Ov, Miur Chom Ik?

ANTU amwing atongining anch chitwishikinap kwijik chidia mwiur mulong kwikiling muntu wadiokila kal mwinimwa chakwel aturumburila mutapu mu mudia. Pamwing ap avurikin anch Yesu walonda anch: “Am kinadokalap mwiur kusal rusot ram.” (Yohan 6:38, MN) Ndiy wayileja kand amakurump amwing achirelijon anch: “En udiany a pa mangand pakwez am nidiokil mwiur.” (Yohan 8:23, MN) Yesu walonda nchik piur pa mwiur?

Yesu walejana patok anch mwiur mwawiy mukatay kushakamin Yehova. Ndiy wamutazuka Nzamb anch: “Tatukwam udia mwiur.” (Mateu 12:50, MN) Pakwez Yesu wasadila dizu “mwiur” mu mitapu yivud. Chilakej, ndiy wajimbula diur ditumena ni mes anch “mwiur” palonday anch: “Yitalany bil atujil a mwiur.” (Mateu 6:26, MN) Pakwez, Yehova kakatap kushakamang mu diur ditumena ni mes bwat. Bibil ulondin anch: “Ndiy ushicha pa ditand diend piur pa divu ni diur.”—Isay 40:22, MN.

Ov, “Tatuku udia mwiur” ushakamining pakach pa atutumbu? Diur ditumena nich mes Bibil uditazukin ni diawiy anch “mwiur.” Chilakej, nfund a kuseng umwing wafunda anch: “Anch natongijok ya maur mey, midimu ya miny yey, ngond ni atutumbu yiwashichika Ey, ing muntu udi nany lel chakwel Ey ukumutong?”—Kuseng 8:3, 4.

Bwat, Yehova kakatap kushakamang mu diur ditumena ni mes diatangay mudi mwin kusong mabay kakatap kushakamang mukabach usadinay. Chawiy lel, Mwant Salomon papanay tempel wadinga ku Yerusalem kudi Yehova, ndiy walonda anch: “Ov, komb Nzamb ukushakam pa mangand? Tal, maur ni piur kimakuwanyidinap, ing lel chikumbu chinatungila chikukuwanyin nchik?” (1 Ant 8:27, MN) Anch Yehova kashakaminap mwiur mutumeninga nich mes, ov mwiur ik mukatay kushakam?

Ap anch antu ileja diur ditumena nich mes kusutil ma telescope ni akwau akasa maweny ma kuya mwiur, chamekana anch chilondinay Bibil anch: “Kwikil muntu ap umwing wamumanap kal Nzamb” chidi chakin (Yohan 1:18) Yesu warumburila mazu minan palonday anch: “Nzamb udi Spiritu.”—Yohan 4:24.

Spiritu udi mwikadil wa mwom wa piur nakash upandakenamu wa muntu. Spiritu kakwetap mujimbu mudi wa muntu, ukweta mbij ni mash, utukutwisha kuman ni kutesh nich yovil ya ukauntu. Chawiy lel palonday Yesu anch ndiy washakama pamwing ni Tatukwend “mwiur,” chirumburikin anch wading ni mwom wa piur nakash, wa uyaj kupandakanamu muladi wawonsu wa mwom wa mujimbu. (Yohan 17:5; Filipoi 3:20, 21) Ndond ya muspiritu kwashakamay Yesu nenday Tatukwend yidi ndond yitazukinau mu Bibil anch “mwiur.” Ov, mwiur mudi nchik? Yik yisadikinamu?

Ndond ja Mudimu Usangareshina

Bibil ulejen anch mwiur mudi midimu yivud nakash. Wisambidin yitot ya tutikit twa yitang yishinshamena ya muspiritu yishakamina mwinimwa. (Daniel 7:9, 10) Chitang ni chitang cha muspiritu chikwet untu wach. Ov, mutapu ik twija chinech? Pakach pa yitang yawonsu yitumena nich mes, kwikiling yitang yaad yida chilik chimwing, tukwet kashinsh anch mwiur ni mwawiy muding mwamu, mudi ni mwawiy yom kushalijan. Chimeken anch, yitang yiney yawonsu ya mwiur yisadin mu uumwing, kushalijan mu mutapu ushimokishina nich yisadikina pa divu nlel unou, pakach pa antu akad kwovijanang nawamp yisu yivud.

Tal mutapu Bibil ulejenay mujikit usadikina mwiur. “En aruwend a mwiur ukwetany usu, mutumbishany [Yehova, NW.] Yen kamu ukata kuziyilany malejan mend, yen kand ukata kuteshany mazu mend. En, in dikand end a mwiur, mutumbishany [Yehova, NW.] Yen kamu atushalapol end ukata kusadilany rusot rend.” (Kuseng 103:20, 21, MN) Chiwiy lel, mudimu uvud usadikin mwiur. Tukutwish kwikal nich kashinsh anch udi mudimu usangareshina.

Kudiosh pasak kurutu atanga divu, Angel asambisha kal kusal mudimu usangareshina. Kwambatan nich Bibil, patangay Yehova divu, an a Nzamb “awanga miminy ya musangar” ni “atupula disok dia musangar.” (Yob 38:4, 7, MN) Umwing pakach pa an a Nzamb a mwiur wading nich chisend cha kusal pamwing nenday Nzamb mu kutang yom yikwau yawonsu. (Kolosay 1:15-17) Mazu minam mamushena ma mujikit usangareshina usadikina mwiur ma kutwish kulangwish yipul mu manangu mey piur pa mwiur ni mangand.

Ov, Antu Asotining Kuya Mwiur?

Mulong angel adinga ni kumusadil Nzamb mwiur kurutu kwa kutang divu, pakwez ikundj ni mband wa kusambish kayitangap chakwel avulijana mwiur bwat. Pakwez, Nzamb wayileja antu inay aad akusambish anch: “Valijanany, vulijanany, shakamany, izwishany ngand ni kuyiziyish.” (Disambishil 1:28; MN; Midimu 17:26) Adam wading muntu wakusambish wikala nich mulad wa mwom wa pa divu, utwishina kumwijik Nzamb ni kumusadin nich kushinshaman. Ndiy wafanyina kuval antu chakwel ashakama awonsu pa divu. Mulong “Diur didi dia [Yehova, NW] pakwez ngand yawonsu wayipana kudi an au antu.”—Kuseng 115:16, MN.

Antu kakatiningap kwau kufa; antu kayitangap chakwel asambisha kufa. Nzamb walejana anch rufu radinga dirumburish mulong muntu waburena kuziyil. Anch Adam waziyila, kelap kufa dichuku ap dimwing.—Disambishil 2:17; Rome 5:12.

Chidiap chakushimok, mulong Nzamb kalondap anch Adam ukuya mwiur. Chawiy lel divu diadingap ndond ja kuyipakidin antu chakwel kuman anch akutwish kuya mwiur bwat. Antu ayitangap mulong wa kushakam chikupu mwiur, ni rutong ra Nzamb rikez kuwanyin chakin kamu. Bibil washilamu anch “mwin kutentam mwawonsu ukez kaswan ngand, ukez kashakamamu chikupu.” (Kuseng 37:29, MN) Chimeken patok anch, antu kayitangap chakwel aya mwiur. Ov, mulong wak Yesu wayishilamu atwimbuy end mwom wa mwiur? Ov, Yesu wasota kulond anch antu awonsu awamp akez kuya mwiur?