Twikalany Nich Chitongijok Cha Kristu

“Ukukwinkishany yitongijok ya mutapu umwing pakach pen chakwel umwilakejany Kristu Yesu.”—ROME 15:5.

1. Ov, mulong wak tufanyidina kwimburij chitongijok cha manangu ma Kristu?

YESU KRISTU walonda anch: “Ezany kwen kudi am . . . Ungiyiyany am; mulong yam nitudishila ni kwikepishil mu muchim; ni en ukez kutanany kwipimish mipim yen.” (Mat. 11:28, 29) Diladikij dined dia rukat dilejen nawamp chitongijok cha Yesu cha rukat. Kwikil muntu ap umwing ukutwisha kwikal chilakej chiwamp cha kwimburij. Ap anch ndiy wadinga Mwan mwin dikand wa Nzamb, Yesu wamekesha ranaken ni riy, pakampwil pantaliken ni antu adinga amena mar.

2. Yom ik yidia mu chitongijok cha Yesu yitukwileja?

² Mu mutu wa mulong unou ni yikwau yaad yilondwilaku ey, tukwilej mutapu tukutwisha kukudish ni kulam chitongijok cha manangu ma chilik chimwing mudi madingay nich Yesu ni mutapu wa kwimburij “chitongijok cha kristu” mu mwom wetu. (1 Kor. 2:16, MM) Tukwisambin bil pa yom yitan: kwitudish kwa Yesu, kwikepish kwend, riy rend, kuziyil kwend kudi Nzamb, kujijaman kwend, ni rukat rend rikash.

Twilejinany ku Kwitudish kwa Kristu

3. (a) Yesu wayileja in kwilejend dilejan ik dia kwikepish? (b) Mutapu ik wasalay Yesu pa chisu chamekeshau in kwilejend kuziy?

³ Yesu, Mwan uwanyidina wa Nzamb, wasota amwinend kwez panap pansh chakwel asala pamwing ni antu akad kuwanyin ni akayitil. Kurutu amwing au amujipa. Chikalap nchik mwamu, Yesu walama musangar wend ni kwiyikel kwend amwinend. (1 Pita 2:21-23) ‘Kujikish kutal’ pa chilakej cha Yesu kukutwish kwatukwash niyetu tusala chilik chimwing anch kurumbuk ni kuburen kuwanyin kwa antu akwau kwatukwat. (Heb. 12:2) Chawiy Yesu wayileja in kwilejend ‘itwika mpand yend pamwing nend’ chakwel ilejina kusutil kudiay ndiy. (Mat. 11:29) Ov, chom ik chelau kwilej? Cha kusambish, Yesu wadinga witudishina, ni wadinga mwin kushimpish muchim chikalap nchik kurumbok kwau. Pa uchuku wafay, Yesu wayowisha mend yau, chawiy chayilejay dilejan dia “kwikepishil mu muchim” diakad awiy kufanyidin kuvuramen ap dimwing. (Tang Yohan 13:14-17.) Kupwa, pakanganay Pita, Yakob ni Yohan ‘kuchish ku mes,’ nich ranaken Yesu witiyija kuziy kwau. Chawiy wipula anch: “Simon, niyey walalang kal kwey? . . . Chishany ku mes, chad lembilany chakwel kangal wawany mu yoziu. Muchim wa muntu usotil kusal nawamp, pakwez ndiy kakwetap usu.”—Marko 14:32-38, MM.

4, 5. Ov, chilakej cha Yesu chikutwish chatukwash mutapu ik pantaliken nich kurumbok kwa antu akwau?

⁴ Ov, mutapu ik tukata kusal anch mukwetu mukaritiy ukwet chaku cha kuril, cha kujiman swa-swa, ap kakatap kwitiy swa chiyul chimwinkishinau kudi amakurump ap kudiay “kashalapol ushishamena ni kubabal”? (Mat. 24:45-47) Ap anch chitwishikin kwitiyij ngikadil ya ku mujimbu ya mu mangand ma Satan mudi yoviken, pakwez chiding chikash kura nich yom yiney mukach mwa akadivar netu. Anch kurumbok kwa antu akwau kwatwovish kuyip swa, tuswiridin twiyipula ayinetu anch: ‘Ov, mutapu ik uwamp nikutwisha kumekesh “chitongijok cha kristu”?’ Pakish kulam mu manangu mey anch Yesu kadingap ni kuyijimen in kwilejend, ap pa yisu yamekeshau kuziy kwa muspiritu.

⁵ El tushinshikinany chilakej cha kambuy Pita. Pamwelau Pita kudiay Yesu anch diokal mu wat wenda piur pa mem chakwel eza kudiay Ndiy, Pita wenda kachisu kakemp. Kupwa Pita watala ku rinkind wadinga ututina ni wasambisha kujiy. Ov, Yesu wajimana ni wamuswejina anch: “Mwamu wadia usotina! Ukwov kwey”? Bwat! “Yesu watandjek chikas chend swa wamukwat, wamwel anch: A, ey wa karitiy kakemp, mulong ik watadikinanga?” (Mat. 14:28-31) Anch tufanyidin kurish nich chom kanang chikwetay mukadivar chimekeshina kuburen ritiy, ov, niyetu tukutwish twatandjek chikas cha chifanikesh chakwel tumukwasha ikala nich ritiy rikash? Chom chinech chimeken anch diawiy dilejan dia usey didia mu chisal cha kwitudish kwa Yesu mulong wa Pita.

6. Yesu wayileja chom ik atwimbuy end pa mulong wa kusot kwikal muntu mujim?

⁶ Pita niyend wadinga mwi ntad jadinga ni kulank chisu ni chisu mukach mwa atwimbuy piur pa nany wadinga mujim kuyipandakanamu akwau. Yakob ni Yohan asota kushakam ou ku chikas cha katatuku cha Yesu ou niyend ku chikas cha kamaku mu Want wend. Pateshay Pita ni atwimbuy akwau dizu dined, akisa nakash. Yesu wadinga wij anch chaku chinech chidiokil mu chisak chapaminau. Wayitazuka awonsu, ni walonda anch: “En wijany kal anch anyikel au antu a mangand akwet kal antu ajim au, akat kuyisadish nakash piur pau. Kangal chikikal mwamu pakach pen; pakwez wawonsu ukwel anch, nikala mujim pakach pen ukwikal mwin kusadil wen; ni wawonsu ukusambilaku mukach mwen ukez kwikal kashalapol wen.” Kupwa Yesu wisambina piur pend amwinend anch: “Mudi Mwan a muntu kezilap ni kusadish pakwez ni kusadil, ni kupan kupand kwend kuyikingiluku avud.”—Mat. 20:20-28.

7. Ov, mutapu ik ukutwishay umwing ni umwing wetu kuwejin ku uumwing mu chikumangen?

⁷ Kutongijokin pa ngikadil ya kwikepish ya Yesu kukutwish kwatukwash ‘twikal antu ikepishina’ mukach mwa akadivar netu. (Luka 9:46-48) Kusalang mwamu kuletining uumwing. Yehova, mudi tatuku ukweta dijuku dijim, ukatin anch anend awonsu “ibomba ashakamang pamwing,” mu kwovijan. (Kus. 133:1) Yesu wamulembila Tatukwend anch in Kristu awonsu akin ikala mu uumwing, chakwel “mangand makwijik anch, komb yey wantuma am, ni kuyikat awiy mudi ey chiwinkatila am.” (Yoh. 17:23) Chawiy komb, uumwing wetu ukat kutwijikish anch tudi in kwilej a Kristu. Chakwel anch tusangera uumwing winou, tufanyidin kuman kurumbok kwa antu akwau mudi mwadingay Kristu ni kukuman. Yesu wadinga mwin kulikishan, ni walejana anch ching kusutil ku kwikal mwin kulikishan chawiy lel niyetu akutwish atulikishin.—Tang Mateu 6:14, 15.

8. Chom ik tukutwisha kwilej kusutil kudi atushalapol a pakur a Nzamb?

⁸ Tukutwish twilej kand yom yivud kusutil ku kuyimburij antu akaritiy asala kal mivu yivud mu kumwimburij Kristu. Mudi Yesu, antu inay niyawiy akat kumekesh anch ateshin kurumbok kwa antu akwau. Ileja kal anch, kumekesh riy mudi ra Kristu kukatap ching kusu kutukwash “kuyisend . . . aziyila” pakwez kutukwashining kand kuwejin ku uumwing. Chikwau kand, kukat kuchikasikesh chikumangen chawonsu kumekesh chitongijok cha Kristu. Awiy akat kuyisotin akadivar nau yom yawiy yimwing mudi mwadingay ni kusot kambuy Paul mulong wa in Kristu in Rome anch: “Nzamb wa kudandamen ni wa kwongoj akwinkany en kushakamany mu kwovijan kudi muntu ni muntu mukwau mudi musotilay Yesu Krisu; chakwel en ukumutumbishany Nzamb, Tatukwend wa Nsalejetu Yesu Kristu, ni muchim umwing ni kan kamwing.” (Rome 15:1, 5, 6) Inge, kwifukwil kwetu mu uumwing kukat kumutumbish Yehova.

9. Ov, mulong wak tuswiridina mwiku utumbila chakwel kwimburij chilakej cha Yesu?

⁹ Yesu wateka pamwing “kwikepishil mu muchim” ni kwitudish, kudia chikunku cha dibuj dia mwiku utumbila wa Nzamb. Chawiy lel, kuwejin pa kwilej chilakej cha Yesu, tuswiridin mwiku utumbila wa Yehova, chakwel anch twimburija nawamp chilakej chinech. Tufanyidin kumwilembil Nzamb atwinkisha mwiku wend utumbila ni tusala usu wa kukudish dibuj dia mwiku utumbila—“rukat, musangar, chisambu, kushimpish muchim, kudimuk, kuwap, [ritiy, NW], kwitudish ni [kwilam, NW].” (Gal. 5:22, 23) Kusutil ku kulondul chilakej cha kwikepish ni kwitudish chashay Yesu, tukez kushiken ku kumusangaresh Tatukwetu wa mwiur, Yehova.

Yesu Wayisadila Akwau mu Mutapu Uwamp

10. Mutapu ik wamekeshay Yesu kuwap?

¹⁰ Kuwap nikwau kudi chikunku cha dibuj dia mwiku utumbila. Chisu ni chisu Yesu wadinga ni kuyisadil akwau mu mutapu uwamp. Antu awonsu adinga ni kumukimb Yesu nich michim yitok ashikena ku kuman anch ndiy “wayaka nawamp.” (Tang Luka 9:11.) Chom ik tukutwisha kwilejin ku kuwap kwadingay ni kumekesh Yesu? Muntu muwamp udi murund wa awonsu, mwin kuyibangin akwau ni mwin riy. Mwamu mwadingay Yesu. Ndiy wayovila antu riy “mulong awiy ading ni kutambitamb ni kupalangan mudi amikoku akad kafung.”—Mat. 9:35, 36.

11, 12. (a) Rumburil chisal chimwing chimekeshina riy ra Yesu. (b) Chom ik ukutwisha kwilejin ku rusangu ritwisambina kal er?

¹¹ Yesu wadinga ni kusadil riy ni ranaken rend. Tushinshikinany chom chimwing chasadika. Mband umwing wadinga ni mayej ma rulong ra mash, mu mivu 12. Ndiy wadinga wij anch mu Chijil cha Moses, mwikadil wend wamwikadisha mwin kwijond pamwing ni muntu win mwawonsu ukumupukuna. (Lev. 15:25-27) Pakwez, ntumb ni chaku cha Yesu yamwitiyikisha mband winou anch ukusot ni ukutwish kumwok. Ndiy wasambisha kulond anch: “Anch napukun kusu kwam ku maswin mend nikuyerik kwam.” Wakwata mupak, wasala mwamu ni kapamp kamwing watesha anch wayerik kal.

¹² Yesu wijika anch kudi muntu wamupukuna kal, ni watalijola oku ni oku chakwel amumana muntu winou. Chimeken anch, mband winou wova wom wa kumuswejin mulong ndiy wajirila Chijil, wawa kabwikam ni kuzal ku mend yend ni walonda yom yawonsu patok. Ov, Yesu wamukabwokina mband winou kazwendj ni chimana mar? Bwat kwau! Ndiy wamuleja nich kumukasikesh anch: “Mwan mband, ritiy rey rakwok kal kwey; yang kwey ni chisambu.” (Marko 5:25-34) Chamwongoja nakash mudi ik pateshay mazu minam mawamp!

13. (a) Ov, chitongijok cha Yesu chadinga chishalijadin mutapu ik nich cha Afarise? (b) Yesu wayisadila an akemp mutapu ik?

¹³ Pakad kwikal mudi Afarise achinchikina michim, Kristu kadingap ni kusadil ulabu wend mulong wa kuyiwejin akwau yisend yilimina. (Mat. 23:4) Pakwez, ndiy wayileja akwau mu mutapu uwamp ni kushimpish muchim jinjil ja Yehova. Yesu wadinga murund wadinga ukatinau kudi in kwilejend, mwin rukat ni muwamp chisu chawonsu, murund wakin. (Jinsw. 17:17; Yoh. 15:11-15) Ap adinga ni kusanger kwikal ni Yesu, niyend wadinga ni kuyisanger. Kadingap ukwatikena nakash mu chilik cha kukangany kulik yadingay ni kusal mulong wa kusutishaku chisu ni an. Pa dichuku dimwing, in kwilejend, padingau achikwet yitongijok ya kwiman ayinau anch adi ajim mudi mwadingau antakel a relijon adingaku pa chirung chau, apakisha kuyikangesh antu anch kangal ayileta anau kudiay Yesu chakwel ayikwata. Yesu kasangerap chom chasalau in kwilejend. Ndiy wayileja anch: “Yilikany kwau an akemp eza kudi am, kangal wayikojany; mulong want wa Nzamb udi wa awiy.” Kupwa, wayisadila an akemp mulong wa kuyilej dilejan dia usey, walonda anch: “Chakin kamu nakulejany, Wawonsu wakad kwez kwak want wa Nzamb mudi mwan mukemp, ndiy kakutwiship kuwandam.”—Marko 10:13-15.

14. Yom ik yikatau an kutanin mu kuyibangin nawamp?

¹⁴ Tongin bil piur pa mutapu wezau an inay kutesh pikalau amakundj ni amband, pavurikau anch Yesu Krisu ‘wayisenda mu makas ni wayiyukisha.’ (Marko 10:16) An ilel niyau akez kuvurik mivu yau ya kwinyim nich musangar mulong wa amakurump ni antu akwau adinga ni kuyibangin nich michim yitok. Chijim nakash, an akatau kubangin mwamu kudiosh mu wanikanch wau, mu chikumangen akat kwilej anch mwiku utumbila wa Yehova udi pa antwend.

Mekeshany Kuwap mu Mangand Mayimp

15. Mulong wak kitufanyidinap kukashimuk pa mulong wa kuburen kwa kuwap ilel?

¹⁵ Antu avud ilel iyoviling anch kakwetap chisu cha kuyimekeshin antu akwau kuwap. Chawiy lel, pichuku pichuku, ku shikol, ku mudimu, mu weny ni mu mudimu wa kulejan, antu a Yehova akat kura nich spiritu wa mangand. Ngikadil yiyimp yikutwish yatwovish kuyip, pakwez kiyifanyidinap kutukashimwish. Yehova wamupepila Paul chakwel asambela kutubabesh anch mwom mu machuku minam makash ma “kwisudiel” makez kusal anch in Kristu akin ikala pamwing ni “in kwikat ayinau, . . . in kukis kuwap.”—2 Tim. 3:1-3.

16. Mutapu ik tukutwisha kusadil kuwap kwa Ukristu mu chikumangen?

¹⁶ Ku mutambu ukwau, mashakamin madia mu chikumangen cha Ukristu madi matudishina kushalijan kulemp ni ma mangand makad kuwap. Ku kumwimburij Yesu, muntu ni muntu udia pakach petu ukutwish wawejin ku mashakamin minam mawamp. Mutapu ik tukutwisha kusal mwamu? Cha kusambish, antu avud adia mu chikumangen asotin ukwash wetu ni dikasikesh dietu mulong akat kura nich yikokujol ya ukash wa mujimbu ap milong yikwau yikash. Mu “machuku ma kwisudiel” manam, milong yiney yikutwish yikal yikash, pakwez kiyidiap yisu. Pa yirung yafundau Bibil, in Kristu adinga ni kurish nich milong mudi yiney. Chawiy lel, yisal ya ukwash yifanyidin kamu katat mudi muyadinga kudiau in Kristu adingaku pasak. Chilakej, Paul wayikasikesha in Kristu anch: “Uyikandany azezalela, kasikeshany ayikwop, kwashany aziyila, shimpishany michim kudi antu awonsu.” (1 Tes. 5:14) Chom chinech chitin kusadil kuwap kwa Ukristu.

17, 18. Mu jinjil ik jikwau tukutwisha kwimburij kuwap kwa Yesu?

¹⁷ In Kristu akwet chisend cha ‘kuyak akadivar nawamp,’ kuyisadil mudi mukutwishay Yesu kuyisadil, kuyibangin chakin antu twijika pasutil kal mivu ni atwakad etu kuman. (3 Yoh. 5-8) Yesu wadinga wakusambish mu kuyimekeshin akwau rukat, mwamu tufanyidina niyetu kwikal, in kuyitudish antu akwau chisu chawonsu.—Isay 32:2; Mat. 11:28-30.

¹⁸ Umwing ni umwing wetu ukutwish wamekesh kuwap kusutil ku kubangin kuwap kwa muntu ni muntu. Kimb mitapu ni jinjil ja kusal mwamu. Sal usu wey! Paul ukasikeshin anch: “Katijanany mudi divar, ulimishijanany muntu ni mukwau.” (Rome 12:10) Chirumburikin kulondul chilakej cha Kristu, kuyisadil antu akwau nich chirungul ni kuwap, kwilej mutapu wa kumekesh “rukat rakad kubabek.” (2 Kor. 6:6) Paul warumburila rukat riner ra Ukristu mu mutapu unou: “Rukat rikat kushimpish muchim, rudimukin kand. Rukat kirukwetap mukau, rukat kiribazilap, ap kwishimek.” (1 Kor. 13:4, MM) Pandond pa kuyilamin akadivar ni anambaz rukuny, el tuteshany chiyul chinech: “Ikalany antu adimukina kudi muntu ni mukwau, likishijadinany mudi chikat kunilikishilau en kudi Nzamb mu Kristu.”—Efes 4:32.

19. Yibudikin ik yiwamp yidingaku ku kumekesh kuwap kwa Ukristu?

¹⁹ Kusal kwetu usu chakwel tukudisha ni kumekesh kuwap kwa Ukristu pa yisu yawonsu ni mu mikadil yawonsu kukat kutuletin yiyukish yivud. Spiritu wa Yehova ukutwish kusal ni want ipau mu chikumangen, ni kusongish dibuj dia spiritu. Chikwau, pitukata kulondul chilakej chashay Yesu ni kuyikwash antu akwau asala chilik chimwing, musangar wetu, difukwil dietu dia mu uumwing dikumusangaresh Nzamb amwinend. Chawiy lel, el tusalany usu wa kumekesh kwitudish ni kuwap kwa Yesu, mu yom yawonsu tukuyisadila akwetu.

Ov, Ukutwish Kurumburil?

• Mutapu ik wamekeshay Yesu anch wadinga ‘witudishila ni wikepishil mu muchim’?

• Mutapu ik wamekeshay Yesu kuwap?

• Mu jinjil ik jimwing mutukata kumekeshin kwitudish ni kuwap kwa Ukristu mu mangand manam makad kuwanyin?

[Chipich chidia pa paj wa 11]

Anch ritiy ra mukadivar rasambish kukep, mudi muradinga ra Pita, ov, ukutwish wamukwash?

[Chipich chidia pa paj wa 13]

Ov, mutapu ik ukutwisha kukwash chakwel chikumangen chikala ndond yiwamp?