal musangar mudi ik pa kuman kutumbishiu kwa dijin dia Yehova!—Ezek. 38:18, 22, 23.

‘Ukuzambuk ni Kalimish’

17. Mutapu ik ukezay muntu utentamina ‘kuzambuk nich kalimish’?

¹⁷ Chikez kwikal cha musangar mudi ik kumushiman Yehova mu uumwing, pakad rupompat ra Djabul ni mangand mend! Musangar winou ukez kwikal difut dia antu awonsu atentamina ku mes kwa Nzamb. Kakezap kuzendjik mitu mulong wa usany ni kuyiwin, mulong Yehova niyend washilamu anch “mutu” wa muntu utentamina ukez ‘kuzambuk nich kalimish.’ (Kus. 112:9) Muntu utentamina wa Yehova ukez kuzangam mulong wa kuwin pakumanay chikezau kusheshik akankuny awonsu a ukaleng wa Yehova.

18. Mutapu ik ukeza kuwanyin mazu ma nsudiel ma Kuseng 112?

¹⁸ “Muyimp ukaman musangar wa utentamina ni kwov mukau, ukusumodin ku mazeu ni kunong; ruchingej ra ayimp rukwikal chom chamwamu.” (Kus. 112:10) Antu awonsu adandamedina kuyipompat antu a Nzamb akez “kunong” piswimpap kamu. Kusot kwau anch mudimu wetu upwa akez kufa nich pakeza “mar mapandakena.”—Mat. 24:21.

19. Ruchingej rikwet usey ik?

¹⁹ Ov, ukez kwikal mukach mwa antu akeza kuzangam mulong wa kupand kwau ku kuwin kwinoku kujim? Ap anch chashiken anch wafa mulong wa mayej ap mulong wa upal kurutu kwa mangand ma Satan mapwa, ov, ukez kwikal mukach mwa antu “ayingila” akezau kusangul? (Mid. 24:15) Chakul chikutwish kwikal anch mwawiy anch wadandamen kwitiyij mulambu wa difut wa Yesu ni kumwimburij Yehova, mudi wasalau antu afanikeshinau kudi “muntu” utentamina wisambidinau mu Kuseng 112. (Tang Efes 5:1, 2.) Yehova ukez kushinshikin anch kakezap kuvuramen ‘kuyivurik’ antu mudi inay, ni kakezap kuvuramen yisal yau. Yehova ukez kuyivurik ni ukez kuyikat chikupu ni chikupu.—Kus. 112:3, 6, 9.

[Mazu madia kwishin kwa paj]

Yipul ya Kutongin

• Mayingishin ik mamwing mitukweta ma kulondil anch: “Aleluya”?

• Chom ik chisadikina katat chiyisangareshina in Kristu?

• Yehova uyikatining in kupan a mutapu ik?

[Chipich chidia pa paj wa 25]

Chakwel anch twikal atentamina ku mes kwa Nzamb, tufanyidin kwitiyijin mu mash michilay Yesu

[Chipich chidia pa paj wa 26]

Milambu yiletiningau ya kwikatin yikwashining mulong wa kukwashan nich adia mu maswir ni mulong wa kupalangesh nich mikand yengamidina pa Bibil