Uumwing Wa In Kristu Umutumbishin Nzamb

“Ikasikeshany kwikal mu umwing wakwinkishanyau kudi mwiku utumbila.”​—EFES 4:3.

1. Ov, mutapu ik wamutumbishau Nzamb kudi in Kristu a mu chitot cha mivu cha kusambish mu Efes?

UUmwing wa chikumangen cha in Kristu mu Efes wa pasak wamutumbisha Yehova, Nzamb wakin. Kwindond yiney ya kwisakin yadinga ni yom yivud, akadivar amwing in Kristu adinga chakin kamu ampich akweta atushalapol au ni akwau adinga atubindj pamwing ap atuzwendj nakash. (Efes 6:5, 9) Antu amwing ading in Yuda ileja uyakin mu angond asatu mwayilejau kudi kambuy Paul mu sinagog wau. Pasak antu akwau ading akat kumwifukwil Aritemis ni in yipong. (Mid. 19:8, 19, 26) Chimeken patok anch, win Kristu wakin wakumangeja pamwing antu adiokila ku jindond jivud. Paul wijika anch amutumbisha Yehova kusutil ku uumwing wa chikumangen. Kambuy Paul wafunda anch: “Uyaj wikala kudi Nzamb mu chikumbu cha Nzamb.”​—Efes 3:21.

2. Ov, chom ik chapompata uumwing wa in Kristu mu Efes?

² Pakwez, uumwing wayukishau wa chikumangen cha in Efes aupompata. Paul wayibabesha amakurump anch: “Mukach mwa chisak chen mukez kikal antu amwing akez kalond yom ya makasu, mulong wa kuyirumbul in kwitiyij chakwel ayikakila ku mutambu wau.” (Mid. 20:30) Chikwau kand, akadivar amwing ading kandikal alika chitongijok cha kwiyauril, chawiy lel Paul wayibabesha piur pa “mwiku uyitakedila antu akata kumubwambwil Nzamb.”​—Efes 2:2; 4:22.

Mukand Ukasikeshina Uumwing

3, 4. Ov, mutapu ik wakasikeshina mukand wa Paul wayifundinay in Efes uumwing?

³ Paul wamana anch in Kristu afanyidin kudandamen kusal pamwing, afanyidin muntu ni muntu wa mukach mwau kusal usu nakash wa kukasikesh uumwing. Nzamb wamupepidila Paul chakwel ayifundila in Efes mukand wadinga ni mutu wa mulong wisambidina uumwing. Chilakej, Paul wafunda piur pa rutong ra Nzamb ra ‘kunung yom yawonsu mu Kristu.’ (Efes 1:10, TMK) Ndiy wayisikeja kand in Kristu nich mayal mashalijadina matunginau nich chikumbu anch: “Ni chikumbu chawonsu achisankeshil mwi ndiy, achilamikin nawamp, chikat kujimbil mu tempel umwing utumbila wa [Yehova].” (Efes 2:20, 21) Chikwau kand, Paul wakasikesha uumwing wa in Yuda ni in Kristu a Michid ni wayivurisha kand akadivar anch awonsu ayitanga kudi Nzamb. Ndiy wisambina piur pa Yehova mudi “Tatuku, kwipidilau majuku mawonsu mwiur ni pansh.”​—Efes 3:5, 6, 14, 15.

⁴ Pitushinshikidina shapitre wa 4 wa in Efes, tukuman mulong wak uumwing witin kusal usu, mutapu utukwashinay Yehova kwikal mu uumwing, ni ngikadil ik yikeza kutukwash twikala mu uumwing. Mulong wak ufanyidinap kutang shapitre mwawonsu chakwel utaninamu yom yivud mu dilejan dined?

Mulong wak Kwikal mu Uumwing Kwitin Kusal Usu

5. Ov, mulong wak angel a Nzamb akutwish kusal mu uumwing, ni mulong wak uumwing ukutwish kutukasiken?

⁵ Paul wayita akadivar nend in Efes chakwel ‘ikasikesha kwikal mu umwing wakwinkishanyau kudi mwiku utumbila.’ (Efes 4:3) Mulong wa kutesh nawamp kuswir kwa kusal usu pa milong yiney, shinshikin pa yom yayishikena angel a Nzamb. Kwikil yom yaad yikweta mwom pa divu yidia chilik chimwing, chawiy lel, tukutwish kulond anch Yehova wayiyukisha ma miliyon ma angel umwing ni umwing pakampwil. (Dan. 7:10) Chikwau kand, akutwish kumusadil Yehova mu uumwing mulong awonsu amuteshina ndiy ni asadin rusot rend. (Tang Kuseng 103:20, 21.) Pakatau kwikal angel nich ngikadil kushalijan, in Kristu niyawiy akwet yilim yishalijadina. Chinech chikutwish kuyikangesh kwikal mu uumwing.

6. Ov, ngikadil ik yikeza kutukwash chakwel tusala pamwing ni akadivar akwet yilim kushalijan nich yetwetu?

⁶ Pakatau antu akad kuwanyin kupakish kusal pamwing, chiyiswapeling kutan yikokujol. Chilakej, ov, chikwikal nchik anch mukadivar witudishina ukweta chaku cha kuburen kushik kurutu kwa chisu pakwez, ukat kumusadin Yehova pamwing ni mukadivar ukat kushikang pa chisu chiwanyidina pakwez ukata kujimanang swaa? Muntu ni muntu ukutwish kutong anch mbay nend kakwetap chaku chiwamp pakwez ukutwish wavuramen anch niyend ukwet ngikadil yimwing yiyipin. Ov, mutapu ik ukutwishau akadivar inay aad kusal mu uumwing? Talany ngikadil yikasikeshinau mu mazu ma Paul malondwila yikutwisha kuyikwash. Tonginany piur pa mutapu tukutwisha kukasikesh uumwing kusutil ku kukudish ngikadil yiney. Paul wafunda anch: “[Am] nakulembijekany anch, ikalany nich mwom uwanyidina . . . Yisu yawonsu ikalany in kwitudish, ikalany in kudimuk ni in kushimpish muchim. Kwashijanany muntu ni mukwau mu rukat. Ikasikeshany kwikal mu uumwing wakwinkishanyau kudi mwiku utumbila. Ndiy ukat kukwinkishany chisambu chikukasinany en awonsu pamwing.”​—Efes 4:1-3.

7. Ov, mulong wak chidi cha usey kusal usu chakwel twikala mu uumwing ni in Kristu akwau akad kuwanyin?

⁷ Chidi cha usey kumusadil Nzamb mu uumwing nich antu akwau akad kuwanyin mulong kudi mujimbu umwing kusu wa in kumwifukwil akin. “Etu tudi a mujimbu umwing, kudi mwiku utumbila ching kusu umwing, tukwet kand ruchingej rumwing kwawiy kwatutazukinay Nzamb. Kudi kusu ching nsalejetu umwing, kudi mutapu umwing wa kumwitiyij, kudi kand ching kusu dijin dimwing dia kutambwil dibabatish. Kudi Nzamb umwing, Tatuku wetwetu awonsu.” (Efes 4:4-6) Spiritu wa Yehova ni yiyukish yend yiimedin pa kushakam mu uumwing kwa akadivar asadidilau kudi Nzamb. Ap anch muntu umwing mu chikumangen watwovish kuyip, ov, kwisu tukutwisha kuya? Kwikil ndond yikwau kutukutwisha kutesh mazu ma mwom wa chikupu.​—Yoh. 6:68.

‘Yipan ya Antu’ Yikasikeshin Uumwing

8. Ov, chom ik chasadidilay Kristu mulong wa kutukwash kutukasikesh chakwel twipuka yibachikin ya kwiyauril?

⁸ Paul wasadila chadingau ni kusal amasalay a pasak mulong wa kwilikej mutapu waletay Yesu ‘yipan ya antu’ mulong wa kukwash chikumangen chikala mu uumwing. Anch Isalay wawin kwi njit ndiy wadinga ni mbil ya kumulet muswik wakwatay kwinjit chakwel amukwasha mukajend kusal midimu. (Kus. 68:1, 12, 18) Chilik chimwing, kuwin kwa Yesu piur pa mangand kwamuletina ndiy aswik avud a kwisotin. (Tang Efes 4:7, 8.) Ov, mutapu ik wayisadilay aswik inay a mu chifanikesh? “Amwing wayitonda kwikal atwimbuy a Yesu, akwau wayitonda kwikal aruu a Nzamb, akwau wayitonda kwikal in kurumburil rusangu ruwamp, akwau wayitonda kwikal a paster, akwau wayitonda kwikal alej. Ndiy wasala mwamu mulong wa kurijek antu mulong a kusal mudimu wa Kristu, chakwel ayikasikesha in Kristu, awiy kamu mujimbu wa Kristu. Asala mwamu djat ni pitukwikadila mu umwing mu ritiy.”​—Efes 4:11-13.

9. (a) Ov, mutapu ik utukwashina ‘yipan ya antu’ kulam uumwing wetu? (b) Ov, mulong wak yid yawonsu ya chikumangen yifanyidin kukasikesh uumwing?

⁹ Mudi atufung in rukat, ‘yipan yiney ya antu’ yitukwashin kulam uumwing wetu. Chilakej, anch mukurump umwing mu chikumangen wayiman akadivar aad akat “kusarumunijan” ndiy ukutwish kukwash nakash chakwel kwikala uumwing mu chikumangen kusutil ku kupan yiyul kuns, “kuyipizurish nich michim yidimukina.” (Gal. 5:26–6:1) Chidiau alej, ‘yipan yiney ya antu’ yitukwashin kukasikesh ritiy rimedina pa malejan ma Bibil. Chawiy lel akasikeshin uumwing ni atukwashin kuya kurutu mu kukul kwa Ukristu. Paul wafunda anch mulong “kitukez kikalap kand anikanch akusendolau kudi mambek, ap akupwepolau kudi rinkind kuya mutambu ni mutambu. Ndiy rinkind wa malejan ma antu in kudimban, akata kuyikak antu akwau ku kurumbuk mulong wa yom yitenchikinau ya makasu.” (Efes 4:13, 14) In Kristu awonsu afanyidin kukasikesh uumwing wa ukadivar, mudi mukata chid ni chid cha mujimbu wetu kupan ukwash ku chid chikwau kusutil ku kupan yom yiswiridinau.​—Tang Efes 4:15, 16.

Kudishany Ngikadil Yisu

10. Ov, mutapu ik ukutwisha yisal ya masandj kuyipish uumwing wetu?

¹⁰ Ov, wamanangap anch shapitre wa kanying wa mukand wa Paul wafunday kudi in Efes ulejen anch kumekesh rukat yidi nfungul ya kutushikish ku uumwing mudi in Kristu aswila? Verse ulondwila ulejen mutapu chifanyidina kumekesh rukat. Chilakej, kumekesh rukat kurumburikinap kusal masandj ap kwikal ni yisal yiyimp. Paul wayibabesha akadivar nend anch kafanyidinap ‘kudandamen kusal mudi mukata kusalau antu akad ritiy.’ Antu “ipanin kusal ching kusu yom yiyimp,” ni “akat kusal mitapu yawonsu ya yom yitakanena nich maku mayimp.” (Efes 4:17-19) Mangand minam ma masandj makat kupompat uumwing wetu. Antu asadin maswimbu piur pa masandj, amawangin mu miminy, akat kumatal mulong wa kwipuwangesh, ni kumasal mu ujindj ap patok. Chikwau kand, ap kwizez kwi mband ap ikundj wakad weyey, kusal yom mudi ukwet mbil ja kwijikijan ku mujimbu pakad kwikal nich chitongijok cha kwatijan, kukutwish kukushadish kulemp ni Yehova ni chikumangen. Mulong wak? Mulong chaku chinech chiswapel kumubachik muntu ku kusal masandj. Chikwau kand, kwizez kwi mband mukwau kukutwish kumubachik mbay wa uruw ku kusal masandj makutwisha kuyauril mu mutapu uyimp an kudi anvajau ni ambay a uruw akad milong kudi ambay nau a uruw. Chidi chom chaurila kamu! Chishimokishinap anch Paul wafunda anch: “Kiyawiyap yom yiney yiwilejanya mulong wa Kristu, bwat”!​—Efes 4:20, 21.

11. Ov, kwisu kukarumuk kuyikasikeshinau in Kristu mu Bibil?

¹¹ Paul wakasikesha anch tufanyidin kwipuk mutapu uyimp wa kutong ni kukudish ngikadil yikeza kutukwash tushakama mu uumwing ni antu akwau. Ndiy walonda anch: “Chifanyidin en ulikany yaku yen yikur, mudjolany muntu mukur wavundakal nich maku mayimp ma kudimban. Chifanyidin michim yen ni manangu men kukarumuk kwikal yisu. Chad mudjalany muntu musu watangau mudi mudiay Nzamb mu kutentam kwakin ni mu kutumb.” (Efes 4:22-24) Ov, mutapu ik yikutwisha ‘michim yetu ni manangu metu kwikal yisu’? Anch twatongijokin nich kujikitish piur pa yitwilejina ku Dizu dia Nzamb ni ku yilakej yiwamp ya in Kristu aswila kal mu spiritu, anch twasal usu tukutwish kudjal muntu musu “watangau mudi mudiay Nzamb.”

Kudishany Mitapu Yisu ya Kulond

12. Ov, kulond uyakin kukasikeshin uumwing mutapu ik, ni mulong wak chiyikasikedin antu akwau kulond uyakin?

¹² Kulond uyakin kudi kwa usey kudi antu adia mu umwing ni mukwau mu dijuku ap mu chikumangen. Mazu makin, ma patok, ni mawamp makutwish kuyitek antu pamwing. (Yoh. 15:15) Pakwez, chikwikal nchik anch muntu wamudimb mukadivar nend? Pakezay mukadivar nend kujingunin anch wamudimba, moj wa ruchingej pakach pau ukez kuziy. Ukutwish kutesh nawamp mulong wak Paul wafunda anch: “Chifanyidin muntu ni muntu kulond uyakin kudi mukwau mwin Kristu, mulong etu awonsu tudiany yid ya mujimbu wa Kristu.” (Efes 4:25) Muntu umwing ukweta chaku cha kudimban, wasambisha pamwing ap chaku chend padingay mwanikanch, ni chikutwish kumukasiken kusambish kulond uyakin. Pakwez Yehova ukez kasanger usu usadinay chakwel akarumuka ni ukez kumukwash.

13. Ov, chitin kusal ik chakwel kulik mazu ma masaal?

¹³ Yehova utufundishin kumekesh kalimish ni uumwing mu chikumangen ni mu dijuku kusutil ku kutek mipak mu mutapu wetu wa kulond. “Kangal mu tun twen mwabudik mazu mayimp . . . Dioshany rukuny rawonsu, ni kuswej kwawonsu, ni ujim wawonsu. Kangal wabarokany, ap kusaalan masaal, likany kand kukisijan kwa mitapu yawonsu.” (Efes 4:29, 31) Mutapu umwing wa kwipuk kulond mazu mayimp udi ku kudish ngikadil ya kalimish kapandakena kudi antu akwau. Chilakej, ikundj ulondina mazu ma masaal pantaliken ni mukajend ufanyidin kukarumun ngikadil yend pantaliken ni mukajend, pakampwil anch wilej mutapu ukatay Yehova kuyilimish amband. Nzamb wayizizila amband amwing nich spiritu utumbila, ni kuyinkish ruchingej ra kutakel mudi ant pamwing ni Kristu. (Gal. 3:28; 1 Pita 3:7) Chilik chimwing, mband ukweta chaku cha kumusaal nfumwend ufanyidin kusal usu wa kukarumuk pakatay kwilej mutapu wilamay Yesu pamusarumunau.​—1 Pita 2:21-23.

14. Ov, mulong wak kumekesh ujim kudi kwa ubaj?

¹⁴ Chom chikwatijadina nakash nich mazu ma masaal chidi kukangany kuyikel ujim. Chinech chikutwish kand kuyauril antu adia uumwing umwing ni mukwau. Ujim udi mudi kasu. Ukutwish kukangesh kwilam ni kulet uyimp. (Jinsw. 29:22) Muntu utongina anch ukwet mbil ja kumekesh ujim wend ufanyidin kuyikel ujim wend mulong wa kwipuk kuyipish urund wa usey. In Kristu afanyidin kulikishin, kulam rukuny ni kwipuk kwisambin kand pa milong yasadika. (Kus. 37:8; 103:8, 9; Jinsw. 17:9) Paul wayiyula in Efes anch: “Anch wajimanany, babalany, chakwel kangal ujim wa kusadikish chitil, kangal wajingany nich ujim dichuku diakabuj. Kangal wamushilany Sakudimban chisu.” (Efes 4:26, 27) Anch muntu wakangany kuyikel ujim, ukutwish kumushil Djabul chisu cha kukasikesh kwaurik ni kulet kupwitijan mu chikumangen.

15. Ov, kusend chom chayen kukutwish kwikal nich yibudikin ik?

¹⁵ Kulimish yom ya antu akwau kukasikeshining uumwing wa chikumangen. Tutangin anch: “Chifanyidin muntu mwij alika kwiy.” (Efes 4:28) Muchim wa kuyichingejin antu akwau aukudisha pakach pa antu a Yehova. Anch mwin Kristu wayipish ruchingej riner kusutil ku kusend chom chayen, ukez kuyipish uumwing usangareshina.

Rukat ra Nzamb Ritutekin mu Uumwing

16. Ov, mutapu ik tukutwisha kusadil mazu matungina mulong wa kukasikesh uumwing wetu?

¹⁶ Uumwing wa chikumangen cha in Kristu udi chibudikin cha kwikal abachikinau nich rukat ra Nzamb ra kuyisadin antu akwau yom nich rukat. Kumujikitish Yehova mulong wa uwamp wend kukez kutubachik chakwel tusala usu wawonsu wa kusadin chiyul chinech: “Pakwez londany ching kusu mazu mawamp makutwisha kukasikesh antu ku kukul mu ritiy mudi muchifanyidina, ni kuyiyukish antu awonsu akumatesha. . . . Ikalany antu adimukina, in kwanakenijan muntu ni mukwau, in kulikishijadin muntu ni mukwau mudi mwakulikishinanyau en kudi Nzamb mu Kristu.” (Efes 4:29, 32) Yehova ukat kuyilikishin nich kudimuk antu akad kuwanyin mudi etu. Ov, tufanyidinap niyetu kuyilikishin antu akwau pitumena kuburen kuwanyin kwau?

17. Ov, mulong wak tufanyidin kusal usu nakash wa kukasikesh uumwing?

¹⁷ Uumwing wa antu a Nzamb umutumbishin Yehova. Spiritu wend utubachikin mu mitapu kushalijan mulong wa kukasikesh uumwing. Tukusotap chakin kamu kulik umutakel wa spiritu winou. Paul wafunda anch: “Kangal wamunenganeshany mwiku utumbila wa Nzamb.” (Efes 4:30) Uumwing udi dipit ditufanyidina kulam. Ukat kuyisangaresh antu awonsu asadina mu uumwing ni umutumbishin Yehova. “Mwilakejany Nzamb mulong en udiany anend akatilay. Chifanyidin en kwikal nich rukat.”​—Efes 5:1, 2.

Ov, Nchik Ukutwisha Kwakul?

• Ov, ngikadil ik yikasikeshina uumwing pakach pa in Kristu?

• Ov, mutapu ik ukutwisha yisal yetu kukasikesh uumwing mu chikumangen?

• Ov, mutapu ik ukutwisha mazu metu kutukwash kusal mu uumwing ni antu akwau?

[Chipich chidia pa paj wa 20]

Antu avud adiokala ku jindond jivud adi mu uumwing

[Chipich chidia pa paj wa 23]

Ov, uteshin ubaj wa kwizez kwi mband ap ikundj wakad kwikal weyey?