Yilejany Anen

Yeremiy Kalikap

OV, UKAT kwiyov chisu chimwing mudi uziyil ni kwov ja kulik?—a Mwamu mwovilingau antu avud. Mwamu mwiyovay Yeremiy padingay nsand. Pakwez, kalikinap yom yadingau ni kulond ap ni kusal antu akwau chakwel yimushikija ku kulik. El twisambinany piur pa mutapu wadingay Yeremiy muntu wa pakampwil kudiay Nzamb, ap anch wova ja kulik.

Kurutu Yeremiy avadika, Nzamb wakin, Yehova, wamutonda chakwel ikala muprofet ukuyibabesha antu adinga alikina kusal yom ya kumusangaresh Nzamb. Ov, wijany yom yamulejau Yehova kudiay Yeremiy pa kusut kwa mivu?— “Am kinijap mutapu wa kulond, mulong nichidi kwam nsand.”

Utonginany anch Yehova wamwakula Yeremiy mutapu ik?— Mu mutapu uwamp pakwez nich kujijaman, ndiy walonda anch: “Kangal walond anch: ‘Am nichidi nsand,’ bwat. Pakwez yang kudi antu kunikutumina, ukayilej yom yawonsu nikulejina. Kangal wayov wom.” Mulong wak? Mulong Yehova walonda anch: “Am nidi ni yeyey, nikukuchidij.”—Yeremiy 1:4-8.

Pakwez, mudi mutwasambelang kal kwilej, kurutu Yeremiy washikena ku kuziy. Chom chinech chamushikena mulong adinga ni kumuswingish mulong wa kumudil kwend Nzamb. Ndiy walonda anch: “Antu awonsu akat kwinsikp ni kwiyingil machuku mawonsu.” Chawiy chakwatay mupak wa kulik. Ndiy walonda anch: “Nikumuvuramen [Yehova, NW], kinikulondap kand mu dijin diend.” Ov, walika chakin kamu?

Yeremiy walonda anch: ‘Mazu ma Yehova madinga makat kwinswanish mu mafup mudi kasu, ni kinikutwishap kunenet.’ (Yeremiy 20:7-9) Ap anch pa yisu yimwing Yeremiy wova wom, pakwez kalikap mulong wa kumukat kwend Yehova. El tushinshikinany mutapu wamuchidijau Yeremiy mulong ndiy kalikap.

Yehova wamuleja Yeremiy chakwel ayibabesha antu anch Yerusalem akez kumushesh anch alik kukarumuk kudiokal ku yisal yau yiyimp. Palejanay Yeremiy dibabesh dined, antu ajimana ni alonda anch: “Chifanyidin muntu mwinou kufa.” Pakwez, Yeremiy, wayilembila chakwel ‘aziyila ku dizu dia Yehova.’ Kupwa walonda anch: “Ijikany anch, chakin kamu, anch wanjipany am, en ni antu a musumb winou ukufany nich mulong wa kumujip muntu wakad mulong. Chakin, [Yehova, NW] ndiy wantuma am kukulejany yom yiney.” Ov, wij chom chasadikaku?—

Bibil ulondil anch: “Chad in kutakel, ni antu awonsu ayileja in kupesh ni aruu anch: ‘Muntu mwinou utulejidin mu dijin dia Chinawej Nzamb wetu. Kichifanyidina kumufish nich kwa kumujip.’” Chawiy lel pasalay Yeremiy chakwel wom kangal umukangangesha, Yehova wamuchidija. El tushinshikinany yom yamushikena Uri, muprofet mukwau wa Yehova, wasala yom mu mutapu windjing.

Bibil ulondil anch: ‘Uri wadinga ni kubwakin musumb wa Yerusalem mudi mwabwakay Yeremiy.’ Pakwez, pamujimenau Uri kudiay Mwat Yehoyakim, ov, wijany chasalay Uri?— Ndiy wova wom, walika kusal rusot ra nzmb, ni wafukula mau waya ku Idjibit. Chawiy mwant wayituma amakundj akamutana kwinikwa chakwel amuleta. Payau akasend ez nend, ov, wijany chom chiyimp chaslay mwant?— Wamujipa Uri nich mpak ya musamun!—Yeremiy 26:8-24.

Mulong wak ukutwishany kulond anch Yehova wamuchidija Yeremiy ni walika kumuchidij Uri?— Mwaning, chimeken anch Yeremiy niyend wovaku wom, Mudi mwovay Uri, pakwez Yeremiy kalikap kumusadil Yehova ni kachinap. Ndiy kalikap. Dilejan ik ukutwisha kulond anch diawiy tukutwisha twilejin ku chilakej chenday Yeremiy?— Anch pa yisu yimwing tukutwish twaman anch chikasiken tusala yilondilay Nzamb, pakwez tufanyidin ching kumuchingejin ni kumuziyil.

[Dizu didia kwishin kwa paj]

[Chipich chidia pa paj wa 23]

Yipul:

[Chipich chidia pa paj wa 23]

❍ Nzamb wamutondina Yeremiy mudi ik?

❍ Mulong wak Yeremiy wova ja kuulik?

❍ Mulong wak wamuchidijau Yeremiy, pakwez Uri bwat?

❍ Chom ik wilejidina kal ku chilakej cha Yeremiy?