Ov, Mulong Wak Antu Asadin Yom Yiyimp?

KUDI chom chimwing chikutwishau antu akemp kupwitijan: Etwawonsu tudi akad kuwanyin kupwa tukat kurumburik ni kusal yom yikutwisha kutunenganesh. Chikwau kand, ov, chinech chawiy chiyibachikina antu avud ku kusal yom yiyimp, yijim ni yikemp, yitumena ap yituteshina dichuku ni dichuku, kud antu ap kusutil ku yisanj?

Chikalap nchik kuburen kuwanyin, antu avud itiyijining anch kudi mipak ya mikadil yakad kujiril dichuku ap dimwing ni antu akutwish kwipuk kusal yom yiyimp. Antu avud akutwish kulond kand anch kud kushalijan pakach pa kulond pakad kwisotil chom chakad kwikal chakashinsh ni makasu kamu, pakach pa kumusal muntu nayimp ni kukwat chiyul cha kujipan. Chikwau kand, yisal yiyimp nakash akat kuyisalang chisu chivud kudi antu amekena anch adi antu a chamwamu pakach pa amutej. Ov, mulong wak? Mulong wak antu asadin yom yiyimp?

Bible ulejen patok pa mulong winou. Ujingunin mu mutapu wakin mayingish majim piur pa mulong wak antu asadin yom yijau anch yidi yiyimp. Tal yilondinay Bibil.

▪ “Anch mwin manangu wamuzengol mukwau, ndiy ukat kumekan mudi chisup.”—MULEJ 7:7.

Bibil witiyijin anch pa chisu chinicha antu akez kwiyov anch akat kuyibachik kudi usu wa mikadil chakwel asala yom yakad awiy kuchingejin. Antu amwing akutwish ap kujipan mulong wa kusal usu wa kulet yimenau anch yawiy mitapu ya kupwish mar ni kasolikany. Buku Le Terrorisme urbain ulondin anch: “Yisu yivud, chom chijim chiyibachikina antu kusal yisal ya kujipan kudi kulik kusanger milong ya chipolitik, ya mu chisak ni ya nfalang ya ngand jiyikedila.”

▪ “Mulong rukat ra nfalang diawiy disambishin dia yom yawonsu yiyimp.”—1 TIMOTE 6:10.

Jinswir jimwing ja pasak jilondin anch, muntu mwawonsu ukweting usey, jisotin kulond anch ap antu awamp akutwish kujiril yijil ya uwamp ni ya mikadil anch kudi kukimb nfalang. Antu amwing akutwish kumekesh urund ni uwamp anch mikadil yidi yiwamp, ni untu wau ukat kuswimp anch kudi mulong wa kukimb ap kushadish nfalang, ni akusambish kwikal ayinau ni chaku chiyimp ap kupwitijan. Tongin bil piur pa yisal yivud ya chisum yidiokilinga ku ris—kulondol, kubwitan, wij, kumukwat muntu ku usu ni kuchin nend, ap kujipan.

▪ “Antu akwet michim ya kusal kuyip mulong kakat kuyirumburishap ni kuyilej kadim swa.”—MULEJ 8:11.

Verse winou wisambidin piur pa chibachikin cha muntu cha kutong anch muntu ukutwish kusal chom chawonsu chisotinay anch antakel kalondinap chom. Chinech chimekening chakin kamu pakatau antu kwendish motak mau mapandikena chipim, kwiy ekzame, kwiy nfalang ja antu, ni yom yikwau yiyimp nakash. Anch kayikwatinap antu alikina kuziyil ku yijil, ap anch kwikil wom wakwel anch akuyikwat, antu akata kuziyilang akutwish kuman anch ayikasikeshin kusal yom yakad awiy kusot kusal. Gazet Arguments and Facts ulondin anch “Mulong chiyiswapedil in chisum kwipuk dipup, chawiy chiyibachikina antu a chamwamu chakwel asala yisal yikash ya chisum.”

▪ “Muntu ni muntu ukat kwiyoz amwinend nich maku mend mayimp, mawiy makata kumubachik, chad mamurumbwish. Chad maku mend mayimp makat kwimish, maval chitil.”—JAKOB 1:14, 15.

Antu awonsu akutwish kwikal ni yitongijok yiyimp. Dichiku ni dichuku tuteshin yiyul ni tumen yoziu yivud nakash yikata kutubachik ku kusal uyimp. Pa chisu chafundau Bibil, ayileja in Kristu anch: “Yoziu yikata kushik kudi en, yawiy kand yikata kushik kudi antu awonsu.” (1 Korint 10:13) Chikalap mwamu, chibudikin chimedin pa kutond kwa muntu amwinend—kudiosh chitongijok chiyimp swaa ap kuchilam ni kuchilikidil anch chikula. Verse utwisambinang kwiur oku udiokila mu mukand upepidilau wa Jakob utubabeshin anch ang muntu walikidil maku mend chakwel mashikena ku “kwimish,” ukez chakin kamu kusal yom yiyimp.

▪ “Muntu ukata kwend nau in manangu, ni yend ukwikal mwin manangu, pakwez ukata kwend nau ayisup ukuman mar.”—JINSWIR 13:20.

Chifanyidinap kupipesh chibachikin chikutwishau kwikal nich arund netu piur petu chikalap nchik—chiwamp ap chiyimp. Chawiy lel, antu asadining yisu yivud yom yakad awiy kusot kusal—yiney yawonsu yikat kuyishikenang mulong wa yibachikin ya arund ap, mudi mukatau kulond antu avud anch chidi mulong akat kuwilang mu makas ma arund ayimp, nich yibudikin yiyimp. Mu Bibil, dizu “ayisup” dirumburikinap, antu akad manangu, pakwez antu akad kwijik chiyul chidiokila mu Dizu dia Nzamb. Ap anch tudi ansand ap amakurump, anch tutodinap nawamp arund ni ambay netu nich manangu, kwambatan nich yijil yidiokila mu Bibil, tufanyidin kwijik anch tukez ‘kuman mar.’

Ma verse minam ni makwau mavud madia mu Bibil marumburil mu wiswimp mulong wak antu—pamwing ap antu akwau a chamwamu—asadin uyimp, ap yom yiyimp nakash. Mulong chiwapidil kwijik yom yikata kuyibachik antu chakwel asala yom yiyimp nakash, ov, kudi ruchingej ra kwel anch yom yikez kuwap? Mwawiy, mulong Bibil kalejenap kusu mulong wak antu asadin yom yiyimp pakwez ulejen kand anch yisal yiney yikezap kwikalaku. Ov, yakushilamu yiney yidi yisu? Ov, yom yawonsu yiyimp yidia mu mangand yikez kupwa? Mutu wa mulong ulondwilaku ukez kwakul.