Ov, Ukutwish Kumwijik Nzamb pa Dijin?

Kwikal witinau kumulangwish muntu wa usey ujim ni kumutazuk kapamp kamwin pa dijin diend kadi kamu katumb. Antu a katumb akat kuyitazukang yisu yivud kusutil ku yijiken, mudi “Ntakel,” “Mukaleng,” ap “Mwin Katumb.” Chawiy lel anch muntu kanang ukweta ulabu ujim wakulej anch, “Sambish kusu kwintazukang pa dijin diam,” ukov chakin kamu anch akuyukishin.

NZAMB wakin utulejin mu Bibil, Dizu diend difudinau anch: ‘Yam kusu Yehova, diawiy dijin diam.’ (Isay 42:8) Ap anch ukwet kand yijiken yivud, mudi “Sakatang,” “Mwin Dikand Diawonsu,” ni “Mukaleng Mwant,” ukat chisu chawonsu kuyishiman atushalapol end ashinshamena kusutil ku kwitiy amutazuka pa dijin diend.

Chilakej, pasambishay muprofet Moses kumulembil Nzamb ndiy walonda anch: “A! Nsalejam [Yehova], nlikishina, amboku!” (Kubudik 4:10, MN) Pa musambu wa kufungul tempel mu Yerusalem, Mwant Salomon wasambisha malembil mend nich mazu minam anch: “A! Yehova.” (1 Ant 8:22, 23, NW) Ni palembilay muprofet Isay piur pa in Isarel, walonda anch: “Ey [Yehova] udi tatukwetu.” (Isay 63:16) Chakin kamu, Tatukwetu wa mwiur utwitin tumutazuka pa dijin diend.

Ap anch kumutazuk Yehova pa dijin diend kudi kwa usey, chakin kumwijik pa dijin diend kurumburikin yivud. Piur pa muntu umukatila ni umuchingejidina, Yehova wakana anch: “Nikumuchidij mwawonsu wingitiyijina am anch, yam [Yehova].” (Kuseng 91:14, MN) Chakin kamu, chifanyidin kurumburikin yom yivud mu kwijik dijin dia Nzamb, mulong chidi chom cha usey chakwel kutambul diking dia Nzamb. Chawiy lel, chirumburikin ik kudi ey kumwijik Yehova pa dijin?