Ridi Ranaken Rijim—Kwikal Antu a Yehova
‘Tudi ayen a Yehova.’—ROME 14:8.
1, 2. (a) Chisend ik cha mudimu tukweta? (b) Yipul ik tukushinshikina?
MUCHID wa Isarel witapila dilau mudi ik paulejau kudiay Yehova anch: “En ukez kwikalany amam pakach pa antu awonsu.” (Kub. 19:5) Nlel, yid ya chikumangen cha in Kristu niyawiy itapidil dilau dia kwikal antu a Yehova. (1 Pita 2:9; Kubur. 7:9, 14, 15) Didi dilau ditukutwisha kusanger chikupu.
2 Kuwejin pa kwikal dilau, kwikal antu a Yehova kuletin kand chisend. Muntu ukutwish wiyipul anch: ‘Nikutwish kusal chom chin chawonsu chikwingitay Yehova kusal? Anch nasal chitil, ov, ukez kanlik? Nikwikalap ni wan mpam anch nikal muntu wa Yehova?’ Yom yiney yidi yom ya usey yitufanyidina kushinshikin. Cha kusambish, kudi chipul chikwau chitufanyidina bil kushinshikin: Ik tukutaninamu anch twikal antu a Yehova?
Kwikal Antu a Yehova Kuletin Musangar
3. Mutapu ik watanidinayimu Rahab mu mupak wakwatay wa kumusadil Yehova?
3 Ov, kudi kutaninamu ku kwikal antu a Yehova? Tushinshikinany chilakej cha Rahab, mband mwin kusochik wadinga mu Yeriko wa pasak. Pamwingap amulidina mu difukwil diyimp dia anzamb a in Kanan. Ap mwamu, pateshay mutapu wasalay Yehova chakwel in Isarel awina, washikena ku kwitiyij anch Yehova udi Nzamb wakin. Chawiy chatekay mwom wend mu chak payichidijay antu atonday Nzamb ni wateka ruchingej rend ra machuku ma kurutu mudi awiy. Bibil ulondil anch: “Mwamu muchikala kand kudi Rahab mband mwin kushochik. Nzamb wamuyingisha mulong wa yisalijok yend yiwamp. Ndiy wayaka in kutentish ngand, chad wayiwemburul, wayibudishin mwi njil yikwau.” (Yak. 2:25, MM) Tongijokin yom yataninayimu pikalay umwing wa antu ishitwila a Nzamb, antu alejau Chijil cha Nzamb mu rukat ni kutentam. Wasangara nakash mulong wa kulik mwom wend wa pasak! Amwata kudiay Bowaz, mwin Isarel ni wavala nend mwan ikundj, wikala muntu mujim kudiay Nzamb.—Yos. 6:25; Rut 2:4-12; Mat. 1:5, 6.
4. Mutapu ik watanidinayimu Rut mu mupak wend wa kumusadil Yehova?
4 Rut mwin Mowab ni yend wakwata mupak wa kumusadil Yehova. Padingay changadim, pamwingap wadinga ni kwifukwil Kemos ni anzamb akwau a in Mowab, pakwez washikena ku kumwijik Nzamb wakin, Yehova, ni amwata kudi mwin Isarel wachinina mwingand yau. (Tang Rut 1:1-6, NW.) Kupwa, mudi Rut ni chipad nend Orpa, pamwing ni Naomi, mawenau, asambisha kuya ku Betlehem, chawiy Naomi wayilembila ayangadim inay aad achirika kwolikwau. Chelap kwikal chiyiswapedila kushakam mu Isarel. Chakin kamu, Orpa “wachirika kudi antu end ni anzamb end,” pakwez, Rut kachirikap. Wasala kukwatijan ni ritiy rend ni wadinga umwij usotinay kusadil. Chawiy, wamwela Naomi anch: “Kangal wanshindil nikusha, chakwel nichirika nilika kuya ney; mulong kwawonsu ku ukuya ni yam kwawiy nikuya, ni kwawonsu ku ukulala ni yam kwawiy nikulala. Antu ey akwikal antu am, ni Nzamb wey Nzamb wam.” (Rut 1:15, 16) Mulong wa kutond kwend kumusadil Yehova, Rut washikena ku kutaninamu mu Chijil cha Nzamb, mwadinga ditenchik dia pakampwil piur pa adia-a-afu ni atuzweny ni antu akad ngand. Watana musangar, diking ni mashakamin ma zoong mu chikas cha Yehova.
5. Yom ik umena piur pa antu amusadidila Yehova ni kushinshaman?
5 Ukutwish wijik antu amwing ipana ayinau kudiay Yehova ni amusadidil mu makum ma mivu nich kushinshaman. Yipula akuleja mutapu utanidinamu mu kumusadil. Ap anch kwikil umwing wau wakad kwikal nich yikokujol, uman ukasikeshidin mazu malonday mwin kufund kuseng anch: “Ayuk kwau antu anch chidi mwamu ukach mwau, ayuk kwau antu amukweta Chinawej, Nzamb wau!”—Kus. 144:15.
Yehova Utwitin Kusal Yom Yisikena
6. Mulong wak tufanyidinap kwov wom wa kukangany kusal yitwitinay Yehova kusal?
6 Ukutwish pamwingap wiyipul anch ukutwish wasal yom yikwitinay Yehova kusal. Chiswapel kwiyov mudi usendin chisend chilimina anch watongijokin pa kwikal kashalapol wa Nzamb, kushakam kukwatijan nich chijil chend ni kulondin mu dijin diend. Chilakej, Moses wiyova anch kawanyidinap chisu chamutumau akayileja in Isarel ni mwant wa Idjibit. Pakwez, Nzamb kadingap wakad kwisikan mu yom yamwitay Moses kusal. Yehova ‘wamuleja chom cha kusal.’ (Tang Kubudik 3:11; 4:1, 10, 13-15.) Moses wamana musangar wa kuwanyish rusot ra Nzamb mulong witiyija ukwash wamwinkishau. Yehova udi wisikena mu yom yitwitinay kusal. Uteshining anch tudi akad kuwanyin, ni usotin kutukwash. (Kus. 103:14) Kwikal mwin kwilej wa Yesu mulong wa kumusadil Nzamb kukat kulet kwiswedish kudingap kukasikena, mulong mashakamin minam makat kusal anch antu akwau atanyidinamu ni kuusangaresh muchim wa Yehova. Yesu walonda anch: “Ezany kwen kudi am, . . . am nikuninkishany kwiswedish. Itwikany mpand yam, ungiyiyany am; mulong yam nitudishila ni kwikepishil mu muchim.”—Mat. 11:28, 29.
7. Mulong wak ufanyidina kwikal nich kashinsh anch Yehova ukukukwash usala yichingejinay kudi ey?
7 Yehova ukudandamen kutwinkish chisu chawonsu dikasikesh dituswiridina, mudi mutukungamedina padiay ndiy chakwel atwinkisha usu. Chilakej, Yeremiy kadingap mwin kukapuk pa kulond. Chawiy, pamutondau kudi Yehova ikala muprofet Wend, Yeremiy walonda anch: “Nsalejam [Yehova, NW], am kinijap mutapu wa kulond, mulong nichidi kwam nsand.” Kupwa, ndiy walonda kand anch: “Kinikulondap kand mu dijin diend.” (Yer. 1:6; 20:9) Pakwez, nich ukwash wa Yehova, Yeremiy watwisha kulejan mu mivu 40 uruu wadinga ukisinau antu. Chisu ni chisu Yehova wamukasikesha nich kumulej anch: “Am nidi ni yeyey, nikukulam ni kukuchidij.”—Yer. 1:8, 19; 15:20.
8. Mutapu ik tumekeshininga anch tukungamedin padiay Yehova?
8 Mudi mwamukasikeshay Moses ni Yeremiy, niyetu Yehova ukutwish watukwash tusala yitinay in Kristu nlel. Chom cha usey chidi kumukungamen Nzamb. Bibil ulondil anch: “Mukungamena [Yehova, NW] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.” (Jinsw. 3:5, 6) Tukat kumekesh anch tumukungamedin Yehova pitukata kwisakin ayinetu ukwash uletinay kusutil ku Dizu diend ni ku chikumangen chend. Anch twamushil Yehova ndond chakwel atakela jinzau jetu mu mwom wetu, kwikil chom chikutwisha kutukangesh kushishaman kudiay ndiy.
Yehova Uyibangidin Antwend Umwing ni Umwing
9, 10. Kukamunin kwa mutapu ik kushidilaumu mu Kuseng wa 91?
9 Pakatau antu amwing kutongijokin pa mupak wau wa kwipan kudi Yehova, amwing akat kutongijokin pa ubaj wa kusal chitil, kushiken ku kwikal akad kufanyin ni kuyilik kudiay Yehova. Chamusangar chidi anch Yehova utwinkishining diking diawonsu chakwel tulama urund wetu ni ndiy. El tushinshikinany mutapu akwisambidina mu Kuseng wa 91.
10 Kuseng winou usambishin anch: “Mwawonsu ushicha mwi ndond ya kujingamin yend Ndiy Udia Piur, washakama mwishin mwa mwizuzwimb wend wa [mwin] Dikand Diawonsu, ukamwel Ndiy anch: ‘Dipat diam ni kwikang kwam, Nzamb wam, mwawiy munikungamedina.’ Mulong Ndiy ukez kukukamunin mu chilemb cha in kuwishan.” (Kus. 91:1-3) Talany anch Nzamb ushidilamu kuyikamunin antu amukatina ni amukungamedina. (Tang Kuseng 91:9, 14.) Kukamunin kwinoku kudi kwa mutapu ik? Mwaning, Yehova wayikamunina ku mujimbu atushalapol end amwing a pasak—pa yisu yimwing chadinga mulong wa kuchidij dijuku mukezay kuvadikin Mesia washilaumu. Pakwez, amakundj akwau avud ashinshamena ayikasa mu rukan, ayimesha mar, ni ayijipa mu mutapu umwing wa chisum mulong wa kusot kushesh kushinshaman kwau kudi Nzamb. (Heb. 11:34-39) Ashikena ku kutan dikasikesh diadinga diswiridinau chakwel ajijamena mulong Yehova wayikamunina muspiritu ku chak cha kushesh kujijaman kwau. Chawiy lel, Kuseng wa 91 chifanyidin kumutesh mudi anch udi kushilamu kwa kutukamunin kwa muspiritu.
11. “Ndond ya kujingamin yend Ndiy Udia Piur” chom ik, ni Nzamb ukat kumukamunidinamu nany?
11 “Ndond ya kujingamin yend Ndiy Udia Piur” yajimbulay mwin kufund kuseng yidi ndond ya chifanikesh ya kukamunin kwa muspiritu. Mwin ndond yiniya, antu awonsu ashicha ni Nzamb mudi angendj end ukuyikamunin ku chom chin chawonsu ap palemp ni muntu win mwawonsu usotina kutek ritiy rau mu chak pamwing ni rukat rau ra Nzamb. (Kus. 15:1, 2; 121:5) Yidi ndond yijingamena mulong antu akad ritiy katwijiningap kuyijingunin. Mwawiy mwinimwa, mukatay Yehova kuyikamunin antu amwendila chakin kamu anch: ‘Udi Nzamb wetu utukungamedina.’ Anch twashakam mwi ndond yiney ya kujingamen, kitukwiyakamishap chamwamu piur pa kushadish kwitiyik kwend kudi Nzamb anch tukuwil mu chilemb cha Satan, mwin “kuwishan.”
12. Yak ik yizombininga urund wetu uwamp ni Nzamb?
12 Yak ik yizombininga urund wetu uwamp ni Nzamb? Mwin kufund kuseng wajimbulaku yak yimwing, mud “yipupu yikata kwendil mu mididim, . . . [ni] kujiy kukat kufishan muten mukach.” (Kus. 91:5, 6) Mwin “kuwishan” wayikwata kal antu avud mu maku mijondila ma kusot wan ipau. (2 Kor. 11:3) Ukwatin antu akwau kusutil ku ris, chibud ni kusot mapit ma ku mujimbu. Ni akwau niyau uyidimbin nich malejan ma wan ngand, malondila anch yom yakarumuka ayinay ni kusutil ku relijon wa makasu. (Kol. 2:8) Ni akwau avud ashikena kal ku kuwil mu chilemb cha masandj. Yipupu yiney ya muspiritu yayishikijin kal antu avud ku kushadish rukat rau ra Nzamb.—Tang Kuseng 91:7-10; Matt. 24:12.
Lamany Rukat Ren ra Nzamb
13. Mutapu ik ukatay Yehova kutukaminin ku yak yizombininga mwikadil wetu wa muspiritu?
13 Mutapu ik ukatay Yehova kuyikamunin antwend ku yak yiney ya muspiritu? Mwin kufund kuseng ulondil anch: “Ndiy ukez kayipan angel end kukulam mu jinjil jey jawonsu.” (Kus. 91:11) Angel a mwiur akat kututakel ni kutukamin chakwel tutwisha kulejan rusangu ruwamp. (Kubur. 14:6) Kuwejin pa yisadilau angel, amakurump in Kristu, kusutil ku kulamat kwau baa ku malejan madia mu Mifund, akat kutukamunin palemp nich kudimbiu ni yitongijok ya makasu. Akutwish amukwash muntu win mwawonsu urishina chakwel apandakana ngikadil ya mangand. (Titus 1:9; 1 Pita 5:2) Chikwau, “kashalapol ushishamena ni kubabal” utwinkishin yakudia ya muspiritu chakwel atukaminina palemp nich malejan malondila anch yom yikarumuna ayinay, palemp nich maku mijondila ma masandj, nich kusot nakash mapit ma ku mujimbu ni kusot ntumb, ni maku ni ngikadil yikwau yivud yiyimp. (Mat. 24:45) Chom ik chikutwisha kukukwash chakwel ujijamena yimwing ya yak yiney?
14. Mutapu ik tukutwisha kusal chakwel tutanidinamu mu dikamunin dia Nzamb?
14 Chom ik tufanyidina kusal chakwel tushala mwi “ndond ya kujingamin” ya Nzamb mukatay kutukamunin? Chidi kamu mudi mutukata kwikamunin ayinetu ku yak ya ku mujimbu, mudi ma akisident, ku kujipan ap ku misongu, chawiy kand tufanyidin tudandamena kusal chom kanang chakwel twikaminina ayinetu ku yak ya muspiritu. Chawiy lel, tufanyidin twisakina chisu ni chisu umutakel wa Yehova utwinkishinay kusutil mu mikand yetu ni ku yikumangan ya chikumangen ni ku yitentam yawonsu. Tukimbining ukwash wa amakurump. Ov, kitukatap kutaninamu mu ngikadil kushalijan yimekeshinau akadivar ni anambaz etu a muspiritu? Chakin kamu, kwikal kwetu mu chikumangen kutukwashining twikala in manangu.—Jinsw. 13:20; Tang 1 Pita 4:10.
15. Mulong wak ufanyidina kwikal nich kashinsh anch Yehova ukutwish wakukamunin ku chom chin chawonsu chisotila kukushadishin kwitiyik kwey kudiay ndiy?
15 Tukwetap diyingish dia kwidjidjek piur pa mutapu ukutwishay Yehova kutukamunin ku chom chin chawonsu chikutwisha kusot kutushadishin kwitiyik kwetu kudi ndiy. (Rome 8:38, 39) Ukat kuchikamunin chikumangen palemp ni relijon wa usu nau akankuny a chipolitik akweta rutong, ridiap ching ra kutujip kusu, pakwez asotininga kand kutwauril kulemp ni Nzamb wetu utumbila. Kushilamu kunoku kwa Yehova kudi ching kwakin: “Ut wawonsu ukuchilau mulong wa kukurishish ukez kupandikanap bwat.”—Isay 54:17.
Nany Utwinkishina Wan Ipau?
16. Mulong wak mangand makutwishap matwinkish wan ipau?
16 Ov, kwikal antu a Yehova kukat kutukangesh kwikal nich wan ipau? Chinyim nich, anch twikal a mangand tukuburen wan ipau. Mangand madi kulemp ni Yehova, ni amayikedil kudi nzamb mwin chisu uyikwatina antu mu usuk. (Yoh. 14:30) Chilakej, ditenchik dia yom dia Satan disadidil kukasik kwa kuman nfalang mulong a kuyisal antu aburena wan ipau. (Isikej ni Kuburik 13:16, 17.) Chitil ni chawiy chikwet usu wa makasu uyikwatina antu mu usuk. (Yoh. 8:34; Heb. 3:13) Ap anch antu akad kwitiyij ashilamu kulet wan ipau pakatau kukasikeshin mashakamin ma mwom makad kwovijan nich malejan ma Yehova, antu in awonsu ayiteshininga iyandjikining swa ayinau mu usuk wa mwom wa chitil ni wa ushon.—Rome 1:24-32.
17. Wan ipau ik utwinkishinay Yehova?
17 Ku mutambu ukwau, Yehova ukez kutukol anch twamukungamedin ku chom chin chawonsu chikutwisha kutushesh. Mu jinjil jikwau, mwikadil wetu udi mudi wa muntu utekina mwom wend mu makas mwa mwingang wa kapasul usadilinga mudimu wend nawamp ukutwisha kumukol ku mayej kanang mamutekina mu chak. Etu awonsu tudi mu mwikadil umwing utekina mwom wetu mu chak—chitil chitwaswana. Ching anch twamungukamedin Yehova, pa dishin dia mulambu wa Kristu, chawiy tukutwisha kuchingejin kwiyep ku yibudikin ya chitil ni kuchingejin mwom wa chikupu. (Yoh. 3:36) Ruchingej retu mudiay mwingang wa kapasul rikutwish kwikal rikash anch twatesh ntumb yend piur pa mutapu uwamp usadilingay mudimu wend, chawiy chimwing kumukungamedin Yehova kukwikal kukash anch twandamen kwilej piur pend. Chawiy lel, tudandamedinany kwilej Dizu dia Nzamb nawamp mulong diawiy dikutukwasha tumukata mu mutapu umwing ukutwisha kutudiosh wom win wawonsu pa mulong wa kwikal antwend.—1 Yoh. 4:18.
18. Chom ik chikezau kutaninamu antu a Yehova?
18 Yehova uyinkishin antu in awonsu wan ipau wa kutond. Dizu diend dilondil anch: “Tondany mwom chakwel en ni a majuku men makeza kwez, wez upandany, mu kumukat [Yehova, NW] Nzamb wen.” (Kuv. 30:19, 20) Ndiy ukat anch etu ayinetu twitondina kumumekeshina rukat retu kusutil ku kumusadil. Pa ndond pa kutukish wan ipau wetu, kwikal antu a Nzamb utukatina kukez chakin kamu kutwikadish in musangar.
19. Mulong wak ridi ranaken kwikal ayen a Yehova?
19 Chitudia akayitil, kitufanyidina kwikal antu a Nzamb uwanyidina. Chidi ching kusutil ku ranaken ra Nzamb kwawiy chom chinech chitwishikin. (2 Tim. 1:9) Chawiy, Paul wafunda anch: “Anch tudi aom, tudi aom mulong wa [Yehova, NW], anch twafa, tufil mulong wa [Yehova, NW]. Chawiy anch twapandap nchik, ap anch twafap nchik, tudi ayen a [Yehova, NW].” (Rome 14:8) Kitukez kwinanap ap dimwing mulong wa kutond kwetu kwikal ayen a Yehova.
[Chipich chidia pa paj wa 15]
Ipulany antu akwau alonda yom yitanidinaumu mulong wa kwikal kwau ayen a Yehova
[Chipich chidia pa paj wa 16]
Mu jinjil ik jimwing mukatay Yehova kutukamunin?
[Chipich chidia pa paj wa 17]
Ukwakul Nchik?
• Tukutaninamu ik anch twikal ayen a Yehova?
• Mulong wak tutwishininga kusal yitwitinay Nzamb?
• Mutapu ik ukatay Yehova kuyikamunin atushalapol end?