Ov, Ukat Kusambelang Kuyilimish Ambay Ney Akaritiy?

“Katijanany amwing ni akwau mudi mufanyidinau akadivar kukatijan. Chifanyidin kukasikesh kulimishijan amwing ni akwau.”—ROM 12:10.

1, 2. (a) Ov, chiyul ik chapanay Paul mu mukand wend wayifundinay in Rom? (b) Ov, chipul ik tukeza kushinshikin?

MU MUKAND wend wayifundinay in Rom, kambuy Paul wakasikeshina mutapu chidia cha usey kudi etu in Kristu kumekesh rukat mu chikumangen. Ndiy utuvurishin anch rukat retu rifanyidin kwikal “rakad kubabek.” Wisambidin kand piur pa “kukatijan [kwa] akadivar” ni ulejen anch rukat riner chifanyidin kurimekesh nich “kukatijan.”—Rom 12:9, 10a TMK.

² Chakin kamu, kwikal nich rukat ra ukadivar kwitin yom yivud pa ndond pa kumekesh ching kusu yovil ya chirungul pantaliken ni antu akwau. Yovil yiney chifanyidin kuyimekesh mu yisal. Chawiy lel, kwikil muntu ukeza kwijik rukat retu ni ranaken ching anch twayimekesh mu mutapu kanang. Chawiy Paul upanin kand chiyul anch: “Chifanyidin kukasikesh kulimishijan amwing ni akwau.” (Rom 12:10b) Ov, chom ik chitinau mu kulimishijan? Ov, mulong wak chidi cha usey kusambelang kuyilimish ambay netu akaritiy? Ov, mutapu ik tukutwisha kusal mwamu?

Katumb ni Kalimish

3. Ov, dizu “katumb” dirumburikin chom ik mu dizu dia kusambish dia Bibil?

³ Dizu dia Hebereu “katumb” dirumburikin “kulim.” Muntu ulimishinau udi muntu umenau anch ulimina ap ukwet usey nakash. Dizu dined dia Hebereu adikarumwin kand mu Bibil anch “katumb,” ni kumekesh kalimish kapaninau kudi muntu utumbishinau. (Dis. 45:13) Dizu dia Grek dikarumwinau anch “katumb” mu Bibil dimekeshin kulimish ap usey. (Luka 14:10) Mwaning, antu tulimishina akwet usey kud etu.

4, 5. Ov, mutapu ik kufanikena kumekesh katumb ni kwikal nich kalimish? Let chilakej.

⁴ Ov,chitin ik mu kuyitumbish antu akwau? Kukat kusambishang nich kalimish. Pakwez, mazu “katumb” ni “kalimish” akat kumasadin pamwing yisu yivud mulong malejen chom chimwing. Katumb kudi kumekesh, ap kumekesh kalimish patok. Mutapu ukwau, dizu kalimish dimekeshin chakusambish mutapu tuyimena akadivar netu pakwez katumb kamekeshin yitukutwisha kumusadin mukadivar netu.

⁵ Ov, mutapu ik ukutwishay mwin Kristu kumekesh katumb kakin pantaliken ni ambay akaritiy anch kakatap kuyilimish ni muchim umwing? (3 Yoh. 9, 10) Mudi mutond ukata kukul ni kulab ching anch mij yend yidi mu divu diwamp, chawiy lel katumb kutwish kwikal kakin ni kalabina ching anch kakwet mij mu kalimish kadiokila ku muchim. Chawiy lel katumb ka makasu kakutwishap kukul nich kalimish kakin, pakwez kakez kushadik pakad kulab ap mu machuku ma kurutu. Chidiap chom chishimokishina anch Paul wasambisha kupan chiyul chend palonday patok anch: “Rukat rikala rakad kubabek.”—Rom 12:9, TMK; tang 1 Pita 1:22.

Yilimishany Antu Atangau “mu Chifu Cha Nzamb”

6, 7. Ov, mulong wak tufanyidin kuyilimish antu akwau?

⁶ Mulong kwikal nich kalimish kadiokila ku muchim yidi nfungul ya kumekesh katum, tufanyidinap dichuku ap dimwing kuvuramen mayingish ma Bibil tukweta ma kuyilimish akadivar netu awonsu. Pakwez, shinshikinany amboku mayingish maad pakach pa mayingish minam.

⁷ Chinyim ni yitang yikwau yidia pa divu, antu ayitanga “mu chifu cha Nzamb.” (Jak. 3:9, TMK) Chawiy chisadina anch twikala nich ngikadil ya Nzamb mudi rukat, manangu, ni kutentam. Tal yom yikwau twatambul kudi Sakatang wetu. Nfund a kusend ulondin anch: “A! [Yehova] . . . , dijin diey aditumbishil kal pa mangand mawonsu. . . . Pakwez yey wamutanga muntu kwishin kwa angel ching pakemp kusu, ni kumudjik chibangul ni uyaj ni kulim.” (Kus. 8:1, 4, 5; 104:1)a Antu avud akat kuyidjikang yibangul ap kuyiwapish, kudi Nzamb nich kalimish, ni katumb. Chawiy lel, pitukata kumulimish muntu mukwau, tukat kwitiyij Musul wa katumb ka muntu, Yehova. Katat, anch tukwet mayingish makin mulong wa kuyilimish antu, tufanyidin komb kuyilimish akadivar netu akaritiy!—Yoh. 3:16; Gal. 6:10.

Yid ya Dijuku Dimwing

8, 9. Ov, mayingish ik misambidinay Paul piur pa kuyilimish ambay akaritiy?

⁸ Diyingish dikwau ditufanyidina kuyilimish antu akwau adilejen kudiay Paul. Kurutu kwa kulet chiyul chend pa mutapu wa kumekesh kalimish ulondin anch: “Katijanany amwing ni akwau mudi mufanyidinau akadivar kukatijan.” Dizu dia Grek dikarumwinau “Kukatijan” disambidin moj ukash unungina dijuku mu rukat ni kukwashijan. Chawiy lel pasadinay dizu dined Paul ulejen anch urund udia mu chikumangen ufanyidin kwikal ukash wa rukat mudi dijuku didia mu umwing. (Rom 12:5) Chikwau kand, vurik mazu mafunday Paul kudi in Kristu azizidilau many, awonsu ayisenda mudi an kudi Tatuku umwing Yehova. Chawiy lel, chirumburikin chakin kamu anch awiy asala dijiku dimwing. In Kristu azizidilau many a mu chirung cha Paul ading chakin kamu ni diyingish dikash dia kulimishijan umwing ni mukwau. Chidi chilik chimwing ni in kristu azizidilau many adiaku nlel unou.

⁹ Ov, chidi nchik piur pa “amikoku akwau”? (Yoh. 10:16) Ap anch kand kal ayisenda mudi an a Nzamb, akutwish chakin kamu kutazukijan umwing ni mukwau anch mukadivar ni nambaz mulong asadin dijuku dia in Kristu didia mu uumwing pa mangand mawonsu. (1 Pita 2:17; 5:9) Chawiy lel, anch amikok akwau asangaredin yikatau kulond pasadidilau mazu “mukadivar” ap “nambaz,” niyawiy akwet diyingish dikash dia kumekesh kalimish nich muchim umwing pantaliken ni ambay nau akaritiy.—Tang 1 Pita 3:8.

Ov, Mulong Wak Kumekesh Katumb Kudi Kwa Usey Nakash?

10, 11. Ov, mulong wak kumekesh kalimish ni katumb chidi cha usey nakash?

¹⁰ Mulong wak chidi cha usey kumekesh kalimish ni katumb? Diyingish diawiy ed: Kusutil ku kuyilimish akadivar ni anambaz netu, tukez kukasikesh ukash ni uumwing wa chikumangen chawonsu.

¹¹ Chawiy lel, twij kal katat anch kwikal nich urund wa piswimp ni Yehova ni kutambul ukwash wa spiritu wend yidi misul yikash kudiokila usu utukweta mudi in Kristu akin. (Kus. 36:7; Yoh. 14:26) Pa chisu chimwing, anch ambay netu akaritiy amekesh anch atusangaredin, chinech chikat kutukasikesh. (Jinsw. 25:11) Akat kutukasikesh kusutil mazu makashinsh mamekeshina anch atusangaredin ni kutulimish. Chinech chitwinkishin kand usu ukwau wa kudandamen kwend nich musangar ni kujijaman mwinjil ya mwom. Yovil yiney yakushikenap kal kamu ni yey chakin kamu.

12. Ov, mutapu ik ukutwishay muntu ni muntu pakach petu kukasish mwikadil wa chirunguk ni rukat mu chikumangen?

¹² Katat, mulong Yehova wij maswir metu ma chivadik ma kutambul kalimish, kusutil Dizu diend utukasikeshin nawamp anch “chifanyidin kukasikesh kulimishijan amwing ni akwau.” (Rom 12:10; tang Mateu 7:12.) In Kristu awonsu alamina mu muchim chiyul chinech cha machuku mawonsu akat kukasikesh mwikadil wa chirungul ni wa rukat mu ukadivar wa win Kristu. Chawiy lel, chiwapidil kutongijok ni kwiyipul ayinetu anch, ‘Ov, pa chisu ik cha nsudiel nalonda mazu ni kusal yom yidiokila mu muchim yimekeshina kalimish pantaliken ni mukadivar ap nambaz mu chikumangen?’—Rom 13:8.

Etwawonsu Tufanyidin Kulimishijan

13. (a) Ov, nany ufanyidin kusambel kumekesh kalimish? (b) Ov, mazu ma Paul mafunday mu Rom 1:7 mamekeshin chom ik?

¹³ Ov, nany ufanyidin kusambel kumekesh kalimish? Mu mukand wayifundinay in Hebereu, Paul wisambidina piur pa amakurump in Kristu mudi “in kutakel en.” (Heb. 13:17) Chakin kamu, amakurump akat kutakelang mu mijikit yivud. Chikwau kand, atufung a amikoku, afanyidin kuyitakel nich kalimish ambay nau akaritiy—ni ambay nau amakurump. Chawiy lel, pakatau amakurump kushinshikin maswir ma muspiritu ma chikumangen, akat kulimishijan umwing ni mukwau kusutil ku kutesh yilondinau ambay nau amakurump. Chikwau kand, amekeshin kalimish kusutil ku kwitiyij yitongijok ni yilondinau amakurump awonsu pakatau kukwat yiyul. (Mid. 15:6-15) Tufanyidin kuvurik anch, ap anch mukand wa Paul wayifundinay in Rom kayituminap ching kusu amakurump pakwez watumina chikumangen chawonsu. (Rom 1:7) Chawiy lel, chiyul cha kusambel kumekesh kalimish, etwawonsu nlel unou tufanyidin kuchisadil.

14. (a) Let chilakej piur pa kushalijan kwa kumekesh kalimish ni kusambel kukamekesh. (b) Ov, chipul ik chitufanyidina kwiyipul ayinetu?

¹⁴ Talany kand mwikadil ukwau wa chiyul cha Paul. Ndiy wayibabesha ambay nend a mu ritiy in Rom anch kafanyidinap kumekesh ching kusu kalimish pakwez afanyidin kusambel kumekesh kalimish. Ov, mulong wak kudi kushalijan pakach pa kumekesh kalimish ni kusambel kukamekesh? Tongin bil pa chilakej chinech. Ov, mulej ukutwish kuchikasikesh chisak cha in kwilej a shikol chakwel ileja kutang? Bwat. Mulong awiy ij kwau kutang. Pakwez, mulej ukusot kuyikwash in kwilej a shikol chakwel atanga nawamp. Chilik chimwing, kukatijan umwing ni mukwau, kukez kutubachik kulimishijan umwing ni mukwau, chawiy chidinga chijingidij cha kuyijingunin in Kristu akin. (Yoh. 13:35) Pakwez, mudi mukatay mwin kwilej kuya kurutu kusutil ku kukasikesh ukaliweny wend wa kutang, chawiy niyetu tukutwish kuya kurutu mu kusambel kumekesh kalimish. (1 Tes. 4:9, 10) Mudimu winou wa kusambel kumekesh kalimish aupanin kudi muntu ni muntu pakach petu. Tufanyidin kwiyipul ayinetu anch, ‘Ov, chawiy nisadina am—ov, nikwatining mupak wa kuyilimish antu akwau adia mu chikumangen?’

Mulimishany “Kazwendj”

15, 16. (a) Pitumekeshina kalimish, ov tufanyidinap kumuvuramen nany, ni mulong wak? (b) Ov, chom ik chikutwisha kumekesh anch tukwet kalimish kadiokila mu muchim pantaliken ni akadivar ni anambaz etu awonsu?

¹⁵ Pitumekeshina kalimish, ov, tufanyidinap kuvuramen nany mu chikumangen? Dizu dia Nzamb dilondin anch: “Mwin kumwovil kazwendj riy ukat kumusondjik [Yehova], ni [Yehova] ukez kamuchirishin.” (Jinsw. 19:17) Ov, mutapu ik chitukwashin chiyul chidia mu mazu minam pitukata kwikasikesh kusambel kumekesh kalimish?

¹⁶ Ukez kwitiyij anch antu avud asadin usu wa kuyilimish amakurump au, pakwez antu awiy kand amwing akutwish kushakam pakad kalimish ni antu amenau anch adi mwishin mwau. Pakwez, Yehova kadingap mwamu. Ndiy ulondin anch: “Awiy akwinlimisha am niyam nikuyilimish.” (1 Sam. 2:30; Kus. 113:5-7) Yehova uyilimishin antu awonsu amusadidila ni amulimishina ndiy. Ndiy kakatap kumuvuramen “kazwendj.” (Tang Isay 57:15; 2 Jsng. 16:9) Chakin kamu, tusotin kumwimburij Yehova. Chawiy lel, anch tusotin kwijik mutapu tukutwisha kumekesh kalimish kakin, chiwapidil kwiyipul ayinetu anch, ‘Mutapu ik nikutwisha kushakam ni antu akad katumb, akad yisend mu chikumangen?’ (Yoh. 13:14, 15) Chakul ku chipul chinech chimekeshin yom yivud piur pa chilik cha kalimish kadiokila mu muchim tukweta pantaliken ni antu akwau.—Tang Filip 2:3, 4.

Mekeshany Kalimish Kusutil ku Kupan Chisu Chetu

17. Ov, mu mutapu ik ukash mutukutwisha kusambel kuyilimish antu?, ni mulong chifanyidin kusal mwamu?

¹⁷ Ov, wisu mutapu ujim nakash tukutwisha kusambel kuyilimish antu awonsu adia mu chikumangen? Kusutil ku kupan chisu chetu kudi antu akwau. Ov, mulong wa chidi mwamu? Etu in Kristu, tukwet yom yivud ya kusal, ni kwipan mu mijikit yivud yidia ya usey mu chikumangen kusendin chisu chetu chawonsu. Pakwez, chidap chom chishimokishina, mulong twij anch chisu chidi cha usey nakash. Twij kand anch, tufanyidinap kuchingejin anch akadivar ni anambaz netu atwinkisha chisu chau kupandakanamu uvud wa chisu ukutwisha kwikal nich. Chilik chimwing, tukez kusanger pakezau antu akwau adia mu chikumangen kwijik anch kafanyidinap kutwit chisu chilemp kupandakanamu uvud wa yisu utukutwisha kwikal nich.

18. Mudi mulejenau pa chipich chidia pa paj wa 18, ov, mutapu ik tukutwisha kumekesh rusot retu ra kupan chisu chimwing kudi ambay netu akaritiy?

¹⁸ Pakwez, niyetu twij anch (pakampwil antu adia pakach petu asadina mudi atufung mu chikumangen) rusot retu ra kwimik mijikit yetu mulong wa kupan yisu yimwing kudi ambay netu akaritiy kumekeshin anch tukat kuyilimish. Ov, mutapu ik? Kusutil ku kwimik mijikit yetu mulong wa kupan chisu tukweta kudi akadivar netu, kurumburikin anch tuyilejin anch, ‘Ukwetany usey nakash ku mes mam, chawiy lel chidi cha usey nakash kudi am kusutish chisu kanang pamwing ni yeyey pa ndond pa kudandamen kusal yinikata kusal.’ (Mar. 6:30-34) Chinyim nich chinech chidi kand chakin. Anch tusotinap kwimik mijikit yetu mulong wa kupan chisu tukweta kudi mukadivar netu, tukutwish kumwovish anch ndiy kakwetap usey kudi etu. Chakin kamu, choviken anch kuding yisu yikwau milong yikutwisha kumekan anch yiney yidi ya kusal swaa ni chifanyidinap kuyimik. Chikwau kand, kusot kwetu—ap kulik kwetu—kupan chisu chimwing pakach pa chisu tukweta kudi antu akwau yikutwish kumekesh ukash wa kalimish tukweta mu muchim wetu pantaliken ni akadivar ni anambaz netu.—1 Kor. 10:24.

Dandamenany Kusambel Kumekesh Kalimish

19. Kupwa kwa kupan chisu chetu, ov, mutapu ik tukutwisha kuyilimish ambay netu akaritiy?

¹⁹ Kudi kand mitapu yikwau ya usey tukutwisha kumekeshin kalimish kudi ambay netu akaritiy. Chawiy lel, pituyinkishina chisu chetu, tufanyidin kand kuyibangin. Chikwau kand, Yehova utwinkishin chilakej. Nfund a kuseng David ulondin anch: “Mes ma [Yehova] madi padi in kutentam, ni matu mend manzurikin ku kudil kwau.” (Kus. 34:15, TMK) Tusadin usu wa kumwimburij Yehova kusutil ku kuyital ni kuyitesh—kuyibangin nakash—akadivar netu, pakampwil antu itina chakwel tuyikwasha. Anch twasal mwamu, tuyilimishin.

20. Ov, yiyul ik yitusotina kulam mu manangu piur pa kumekesh kalimish?

²⁰ Mudi kamu mutapu twashinshikinang, tusotin kulam nawamp mu manangu diyingish ditukasikeshina kuyilimish ambay netu akaritiy nich muchim umwing. Chikwau kand, tukez kukimb yisu ya kwikal akusambish kuyilimish antu awonsu, kuwejaku ni atuzwendj. Mu kusal mwamu, tukez kakasikesh moj wa rukat ra ukadivar ni uumwing wa chikumangen. Pakwez, tudandamenany etwawonsu, pikil ching kusu kumekesh kalimish pakwez kusambel mu kumekesh kalimish umwing ni mukwau. Ov, wakwatin kal mupak wa kusal mwamu?

[Dizu didia kwishin kwa paj]

Ov, Uvurikin?

• Ov, mutapu ik ufanikena katumb ni kalimish?

• Ov, mayingish ik tukweta mulong wa kuyilimish ambay netu akaritiy?

• Ov, mulong wak chidi cha usey kulimishijan umwing ni mukwau?

• Ov, mu jinjil ik tukutwisha kuyilimish ambay netu akaritiy?