Kukimb Uyakin Piur pa Mwiur

RUCHINGEJ ra kuya mwiur roviken kamu anch ridi risangareshina nakash! Ruchingej ra mwom kwinyim kwa rufu akat kurupalangesh kudi a Musulman, a Hinduiste, a Budiste, ni kudia yidi ya ma ekliz ma Kristendom, ni kudi antu avud asangaridina relijon. Atongining yisu yivud anch diur didi ndond ja ufun ni musangar kukatau kupimin antu ku mar mamenau ni kutanijan nau “akatish nau afila kal.” Chikwau kand, kudi avud, jinswir jinej ja pasak jidi jakin: Muntu mwawonsu usotin kuya mwiur, pakwez kadap muntu mwawonsu usotina kufa chakwel aya kwinikwa. Ov, mulong wak?

Anch atutonda chakwel tufa ni tuya mwiur, antu avud kelap kuchingejin nakash kufa mudi mukatau kuchingejin mwan kupam swa chakwel ashikena ku kwatan? Pakwez antu avud kasotiningap kufa.

Ap mwamu, in kulejan avud alondining anch kupwa kwa kushakam kachisu kakemp pa divu, mwiur mwawiy mutukata kusot kuya kushakam. Chilakej, Cardinal Theodore Edgar McCarrik, wadinga mukurump wa ekliz ku Washington, D.C., walonda anch: “Katusalap nich mwom winou. Atutunga chakwel tushakama mwiur.” Chilik chimwing, Président umwing wa pasak wa Association américaine des mouvements évangéliques mu États-Unis walonda anch: “Rutong ra mwom ridi ra kumushiman Nzamb ni kuya mwiur . . . mulong mwiur kwawiy kol kwetu.”

Antu itiyijina anch kudi mwom ukwau mwiur, ritiy rau rimedin pa jinsangu ja piur piur. George Barna, président wa sosayit umwing ukata kukimbijol yitong ya marelijon, wamana anch antu avud itiyijin “rutong ra mwom ni mwom kupwa kwa kufa, rimedina pa yitongijok yidiokila ku yom kushalijan, mudi mafilim, mizik ni jingany.” Mukurump umwing wa ekliz Épiscopale wa mu Floride walonda anch: “Twijap chom ap chimwing piur pa mwiur twij ching anch mwiur mwawiy mudiay Nzamb.”

Diur, udi mutu wa mulong wa usey wisambidinau mu Bibil. Kwambatan nich Dizu dia Nzamb, ov, Diur chom ik? Ov, muntu amutanga chakwel aya mwiur? Anch antu akez kuya mwiur, yik yikuyau kusal kwinikwa?

[Dizu dirumburila chipich chidia pa paj wa 3]

Ov, mulong wak antu avud asotining kuya mwiur, pakwez kudi akemp kusu asotininga kufa chakwel aya kwinikwa?