Kimbany Nich Muchim Umwing Chiyukish Cha Yehova

“[Nzamb] ndiy ukat kufutan kuwap kudi antu awonsu akata [kumukimb nich muchim umwing, NW].”​—HEB. 11:6.

1, 2. (a) Ov, mutapu ik ukimbinau antu avud yiyukish ya Nzamb? (b) Mulong wak tufanyidin kutongin piur pa kutambul chiyukish cha Yehova?

“NZAMB akuyukish!” Mu mangand mamwing, chidingap chaku cha kuyitesh angez akat kusadil mazu minam anch muntu wakisil. Chitwishikin kuyitan amakurump a ma relijon kushalijan akat kuyiyukish antu, anam, ni yom yakad mupim. Angez akutwish kwikal apwitidinau ku ma site ma chirelijon pa internet nich ruchingej ra kutambul chiyukish. Anyikel a chipolitik isambining chisu chawonsu piur pa chiyukish cha Nzamb ku muchid wau. Ov, utongin anch kwit kwinoku kwa chiyukish kudi kuwamp? Ov, kudi kwa usey? Ov, nany ufanyidina chakin kamu kutambul chiyukish cha Nzamb, ni mulong wak?

² Yehova wasambela kulejan anch mu machuku mansudiel, ukez kwikal ni antu adia zwang ni in chisambu adiokila ku michid yawonsu akeza kulejan rusangu ruwamp ra Want kwinsudiel kwa divu chikalap nchik rukis ap rupompat. (Isay 2:2-4; Mat. 24:14; Kuj. 7:9, 14) Antu amwing pakach petu itiya chisend cha kwikal antwend asotin—ni aswiridin—chiyukish cha Nzamb, mulong chitwishikinap kutwish pakad chiyukish cha Nzamb. (Kus. 127:1) Pakwez, mutapu ik tukutwisha kutambul chiyukish cha Nzamb?

Yiyukish Yikat Kuyishiken Antu Aziyidila

3. Anch in Isarel adandamena kuziyil, chom ik chela kushiken?

³ Tang Jinswir 10:6, 7. Kurutu kwa kwandam kwa muchid wa in Isarel mwingand ya kushilamu, Yehova walejana anch akez kwikal nich diking ni mapit mavud anch adandamen kuziyil ku dizu diend. (Kuv. 28:1, 2) Yiyukish ya Yehova yikezap kwikal ching kusu piur pa antu a Nzamb pakwez yikez ‘kayiwil.’ Mulong wa antu inay aziyidina, yiyukish yikez kayiwil chakin kamu.

4. Ov, chom ik chitina kuziyil kwakin?

⁴ Ov, mu mwikadil wafanyidina ik in Isarel kuziyil? Chijil cha Nzamb chalejana anch ndiy wela kwov kuyip anch antu akanganya kumusadil “mu musangar ni mu kuwap [kudiokila mu muchim, NW].” (Tang Kuvurik Yijil 28:45-47.) Yehova witin yom yivud kupandakenamu kuziyil pakad manangu ku yany kampand, kukutwisha kuyikasikesh anam ap ayilembil. (Mar. 1:27; Jak. 3:3) Kumuziyil Nzamb kwa kashinsh kudi kumekesh kwa rukat. Kumekening kusutil ku musangar ubachikinau nich ritiy anch yijil ya Yehova yiliminap bwat ni anch “ndiy ukat kufutan kuwap kudi antu awonsu akata [kumukimb nich muchim umwing, NW].”—Heb. 11:6; 1 Yoh. 5:3.

5. Ov, mutapu ik kuchingejin mu kushilamu kwa Yehova kwela kumukwash muntu chakwel aziyila ku chijil chidia mu Kuvurik Yijil 15:7, 8?

⁵ Tonginany piur pa mutapu wafanyina kuziyil kwinoku nich ruchingej kumekan anch alondula chijil chalejanau mu Kuvurik Yijil 15:7, 8. (Tang.) Kuziyil pakad kukatish ku chijil chinech kukutwish kushiken ku kumukwash kazwendj mu mutapu umwing, pakwez, ov, ukutwish kulet urund uwamp ni mashakamin mamushena pakach pa antu a Nzamb? Cha usey nakash, chidi anch, ov, chinech chimekeshin ritiy mu ukaliweny ukwetay Yehova wa kuyinkish atushalapol end ni kusanger chisu cha kwimburij muchim wend wa kupan? Chakin anch bwat! Nzamb umening nawamp mwikadil wa muchim wa kupan kwakin wa muntu ni washilamu anch ukez kumuyukish mu yisal ni mu midimu yend yawonsu. (Kuv. 15:10) Kutek ritiy mu kushilamu kwinoku kukez kubachikin ku yisal yiwamp ni kulet yiyukish yivud.​—Jinsw. 28:20.

6. Ov, chom ik chifanyidina kutukasikesh mu Hebereu 11:6?

⁶ Kuwejaku ku kwikal ni ritiy mudiay Yehova mudi ukata Kuyifut antu awonsu, Hebereu 11:6 ukasikeshidin piur pa mwikadil ukwau udia wa usey mulong wa kutambul chiyukish cha Nzamb. Ijik anch Yehova ukat kuyifut antu ‘amukimbina nich muchim umwing.’ Dizu dia kusambish diasadilau pinap dimekeshin kukasikeshin kwa yom ni usu ukash. Chinech chitukasikeshin mudi ik piur pa kuwanyin kwa chiyukish! Musul wau udi Nzamb umwing kusu wakin “wakad makasu.” (Tit. 1:2) Ndiy wamekesha mu mivu kanan yasutina anch kushilamu kwend kudi kwakin kamu. Mazu mend makutwishap kukangany; makez kuwanyin chakin kamu. (Isay 55:11) Chawiy lel tukutwish kwikal nich ruchingej kamu anch, anch twamekesh ritiy rakin, ku mutambu wetu, ndiy ukez Kutufut.

7. Ov, mutapu ik tukutwisha kutan yiyukish kusutil kwi “mbut” ja Aburaham?

⁷ Yesu Kristu wamekesha anch udi chikunku cha kusambish cha “mbut” ya Aburaham. In Kristu azizidilau many adi chikunku cha kaad cha “mbut” chasambelau kulejan. Awiy ayinkisha mudimu wa “kurumburil yisalijok yikwamushena ya Nzamb, ndiy kamu wakutazukanya en kudiokal mu mididim, wandamany mu chimunyik chend chikwamushena.” (Gal. 3:7-9, 14, 16, 26-29; 1 Pita 2:9) Tukutwishap kuchingejin kwikal mu urund uwamp ni Yehova anch twalik kuyiziyil antu atekay Yesu mulong wa kulam yom yend. Pakad ukwash wa “kashalapol ushinshamena ni kubabal,” twelap ap kutesh nawamp usey wa yom yawonsu yitutangina mu Dizu dia Nzamb ap kwijik mutapu wa kuyisadil. (Mat. 24:45-47, TMK) Kusutil ku kusadil yom yitwilejina mu Bibil, tukutwish kutan yiyukish ya Nzamb.

Shinshikinany pa Rusot ra Nzamb

8, 9. Ov, mutapu ik wipanay nshakur Jakob kwambatan nich malembil mend?

⁸ Chitongijok cha kwipan ni usu wawonsu mulong wa kutambul chiyukish cha Nzamb chikutwish kutuvurish nshakur Jakob. Ndiy kijikap mutapu kushilamu kwa Nzamb kudi Aburaham kwela kuwanyin, pakwez ndiy wading nich ruchingej anch Yehova ukez kuvudish nakash an a ngakend, an ela kwikal muchid ujim. Chawiy lel, mu muvu wa 1781 K.C.C., Jakob wakasa weny wa kuya ku Haran mulong wa kukimb mband. Ndiy kasangerap kutan kusu changadim ukeza kwikal murund usangareshina; pakwez, ndiy wasota kukimb muntu umwovila Nzamb wom, mband wadinga mwin kumwifukwil Yehova ukeza kwikal maku muwamp kudi anend.

⁹ Twij anch Jakob wamusankana mwanamakwend Rachel. Ndiy washikena ku kumukat Rachel ni witiyija kumusadil tatukwend, Laban, mu mivu sambwad chakwel amusenda mukajend. Rusangu riner radingap ra chamwamu ap rimedina pa mazang ma rukat, bwat. Jakob wading wij chakin kamu kushilamu kwapanay Nzamb wa Dikand Diawonsu kudi ngakend Aburaham ni kumwinkish kand tatukwend, Isak. (Dis. 18:18; 22:17, 18; 26:3-5, 24, 25) Isak ni ndiy wamuleja mwanend Jakob anch: “Chawiy Nzamb wa [Dikand Diawonsu] akuyukisha. Ndiy akusongisha kwend ni kukuvudish chakwel ey ukwikal chisak cha antu. Nzamb akwitiy kukwinkish ey ni a majuku mey kand chiyukish cha Aburaham, chakwel ey ukwikal ni ngand yiney yiushicha, yapanay kal Nzamb kudi Aburaham.” (Dis. 28:3, 4) Chawiy lel, usu wasalay Jakob wa kutan mband muwamp ni kusal dijuku wamekesha patok ruchingej rend pantaliken ni yom yalonday Yehova.

10. Ov, mulong wak Yehova wasangara pa kumuyukish Jakob?

¹⁰ Jakob kakimbap mapit mulong wa kutenchik dijuku diend. Ndiy wading utongijokin piur pa kushilamu kwa Yehova pantaliken ni anend. Rutong rend rading rimedin pa kuwanyin kwa rusot ra Yehova. Jakob wakwata chiyul cha kusal yom yawonsu yelay kutwish kusal mulong wa kutambul chiyukish cha Nzamb kwikalap nchik yikangesh. Ndiy walama mwikadil wend pikalay ipal, ni Yehova wamuyukisha mulong wa mwikadil winou.​—Tang Disambishil 32:24-29.

11. Ov, usu ik utufanyidina kusal kwambatan nich rusot ra Nzamb ralejanay?

¹¹ Mudi Jakob, twijap yom yawonsu kachom pa kachom piur pa kuwanyin kwa rutong ra Yehova. Chikwau kand, kusutil ku kwilej Dizu dia Nzamb, tukat kujingunin milong yijim pa yituchingejina piur pa “Dichuku dia Mwant [Yehova.]” (2 Pita 3:10, 17) Chilakej, twijap nawamp chisu chikeza kwez dichuku dinidia, pakwez twij anch didi piswimp. Twitiyijin Dizu dia Nzamb pa dilejena anch kusutil ku kupan nakash uman mu machuku makemp mashalaku kal, tukez kwipandish ayinetu ni pamwing nau antu atuteshina.​—1 Tim. 4:16.

12. Ov, kashinsh ik tufanyidina kwikal nich?

¹² Twij anch disudiel dikutwish kwez pa chisu chin chawonsu; chisu chatenchikay Yehova chimedinap pa mutapu wetu wa kupan uman kudi antu awonsu adia pa divu. (Mat. 10:23) Pakwez, tutambwil umutakel uwamp chakwel utukwasha kusal nawamp mudimu wetu wa kulejan. Nich ritiy, tusadil mudimu winou nich ukaliweny wetu wawonsu, ni kusadil mapit metu mawonsu tukweta. Ov, tukez kadandamen kulejan mu chingand chisongina nakash? Chakin kamu, ov, mutapu ik tukutwisha kusambel kwijik? (Tang Mulej 11:5, 6.) Mudimu wetu udi wa kulejan, ni kwikal nich ruchingej anch Yehova ukez kutwinkish chiyukish chend. (1 Kor. 3:6, 7) Tukutwish kwikal nich kashinsh anch ndiy umen usu wetu ukash, ni kusutil ku spiritu wend utumbila ukez kutwinkish umutakel wa pakampwil utukweta nich kuswir.​—Kus. 32:8.

Kimbany Spiritu Utumbila

13, 14. Ov, mutapu ik usu ukwetay spiritu utumbila wa Nzamb wa kuyikwash atushalapol end wamekana?

¹³ Ov, chikwikal nchik anch twiyov mudi tukutwishap kuwanyish chisend chimwing ap kwipan mu mudimu wa kulejan? Tufanyidin kumwit Yehova atwinkisha spiritu wend utumbila chakwel akasikesha ukaliweny win wawonsu utukweta mu mudimu wend. (Tang Luka 11:13.) Spiritu wa Nzamb ukutwish kuyikwash antu chakwel asala mudimu ap awanyisha chisend cha mudimu chikalap nchik mikadil yau ap ukaliweny ukwetau. Chawiy lel, kupwa kwa kudiokal mu Idjibit, spiritu wa Nzamb wayikwasha atufung ni aswik chakwel ayipandikana akankuny nau mwinjit ap anch adingap ija nawamp mutapu wa kwas njit. (Kub. 17:8-13) Kupwa, spiritu winou wamwinkisha Besalel ni Oholiab usu wa kusal dizang kwambatan nich yom yatenchikau kudi Nzamb piur pa mutapu wa kusal dizang dined.​—Kub. 31:2-6; 35:30-35.

¹⁴ Spiritu winou wa usu ukash wayikwasha atushalapol a Nzamb a pa chirung chetu chakwel awanyisha maswir ma dirijek padingau nich kuswir kwa kusambish mudimu wau wa kuchap mikand. Mu mukand umwing, kalam wa chapu cha kuchap mikand pa chisu chinicha, Mukadivar Robert Martin, warumburila yom yasadika mu muvu wa 1927 anch: “Pa chisu chiwanyidina, Mwant wafungula chis; twatana mashin mujim wa dichap, pakwez kitwadingap twija chom piur pa mutapu wamusalau ap mutapu wa kumusadish. Pakwez Mwant wij mutapu wa kukasikesh manangu ma antu asadila usu wau wawonsu mulong wa kumusadil. . . . Mu jimbing jikemp, twatwisha kusadish mashin minam nawamp, ni katat ukat kudjim, usadin mudimu wakad kwijik ap kudi antu asala mashin minam.” Yehova wadandamena kuyukish usu wa mushiku ni nlel unou.

15. Ov, mutapu ik ukutwishay Rom 8:11 kwikal dikasikesh kudi antu arishina nich yoziu?

¹⁵ Spiritu wa Yehova usadin mudimu mu mitapu kushalijan. Spiritu winou udi kudi atushalapol awonsu a Nzamb, ni uyikwashin kupandakan yikangesh yikash. Ov, chikwikal nchik anch yoziu yatupandiken? Tukutwish kutan dikasikesh mu mazu ma Paul madia mu mukand wa Rom 7:21, 25 ni 8:11. Mwaning, “mwiku wa Nzamb wamuvumbula Yesu mu rufu” ukutwish kusal mulong wa kutukwash, kutwinkish usu wa kupandakan mwinjit jiturishina nich maku ma ku mujimbu. Verse winou amufunda mulong wa in Kristu azizidilau many, pakwez chany chisambidin kand piur pa atushalapol awonsu a Nzamb. Etwawonsu tukez kwikal ni mwom kusutil ku kwijidish ritiy mudi Kristu, ku kwikasikesh mu kulik maku mayimp matwadila ku rufu, ni kushakam kwambatan nich umutakel wa spiritu.

16. Ov, chom ik tufanyidina kusal chakwel tutambula spiritu utumbila wa Nzamb?

¹⁶ Ov, tukutwish kuchingejin anch Nzamb atwinkisha usu wend ukash pakad etu kusal usu ap umwing? Bwat. Kupwa kwa kwit spiritu winou, tufanyidin kwilej nich mushiku Dizu diapepilau kudi Nzamb. (Jinsw. 2:1-6) Chikwau kand, spiritu wa Nzamb udi pa chikumangen cha in Kristu. Kukumangan kwetu pakad kujing kumekeshin rusot retu ra ‘kutesh yom yilondinay mwiku utumbila kudi yikumbu ya Nzamb.’ (Kuj. 3:6) Chikwau kand, tufanyidin kwitiy nich kwitudish yitwilejina. Jinswir 1:23 jitulejin anch: “Karumukany mulong wa jinkand jam. Talany, ni kumekesh muchim wam kudi en.” Chikwau kand, Nzamb ukat kupan spiritu wend utumbila kudi “antu amuziyidila.”—Mid. 5:32.

17. Ov, Chom ik chitukutwisha kwisikesh nich yibudikin ya chiyukish cha Nzamb mulong wa usu tusadila?

¹⁷ Anch chifanyidin kusal usu ukash mulong wa kutambul chiyukish cha Nzamb, vurik anch mudimu ukash winou pa awinau ukutwishap kwisikan nich yom yiwamp yivud yayisadilay Yehova antwend. Yibudikin ya chiyukish chend chitwishikin kuyisikesh nich mutapu ukata mujimbu wetu kutaninamu mu yakudia yiwamp. Nzamb wasala mujimbu wetu mu mutapu wakwel anch tusangera yakudia ni tutaninamu mu yakudia ya usey yikasikeshina ukash wa mujimbu. Ndiy uletin kand yakudia. Twijap nawamp mutapu yiletininga yakudia yetu ukash wa mujimbu, kwikil muntu pakach petu ukutwisha kurumburil mutapu yiletininga mijimbu yetu usu kusutil ku yakudia yitudilinga. Pakwez, twij anch mudimu winou ukat kusadik ni tukat kuukasikesh kusutil ku kudia. Anch twasambish kudia nawamp, yibudikin yikwikal yiwamp nakash. Chilik chimwing, Yehova utenchikin yijidik mulong wa mwom wa chikupu, ni ukat kutwinkish ukwash utuswiridina chakwel tuziyila ku yijidik yiniya. Chimeken patok anch, ndiy utukwashining nakash ni chifanyidin kumushiman. Chikwau kand , tufanyidin kusal nend pamwing, kusal yom yambatena nich rusot ra Nzamb, chakwel tutambula chiyukish.​—Hag. 2:18, 19.

18. Ov, chiyul ik ukwatina, ni mulong wak?

¹⁸ Chawiy lel, ipana nich muchim wey wawonsu chakwel uwanyisha yisend yawonsu yiukutwisha kutambul. Dandamen mu kumuchingejin Yehova chakwel utwisha kusal mwamu. (Mar. 11:23, 24) Piusadila mwamu, ikal nich kashinsh anch “muntu mwawonsu ukata kwit ukutambul.” (Mat. 7:8) Antu azizidilau many akez kayiyukish nich “chibangul cha mwom” mwiur. (Jak. 1:12) “Amikoku akwau” a Kristu, ayikasikeshin chakwel atambula ayinau chiyukish kusutil kwi mbut ja Aburaham, akez kusanger pakezau kumutesh Ndiy ulondin anch: “Ezany, en antu ayukishinau kal kudi Tatukwam, Ezany, uswanany Want wakurijekinanyau kudiokal ku disambishil dia mangand.” (Yoh. 10:16; Mat. 25:34) Mwaning, “antu ayukishinau [kudi Nzamb] akez kaswan ngand, . . . Ni [akez] kashakamamu chikupu.”—Kus. 37:22, 29.

Ov, Ukutwish Kurumburil?

• Ov, chom ik chitinau mu kuziyil kwakin?

• Ov, chom ik chitinau chakwel tutambul chiyukish cha Nzamb?

• Mutapu ik tukutwisha kutambul spiritu utumbila wa Nzamb, ni mutapu ik ukutwishay kusal mulong wa kutukwash?

[Yipich yidia pa paj wa 12]

Jakob warisha ni mwangel chakwel atambula chiyukish cha Yehova.

Ov, niyey usadil chilik chimwing usu ukash?

[Chipich chidia pa paj wa 13]

Spiritu utumbila wa Nzamb wayikwasha Besalel ni Oholiab chakwel apandakana