“Ov, Nany Wijika Chitongijok Cha [Yehova]?”

“‘Ov, nany wijika chitongijok cha [Yehova], ov, nany ukutwisha kumuyul?’ Pakwez etu tukwet chitongijok cha Kristu.”—1 KOR. 2:16.

1, 2. (a) Ov, chikokujol ik chikata kuyishiken antu avud? (b) Ov, chom ik tufanyidina kuvurik piur pa yitongijok yetu ni yitongijok ya Yehova?

OV, CHAKUKASIKENAP kal kutesh yitongijok ya muntu mukwau? Pamwing ap udiokil mu kwatan, ni umen anch utwishinap kutesh nawamp mutapu mutonginay mukajey ap nfumwey. Chikwau kand, amakundj ni amband atongining ni kulond mu mutapu ushalijadina. Chawiy lel, mu mashakamin ma antu amwing, amakundj ni amband akat kulond jindim kushalijan! Chikwau kand, kushalijan kwa mashakamin ni kwa rudim kukutwish kulet kudi ambay mitapu ya kutong ni yisal yishalijadina. Pakwez, kwijik yom yivud piur pa antu akwau, kukusal anch usambisha kutesh mutapu wau wa kutongijok.

² Pakwez, tufanyidinap kukashimuk pa kwijik anch yitongijok yetu yidi kulemp nakash ni ya Yehova. Kusutil muprofet wend Isay, Yehova wayileja in Isarel anch: “Yitongijok yam kiyidiap mudi yitongijok yenen, ap yaku yam kiyidiap mudi yaku yenen.” Kupwa, mu kwilikej mulong winou, Yehova walonda anch: “Mudi diur chididia kulemp ni divu, mwamu mu yidia kand yaku yam kulemp ni yaku yenen, ni yitongijok yam yidi kand kulemp ni yitongijok yenen.”—Isay 55:8, 9.

3. Ov, mitapu ik yaad yikutwisha kutukwash kuta ‘urund nend Yehova’?

³ Ap mwamu, ov, chinech chirumburikin anch tukutwishap kupakish kutesh chitongijok cha Yehova? Bwat. Ap anch tukutwishap dichuku ap dimwing kutesh yitongijok yawonsu ya Yehova, pakwez Bibil utukasikeshin kuta ‘urund nend Yehova.’ (Tang Kuseng 25:14, TMK; Jinswir 3:32.) Mutapu umwing ukutwisha kutukwash kushejin piswimp ni Yehova udi kusutil ku kutal ni ku kushinshikin mijikit yend mudi muyifundinau mu Dizu diend, Bibil. (Kus. 28:5) Mutapu ukwau udi kusutil ku kwijik “chitongijok cha Nsalejetu,” udia “chifu cha Nzamb wakad kumekan ku mes.” (1 Kor. 2:16; Kol. 1:15, TMK) Kusutil ku kwitekin chisu cha kwilej jinsangu ja Bibil ni kujitongijokin, tukutwish kusambish kutesh mikadil ya Yehova ni mutapu wend wa kutong.

Ipukany Chibachikin Chiyimp

4, 5. (a) Ov, chibachikin ik chiyimp chitufanyidina kwipuk? Rumburil. (b) Ov, in Isarel awila mu chitongijok ik chiyimp?

⁴ Anch twatongin pa mijikit ya Yehova, tufanyidin kwipuk chibachikin cha kumurumburish Nzamb kusutil ku yijil ya antu. Chibachikin chinech achimekeshin patok mu dizu dia Yehova mudi mwafundau mu Kuseng 50:21 anch: “Ey watonga anch, am nidi mudi ey.” Chidi mudi mwalonday mwin kwilej Bibil umwing pasutin kal mivu 175 anch: “Antu aswapeling kumurumburish Nzamb kwambatan ni yijil yau ayinau, ni kutong anch ndiy amukangeshin kudi yijil yiniya, yitonginau anch antu afanyidin kulondul.”

⁵ Tufanyidin kwipuk kulikidil mutapu tumumena Yehova wikala uyikedilau nich yijil yetu ayinetu ni maku metu. Ov, mulong wak chidi cha usey? Mwaning, mudi mutukata kwilej Bibil, yisal yimwing ya Yehova yikutwish kumekan mudi yidi yakad kutentam kwambatan nich chitongijok chetu chikweta mupak ni chakad kuwanyin. In Isarel a pasak asambisha niyawiy kutongijok mu mutapu winou ni ashikena ku kulond yom yiyimp piur pa yisal ya Yehova pantaliken. Tal yom yayilejay Yehova: “En ukat kulondany anch: ‘Yom yisadilay [Yehova] kiyitentaminap.’ En, in Isarel, nteshany. Ov, utongilany yisalijok yam kiyitentaminap? Yisalijok yenen, yawiy yakad kutentam.”—Ezek. 18:25.

6. Ov, dilejan ik dilejay Job, ni mutapu ik tukutwisha kutaninamu mu yom yamushikena?

⁶ Chom chikutwisha kutukwash twipuka kuwil mu mupit wa kumurumburish Yehova kusutil yijil yetu ayinetu chidi kwijik anch yitongijok yetu yikwet mupak ni yisu yimwing yiding yiyimp. Job waswiridina kwilej dilejan dined. Pamanay mar, Job warisha pakad ruchingej ni wasambisha kwitongin ching amwinend. Ndiy waburena kutongin pa milong yikash. Pakwez Yehova wamukwasha nich rukat chakwel aswimpa chitongijok chend. Pamwipulay Job yipul kushalijan piswimp 70, yakanganyay Job kwakul, Yehova wisambina piur pa kukep kwa ronganyin ra Job. Job wakula nich kwitudish, ni kuswimp chitongijok chend.—Tang Job 42:1-6.

Mutapu Tukutwisha Kwijik “Chitongijok Cha Nsalejetu”

7. Ov, mulong wak atukwashin kutesh chitongijok cha Yehova anch twashinshikin pa mijikit ya Yesu?

⁷ Yesu wamwimburija Tatukwend mu mutapu uwanyidina mu yom yawonsu yalonday ni yasalay. (Yoh. 14:9) Pakwez, kushinshikin piur pa mijikit ya Yesu kutukwashin kutesh nawamp mutapu utonginingay Yehova. (Rom 15:5; Fil. 2:5) Shinshikinany amboku katat jinsangu jaad ja rusangu ruwamp.

8, 9. Mudi mwafundau mu Yohan 6:1-5, ov, mwikadil ik wamubachika Yesu chakwel amwipula Filip, ni mulong wak wasalay mwamu?

⁸ Tongin bil pa yom yashikena. Kurutu kwa kuvurik Kusut kwa Yehova mu muvu wa 32 C.C. Atwimbuy a Yesu adiokala mu weny wa pakampwil wayau mu kulejan mu Galaliya. Paziyau mulong wa mujikit winou wawonsu, mulong wa mujikit winou, Yesu wayipwitina kwa ayinau kwindum ni kwingangel ushad wa Karung wa Galalia. Pakwez, tunan twa antu twayilondula kwinikwa. Kupwa, kwa kuyok antu inay avud ni kuyifundish yom yivud kudi Yesu, mulong wa kuburen yom walanka. Ov, mutapu ik welau antu awonsu inay kutan yakudia kwindond kwinoku kujingamena? Pamanay kuswir kwinoku, Yesu wamwipula Filip, wadinga wa mu ul winiwa anch: “Kwisu tukulandip mabot chakwel antu ang adia?”—Yoh. 6:1-5, TMK.

⁹ Ov, mulong wak Yesu wamwipula Filip chipul chinech? Ov, Yesu wading wakamin piur pa yikutwishay kusal? Bwat. Chom ik chadingay ni kutongijokin? Kambuy Yohan, wadinga pinipa, urumburil anch: “Chinech [Yesu] wachilondila kumupak, mulong amwinend wading wij mukusalay.” (Yoh. 6:6) Yesu wading upakin kukul muspiritu kwa in kwilejend. Kusutil ku kwipul chipul chinech, ndiy wapwita manangu mau ni kuyinkish chisu cha kumekesh ritiy rau pa yom yelay kusal. Pakwez areza chiyukish chinech cha kutambul ritiy ni amekesha anch yitongijok yau yadinga chakin kamu ni mupak. (Tang Yohan 6:7-9.) Chawiy lel, Yesu walejana anch ndiy ukutwish kusal chom chakad awiy kutongijokin. Mu chilay ndiy wadisha tunan twa antu adinga ni nzal.—Yoh. 6:10-13.

10-12. (a) Ov, mulong wak Yesu kitiyap kapamp kamwing chamwitay mband umwing mwin Grek? Rumburil. (b) Ov, chom ik tukeza kushinshikin katat?

¹⁰ Rusangu riner rikutwish kutukwash chakwel tutesha chitongijok cha Yesu pa chisu chikwau. Chisu chikemp kupwa kwa kudish chisak chinech chijim cha antu, Yesu ni atwimbuy aya kwindum, ushad wa mimbu ya Isarel, piswimp ni Tire ni Sidon. Padingay kwinikwa, atana mband umwing mwin Grek wamulembila Yesu chakwel amwoka mwanend mband. Chakusambish, Yesu kamwijikap mband winou. Pakwez, padandamenay kumulembijek, Yesu wamwela anch: “Chifanyidin an adia bil pakusambish, mulong kichiwapilap kudjibul yakudia ya an kudi atubu.”—Mar. 7:24-27.

¹¹ Ov, mulong wak Yesu walika pa kusambish kumukwash mband winiwa? Ov, Yesu wadinga ni kumupak, mudi mwamusalay Filip, mulong wa kuman mutapu ukezay kwakul, ni kumwinkish chisu cha kumekesh ritiy rend? Ap anch kamekeshap ukash wa dizu diend mu dizu diafundau, mutapu winou wa kulond kiwamuziyishap. Pasadinay dizu ‘twan a tubu’ ndiy wafanikesha antu end mudi atubu awamp itudishina. Chawiy lel pamwing ap Yesu wasala mudi nvaj usotin kwitiy yimwitinay mwanend pakwez kamekeshinap anch usotin kumwinkish mulong wa kumupak anch ukujijaman. Chikalap nchik mwamu, mband winou wamekesha ritiy rend, kupwa Yesu witiyija kwa kwisotil chamwitay.—Tang Marko 7:28-30.

¹² Jinsangu jinej jaad ja Rusangu Ruwamp jitwinkishin ronganyin ruwamp piur pa “chitongijok cha Nsalejetu.” Talany amboku katat mutapu jikutwish jinsangu jinej kutukwash kwijik nawamp chitongijok cha Yehova amwinend.

Yisal ya Yehova Pantaliken ni Moses

13. Ov, kwijik mutapu wadingay ni kutong Yesu kukutwish kutukwash mutapu ik?

¹³ Kwijik nawamp yitongijok ya Yesu kutukwashin kutesh ma verse ma Bibil makutwisha kukasikan kumatesh. Chilakej, shinshikin yamwelau Moses kudi Yehova kupwa kwa kusal musamb a ngomb wa utad kudi in Isarel chakwel amwifukwila. Nzamb walonda anch: “Am nayiman kal antu inay abwambwil. Katat chifanyidin amwinam niyiswejina nich ujim wam ni kuyishesh! Pakwez ey nikez kakwikadish muchid ujim.”—Kub. 32:9, 10.

14. Ov, chom ik chasalay Moses pateshay mazu ma Yehova?

¹⁴ Rusangu ridandamen kulejan anch: “Moses wamwilembila [Yehova] Nzamb wend anch: ‘Ov, [Yehova,] mulong wak ujim wey wapandakana kal mwamu kuyiswejin antwey iwadiosha ku Idjibit nich usu wey ujim, ni chikas chey cha dikand? Ov, in Idjibit akulond nchik? Akulond anch: ‘Komb wayidiosha kwend mulong wa kuyisal nayimp, akayijipin mu mikandu ni kuyishesh pa mangand’? Diosh ujim wey ukash, karumun muchim wey, lik kuyimesh antwey mar. Yivurika atushalapol ey Aburaham, ni Isak, ni Isarel. Wayichipila amwiney machip anch: “Am nikez kavudish kand a majuku mend mudi atutumbu a mwiur, ni ngand yen yinalonda kal nikez kayipan ku a majuku men, nikwikal ya uswan wau wa chikupu.”’ Chad [Yehova] wakarumuna muchim, walika kuyitumin antwend mar mayimp machelay kusal.”—Kub. 32:11-14.a

15, 16. (a) Ov, chom ik chafanyidinay Moses kusal mulong wa yom yamulejay Yehova? (b) Ov, Yehova “wakarumuka muchim” mu mutapu ik?

¹⁵ Ov, Moses waswiridina chakin kamu kukarumun chitongijok cha Yehova? Bwat kamu! Ap anch Yehova walejana chadinga chisotinay kusal, dined diadingap dirumburish diend dia nsudiel. Pakwez, Yehova wading umupakin Moses, mudi mwayipakau, Filip ni mband mwin Grek kudi Yesu. Amwinkisha Moses chisu cha kumekesh rutong rend.b Yehova wamuteka Moses mudi chapakach pakach pa in Isarel ni Amwinend, ni Yehova walimisha ditenchik dined dia kumwinkish Moses mudimu winou. Ov, Moses wela kulikidil wom umukangesha? Ov, wasadina chisu chinech mulong wa kumukasikesh Yehova chakwel avuramena yisal ya in Isarel ni asala muchid wa dikand kudiokal kudi an a Moses?

¹⁶ Chakul cha Moses chamekesha ritiy ni ruchingej rend mu kutentam kwa Yehova. Yisal yend kiyamekeshap choy bwat, pakwez yamekesha kubangin dijin dia Yehova. Ndiy kasotap anch adisala. Pasalay mwamu, Moses wamekesha anch ndiy watesha “chitongijok cha [Yehova]” pa mulong winou. (1 Kor. 2:16) Ov, chom ik chashikena? Mulong Yehova kadingap ulamatina nakash ku yisal kanang, dizu diapepilau dilejen anch ndiy “wakarumuka muchim.” Mu dizu dia Hebereu, dizu dined dikutwish kurumburik kwau anch Yehova kaletap mar malejanay anch wading usotin kulet piur pa muchid wawonsu.

Yisal ya Yehova Pantaliken ni Aburaham

17. Mutapu ik wamekeshay Yehova kushimpish kukash kwa muchim pantaliken ni yadingay ni kubangin Aburaham?

¹⁷ Chilakej chikwau piur pa mutapu uyinkishinay Yehova atushalapol end chisu cha kumekesh ritiy ni ruchingej rau chimekedin mu chom chitay Aburaham mulong wa Sodom. Mu rusangu riner, Yehova wamekesha kushimpish muchim kukash kusutil ku kumulikidil Aburaham ipula yipul yivud. Pa chom chimwing, Aburaham wamulembijeka mu mutapu wamushena anch: “Chakapul chaya mwa! Kutong kusal chom mutapu winou, kujip in kutentam pamwing nau in kupengam, ov, komb mwin kutentam amurumburisha kand mudi mwin kupengam! Chakapuk chaya mwa! Ov, Nkalansambu wa mangand mawonsu kakusalap chitentamina?”—Dis. 18:22-33.

18. Ov, chom ik twilejina piur pa mutapu washakamay Yehova ni Aburaham?

¹⁸ Ov, chom ik twileja piur pa yitongijok ya Yehova, mu rusangu riner? Ov, Yehova wading nich kuswir kwa kutongijokin pamwing ni Aburaham chakwel akwata mupak utentamina? Bwat kwau. Pakwez, Yehova wela kulejan kwend kusu kudiosh kwinsambishil mayingish ma mupak wend. Pakwez, kusutil ku yipul yiney, Yehova wamwinkisha Aburaham chisu cha kwitiy mupak wend ni kutesh chitongijok Chend. Chinech chasala kand anch Aburaham atesha ukash wa riy ni kutentam kwa Yehova. Mwaning, Yehova washakama ni Aburaham mudi murund nend.—Isay 41:8; Jak. 2:23.

Malejan Kudi Etu

19. Ov, mutapu ik tukutwisha kumwimburij Job?

¹⁹ Ov, chom ik twileja kal piur pa “chitongijok cha [Yehova]”? Tufanyidin kulikidil Dizu dia Nzamb kuwapish mutapu wetu wa kutesh yitongijok ya Yehova. Tufanyidinap dichuku ap dimwing kumutekin Yehova mipak yetu ni kumurumburish nich yijil ni yitongijok yetu. Job walonda anch: “[Nzamb] kadap muntu mudi am, chakwel nikutwish kumwakul, ap kuya nend ku dirumburish.” (Job 9:32) Mudi Job, anch twasambish kutesh yitongijok ya Yehova, tufanyidin kulond mu mutapu wamushena anch: “Yom yiney yawonsu yidi kusu kachikunku ka midimu yend, niyetu tukat kutesh ching kusu mu kayauyau. Ov, nany ukutwisha kujingunin dikand dia Nzamb?”—Job 26:14.

20. Ov, chom ik tufanyidina kusal anch tuteshinap verse umwing wa Bibil utukasikedina kutesh?

²⁰ Pitutangina Bibil, ov, chom ik tufanyidina kusal anch twatan verse ukasikena kutesh, pakampwil pantaliken nich yitongijok ya Yehova? Anch tuteshinap kupwa kwa kukimbijol piur pa mulong utwakad kutesh nawamp, tukutwish kuman chinech mudi kupak kwa ritiy retu mudiay Yehova. Vurik anch, yisu yimwing mazu makwau makutwish kutwinkish chisu cha kumekesh ritiy retu mu ngikadil ya Yehova. Itiyijany amboku nich kwitudish anch twijap nawamp yom yawonsu yisadinay. (Mul. 11:5) Chawiy lel, tukwez kwitiy swaa mazu minam ma kambuy Paul anch: “A, kujimb kwa rupit ni chiyul ni ronganyin ra Nzamb! Dirumburish diend diakad kwijikan ni jinjil jend jakad kurumburik kudi antu! Nany wijikap kal chiyul cha [Yehova]? Nany wijikap kal mwin kumuyul? Ap nany wasambilap kal kupan kudi ndiy, ni panyim ndiy wachirish kand kudiay ndiy? Mulong yom yawonsu yadiokala kudi ndiy, yiding mwindiy, ni kwinsudiel kwau kuding kudiay ndiy. Uyaj wikala kudiay ndiy chikupu. Amen.”—Rom 11:33-36, TMK.

[Mazu madia kwishin kwa paj]

Ov, Uvurikin?

• Ov, chom ik chikeza katukwash chakwel twipuka chibachikin cha kumurumburish Yehova kusutil yijil yetu ayinetu?

• Ov, Mutapu ik kutesh yisal ya Yesu kutukwashin kwikal nich ‘Urund nend [Yehova]’?

• Ov, malejan ik wileja kal kusutil mambamb ma Yehova nenday Moses ni Aburaham?

[Yipich yidia pa paj wa 13]

Ov, chom ik twilejina piur pa chitongijok cha Yehova mu mutapu wend wa kushakam ni Moses kupwa ni Aburaham?