“Ninaku Kand Pakemp Kusu”

ALLEN wasambisha kuna maar ma kuleushan pakad kupep pa chopu padingay nich mivu 11.a Ndiy ni arund nend asambisha kusengan mu mitond, end imburij yom yamanau mu film. Yom yimburijau yadinga yom ya kutomb yakad kwikalangaku, pakwez kudiay china maar Allen ni arund nend atunuay yading yakin.

Tony wading nich mivu 40 pasambishay pakemp pakemp kupandikesh kuna kwen kapamp kamwing ap twaad urel ni urel kushik ni kutupamp tutan ap musamb. Kupwa, katwishap kand kwijik uvud wa maar makatay kuna pa dichuku.

Allen wakimba ukwash mulong wa chikokujol chend cha maar maleushena. Tony walika ukwash wamwinkishau kud dijuku diend ni arund nend. Allen udi nlel mwom chakwel kutulej rusangu rend; Tony wafa kwinyim kwa mivu yikemp mu akisiden pa moto kupwa kwa kuna nakash maar maleushena.

Apa anch muntu wapandikesh kuna kwa amwinen, yibudikin ya kupandikesh kuna kwend yikumushiken, pamwing ap yibudikin yiyimp.b Kuna pakad kupep pa chopu kwa maar maleushena kuyibachik antu ku kulond kuyimp ni chisum, ku kwasijan njit ni kujipijan, ku makisiden ma miotak ni ma ku mudimu, pamwing ni yikukujol yikash ya ku mujimbu. Kusadil kuyimp kwa maar maleushena kushadishidin ma sosait nfalang jipandakena kuvul pa muvu, kuwejinaku nich kushesh kwa yovil ya muchim ya antu, ya majuku ni ya an.

Ap mwamu, l’Institut américain de la santé ulondin anch: “kadiap antu awonsu akata kunang pakad kujing akweta yikokujol yidiokila ku kuna, ni kadiap antu awonsu akweta milong yidiokila ku kuna anininga dichuku ni dichuku.” Antu avud akad kwikal ayina maar ma kuleushan akudishin kal yaku yikash ya kuna pakad kwijik. Amwing akat kunang pachipatu pakwez anining nakash tupamp tutan kupandakanamu kuna kwa kapamp kamwing.

Anch watond kuna maar ma kuleushan, ov, wisu uvud upandakenamu? Ov, mutapu ik ukutwisha kwijik chisu cha kulik kulond anch “ninaku kand pakemp kusu”? (Jinswir 23:29, 30) Mutu wa mulong udia kurutu oku ukez kushinshikin rusangu ra ukwash piur pa mutu wa mulong winou.

[Mazu madia kwishin kwa paj]