Endil Ku Spiritu Ni Shakam Kulondulijan Nich Kwipan Kwey

“Endilany ku [S]spiritu, kangal kulondulanyip maku ma mujimbu.”—GAL. 5:16.

1. Ubatish ik wasadika pa dichuku dia Pentekot?

PA DICHUKU dia pantekot mu muvu wa 33 C.C., palondau in kwilej a Yesu mu jindim, chadinga kupwa kwa kuyibatish nich spiritu utumbila. Amekesha patok yishimu ya chipan cha spiritu. (1 Kor. 12:4-10) Ov, chipan chinech ni diskur diasalay Pita yikala nich chibudikin ik? Avud “anenganana mu michim yau.” Kusutil kukasikesh kwa Pita, akarumuka ni atambula dibatish. Rusangu riner rafundau pakur rilondin anch: “Awiy atambula dizu diend ayibabatisha; kudi awiy kwibomba dichuku dinidia mipim tunan tusatu.” (Mid. 2:22, 36-41) Mud mwalejanay Yesu, akez kabatish mu mem mu dijin dia Tatuku, dia Mwan, ni dia spiritu utumbila.—Mat. 28:19.

2, 3. (a) Rumburil kushalijan kudia pakach pa kwikal ubatishinau nich spiritu utumbila ni kwikal ubatishinau mu dijin dia spiritu utumbila. (b) Mulong wak muntu mwawonsu wikadila mwin Kristu wakin nlel amwitin kutambul dibatish dia mu mem?

² Pakwez, ov, padi kushalijan pakach pa kwikal ubatishinau nich spiritu utumbila ni kwikal ubatishinau mu dijin dia spiritu utumbila? Mwaning. Antu abatishinau nich spiritu utumbila avadikin kapamp kakwau mudi mwan a Nzamb kapwokal wa mu spiritu. (Yoh. 3:3) Adi azizidilau many chakwel akez kwikal ant ni in kupesh mu Want wa mwiur, ni adi chikunku cha mujimbu wa muspiritu wa Kristu. (1 Kor. 12:13; Gal. 3:27; Kubur. 20:6) Chawiy lel ubatish winou—kwikal ubatishinau nich spiritu utumbila—kwawiy kwasalay Yehova, pa dichuku dia Pentekot ni kupwa, watonda antu chakwel ikala answan pamwing nenday Kristu. (Rome 8:15-17) Pakwez chidi nchik lel piur pa ubatish wa mu mem mu dijin dia spiritu utumbila, chom chikata kusadikang chisu ni chisu ku yikumangan ni yitentam ya antu a Yehova mu machuku metu manam?

³ In Kristu akin akat kuyibatish mu mem mudi chijingidij cha kwipan kwau akabuj kudi Yehova Nzamb. Chawiy chimwing ni antu atazukinau kuya mwiur. Pakwez ubatish wa mu mem udi kand wa usey mulong wa tutikit twa amakundj ni amband pa chirungu cha katat akweta ruchingej katat ra kushakam chikupu pa divu. Rikalap nchik ruchingej ra muntu, kutambul dibatish mu mem mu dijin dia Tatuku ni dia Mwan ni dia spiritu utumbila udi mupak wa usey ufanyidinay muntu kukwat chakwel ikala witiyinau kudi Nzamb. Akristu awonsu abatishinau mu mutapu winou itiyin kudandamen ‘kwendil ku spiritu.’ (Tang Galatia 5:16.) Ov, wendidil ku spiritu ni kushakam kulondulijan nich kwipan kwey?

‘Kwendil ku Spiritu’ Kurumburikin Ik

4. Ov, ‘kwendil ku spiritu’ kurumburikin ik cha kusambish?

⁴ ‘Kwendil ku spiritu’ kwitin kwitiyij kusal kwa spiritu utumbila padi ey, kumutwishish spiritu utumbila chakwel ikala nich usu padi ey. Mu mazu makwau, chirumburikin kwikal uyikedilau kudi spiritu utumbila mu midimu yey ya dichuku ni dichuku. Galatia shapitre wa 5 ulejen patok kushalijan kudia pakach pa kwikal utakedilau nich usu wa spiritu utumbila ni utakedilau nich usu wa wuntu.—Tang Galatia 5:17, 18.

5. Kwikal utakedilau kudi usu wa spiritu utumbila kwitin kulik yisalijok ik?

⁵ Anch akutakedil kudi usu wa spiritu utumbila, ukulik yisalijok ya wuntu. Pakach pa yisalijok yiney padi yom mudi “kusotan, kwijond, ris, akish, kubauk, jinkuny, kuchirilan, mikau, maujim, kwaurik, ntad, matend, ni kukatuk, kukwachik kwa maruvu, kukishan.” (Gal. 5:19-21) Mwi njil yey “kujip chaku cha mujimbu ku usu wa [S]spiritu.” (Rome 8:5, 13) Chikukukwash kutek yitongijok yey pa yom ya spiritu ni kusadil pamwing nich umutakel wend, pa ndond pa kwilikidil amwiney akuyikela kudi maku ma mujimbu.

6. Pan chilikej cha yom yifanyidina chakwel kumekesh dibuj dia spiritu.

⁶ Mulong spiritu utumbila usadil padi ey, umekeshin ngikadil ya Nzamb, ‘dibuj dia spiritu.’ (Gal. 5:22, 23) Ap mwamu, uteshin anch chinech chitin usala usu ku mutambu wey. chilikej: Ndim udimina. Chakin kamu, muten ni mem yidi ya usey; pakad muten ni mem kakutwishap kuchingejin kwangul ap pakemp. Tuswiridin spiritu utumbila chakwel tumekesha dibuj dia spiritu. Pakwez, chom ik chikeza kusong pakad mudimu ukash wa ndim? (Jinsw. 10:4) Mwaning, mutapu wey wa kudim divu dia muchim wey uletin kushalijan pakach pa kuwap ni kujimb kwa dibuj dia spiritu ukweta. Chawiy lel, iyipula anch, ov, ‘nikat kutwishish spiritu utumbila chakwel abudisha dibuj diend kusutil ku kusal pamwing nend?’

7. Ov, kwilej ni kutongijokin kukwet usey ik anch usotil kukudish dibuj dia spiritu utumbila?

⁷ Chakwel kushiken kwangul nawamp, andim aswiridin kwichil mem kwi mbut jau. Chakwel kukudish dibuj dia spiritu, uswiridin mem ma uyakin madia mu Bibil ni madia mu chikumangen cha in Kristu nlel. (Isay 55:1) Wayilejin pamwing ap antu avud anch Mifund Yitumbila yidiokil kudi spiritu utumbila. (2 Tim. 3:16) Chikwau kand, chisak cha kashalapol ushinshamena ni kubabal chikwashin nakash kutesh mem mishitwila ma uyakin wa Bibil. (Mat. 24:45-47) Chibudikin chimeken patok. Chakwel twikala atakedilau kudi spiritu utumbila, tufanyidin kutang ni kutongijokin pa Dizu dia Nzamb. Anch wasal mwam, ukat kwimburij chilikej chiwamp cha aprofet “akasikesha mulong wa kujingunin” jinsangu jidiamu. Chishimokishin anch ap kand angel asangaredin nakash mu uyakin wa muspiritu pantaliken ni Mbut yashilaumu ni chikumangen cha in Kristu azizidilau many.—Tang 1 Pita 1:10-12, MN.

Utakedilau Kudi Spiritu—Ov, Mutapu Ik?

8. Mulong wak chidi cha usey kudi ey kumwit Yehova spiritu wend?

⁸ Udiap mulong wa kwilej kusu Mifund ni kutongijokin. Ufanyidin kudandamen kwit ukwash wa Yehova ni umutakel wend. Ukutwish “kusal yom yivud yipandakena yipul yetu ap yom yitutongina.” (Efes 3:20, MN; Luka 11:13) Pakwez, ukwakul nchik, anch muntu kanang wakwipul anch, “Mulong wak nifanyidina kudandamen kwit anch Nzamb wij kal ‘yom niswiridina kurutu nimwita’?” (Mat. 6:8) Mwaning, mulong wa chom chimwing, mu kulembil mulong wa spiritu utumbila, witiyijin anch umuchingejidin kwey Yehova. Chilikej, anch muntu wezin kukwit ukwash, ukusal yawonsu ukutwisha chakwel kumukwash, mulong wakwitang ukwash, ni ukuchingejidin. (Isikej nich Jinswir 3:27.) Chilik chimwing, Yehova ukat kusangarang anch wamwit spiritu wend, ni ukukwinkishay.—Jinsw. 15:8.

9. Kukumangan ku yikumangan ya in Kristu kukukwash nchik kwikal utakedilau nich usu wa spiritu wa Nzamb?

⁹ Ukutwish kujingunin anch njil yikwau ya kwikal utakedilau kudi usu wa spiritu wa Nzamb yidi yikumangan, ni yitentam yetu. Kusal usu wa kwikal pakach pa in kukumangan ni kuta matu ku program kudi kwa usey nakash. Kusal mwamu kukukwashin kutesh “yom ya Nzamb yikurikina.” (1 Kor. 2:10) Chidi kand cha ukwash kwakul pakad kujing. Tongijokinap bil piur pa yikumangan kuwakumangena mu jimbing jinying jasutina ej. Ov, wazambula chikash chey mwiur tupamp twinch, wakwil, chakwel umekesha ritiy rey? Ov, umen mutapu wa kurijek ku mutambu winou? Anch usadil mwamu, kwat mupak wa yom ukusala mu jimbing jidia kurutu. Yehova ukez kaman kusot kwey kwakul ni ukukwinkish spiritu wend utumbila, ukez kakukwash kudandamen nakash kukumangan ku yikumangan.

10. Kwendil ku spiritu kwitin kupalangesh diladikij ik kudi antu akwau?

¹⁰ Mu kwendil ku spiritu mudi kwakul ku diladikij tutangina mu Kuburik 22:17: “Spiritu ni ngachik akat kulond anch, Ez. Ni ndiy ukat kutesh, mulikany alond anch, Ez. Ni yend ukweta impu, mulikany eza. Ni wawonsu usotila, mulikany atambul mem ma kupand makad usey.” Spiritu, usadishina chisak cha nganchik azizidilau many, upalangeshin diladikij dined piur pa mem ma mwom. Anch witiyin kutazuk “Ez” ov, udandamedin kulond anch, “Ez”? Chidi chiyukish mudi ik cha kwikal atwishina kusal mudimu winou wa kupandish mwom!

11, 12. Mutapu ik ukwashinay spiritu utumbila mu mudimu wa kulejan?

¹¹ Mudimu winou wa usey ausadil katat nich umutakel wa spiritu utumbila. Tutangin piur pa mutapu wasalay spiritu utumbila mu chitot cha mivu cha kusambish mu kwazuril ma teritwar masu mulong wa amishoner. Kambuy Paul ni mbay nend ading “ayilikishang kal kudi [S]spiritu [U]utumbila kulondil dizu mu Asia”; wayilikisha kand kuya mu bitinia. Kitwijap chakin kamu mutapu wayikangeshay spiritu kuya kwau mu jindond jinej, pakwez chimeken patok anch spiritu wamutakela Paul mu chingand chijim cha mwi mputu. Wamana mu chishimushimu mwin Masedon ukat kumulembijek mulong wa ukwash.—Mid. 16:6-10.

¹² Mudimu wa kulejan pa mangand mawonsu autakedil chilik chimwing kudi spiritu wa Nzamb nlel. Kwikil yishimushimu yishimokishina yisadidilau mulong wa kutakel mudimu winou; Yehova ndiy kusu uyitakedila azizidilau many nich spiritu utumbila. Ni spiritu uyibachikin akadivar ni anambaz kusal yawonsu yikutwishau kusal mu kulejan ni kufundish. Pakad kwidjidjek niyey usadil mudimu winou wa usey. Ov, ukutwishap kuvudish musangar wey mu mudimu winou usangareshina?

13. Mutapu ik ukutwisha kulamat ku umutakel wa spiritu utumbila? Ilikej.

¹³ Ukutwish kulamat ku umutakel wa spiritu utumbila kusutil ku kusadil jinsangu jilejenau kudi antu a Nzamb. Shinshikin bil piur pa Mihoko mwan nsand wa mu Japon. Chadingay chibol musu, wiyova anch kawanyidinap mu kusal kuchirikinamu kusu; wiyova anch kijap kulond mutapu wa kumusangaresh mwin chikumbu. Pa chisu chinicha, apana yiyul ya kusadil mu Mudimu Wetu wa Want piur pa mutapu wa kusal mu wiswimp kuchirikinamu kusu. Kupwa apalangesha broshir Une vie pleinement satisfaisante : comment ? Amusadila nakash mu chingand cha Japon. Mihoko wasadila yiyul yipaninau piur pa mutapu wa kusadil broshir winou, pakampwil piur pa kusal mu wiswimp kuchirikinamu kusu. Mu kusut kwa machuku wasambisha kwilej Bibil ni awiy adinga ni kulik pakusambish. Walonda anch, “Nikala ni malejan mavud—12 kapamp kamwing—mu chilik chakwel anch nayileja amwing kuchingel kurutu kwamam kutwish kusambish kwilej nau!” Chakin kamu, anch wendidil ku spiritu, usadidil umutakel upaninau kudi atushalapol a Yehova, ukutwish kwangul yom yivud nakash.

Muchingejina Spiritu wa Nzamb

14, 15. (a) Mulong wak chitwishikin kudi antu akad kuwanyin kushakam kulondulijan nich kwipan kwau? (b) Mutapu ik ukutwisha kutan arund awamp?

¹⁴ Chikutekinau kwikal kashalapol, ukwet mudimu wa kusal. (Rome 10:14) Ufanyidinap kwiyov uwanyidina kusend chisend mudi chinech. Pakwez, mudi muchidia piur pa azizidilau many, Nzamb ndiy ukuwanyishina. (Tang 2 Korint 3:5.) Ukutwish kushakam kulondulijan nich kwipan kwey kusutil ku kusal yiwamp ni kumuchingejin spiritu wa Nzamb.

¹⁵ Chakin kamu, chiswapel kudi etu antu akad kuwanyin kushakam kulondulijan nich kwipan kwetu kudi Nzamb wetu uwanyidina, Yehova. Chikangesh chimwing chidi anch antu amwing adinga arund ney akutwish kulik kutesh kurumburik kwa mwom wey usu ni akutwish ‘kukusalol masaal.’ (1 Pita 4:4) Pakwez, kangal waburen kujingunin anch katat wakudish kal urund usu, upandakenamu usey wa kwikal pamwing nend Yehova ni Yesu Kristu. (Tang Yakob 2:21-23.) Chidi kand cha usey kuyijik akadivar ni anambaz a mu chikumangen chen, adia pakach pa “divar” dia pa mangand mawonsu. (1 Pita 2:17; Jinsw. 17:17) Yehova kusutil ku spiritu ukukukwash kwikal nich arund akudandamena kwikal nich chibachikin chiwamp padi ey.

16. Mulong wak ukutwish, mudi Paul, ‘kusanger mu kuziy’?

¹⁶ Ap anch atunyingumukin kudi arund a ukwash mu chikumangen, ukutwish kudandamen kuman anch chiswapelap kurish nich yikokujol ya pichuku pichuku. Yom yiwadinga ni kusanger yikutwish pa yisu kanang kukusha nich yovil ya kushadish, mudi anch udi mwi njil yilemp ya milong. Chawiy chisu cha pakampwil cheyey kumushejin Yehova, kumwit spiritu wend utumbila. Kambuy Paul wafunda anch “Anch niziyilip nchik chawiy nidi kal mukash.” (Tang 2 Korint 4:7-10; 12:10.) Paul wading wij anch spiritu wa Nzamb ukutwish kusal mulong wa kuziy kwa antu, wikalap nchik mwikadil wau. Chawiy lel, Usu wa kusadish wa Nzamb ukutwish kukukasikesh chisu chin chawonsu wovila kuziy ni uswiridina ukwash. Paul wafunda anch chawiy “chinisangaridina mu kuziy.” Chadinga chisu chaziyay chovay anch spiritu utumbila usadil padiay. Ukutwish kwikal ni yovil ya chilik chimwing!—Rome 15:13.

17. Spiritu utumbila ukutwish kukukwash mutapu ik chakwel ushika kwindond uyila?

¹⁷ Tuswiridin spiritu wa Nzamb chakwel tutwisha kulondul mwom wa kwipan kwetu kudiay. Tong bil amwiney mudi udi kalal wa waat. Rutong rey ridi ra kumusadil Yehova chikupu. Spiritu utumbila udi mudi rinkind usotila kukwat chakwel ushika kwindond yey uyila mu diking ni mu mutapu uwamp. Uswiridinap kwikal upwepodilau kuya mutambu ni mutambu kudi spiritu wa mangand ma Satan. (1 Kor. 2:12) Ufanyidin kusal mutapu wawiy umwing chakwel utana rinkind muwamp ni kumukwat. Ndiy kamu spiritu utumbila. Mu dizu dia Nzamb diawonsu ni dirijek diend ditakedilau kudi spiritu, spiritu utumbila ukukubachik mwi njil yiwamp.

18. Wisu mupak wey katat, ni mulong wak?

¹⁸ Anch wilejin ni Atuman a Yehova, util nau urund wa muspiritu, chad kandikal ni katat ukwata mupak wa usey wa kwipan ni dibatish, iyipula bil anch, ov, ‘Mulong wak nifanyidina kwidjidjek?’ Anch witiyin mudimu usadila spiritu utumbila mu kuwanyish kwa rusot ra Nzamb nlel ni kujingunin kusal kwend, sadil yiwilejina chakwel kwikal utentamina. Yehova ukukuyukish nakash. Nich muchim wend wa kupan ukukwinkish spiritu wend utumbila. Anch watambwil kal dibatish pasutil kal mivu ap makum ma mivu, chakin kamu wamen kal usu wa spiritu utumbila. Wamen kal ni kwov mutapu watwishay Nzamb kukukasikesh nich spiritu wend. Chitwishikin kudandamen kwikal mwamu—mwaning, pakad nsudiel mu machuku ma kurutu. Chawiy lel, kwat mupak wa kudandamen kwendil ku spiritu utumbila.

Ov, Uvurikin?

• Ov ‘kwendil ku spiritu’ kurumburikin ik?

• Ov, chom ik chikutwisha kukukwash ‘kudandamen kwendil ku spiritu’?

• Ov, mutapu ik ukutwisha kushakam kulondulijan nich kwipan kwey?

[Chipich chidia pa paj wa 17]

Kudim divu dia muchim wey kwitin kwikasikesh

[Yipich yidia pa paj wa 19]

Ov akutakedil kudi spiritu wa Nzamb?