Bibil Didi Chakin Kamu Dizu dia Nzamb

OV YOM ik yasotay kambuy Paul kulond pafunday anch Bibil ‘udiokil ku [s]piritu wa Nzamb’? (2 Timote 3:16) Paul, pafunday mu rudim ra in Grek, wasadila dizu dirumburikin “kupepidil kudi Nzamb.” Pa chinech, Paul ulondin anch Nzamb wayitakela in kufund Bibil nich spiritu wend utumbila chakwel afunda yasotay kufund.

Pita walonda anch: In kufund Bibil inay “anyikeshau kudi [s]piritu [u]tumbila alonda mazu matambulau kudi Nzamb.” (2 Pita 1:21) Chawiy lel, kambuy Paul watwisha kand kulejan anch mikand yidia mu Bibil yisadin “Mukand wa Nzamb, ukutwisha kukudimwish ku dipandish ku ritiy mu Kristu Yesu.”—2 Timote 3:15.

Antu avud atadikin nakash piur pa kulond anch Nzamb ndiy wafunda Bibil. In kunyinyit—nakash piur pa yom yikatay kulejan Charles Marston mwin kupundol yom ya pasak mudi “kutadik kwakad kulimish jinsangu ja Bibil”— apompata nakash uyakin wa Bibil. Amwing amudiosha mu manangu alond anch udi kwend “jingany jitekinau pamwing ni jinsangu jiwamp.”

Shinshikin Uman

Ov, chitwishikin kumuchingejin Bibil? Chidi cha usey kudi ey kukwat chiyul chiwamp pa mulong winou. Mulong wak? Mulong Bibil ukwet jinsangu jidiokila kudi Nzamb amwinend, chikwikal cha usup—ap cha ubaj—anch tujivuramedin. Anch wamuman Bibil mudi dizu dia antu pandond pa kumwitiyij anch did Dizu dia Nzamb, Bibil kakutwishap kand kwikal ni usu wa kutakel yisal ni yitiyij yey.—1 Tesalonik 2:13.

Mutapu ik ukutwisha kukwat chiyul cha kumuchingejin Bibil? Chakin, mutapu ik ukutwisha kukwat chiyul cha kuyichingejin antu wakad kwijik? Chom chimwing chidi chakin. Chikasikening nakash kumuchingejin chakin kamu muntu wakad kwijik nawamp. Ching kusu anch wilej nawamp mu chisu kanang mutapu mudingau antu chawiy lel ukutwisha kwijik anch adi antu akashinsh ni akuchingejin. Ukutwish kwijik nawamp Bibil mu chilik chimwing. Kangal kwitiyij pakad chipul cha kusot kwijik ap malejan matadikina uyakin wa Bibil. Itekina chisu cha kushinshikin uman ukasikeshidina yilondinay Bibil anch ‘wadiokala ku [s]piritu wa Nzamb.’

Kupompat Kudiokila Kudi “Arund”

Kangal washadish ruchingej pa kuyiman antu itiyijina anch adi “arunend” a Bibil pakwez kutadikijina uyakin wend ni wa kuchingejin. Nlel unou, in kurumburil Bibil avud, ap anch alondin anch adi in Kristu, ndinguril New Dictionary of Theology ulondin anch: “Akez kulond kwau anch Bibil jidi jinsangu ja antu.”

In kwilej teoloji avud atadikijadin piur pa antu afunda mikand ya Bibil. Chilakej, avud alondin anch mukand wa Isay kaufundap kudi muprofet Isay. Alondin anch amufunda pasuta kal mivu yivud kupwa kwa chirung cha Isay. Buku The Concise Bible Commentary, wafundau kudi Lowther Clarke, ulejen anch udi “buku wafundau kudi antu avud ni majuku mavud.” Pakwez mazu minam maburedin kulejan anch Yesu Kristu ni in kwilejend achirikina piur pa Isay ni mikand yend.—Mateu 3:3; 15:7; Luka 4:17; Yohan 12:38-41; Rom 9:27, 29.

Ap kutadik kukash piur pa Bibil, mudi mwalonday J.R. anch uprofet udia mu mukand wa Daniel “udi chakin kamu jinsangu ja pasak jasadikina kal pakwez mwin kufund udimbin kwend anch udi uprofet.” Kakwau kand, mu kulond mwamu, avuramedin uman wa Yesu Kristu amwinend. Yesu wababesha piur pa chatazukay anch “rukuny ra kusheshan ralonday muprofet Daniel, ukata kwiman mwi ndond yitumbila.” (Mateu 24:15) In Kristu afanyidin kwitiyij anch Yesu Kristu amwinend kayidimbap antu—ov wela kukasikeshin jinsangu jidimbenau anch udi uprofet? Bwat kwau.

Ov, Padi Kushalijan Kanang?

Ufanyidin kwipul anch “Ov, chakin kamu padi kushalijan kanang pakach pa afunda mikand ya Bibil?” Chakin kamu, padi kushalijan kukash. Ov, ukutwish kwitiyij mukand ulejena rusot ra nsudiel ni manswik ma murund anch chimeken anch kadiap ndiy waufunda? Pakwez, anch in kwijik nawamp milong ya mikand akulej anch udi wa makasu—pakwez arund akweta yitongijok yiwamp awiy afunda yom yitiyijau yadinga yisotinay muruney. Ov, chinech chikutwish kusal anch mukand ushadisha usey wau? Ov, ukutwish kand kwikal nich ruchingej rakin ra kwitiyij anch chidi chakin kamu yom yasotay muruney?

Chidi chilik chimwing ni Bibil. Chishimokishinap anch antu avud—ap antu alondina anch adi in Kristu—amekeshin anch kijap yilondinay Bibil piur pa yom mudi ukashinsh, masandj, ni yikwau. Ov, tupamp twinch wateshinap kal antu akat kulond nich kuswingish anch, “O, ayifundin kwau mu Manswik Makur!”—mudi asotin kulond anch kakwetap usey nakash. Chawiy lel, ap anch kambuy Paul ulejen anch Manswik Makur majimbwilay anch “Mukand wa Nzamb madiokala ku [s]piritu wa Nzamb.”

Ukutwish kutadik anch: “Chakin kamu ufanyidinap kulik kwitiyij uman wa in nkeu ni in kwilej awonsu.” Pakwez bwat! Chilakej, tuyijikitishin in kwilej a kashinsh atukwasha kujingunin mukand wa Bibil wafundau pa kusambish. Chimeken patok anch, yilim yikemp yandama mu mukand wa Bibil padingau ni kufundiril mu mivu yitot ni yitot. Vurik anch: Padi kushalijan kukash pakach pa kujingunin yilim yiney yikemp yandama mu mifund ya mikand ya Bibil ni kulik Bibil mwawonsu anch udi chom chasalau kudi antu kusu.

Lam Ritiy mu “Mukand wa Nzamb”

Kurutu alonda anch Bibil amupepidila kudi Nzamb, Paul wamuleja Timote mulong wak mukand winou wafundau nich spiritu wadinga wa usey nakash. Ndiy walonda anch: “Mu machuku ma kwisudiel, . . . antu ayimp ni in makasu akukudil mu kuyip ni mu kuyip nakash, akez kadimbijan ni kudimbijan.” (2 Timote 3:1, 13) Pa chirung cha Paul, antu ading ameken mudi adi ‘in manangu’ adinga ni kusadil “kulond kuwamp kwa rilemb” mulong wa kuyidimb antu ni kuziyish ritiy rau mudiay Yesu Kristu. (1 Korint 1:18, 19; Kolosay 2:4, 8) Mulong wa kumuking ku chibachikin chau, kambuy Paul wamuyula Timote anch ‘ashakam mu yom yilejinay kudiokal ku wanikanch pijay mikand yitumbila’ yadiokala kudi Nzamb.—2 Timote 3:14, 15.

Chidi kand cha usey kudi ey kusal mwamu mu “machuku [minam] ma nsudieI.” Kangal wadiul ubaj wa kudimban kudi antu akweta manangu nakash asadidila “kulond kuwamp kwa rilemb.” Pakwez, mudi in Kristu a mu mivu chitot ya kusambish, ilama amwiney kusutil ku kuchingejin nakash mu yom yawonsu yiwileja mu Bibil—didi chakin kamu Dizu dia Nzamb dipepidilau nich spiritu.

Atuman a Yehova akez kusanger kukukwash ey ukasikesha ritiy rey mu Bibil. Chilakej, akutwish kukulej mutapu yany ya Bibil yamekana kwikal ya usey kudiosh pasak; mutapu Bibil ovijadin nich siyans pisambinay pa milong ya siyans, mutapu ukwet yitongijok yimwing kudiosh kwinsambishil djat ni kwinsudiel; mutapu uprofet wend ukez kuwanyin chakin kamu—ni kuwanyin nakash. Anch usotin, fund kudiau in kufund gazet winou chakwel wikala nich jinsangu jiyikwashina mamiliyon ma antu akashinsh kuman anch Bibil udi chakin kamu Dizu dia Nzamb.

[Dizu dirumburila chipich chidia pa paj wa 5]

Mutapu ik ukutwisha kukwat chiyul cha kuyichingejin antu wakad kwijik?

[Dizu dirumburila chipich chidia pa paj wa 6]

Tuyijikitishin in kwilej a kashinsh atukwasha kujingunin mukand wa Bibil wafundau pa kusambish