Mulong wa Mangand Mawonsu, Chifanyidin Kuudiosh pa Mangand Mawonsu

MAR madi kwawonsu, ni antu avud ayikwash antu adia mu mar. Chilakej, amingang, asadiling asaa avud mu ma rupital mulong wa kuyikwash antu ayedila ap itapina yitat. In kujim kasu, ampurish, in kutenchik yijil, ni in kuyipandish adia mu mar asadil usu wau wawonsu mulong wa kukangesh anch antu akwau kangal amana mar. Usu winou usadikininga, usadil yivud mulong wa kuyikwash antu mu chilik kanang, pakwez udi mulong ujim nakash kudi muntu umwing ap ku ditenchik kanang wa kwel kudiosh mar pa mangand mawonsu. Pakwez, Nzamb ukutwish ni ukez kupwish mulong winou pa mangand mawonsu.

Kashinsh tukatanin mu mukand wa nsudiel udia mu Bibil: “[Nzamb] ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikuru yasutil kal.” (Kuburik 21:4) Tongin bil antu inch akeza kukwachik ku kushilam kwinoku. Kushilamu winoku kulondil mu wiswimp rutong ra Nzamb ra kupwish mar mawonsu. Ukez kusal mwamu kusutil ku kudiosh jinjit pa mangand mawonsu, nzal, mayej ni kuburen kutentam, pamwing ni antu awonsu ayimp. Kwikil muntu ap umwing ukutwisha wasal mwamu.

Want wa Nzamb Wawiy Ukeza Kusal Mwamu

Nzamb ukez kuwanyish yakushilamu yend kusutil kudiay muntu wend wa kaad ukweta usu nakash mu mangand mawonsu—Yesu Kristu wavumbulau. Chisu chezinaku chikezay Yesu kuyikel mudi Mwant pakad mwin kumubwambwil pa divu diawonsu dia kabuj. Antu kakezap kand kuyiyikel kudi ant, antakel ap a in politik a chiuntu, pakwez, akez kuyiyikel kudi Mwant umwing ni akez kwikal mu guvernama umwing—Want wa Nzamb.

Want winou ukez kuyishesh maguvernema mawonsu ma antu. Bibil walonda kal anch: “Nzamb wa mwiur ukez kukasikesh want ukwau wakad kwez kwikal nich disudiel chikupu. Kakez kuukwatap want winou, pakwez ukez kushesh mant makwau mawonsu, chad wawiy ukez kushakam chikupu.” (Daniel 2:44) Antu a pa mangand mawonsu akez kwikal mu uumwing mu guvernema umwing utentamina—Want wa Nzamb.

Padingay panap pansh mudi muntu, Yesu walonda chisu chivud piur pa Want winou. Waujimbula mu malembil ma chilakej, wayileja in kwilejend chakwel alembila mu mutapu unou: “Want wey weza. Rukat rey arusala pansh mudi mwiur.” (Mateu 6:10) Shinshikin anch, Yesu walejana anch Want winou wambaten nich kusadik kwa rusot ra Nzamb panap pansh, ni kupwish mar pansh pawonsu ridi rusot ra Nzamb.

Guvernema utentamina wa Nzamb ukez kulet yiyukish yakad kutwish kulet guvernema wa muntu ap umwing. Vurik anch Yehova wamupana Mwanend mudi mulambu wa difut chakwel antu ashikena ku kutambul mwom wa chikupu. Mwishin mwa winyikel wa Want, antu akez kuya pakemp-pakemp djat ni ku kwikal awanyidina. Chibukin ik chikwikalaku? Yehova “ukez kadiosh rufu chikupu. Nsalejetu [Yehova] ukez kakuswol mansoj ku mes ma antu awonsu.”—Isay 25:8, Les Saintes Écritures — Traduction du monde nouveau.

Antu amwing akutwish ipul anch: ‘Mulong wak Nzamb kasambelap kusal mwamu? Chom ik chichingedinay ni katat?’ Yehova wela kusal yom yiney pakur mulong wa kudiosh mar min mawonsu madiaku. Pakwez, wamalika mikalaku, kichidiap mulong wa diyingishin dia choy, pakwez chadinga mulong wa anend akeza kwikal panap pansh atambula mwom wa chikupu. Anvaj in rukat akutwish amulikin mwanau mu mar makash anch ij anch chawiy chikeza kumuten chiyukish cha chikupu. Chawiy chimwing, kudi mayingishin mawamp mamubachika Yehova ku kuyilikin antu mu mar mu kachisu kakemp, ni mayingishin minam amarumburil mu Bibil. Mu mayingishin mwinomu mudi yom mudi want ipau wa kutond, chitil ni mulong utadila piur pa kutentam kwa Yehova kuyikel. Bibil urumburil kand anch, amulikina chitang chiyimp cha muspiritu chiyikela mangand, mu ka chisu kakemp kusu.a

Ap ndond yitukangeshin twisambina mayingishin mawonsu pinap, kudi yom yaad yakin yikutwisha kutwinkish ruchingej ni dikasikesh. Cha kusambish chawiy ech: Yehova ukez kusal yivud kupandakanamu pa kudiosh kusu mar makutwisha kututan. Chikwau, Nzamb utwinkishin kashinsh anch: “Yom yawonsu ya pakur akez kayivuramen.” (Isay 65:17) Nzamb ukez kupwish kapamp kamwing ni chikupu, mar mawonsu madiokila ku kulikin uyimp mu ka chisu kakemp.

Chom cha kaad chawiy chinech: Nzamb watenchika kal chisu chakad kutwish kuswimp cha kupwish mar. Vurik anch muprofet Abakuk wipula anch kulemp kwa chisu ik chikulikinay Yehova chisu ni mar. Yehova wamwakula anch: “Chisu chau chakuruwanyish kand kal chishika . . . Kichikulabap, bwat.” (Abakuk 2:3) Mudi mutukumana mu mutu wa mulong wambakedinap ou, “chisu chau” chinech chashejin kal piswimp.

[Dizu didia kwishin kwa paj]

[Kamushet kadia pa paj wa 7]

Mifund Yisambidina Piur pa Machuku ma Kurutu Masangareshina

KWIKIL KAND JINJIT:

“Ezany utalany midimu ya [Yehova, NW], kujiyish kujim kwatekay pansh. Ndiy ukat kukatwish njit ni kwisudiel ya mangand; Ndiy ukat kubukon mat, ukat kukatwol mirumbu yikunku yikunku, ukat kwosh matemb mu kasu.”—Kuseng 46:8, 9.

AKATISH NETU AKEZ KUVUMBUK:

“Kukez kikal disanguk ni kudi ayingila ni kudi afila nich.”—Midimu 24:15.

ANTU AWONSU AKEZ KWIKAL NI YAKUDIA:

“Kukwikal mbut jivud mwi ngand, ni mitu ya mbut yikazengamin mu yir pa mukandu.”—Kuseng 72:16.

KUKEZ KWIKILAP KAND MAYEJ:

“Kwikil muntu ap umwing ukeza kulond anch: ‘Niyedil.’”—Isay 33:24.

ANTU AYIMP KAKEZ KWIKALAKWAP:

“Pakwez antu ayimp akez kayidiosh mwingand, ni in rubabek akez kayidioshamu.”—Jinswir 2:22.

KUKEZ KWIKAL KUTENTAM:

“Dichuku dimwing Mwant umwing ukez kayikel nich win yakin, ni ayilol end akez kayikel nich kutentam.”—Isay 32:1.

[Chipich chidia pa paj wa 7]

Want wa Nzamb ukez kapwish mar mawonsu mitukweta