Ikalany In Kwilej Akin A Kristu

“Mutond uwamp ukat kusong mabuj mawamp; pakwez mutond uyimp ukat kusong mabuj mayimp.”—MAT. 7:17.

1, 2. Mutapu ik wiyaurilau in kwilej akin a Kristu palemp nau in makasu, pakamp pa chisu chinech cha nsudiel?

YESU walonda anch antu afila mukan cha makasu anch akat kumusadil akez kuyimen anch ashalijadin ni in kwilejend akin kusutil ku mabuj mau—malejan mau ni mwikadil wau. (Mat. 7:15-17, 20) Chakin, yom yikatau antu kwandjik mu michim ni mu manangu mau yikweting usu ukash padiau. (Mat. 15:18, 19) Antu akatau kulejan makasu asongining “mabuj mayimp,” pakwez antu alejiningau uyakin wa muspiritu asongining “mabuj mawamp.”

² Milad yiney yaad ya mabuj yameken kal patok pa chisu chinech cha kwinsudiel. (Tang Daniel 12:3, 10.) In Kristu a makasu akwet chitong chiyimp piur pa Nzamb ni chisu chivud ading in kwipan kudi Nzamb nich rubabek, pakwez antu akweta chovu cha muspiritu amwifukwidil Nzamb “mu [spiritu, NW] ni uyakin.” (Yoh. 4:24; 2 Tim. 3:1-5) Asadiling usu wa kumekesh ngikadil mudi ya Kristu. Pakwez, chidi nchik padi etu ayinetu? Piukushinshikina yijiken ey yitan yilondwilaku piur pa Ukristu wakin, iyipul ey amwiney anch: ‘Mwikadil wam ni malejan mam mambaten ni Dizu dia Nzamb? Ov, niletining ntumb yiwamp ya uyakin kudi antu aukimbina?’

Kushakam Kukwatijan ni Dizu dia Nzamb

3. Chom ik chimusangareshina Yehova, ni chom chinech chikwatin kand ku yom ik piur pa in Kristu akin?

³ Yesu walonda anch: “Kadiap antu awonsu akata kwintazuk anch: ‘Nsalejetu, Nsalejetu’ akeza kwandam mu Want wa Mwiur, pakwez ching antu akata kusal mudi musotilay Tatukwam udia mwiur.” (Mat. 7:21, MM) Mwawiy, kudiap kulond ku kan anch udi mwin Kristu kukata kumusangaresh Yehova pakwez kuusadil kwawiy kukata kumusangaresh. Kudi in kwilej akin a Kristu, chom chinech chikwatin ku mwom wau wawonsu, kukwatin kand ni ku mutapu umeningau nfalang, mudimu wa ku mujimbu, kwipuwej, yinshakur ni misambu ya mangand, uruw ni urund kushalijan ni akwau antu. Pakwez, in Kristu a makasu, itiyijining chitong ni jinjil ja mangand, yikadila kal yakad kumulimish Nzamb mu machuku manam ma kwinsudiel.—Kus. 92:7.

4, 5. Mutapu ik tukutwisha kusadil mazu ma Yehova madia mu Malakiy 3:18 mu mwom wetu?

⁴ Chawiy lel, muprofet Malakiy wafunda anch antu “akez kaman kand kwaurik kwa yom yikeza kamekan, kudi antu atentamina ni kudi antu ayimp, mwaning, kudi antu akata kwinsadil am ni kudi antu akad kwinsadil.” (Mal. 3:18) Piutongidina pa mazu minam, iyipula amwiney anch: ‘Ov, nidi mudi antu a mangand bil anch, nishadijadin nau? Ov, nikatining chisu chawonsu angityija kudi arund nam a mu mangand, chikala ku shikol ap kwindond ya mudimu, ap anch niding ulamatina ba ku yijidik ya Bibil, ni kukapuk kulond pa chisu chimekena anch yom kiyidiap yiwamp?’ (Tang 1 Pita 3:16.) Chakin kamu, tusotiningap tumekena anch tudi atentamina nakash, pakwez tufanyidin twaurika ni twikala ashalijadina kulemp ni antu akad kumukat ni kumusadil Yehova.

⁵ Anch waman payom pafanyidina kurijek, mulong wak ulikina kulembil pa mulong winou ni kukimb usu wa muspiritu kusutil ku kwilej Bibil chisu ni chisu, ku kulembil ni ku kukumangan ku yikumangan? Anch Dizu dia Nzamb diakwandam nakash chawiy chilik kand ukusonga “mabuj mawamp,” pamwing nich “ [dibuj dia, NW] ku milamu yikata kwitiyil ku dijin diend [Nzamb].”—Heb. 13:15.

Kulejan Want wa Nzamb

6, 7. Piur pa uruu wa Want, kushalijan ik kudia pakach pa in Kristu akin ni amakasu?

⁶ Yesu walonda anch: “Am niwapidil kulejan rusangu ruwamp ra want wa Nzamb ku mal makwau kand, mulong chawiy chantuminau.” (Luka 4:43) Mulong wak Yesu wasadila Want wa Nzamb kwikal mutu wa mulong ujim mu kulejan kwend? Ndiy wadinga wij anch, ndiy amwinend ndiy Mwant wa Want winou, pamwing ni akadivar nend a muspiritu akezau kuvumbul, akez kukwatikan nich mulong wa kunongish musul wa mar mayikwatina antu—chitil ni Djabul. (Rome 5:12; Kubur. 20:10) Chawiy lel, wayinkisha in kwilejend mbil ya kuulejan Want winou djat ni pakeza kwezin nsudiel ya ditenchik dined dia katat dia yom. (Mat. 24:14) Antu afilinga kwau mu kan anch adi in kwilej a Kristu kakatap kwau kusal mudimu winou—chakin kamu, kakuutwishap. Mulong wak? Chidi mulong wa mayingishin manam masatu: Dia kusambish, kakutwishap alejan yom yakadiau awiy ayinau kuyitesh kurumburik. Dia kaad, avud au aburedin kwitudish ni kutakaman kuswirikedinau mulong wa kura nich kuyiswingish ni rupompat rikutwisha kwikalaku ku kulejan uruu wa Want kudiau amutej nau. (Mat. 24:9; 1 Pita 2:23) Ni dia kasatu, in Kristu a makasu kakwetap spiritu wa Nzamb.—Yoh. 14:16, 17.

⁷ Ku mutambu ukwau, in kwilej akin a Kristu, ateshin kurumburik kwa chidia Want wa Nzamb ni yom yiukeza kusal. Chikwau, atekin yisakin ya Want winou pa ndond ya kusambish mu mwom wau, aulejen mu mangand mawonsu, nich ukwash wa spiritu wa Yehova. (Zak. 4:6) Ov, usadiling mudimu winou chisu chawonsu? Ov, usadiling usu wa kwikal mwin kulejan chifuvu wa Want, pamwingap kusutil ku kusutish chisu chilemp mu mudimu winou ap kusutil ku kwikal chifuvu mu kuusal? Antu amwing asala usu wa kuwapish mutapu wa mudimu wau kusutil ku kusadil nawamp Bibil. Kambuy Paul, wasala chikala chaku chend cha kutongijokin pa Mifund, wafunda anch: “dizu dia Nzamb didi diom, ni usu.”—Heb. 4:12; Mid. 17:2, 3.

8, 9. (a) Uman ik ukasikeshidina usey wa kusadil Bibil mu mudimu wetu wa kulejan? (b) Mutapu ik tukutwisha kushiken ku kwikal ayifuvu mu kusadil Dizu dia Nzamb?

⁸ Padingay mu mudimu wa kulejan ku chis ni chis, mukadivar umwing wamutangina ikundj umwing mwin Katolik mukand wa Daniel 2:44 ni wamurumburila mutapu ukeza Want wa Nzamb kulet chisambu chakin ni diking diakin. Ikundj winou wamwela anch: “Nasangar kal nakash pa kwinburil Bibil ni kwilej yilondila mifund pa ndond pa kusot kwilej ya ku kan kusu.” Pa chisu mukadivar chamutanginay mufund mband umwing mwin Ortodoks wa in Grek, mband winou wipula yipul kanand yiwamp. Pa chinech kand, mukadivar, pamwing ni mukajend, asadila Bibil mulong wa kumwakul. Kupwa mband winou walonda anch: “Ov, wijany mulong wak nitiyija kwambamb nen? Chidi mulong wezangany kwolikwam ni Bibil ni wamutangany kal.”

⁹ Mwawiy, mikand yetu yidi ya usey ni tufanyidin tuyipana mu mudimu wa kulejan. Pakwez, Bibil ndiy cham chetu cha kusambish cha kusal nich mudimu. Chawiy lel, anch kiwadiap ni chaku cha kumusadil chisu ni chisu piuyilinga mu kulejan, ov, ukutwishap witekin rutong ra kusal mwamu? Ukutwish pamwingap watond mifund yimwing yirumburila Want wa Nzamb ni yilejena mutapu ukeza kupwish milong kanang yiyikwatina amutej ney. Kupwa, irijeka chakwel uyitanga piuyila ni kulejan ku chikumbu ni chikumbu.

Kwipil Dijin dia Nzamb Nich Kwibaz

10, 11. Kushalijan ik kudia pakach pa Yesu ni antu avud afila mukan anch adi in kwilejend pa mulong wa kusadil dijin dia Nzamb?

¹⁰ Yehova ulondil anch: “En udiany atuman am. Am nidi Nzamb.” (Isay 43:12) Yesu Kristu, Kaman mujim wa Yehova, wamana anch kwipil dijin dia Nzamb ni kudijikish kudi kwitapil dilau dijim. (Tang Kubudik 3:15; Yohan 17:6; Hebereu 2:12.) Chakin kamu, mulong Yesu walejana dijin dia Tatukwend, chawiy chamutazukinau anch: “Kaman ushinshamena.”—Kubur. 1:5; Mat. 6:9.

¹¹ Pakwez, antu avud afilinga mukan anch adi antimesh a Nzamb ni a Mwanend oviling usany pantaliken nich dijin dia Nzamb, djat ni mu chilik cha kudidiosh mu yikarumun yau ya Bibil. Chamekeshay ngikadil yawiy yimwing, mbil yimwing yayinkishinau katat amimpel a in Katolik yilondil anch: “Dijin dia Nzamb mudi mwadingau ni kudifund nich mamuny manying YHWH kichifanyidinap kudisadil ap kudijimbul” pa chisu cha kwifukwil.a Yiney yidi yitongijok yiyimp mudi ik!

12. Mutapu ik washikenau atushalapol a Yehova kwikal ijikena nakash nakash kwikal piswimp ni Yehova mu muvu wa 1931?

¹² Ku kumwimburij Kristu pamwing ni “chisak chijim cha atuman” asambela kwikalaku, in Kristu akin akat nich kwibaz kusadil dijin dia Nzamb. (Heb. 12:1) Chakin kamu, mu muvu wa 1931, atushalapol a Nzamb ijikana nakash nakash anch adi antu a Yehova pitiyijau dijin dia Atuman a Yehova. (Tang Isay 43:10-12.) Chawiy, mu kurumburik kwa pakampwil, in kwilej akin a Kristu ikala ‘antu atazukiningau ku dijin dia Nzamb.’—Mid. 15:14, 17.

13. Mutapu ik tukutwisha kushakam kukwatijan nich dijin dia Nzamb?

¹³ Mutapu ik tukutwisha kushakam kukwatijan nich dijin dietu dia pakampwil? Chom chimwing tufanyidina kusal chidi kushakam nich kushinshaman ni kulejan uman wa Nzamb. Paul wafunda anch: “Wawonsu ukeza katazuk pa dijin dia Mwant akez kamupandish. Pakwez antu akutazuk nchik padiay ndiy wakad kwitiy? Ni akumwitiy nchik wakad kutesh yendendiy? Ni akutesh nchik wakad Mulej? Ni yau akulejan nchik wakad kuyitum?” (Rome 10:13-15) Chikwau, tufanyidin nich nkeu kusaul makata kumushing Sakatang wetu majir, mudi malejan ma karung wa kasu, mamulejena Nzamb mwin rukat mudi mwin chisum mudi Djabul.—Yer. 7:31; 1 Yoh. 4:8; isikej ni Marko 9:17-27.

14. Chom ik chasalau antu amwing pilejau dijin din kamu dia Nzamb?

¹⁴ Ov, ukat kwibaz mulong wa kwipil kwey dijin dia Tatukwey wa mwiur? Ov, uyikwashining antu akwau chakwel niyau ashikena ku kudijik dijin dined disant? Mband umwing wa mu Paris, mu France, watesha anch Atuman a Yehova ij dijin dia Nzamb, chawiy wamwipula kaman wezay kutanijan nend chakwel amuleja dijin dined mu Bibil wend. Patangay Kuseng 83:18, wamushika nakash ku muchim. Wasambisha kwilej Bibil ni katat wikadil kal nambaz ushinshamena usadidila mwi ngand yindjing. Pamanay changandim umwing ushichinga mu Australie dijin dia Nzamb mu Bibil kapamp ka kusambish, wadila masonj. Katat wasadil kal mivu yivud mudi chibol wa rawonsu. Mu mivu ya katat ey, Atuman a mu Jamaïque amuleja mband umwing dijin dia Nzamb mu Bibil wend amwinend, niyend wadila mansoj. Chakwiy komb, ufanyidin kwibaz kwipil dijin dia Nzamb ni, mu kumwimburij Yesu, ijikisha antu awonsu dijin dined diwamp.

“Kangal Wakatany Mangand”

15, 16. In Kristu akin amening mutapu mangand, ni yipul ik yitufanyidina kwiyipul ayinetu?

¹⁵ “Kangal wakatany mangand, ap yom yidia mu mangand. Anch muntu wakat mangand, rukat ra Tatuku kiridip mwi ndiy.” (1 Yoh. 2:15) Mangand ni spiritu wend wa chiuntu yimutalikedin Yehova ni spiritu wend utumbila. Chawiy in kwilej akin a Kristu kakatap kusu kulik kwikal yid ya mangand. Amalikin ni michim yau yawonsu, ij mudi mwafunday mwin kwilej Yakob, “urund wa mangand udi ukankuny ni Nzamb.”—Yak. 4:4.

¹⁶ Chikutwish chikal chikash kusadil yilondilay Yakob mu mangand mayitekina antu mu yoziu yivud kushalijan. (2 Tim. 4:10) Pakwez Yesu walembila mulong wa in kwilejend anch: “Kiniyilembidilip chakwel ey uyidiosha mu mangand, pakwez ey uyilama ku tuyimp. Awiy kadip a mangand, mudi am kinidip wa mangand.” (Yoh. 17:15, 16) Iyipula amwiney anch: ‘Nisadiling usu wa kulik kwikal wa mangand? Ov, antu akwau ij mutambu ku nidia pa milong ya misambu yakad kukwatijan nich mifund pamwing ni yishankur yakad kwikal nich musul mu upangan pakwez yimekeshin patok spiritu wa mangand?’—2 Kor. 6:17; 1 Pita 4:3, 4.

17. Chom ik chikutwisha kuyishikij antu akweta michim yiwamp ku kwikal ku mutambu wa Yehova?

¹⁷ Chidi chakin anch, mangand makutwishap matukat mulong wa kwikal kwetu ku mutambu wa Bibil, pakwez kukutwish kwalangwish manangu ma antu akweta michim yiwamp asotina kwijik. Chakin, pakatau antu inay kujingunin anch ritiy retu rimanyidin pa Mifund ni rikwatin ku mwom wetu wawonsu, akutwish itiyij nich kulond kudiau antu azizidilau many anch: “Tusotil kubombakan ni yeyey, mulong tuteshil anch, Nzamb udi ni yeyey.”—Zak. 8:23.

Mekeshany Rukat Rakin ra Ukristu

18. Chom ik chikwatikina ku kumumekeshin Yehova ni mukwetu muntu rukat?

¹⁸ Yesu walonda anch: “Ukamukata Mwant Nzmb wey nich muchim wey wawonsu, nich mupim wey wawonsu, nich manangu mey mawonsu” ni “Ukamukata mukwen mudi ey amwiney.” (Mat. 22:37, 39) Rukat riner (agapê mu Grek) ridi rukat ra ngikadil rikwatininga ni ku midimu, yijidik ni ku mapit, pakwez mu rukat riner muding kand yovil yikash. Rikutwish rikal ra chirungil ni rijim. (1 Pita 1:22) Ridi palemp nich choy, mulong arisambidin mu mazu ni yisal ya kuyibangin antu akwau.—Tang 1 Korint 13:4-7.

19, 20. Lejanany yom yamanau yikasikeshidina usu wa rukat a Ukristu.

¹⁹ Mulong rukat ridi chibudikin cha spiritu utumbila wa Nzamb, rikat kuyitwishish in Kristu akin asala yom yikangenau antu akwau kusal, mudi kupandakany yikokujol piur pa ulombu wa chikit, yishankur ni ya chipolitik. (Tang Yohan 13:34, 35; Gal. 5:22) Antu adia mudi amikoku kakutwishap achirik panyim pakwez ayiling kurutu anch aman rukat mudi riner. Chilakej, payay nsand umwing mwin Yuda udia mu Israël kapamp ka kusambish kukumangan ku yikumangan ya Ukristu, washimoka pa kuyiman akadivar Ayuda ni a Arab amwifukwidil Yehova awonsu pamwing. Mudi chibudikin, wasambisha kukumangan pakad kujing ni witiyija kwilej Bibil. Ov, ukat kuyimekeshin akadivar ney rukat mudi riner? Ukat kwitekin rutong ra kuyilangwish antu awonsu asu ezina ku Chot cha Want, pakad kutal muchid wau, ulombu wau wa chikit, ap mashakamin ma mwom wau?

²⁰ Chitudia in Kristu akin, tusadiling usu wa kuyimekeshin antu awonsu rukat. Mu El Salvador, mwin kulejan umwing nsand wadinga ni kwilej Bibil mband umwing mwin Katolik wadinga wikadil kal ni mivu 87, wadinga ulamatina ku egliz wend. Dichuku dimwing, mband winou wayela nakash ni amwandjika mu rupital. Pachirikay kwolikwend, Atuman adinga ni kumutazuk chakwel ijika anch ukwet yakudia. Chom chinech chasadika ngond wa kabuj. Kwikil muntu ap umwing wa mu egliz wend weza kumutal. Chibukin? Wapwola yipich yend yadingay nich, wafundina egliz wend anch wadiokalamu kal ni wasambisha kand kwilej Bibil. Mwaning, rukat ra Ukristu rikwet usu! Rikutwish rashik ku muchim mu mutapu umwing wakad mazu kutwish kulond.

21. Mutapu ik tukutisha kwirijekin nawamp machuku metu ma kurutu?

²¹ Piswimpap kamu, Yesu ukez kuyel antu awonsu afila kusu kulond mukan ang akat kumusadil anch: “Kand kal nikwijikanyip; ndiokilany kwa, midimu yiukat kusalany yiyimp.” (Mat. 7:23) El komb etu awonsu tusongany mabuj ma kumushiman Tatuku ni Mwan. Yesu walonda anch: “Wawonsu ukata kutesh mazu mamam minam, wend umasadil, ufaniken mudi mwin kubabal watunga chikumbu chend pa diyal.” (Mat. 7:24) Mwaning, anch twimekesh kwikal in kwilej akin a Kristu, Nzamb ukez kutwitiyij, ni tukez kwirijekin nawamp machuku metu ma kurutu, mudi anch tumatungidin pa diyal!

[Dizu didia kwishin kwa paj]

[Chipich chidia pa paj wa 21]

Ov, Uvurikin?

• In kwilej akin a Kristu ashilijadin nchik nau in makasu?

• Jimbul “mabuj” mamwing makata kuyijikish in Kristu akin.

• Rutong ik ufanyidina kwitekin mu kusongish dibuj dia Ukristu?