Mulong Wak Ufanyidina Kwipan Amwiney Kudiay Yehova?

“Muruu wa mwiur wezang kudi am uchuku. Udi muruu wa Nzamb wam.” —MID. 27:23, Manswik Masu.

1. Yom ik yisadilingau bil antu asotina kubabatishiu, ni chom chinech chilangwish yipul ik?

“PA DISHIN dia yakupesh ya Yesu Kristu, ov, wakarumukin kal ku yitil yey ni kwipan amwiney kudiay Yehova chawel kusal rusot rend?” Chinech chidi chimwing cha yipul yaad yakwilingau antu akubabatishau kwisudiel kwa diskur dia dibabatish. Mulong wak uswiridinau in Kristu kwipan ayinau kudiay Yehova? Ik tukata kutanyidinamu mu kwipan kwetu kudiay Nzamb? Mulong wak chitwishikinap kudiay muntu kumwifukwil Nzamb nawamp anch kipaninap kudiay ndiy? Chakwel anch tutesha yakul, tufanyidin bil tushinshikina chirumburika kwipan.

2. Chirumburikin kwipan amwiney kudiay Yehova?

² Chirumburikin ik kwipan amwiney kudiay Nzamb? Tushinshikinany mutapu warumburilay kambuy Paul urund wend ni Nzamb. Kurutu antu akwau avud andama mu wat wadinga usotina kujiy, ndiy wamutazuka Yehova anch: “Nzamb wam.” (Tang Mid. 27:22-24, MM.) In Kristu akin awonsu adi ayen a Yehova. Pakwez, ngand ya kabuj “yidi mu chikas cha Satan.” (1 Yoh. 5:19) In Kristu akat kushiken ku kwikal ayen a Yehova pa chisu chiyitijinau ku mes kwend ayinau kudiay ndiy mu malembil mau. Kwipan kwinoku kudi machip machipiningay muntu ipend. Kupwa akumubabatish mu mem.

3. Dibabatish dia Yesu diafanikesha chom ik, ni mutapu ik ukatau in kwilejend kwimburij chilakej chend?

³ Yesu watushila chilakej patonday amwinend kusal rusot ra Nzamb. Mudi mwavadikinay mu muchid wa Isarel wadinga wipana kal, muchid wadinga wipana kal awinau kudi Nzamb. Chikwau, ndiy wasala chom chikwau pa chisu chababatishiway kupandakan pa yadinga yitinau mu Chijil. Dizu dia Nzamb dilejen anch Yesu walonda anch: “Tal, am nez kal kusal rusot rey, A Nzamb.” (Heb. 10:7; Luka 3:21) Chawiy dibabatish dia Yesu diadianga chijingidij cha kwipan kwend kudi Nzamb mulong wa kusal rusot ra Tatukwend. In kwilejend end imburijin chilakej chend pakatau kwipan kudiay ndiy chakwel ababatishiwa. Pakwez, ku mutambu wau, dibabatish dia mu mem didi chijingidij chilejena anch ipana kal ayinau mu malembil kudiay Nzamb.

Mutapu Tutanyidina mu Kwipan

4. Urund wenday David ni Yonatan utulejin ik piur pa kushilamu?

⁴ Kwipan kwa Ukristu kudi mulong wa usey. Kupandakenamu kulemp kushilamu kwa chamwamu. Mutapu ik lel tukutwisha kutaninamu mu kwipan? Kusutil ku kwilikej, el tushinshikinany mutapu kudinga kwa usey kushilamu pakach pa antu. Chilakej chimwing chidi cha kukwat urund. Pakwel kusanger urund ni muntu, ufanyidin kwitiyij chisend cha kwikal murund. Chom chinech chitining kushilamu—ukwiyov anch ufanyidin ubangina nakash urund wey. Urund umwing ujim wisambidinau mu Bibil udi urund wenday David ni Yonatan. Asuka ni manswik ma urund. (Tang 1 Samwel 17:57; 18:1, 3, NW.) Ap anch urund wa mutapu winou wa kusuk manswik ukasiken nlel, urund uvud ukat kudandamen anch arund alam kushilamu kwau, ap anch iyov anch akwachikin umwing ni mukwau.—Jinsw. 17:17; 18:24.

5. Mutapu ik ukutwishay musuk kutaninamu anch washal chikupu kudiay mwant wend muwamp?

⁵ Chijil chamwinkishau Isarel kudiay Nzamb chisambidin urund ukwau wadingau ni kukwat antu nich kushilamu. Anch musuk wakat diking dia kushal chikupu kudiay mwant wend, wadinga ufanyidina kushilamu chikupu ni mwant wend. Chijil chilondil anch: “Anch muswik walond anch: ‘Nimukatil mwant wam, ni mukajam, ni anam nalik kal kwam wan ipau,’ mwant wend kukamutwal kudi Nzamb, ukamushikij piswimp ni dinguj ap ku chibamb cha ku chis. Mwant wend ukamubuz ditu diend nich mubur, chad muswik ukez ku musadil midimu mu mivu yawonsu chikupu.”—Kub. 21:5, 6.

6, 7. (a) Mutapu ik ukatau antu kutaninamu mu kushilamu kwau? (b) Chirumburil ik pa yitadina urund wetu wa piswimp ni Yehova?

⁶ Uruw udi urund witina kushilamu kukash nakash. Udi kushilamu ni muntu, kiudiap kwovijan kwa chamwamu. Antu aad ashicha pamwing pakad kwatijan kakutwishap ikal mu diking diakin; ni anau kumwing. Pakwez antu ashidilamu umwing ni mukwau kwatijan nich kalimish akwet diyingishin dia usey dia Mifund dikutwisha kuyibachik ku kupwish milong yau nich rukat anch yikalaku.—Mat. 19:5, 6; 1 Kor. 13:7, 8; Heb. 13:4.

⁷ Pa yisu yafundau Bibil, antu adinga ni kutaninamu kusutil ku kufund kwovijan kwau mu midimu ya kwisak ni pa kusal mudimu kanang. (Mat. 20:1, 2, 8) Nlel, yom yiney yidi yakin kand. Chilakej, tukutwish twataninamu anch twafund kwovijan kwetu, kurutu tusambisha kusadil mudimu wa kwisak ap kurutu kwa kusambish kusal mudimu mu chapu kanang. Chawiy lel, anch kwovijan kukasikeshining yom mudi urund, uruw ni mudimu, kukutwish kwakasikesh kwipan kukutwisha kukusal utaninamu urund ni Yehova mudi ik! El katat tushinshikinany mutapu watanidinamu antu a pasak ku kwipan kwau kudi Yehova Nzamb ni mutapu kwadinga kwa usey nakash kupandakanamu kwau kushilamu kwa chamwamu.

Mutapu Wataninamu in Isarel mu Kwipan Kudi Nzamb

8. Kwipan kudi Nzamb kwadinga kurumburikin ik kudiay Isarel?

⁸ Muchid wa Isarel wawonsu wipana kudiay Yehova pa chisu chachipau machip kudiay Nzamb. Yehova wayita anch eza akumangana awonsu piswimp ni Mukandu wa Sinay, ni wayileja anch: “Anch en wez waziyilany dizu diam ni kulam manswik mam, en ukez kwikalany amam pakach pa antu awonsu.” Antu awonsu akula mudi muntu umwing anch: “Yawonsu yalonday [Yehova, NW], tukez kuyisadil.” (Kub. 19:4-8) Kwipan kwadinga kurumburikin yom yivud kudiay Isarel kupandakanamu kwau kushilamu mulong wa kusal chom kanang. Kwadinga kurumburikin anch adi ayen a Yehova, ni Yehova niyend wadinga ni kuyisadil mudi ‘aend.’

9. Mutapu ik wataninayimu Isarel pipanay kudi Nzamb?

⁹ In Isarel ataninamu mulong wakwikal kwau ayen a Yehova. Ndiy washinshamana ni wayisadila mudi mukatay nvaj mwin rukat kumusadil mwan. Nzamb wayileja in Isarel anch: “Ov, komb mband ukutwish kumuvuramen mwanend, ni kulik kumukat mwan uvadilay? Ap anch mband wamuvuramena mwanend, am kinikutwishap kukuvuramenany en.” (Isay 49:15) Yehova wayinkisha umutakel wa Chijil, dikasikesh kusutil kudi aprofet, ni wayikinga kusutil kudi angel. Nfund a kuseng wafunda anch: “Ndiy wijikisha dizu diend kudi Yakob, yany yend ni yijidik yend kudi Isarel. Ndiy kasadilip mwamu kudi michid yikwau.” (Kus. 147:19, 20; tang Kuseng 34:7, 19; 48:14.) Mudi mwadingay Yehova ni kuubangin muchid wend pasak, mwamu kand ukuyibangin antu akata kwipan ayinau kudiay ndiy nlel unou.

Mulong Utufanyidina Kwipan Ayinetu Kudi Nzamb

10, 11. Ov, tukat kuvadikin mu dijuku dia pa mangand mawonsu dia Nzamb? Rumburil.

¹⁰ Pitukata kumutal mwin Kristu wipanina ni kubabatishiu, antu amwing akutwish iyipul anch: ‘Ov, nikutwishap kumwifukwil Nzamb pakad kwipan amwinam kudiay ndiy?’ Diyingish dikwovikan zwang pa chisu tukushinshikina ukinakin wa mwikadil wetu ku mes kwa Nzamb. Vurikany anch, mulong wa chitil cha Adam, etu awonsu twavadikina pol pa dijuku dia Nzamb. (Rome 3:23; 5:12) Kwipan ayinetu kudi Nzamb kudi chom cha usey chimwitinau muntu witiyijinay anch andama mu dijuku diend dia mu mangand mawonsu. El tumanany mulong wak chidia mwamu.

¹¹ Kwikil muntu ap umwing wetu umukweta tatukwend wamuvala ukutwisha kumuswanish mwom mudi muwadinga ufanyidina kwikal—mwom uwanyidina. (1 Tim. 6:19) Kitwavadikap mudi an a Nzamb mulong pasalau antu aad a kusambish chitil, muchid wa muntu wadiokala kudiay Tatuku mwin rukat ni Sakatang (Isikej Kuvurik Yijil 32:5.) Kusambish kamu pinipa ni kuya kurutu, antu ashakama pol pa dijuku dia pa mangand mawonsu dia Yehova, aurika kudiokal kudi Nzamb.

12. (a) Mutapu ik ukutwishau antu akayitil kwikal yid ya mu dijuku dia Nzamb? (b) Jinzau ik tufanyidina kusal kurutu kwa kubabatishiu?

¹² Ap mwamu, tukutwish twamwit Nzamb chakwel atwitiya mu dijuku dia atushalapol end.a Chitwishikin nchik kudi etu akayitil? Kambuy Paul wafunda anch: “Pitwading akankuny atuchakwisha kudi Nzamb ku rufu ra Mwanend.” (Rome 5:10) Tumwitining Nzamb atwinkisha kom katok chakwel atwitiyija pa chisu cha kubabatishiu. (1 Pita 3:21) Pakwez, kurutu kwa kubabatishiu, kuding jinzau tufanyidina kusal. Tufanyidin tumwijika Nzamb, twileja kumuchingejin, tukarumuka, ni tuswimpa mwom wetu. (Yoh. 17:3; Mid. 3:19; Heb. 11:6) Kudi chom kanang chishadilaku chitufanyidina kusal kurutu kwa kutwitiyij mu dijuku dia Nzamb. Chom ik chinech?

13. Mulong wak chifanyidina anch muntu achipa machip ma kwipan kudiay Nzamb chakwel ikala umwing wa mu dijuku dia in kwifukwil End?

¹³ Kurutu kwakwel anch muntu wadinga wakad kumwijik Nzamb ikala chid cha dijuku dia atushalapol itiyijinay Nzamb, ufanyidin bil kushilamu kwa kuchip kudiay Yehova. Chakwel kutesh kurumburik, tutongany bil anch tatuku umwing wilimishina wamovil nshon riy ni wasot anch amulila mudi mwan wa dijuku diend. Tatuku wijiken kwikal muntu muwamp. Chikalap nchik mwamu, kukrutu kwa kumwitiyij nsand winou mudi mwanend, ikundj winou ukusot anch nsand winou achipa machip. Chawiy, ikundj winou ukulond anch: “Kurutu nikwitiyija anch wikala mwanam, nisotin nijika anch ukwinkat ni kwinlimish mudi tatukwey.” Ching anch nsand winou witiyij kuchip machip ma kushilamu chawiy lel ikundj winou ukumwitiyij mu dijuku diend. Ov, chidiap cha manangu kusal mwamu? Chawiy chimwing, Yehova witiyijin mu dijuku diend ching antu akata kuchip machip ma kwipan kudiay ndiy. Bibil ulondil anch: “Ipanany ayinen kudi Nzamb kwikal mudi yakupesh yikweta mwom, yidia yitumbila ya kumusangarish ndiy.”—Rome 12:1, MM.

Chisal cha Rukat ni Ritiy

14. Kwipan kudi chijingidij cha rukat mwi njil ik?

¹⁴ Kuchip machip ma kwipan kudiay Nzamb kumekeshining rukat ritukweta mulong wa Yehova. Kufaniken mu mitapu yivud ni machip ma uruw. Ngatan mwin Kristu ulond ya rukat rend ku kuchip kwikal ushinshamena kudiay mukajend, kwikalap chom ap chisu. Chidi chijingidij cha kushilamu kudi muntu kupandakanamu kushilamu kwa chamwamu kudi chom cha chamwamu. Ngatan mwin Kristu ukutesh anch kakutwishap kwitapil dilau dia kushakam pamwing ni mukajend anch walik kuchip machip ma uruw. Mwi njil yawiy yimwing, tukutwishap twisakin chakin kamu muchifanyidina kwikal mu dijuku dia Yehova pakad kuchip machip ma kwipan kudiay ndiy. Chawiy tukata kwipanin kudiay Nzamb mulong, kwikalap nchik kuburen kwetu kuwanyin, tuswiridin twikala endend ni twakwatin mupak wa kushal ashinshamena kudiay ndiy, kwikalap chom ap chisu.—Mat. 22:37.

15. Mutapu ik kudinga kwipan chisal cha ritiy?

¹⁵ Pitwipanininga kudiay Nzamb, tusadiling chisal cha ritiy. Mulong wak? Ritiy retu mudiay Yehova rawiy risadila anch twikala nich ruchingej ra kumushejin piswimp mulong wa kuwap kwetu. (Kus. 73:28) Twij anch chikutwishap chikal chiswapela chisu chawonsu kwend ni Nzamb pitushicha mukach mwa “mu chirungu chipengamina ni chirumbangena,” pakwez tumuchingejidin Nzamb anch ukutukwash mu usu utusadila. (Filip. 2:15; 4:13) Twij anch tudi akayitil, pakwez tukwet ruchingej anch Yehova ukutusadil nich riy ap anch twarumbuk. (Tang Kuseng 103:13, 14; Rome 7:21-25.) Tukwet ritiy anch yehova ukez kutufut mulong wa mupak wetu wa kushal ashinshamena.—Yob 27:5.

Kwipan Kudi Nzamb Kututwadil ku Musangar

16, 17. Mulong wak kwipan kudi Yehova kutwading ku musangar?

¹⁶ Kwipan kudiay Yehova kuletining musangar mulong kwitining kand kwipan ayinetu. Yesu walonda uyakin palonday anch: “Chiyukish cha mwin kupan chipandakenamu cha mwin kutambul.” (Mid. 20:35, MM) Yesu watana musangar udinga ku kupan pasalay mudimu wend wa kulejan panap pansh. Pa yisu yimwing, kadingap ni kupim, kudia, ni kadingap ni wa kumwongoj chakwel ayikwasha antu akwau atana njil ya mwom. (Yoh. 4:34) Yesu watana musangar mu kuusangaresh muchim wa Tatukwend. Yesu walonda anch: “Mulong yisu yawonsu nikat kusal yom ya kumusangarish ndiy.”—Yoh. 8:29, MM; Jinsw. 27:11.

¹⁷ Chawiy, Yesu wayileja in kwilejend njil ya kuyiletin musangar mu mwom palonday anch: “Muntu anch wel anch alondul panyim pam, lik ituna bil amwinend.” (Mat. 16:24) Kusal mwamu kutushejishin, piswimp ni Yehova. Ov, tukutwish twitek ayinetu mu makas ma muntu windjing ukutwisha kutubangin nich rukat?

18. Mulong wak kushakam kukwatijan nich kwipan kwetu kudiay Yehova kuletining musangar kupandakanamu kwipan ku chom ap kudi muntu windjing?

¹⁸ Kwipan kwetu ayinetu kudi Yehova ni kushakam kukwatijan nich kwipan kwinoku kusutil ku kusal rusot rend kuletining musangar ujim kupandakanamu kwipan kudi chom ap kudi muntu windjing. Chilakej, antu avud ipanining mu mwom wau mu kukimb mapit pakad kutwish kutan musangar ni mazang makin. Pakwez, antu ipanina ayinau kudiay Yehova atanin musangar wa chikupu. (Mat. 6:24) Ntumb ya kwikal “in mudimu nend Nzamb” yiyisangareshining, chikalap nchik mwamu kipaniningap ku mudimu pakwez ipanining kudiay Nzamb wetu mwin musangar. (1 Kor. 3:9) Kwikil muntu ap umwing ukutwisha kusanger kwipan kwau kumupandakanamu ndiy. Ukez kand kuyichirish ashinshamena end ku usand chakwel asangera kuyibangin kwau chikupu.—Yob 33:25; Tang Hebereu 6:10.

19. Antu ipanina kudiay Yehova itapidil dilau ik?

¹⁹ Kwipan kwey kudiay Yehova kukat kukushikish ku kuta urund wa piswimp ni ndiy. Bibil ulondil anch: “Ikalany piswimp kudi Nzamb, ni yend ukwikal piswimp kudi en.” (Yak. 4:8; Kus. 25:14) Mu mutu wa mulong ulondwilaku ou, tukez kushinshikin mulong utufanyidina kwikal nich kashinsh piur pa kutond kwetu kwikal antu a Yehova.

[Dizi didia kwishin kwa paj]

[Chipich chidia pa paj wa 12]

Kushakam kukwatijan nich kwipan kwetu kutwadiling ku musangar wa chikupu

[Chipich chidia pa paj wa 12]

Ukwakul Nchik?

• Chirumburikin ik kwipan kudiay Nzamb?

• Ik tutanidinamu mu kwipan kudiay Nzamb?

• Mulong wak in Kristu aswiridin kwipan kudiay Yehova?